Elize ya naxhugoshɔ wa tɛgɛ
4
Ayiwa, caŋa ka Kilɛ tudunmɔɔ pu pinnɛgɛ ki tudunmɔ wa wo shɔ ya pa shɛ Elize yíri, na shɛ wu ɲɛɛri, na jo: «Nɛ poo we, ma kapyebye we, wʼa xu. Ma dʼa li cɛ na wu bi fyagi Tɛhɛnɛ Baa Kilɛ na. Ga foo fɔɔ wʼa pa di ba na nɔhɔpigee shuun wu co di zhɛ bye wu buloo.» 2 A Elize di jo: «Ma funŋɔ di ɲɛ nɛ wu lekɛ pye ma mu wɛ? Ɲaha ki wa ma kaban ki ni wɛ?» A cee wu jo: «Nɛ wemu wu ɲɛ ma kapyebyezhɔ wu ge, yaaga katii ɲɛ nige nɛ mu puga na ye sìnmɛ shɔrɔ yɛ na wɛ.» 3 Ayiwa, a Elize di jo: «Foro kakuu wu ni, mʼa yɛrɛyɛ niwaya sha ɲɛɛri ma tiinɲii pu bɛɛri mu, ma niɲɛhɛyɛ sha ɲɛɛri pu mu! 4 Ma ba shɛ guri pa, mʼa gbura ki tɔ wá ma ni ma jalaa pu na, mʼa sinmɛ pu kaaŋa le yee yɛrɛyɛ yi ni. Ka bu ɲi, mʼa kee ɲɛri kabanugo.» 5 Ba cee wʼa laha Elize tàan wɛ, na shɛ li pye mu. A wu shɛ wu gbura ki tɔ wà wu ni wu jalaa pu na. A jalaa pʼi ganha na yɛrɛyɛ yi kaan wu mu, wʼi sìnmɛ pu leni yi ni. 6 Ba yɛrɛyɛ yʼa pa ɲi wɛ, a cee wu ja wa pye: «Pa ni yaaga ka bɛ ni.» Ga a jafɔɔ wu wu pye: «Yaaga ka ɲɛ nige wɛ.» Ayiwa, a sìnmɛ pʼi yere. 7 A cee wu shɛ yee bɛɛri paari Kilɛ wo ná wu mu. A wee di jo: «Shɛ sìnmɛ pu pɛrɛ, mʼa shɛ ma foo li tɔ. Lemu bu gori, ma ni ma jalaa pu ni, yi na da lee li.»Shunɛmu shɛn cee wu ja we
8 Caŋa ka Elize ya toro Shunɛmu kulo li ni. Cee yara fɔɔ wa bye wà, a wee di Elize kemɛ ɲɛɛri na fo wu li wee puga. Na lɔ kee caŋa ki na a Elize di bye wu ba doroo tuun bɛɛri, wʼa jé wee cee wu puga na li. 9 A wee cee wu wu poo wu pye: «Nɛ li cɛ jo ná wemu wʼa ma tuun bɛɛri wèe puga ge, Kilɛ wo fɛfɛɛrɛ sipya wa wu ɲɛ wii. 10 Ma bu sɔɔ, wù pufɛnhɛfɛnhɛnɛ la yereŋɛ kataŋa ki na, lee di bye wu tasinnɛgɛ, wù kajaŋa ka yaha wà, ni tabali, ni yatɛɛngɛ, ni sokinna. Wu ba ba wù puga tuun wemu ni, wu na ba jé wà.»
11 Caŋa ka, a Elize di ba shɛ pu mu, a wu shɛ jé kee kataŋa puga ki ni, na sinnɛ. 12 A wu yi jo wu kapyebye Gexhazi mu na: «We Shunɛmu shɛn cee we yiri pa.» A Gexhazi di wu yiri, a wu shɛ Elize yíri. 13 A Elize di yi jo Gexhazi mu na: «Yi jo wu mu na wʼa wèe co saama na, nimɛ wù ɲaha pye wu mu wɛ? Wù jo ni saan wu ni kelee ni kashɛn kuruyo yi ɲuŋɔfɔɔ wu ni wu keree na ya?» A cee wu jo: «Nɛ ɲɛ ɲaɲiŋɛ na na sipyii pu tɛ ni.» 14 A Elize di jo: «Wù ɲaha pye wu mu wɛ?» A Gexhazi di jo: «Pya ɲɛ wu mu wɛ, wu poo wu bɛ dʼa lɛ.» 15 A Elize di wu pye: «Wu yiri pa.» A Gexhazi di wu yiri, a wu ba yere kuɲɔɔ li ɲɔ na. 16 A Elize di wu pye: «Yee la nimɛtashiin ni ma da ba ja ta.» A cee wu jo: «Ahayi, na kafɔɔ, Kilɛ wo ná we, ma ganha bu na faana wɛ, nɛ wemu wu ɲɛ ma kapyebyezhɔ wu ge.» 17 A wee cee wu yere yacɛrɛ na. Ba yee lʼa maha círi wɛ, a wu ja se na saha ni Elize wo jomɔ pu ni.
18 Pya wʼa pa lɛ ge, caŋa ka a wu ba shɛ wu to wu yíri shinmakɔɔn pu yíri, 19 na wu to wu pye: «Na ɲuŋɔ! Na ɲuŋɔ!» A tofɔɔ wu kapyebye wu pye: «Shɛ wu kan wu nu wu mu.» 20 A kapyebye wu shɛ ni funana li ni, na shɛ li kan li nu wu mu, a pya wu nizinnɛgɛ di bye wu nu wu tɔɔyɔ yi na, fo na shɛ caŋa ki wɛrɛŋɛ, a wu xhu. 21 Wee tuun wu ni a cee wu dugi ni pya wu ni, na shɛ wu sinniŋɛ Kilɛ wo ná wu kajaŋa ki na, na kuɲɔɔ li tɔ na foro. 22 A wu wu poo wu yiri na wu pye: «Nʼa ma ɲɛɛri ma kapyebye wa ni kafazhɔ ka kan pa na mu naha, nʼa da zhɛ tɔvuyo na Kilɛ wo ná wu mu, di guri ba.» 23 A wu poo wu wu yege: «Mʼa giin mʼa shɛ wee mu niɲaa ya? Niɲaa ɲɛ yevoŋɔ kelee cadɛɛngɛ wɛ.» A cee wu jo: «Ma ganha ba ma funŋɔ shaa lee na wɛ.» 24 Lee kadugo na, a wu pu pye pʼa kafazhɔ wu pɔ, na wu kapyebye wu pye: «Pa kafazhɔ wu ɲaha co, wù da se. Ma ganha bu yere ni na ni koo na, na ta di ya jo mu wɛ.»
25 A cee wu gari mu, na shɛ Kilɛ wo ná wu ta Karimɛli faaboboŋɔ ki na. Ba Kilɛ wo ná wʼa wu ɲa taliige ni wɛ, na wu kapyebye Gexhazi pye: «Shunɛmu shɛn cee wu we! 26 Nʼa ma ɲɛɛri, paa shɛ wu ɲuŋɔ círi nimɛ, mʼa wu pye: ‹Mʼa cuuŋɔ ya? Ma poo wu do wà? Pya wu do wà?› » A cee wu jo: «Pʼa cuuŋɔ.» 27 Ba wʼa nɔ yɛ Kilɛ wo ná wu na faaboboŋɔ ki na wɛ, na ná wu tɔɔyɔ yi co. A Gexhazi di fulo wu na, na giin di wu kuruŋɔ kadugo, ga a Kilɛ wo ná wu jo: «Wu yaha wà, bani wu zɔ wʼa tanha. Tɛhɛnɛ Baa Kilɛ ya li ŋmɔhɔ nɛ na, wu ya ta li jo nɛ mu wɛ.» 28 A cee wu jo: «Ta nɛ ja ɲɛɛri ma mu ya, na kafɔɔ we? Ta nɛ ma pye jo ma ganha bu na faanna-ɛ wɛ?»
29 A Elize di Gexhazi pye: «Kirige taga mayɛ pɔa, mʼa na pubiin li lɔ, ma da se. Ma bu shɛ jiri wa na, ma ganha bu wufɔɔ shaari wɛ. Wa bɛ shiin bu ma shaari, ma ganha bu wu fò wu shɔ wɛ. Mʼa shɛ na pubiin li taha funana li ɲaha ki na.» 30 A funana li nu wu jo: «Tɛhɛnɛ Baa Kilɛ ɲìi wo wu mɛgɛ na, ni mayɛ pyaa ki bɛ mɛgɛ na, nʼa da ga laha ma na wɛ!» A Elize di yìri, na binnɛ ni wu ni. 31 Lee bi Gexhazi ta wʼa toro pu ɲaha na, na shɛ pubiin li taha funana li ɲaha ki na. Ga mujuu ya foro wɛ, yaaga bɛ ya pye wɛ. A wu guri na ba jiri Elize na, na wu pye: «Pya wu ya ta ɲɛ-ɛ dɛ!»
Elize ya funana li ɲɛ
32 Tuun wemu ni Elize ya jé puga ki ni ge, na pya wu nixhugo nizinnɛgɛ ki ta wu kajaŋa ki na, 33 a wu jé na kuɲɔɔ li tɔ wá wuyɛ pyaa ni pya wu na, na Tɛhɛnɛ Baa Kilɛ ɲɛɛri. 34 Lee kadugo na, a wu dugi kajaŋa ki na, na sinnɛ sanhana pya wu na, na wu ɲɔ ki saha ni pya wu ɲɔ ki ni, na wu ɲaha ki le wu ɲaha ki ni, na wu keye yi taha wu keye yi na, na sinnɛ sanhana pya wu na. A pya wu ceesɛɛgɛ kʼi ɲɔ kɔn na wɛrɛŋɛ. 35 A Elize di digi puga ki ni, na ɲaari ɲaari ki ni. Lee kadugo na, a wu dugi na sinnɛ sanhana pya wu na sanha. Wee tuun wu ni a pya wu ciriŋɛɛ gbarashuun cìri na ɲìi ki mugi. 36 A Elize di Gexhazi yiri, na wu pye: «Shunɛmu shɛn cee wu yiri pa.» A Gexhazi di wu yiri, a wu ba Elize yíri, a Elize di wu pye: «Ma ja wu lɔ.» 37 A cee wu fulo na nuguro sin Elize fɛɛ ni, fo na shɛ wu gbaa le nɔri ɲiŋɛ ki na, lee kadugo na a wu wu ja wu lɔ, na foro.
Elize ya baha ɲɛri yalige
38 Lee kadugo na, a Elize di guri pa Giligali ni. Lee bi xuugo ka ta kʼa jé fiige ki ni. Tuun wemu ni Kilɛ tudunmɔɔ pu pinnɛgɛ kʼa pa diin Elize tàan ge, a wu wu kapyebye wu pye: «Shɔgbɔɔ li taha, mʼa yalige ka shɔhɔ Kilɛ tudunmɔɔ pu mu.» 39 A pu shɛn nigin wa di foro kari sige ki ni di zhɛ shiga yaara ta sha. A wu shɛ saha ni nagoo tige ka ni sige wo ɛrɛzɛn tiire ta ni, na kee wo yasɛyɛ yi kɔn na taga wu fageŋɛ ki ɲi na pa. Ba wʼa pa nɔ ni yi ni wɛ, na yi cere cere na le shɔɔ li ni, bani sipya bi yi tuugo cɛ wɛ. 40 A pʼi ba yalige ki wolo na kan pee namaa pu mu. Ga ba pʼa ki ɲɔ kɔn na li wɛ, na mujoŋɔɔ wá na: «Baha wu wa shɔɔ li funŋɔ ni dɛ, Kilɛ wo ná we!» Pu ya já ki li wɛ. 41 A Elize di jo: «Yi pa ni myɛ pa ni!» A wu pee pa le shɔɔ li ni, na jo: «Pii sipyii pii kan pʼi li.» Yapege ya ɲa nige shɔɔ li funŋɔ ki ni wɛ.
Buuri wʼa ɲɛri ɲɛhɛ
42 Ayiwa, caŋa ka ná wa ya pa ba na yìri Baali-Shalisha ni, na ba ni ɔrijɛ shinmafomɔ wu buuri ɲuyɔ kɛlɛɛ shuun (20), ni shinma kaya niburiye ya ni wu bɔri wu ni, na pa gan Elize mu, Kilɛ wo ná we. A wee di wu kapyebye wu pye: We buuri we kan sipyii pu mu, pʼi wu li. 43 A wu kapyebye wu wu pye: «Dii nʼa da já we kan pii sipyii xhuu nigin (100) we mu wɛ?» Ga a Elize di wu pye: Wu kan pu mu, pʼi wu li ; Bani Tɛhɛnɛ Baa Kilɛ ya jo na: pʼa da ba li na wusama yaha bɛ. 44 A Gexhazi di wu yereŋɛ sipyii pu tàan, a pʼi li, a wusama di gori na saha ni Tɛhɛnɛ Baa Kilɛ wu jomɔ pu ni.