2 Saannaa 5

Elize ni Aramu shɛɛn Naama

Aramu fiige ki kashɛn keŋɛ ki ɲuŋɔfɔɔ Naama bye sipyigbɔ saan wu kpuun li na. Wu kaa bi dan wu kafɔɔ wu ni, Tɛhɛnɛ Baa Kilɛ bi setaara kan Aramu fiige ki mu wee keŋɛ fɛni. Naŋmere lowaa fɔɔ wa wu bye wii, ga togo di bye wu na.

2 Aramu fiige ki kashɛnŋmuu pʼa pa sipyii pii co bulooro na, kashɛn ka ni, na fucɛɛrɛ la co Izirayɛli wo koomɔ pu ni, lee lʼa bye Naama shɔ wu kapyebye we. 3 A wee di ba wu kafɔɔ wu shɔ wu pye caŋa ka na: «Nɛ kafɔɔ wu da bi da já zhɛ Samari kulo li Kilɛ tudunmɔ wu ɲa, wee bi da wu togo ki xɔ.» 4 A Naama di shɛ lee kafonɔ li jo wu kafɔɔ wu mu na: «Izirayɛli shɛɛn pu poro wʼa ye ni ye jo.» 5 A Aramu fiige ki saan wu wu ɲɔ shɔ na: «Ma na já zhɛ Samari ni, nʼa da kama wɛŋɛ ka tun Izirayɛli saan wu mu.»

A Naama di gari ni warifyɛn kiloo xhuu taanri (300), ni sanni kiloo kɛlɛɛ gbarashuun (60) ni, ni fadeye kɛ. 6 A Naama di shɛ kee kama wɛŋɛ ki kan Izirayɛli saan wu mu, ki funŋɔ jomɔ pu bye na: «Ma bu ke kama wɛŋɛ ke ta, mʼa li cɛ na nɛ wʼa na kapyebye Naama tun ma mu, jo ma wu togo ki xɔ.» 7 Tuun wemu ni Izirayɛli saan wʼa kee kama wɛŋɛ ki kalaa ge, na wu fàya shɛɛngi, na jo: «Ta nɛ wu ɲɛ Kilɛ na sipyii xuli, kelee na shi leni wa ni fo Aramu fiige ki saan wu na we yaha pa nɛ mu, na nɛ wu wu togo ki xɔ? Yi wii, wʼa na ɲɔ coni kɔnhɔ wu dun ni na ni.»

8 Ba Kilɛ wo ná Elize ya yi logo na Izirayɛli saan wʼa wu fàya shɛɛngi wɛ, a wu tuduro yaha shɛ yi jo wu mu na: «Ɲaha na mʼa ma fàya yi shɛɛngi wɛ? Naama yaha pa na mu naha, wu na ba li cɛ na Kilɛ tudunmɔ ɲɛ naha Izirayɛli ni.»

9 A Naama ni wu shɔnyɔ yi ni wu wotoriyo yʼi nɔ Elize kuɲɔɔ li ɲɔ ki na, na yere. 10 A Elize di tudunmɔ wa yaha shɛ yi jo Naama mu na: «Shɛ wuu Zhurudɛn gba lɔhɔ ki ni tɔɔɲii gbarashuun, ma ceesɛɛgɛ ki na ba juuŋɔ, mʼa ɲɛri pye fɛfɛɛrɛ fɔɔ.» 11 A Naama loyire wo di gari, na jo: «Nɛ bi nayɛ funŋɔ kɔɔn jo Kilɛ Tudunmɔ wuyɛ pyaa kʼa da ba foro wu nɛ ɲuŋɔ círi wu yere nɛ tàan, wu Tɛhɛnɛ Baa Kilɛ, wu Kilɛ wu ɲɛɛri, wu wu keŋɛ ki figi figi yama pu ɲuɲɔ na, wu nɛ togo ki xɔ. 12 Damasi wo gba lɔhɔyɔ ye Abana ni Paripari, ta yee ya pɔrɔ Izirayɛli lɔhɔ ki bɛɛri na wɛ? Ta nɛ bi da já wuu yee ni, di nayɛ pye fɛfɛɛrɛ fɔɔ wɛ?» A wu loyire wo di kadugo le na gaaŋi. 13 Ga a wu kapyebyii pʼi fulo wu na, na wu pye: «Na to, Kilɛ tudunmɔ wu da bi kaa latii jo mu mu, lemu lʼa waha na toro le na ge, ta mu da bi lee pye wɛ? Pu da jo wʼa jo yɛ na ma shɛ wuu, ma bye fɛfɛɛrɛ fɔɔ.» 14 Wee tuun wu ni a wu digi Zhurudɛn Gba wu ni, na mini lɔhɔ ki ni tɔɔɲii gbarashuun na saha ni Kilɛ wo ná wu jomɔ pu ni, a wu ceesɛɛgɛ kʼi bye kanna nɔhɔcɛrɛɛ ceesɛɛgɛ ki, a wu juuŋɔ. 15 Wu ni piimu bɛɛri pu bye ge, a pʼi guri pa Kilɛ wo ná wu tàan. Ba wʼa nɔ wà wɛ, na yere Elize ɲahagbaa na, na wu pye: «Nɛ li cɛ nimɛ jo Kilɛ watii ɲɛ ɲiŋɛ ki xuu wa ni, ni Izirayɛli wo Kilɛ wu bɛ wɛ. Nimɛ, nʼa ma ɲɛɛri, jo ma yakanya yi shɔ ma kapyebye wu keŋɛ ni.» 16 A Elize di wu ɲɔ shɔ na: «Tɛhɛnɛ Baa Kilɛ ɲìi wo wu mɛgɛ na, nʼa kapyeŋɛɛ ki pyi wee wemu mu ge, nʼa da yaaga ka shishiin shɔ ma keŋɛ ni wɛ.» A Naama di Elize ɲɛɛri na fo wu yee yaŋmuyɔ yi shɔ. 17 A Naama di jo: «Ni mʼa she, nʼa ma ɲɛɛri mʼa shɔngɔ kafaya shuun tuguro pomyɛ kan na mu, ma kapyebye we. Na co nimɛ na, nʼa giin di saraga nizogoŋɔ ni saraga katii kan kilɛ watii mu ni Izirayɛli wo Tɛhɛnɛ Baa Kilɛ wu bɛ wɛ. 18 Ga na ɲuŋɔfɔɔ wu ba jé Irimɔ puga ki ni tuun bɛɛri ni na nuguro sin Irimɔ fɛɛ ni, na wuyɛ tiiŋɛ na keŋɛ ki na, nɛ bu nuguro sin Irimɔ puga ki ni, Tɛhɛnɛ Baa Kilɛ wu lee yafa wu bulona wu mu.» 19 A Elize di wu ɲɔ shɔ na: «Ta se ɲaɲiŋɛ na!»

Ba Naama ya yìri Elize tàan, na lii wu na wɛ, 20 a Kilɛ wo ná Elize wo kapyebye Gexhazi di jo wuyɛ funŋɔ ni na: «Li wii, nɛ kafɔɔ wʼa li faha toro, we Aramu shɛn we mu, wu ya gbara na wu keŋɛ yaŋmuyɔ yi shɔ wɛ. Tɛhɛnɛ Baa Kilɛ ɲìi wo wu mɛgɛ na, nʼa da baa zhɛ wu fɛni di shɛ yaaga ka shɔ wu mu.» 21 A Gexhazi di baa Naama fɛni. Naama ya li ɲa na wʼa fe wee fɛni ge, a wu digi na foro wu wotori wu ni, na wu ɲuŋɔ círi, na wu yege na: «Lʼa taan ya?» 22 A Gexhazi di wu ɲɔ shɔ na: «Lʼa taan. Nɛ kafɔɔ wʼa nɛ tun na di yi jo ma mu na tudunmɔɔ lɛvɛɛ shuun wʼa yìri Efirayimu faaboboyo yi ni na pa nimɛ. Na wee ya ma ɲɛɛri na ma warifyɛn kiloo kɛlɛɛ taanri (30) ni kaleŋɛɛ fadeye shuun kan pu mu.» 23 A Naama di jo: «Sɔɔ mʼa warifyɛn kiloo kɛlɛɛ gbaara (60) shɔ.» A wu wu karamu fo wʼa sɔɔ, a pʼi warifyɛn wu le bɔrɔyɔ shuun ni, na kaleŋɛɛ fadeye shuun wu taha wà, na yee kan wu kapyebyii shuun wa mu, a pee di Gexhazi torogo ni yi ni. 24 Pʼa nɔ faaboboŋɔ ki na ge, a Gexhazi di yee yaŋmuyɔ yi shɔ pu keŋɛ ni bɔrɔyɔ yi ni, na yi yaha puga ki ni, na pee namaa pu yaha kari. 25 Wee wi ge, a wu gari wu kafɔɔ Elize tàan, a wee di wu pye: «Mii mʼa yìri wɛ, Gexhazi?» A wu wu ɲɔ shɔ na: «Ma kapyebye wu bi kari xuu wa ni wɛ.» 26 A Elize di jo: «We ná we ya foro wotorogo ki ni, na ma ɲuŋɔ círi tuun wemu ni ge, nɛ munaa li bye wà. Ta warifyɛn taashɔɔ li ɲɛ le ya? Ta le ɲɛ fàya, ni oliviye tiiye, ni ɛrɛzɛn tɛyɛ, ni dubyaa, ni niiyɛ, ni kapyebyii namaa ni kapyebyezhaa taashɔɔ ya? 27 Lee wuu na Naama wo togo ki na ba gori yaha ma ni ma kadugo ki na fo gbee!» A Gexhazi di laha wà Elize tàan, a togo kʼi wu co, na wu ceesɛɛgɛ ki fiinŋɛ ba xɔɔrɔ ɲɛ wɛ.