Kacerege kʼa yìri na beele lɔhɔ ki fugba ni
6
Caŋa ka Kilɛ tudunmɔɔ pu pinnɛgɛ kʼa pa Elize pye: «Xuu wemu ni wèe ya dɛn na wù kayoŋɔɔ ki yu ni ma ni ge, wʼa cɛ́rɛ wèe ni. 2 Wʼà ma ɲɛɛri, wù yaha wù shɛ fo Zhurudɛn gba wu ni, wa bɛɛri di shɛ tinnɛ la kɔn wà, wù ba xuu watii yàa naha.» A Elize di jo: «Yi shɛ!» 3 A pu shɛn nigin wa di jo: «Nʼa ma ɲɛɛri, ma bɛ wu pinnɛ ni wù ni!» A wu jo: «Na bɛ na zhɛ.» 4 A wu gari ni pu ni. Ba pʼa shɛ nɔ Zhurudɛn gba wu na wɛ, na ganha na tiin ki kɔɔn. 5 Na wa yaha wu na tinnɛ la kɔɔn, a wu kacerege kʼi feri to lɔhɔ ki ni. A wu sipile wá na: «Eeyi! Kafɔɔ, nɛ shɛ ki ɲɛɛri!» 6 A Kilɛ wo ná wu jo: «Mii ki dʼa to wɛ?» A wu xuu wu shɛ wu na. A Elize di tige genɛ la kɔn, na lee wá ki tatogo ki ni, a kacerege kʼi yìri na beele lɔhɔ ki fugba ni. 7 Lee kadugo na, a Elize di jo: «Ki lɔ!» A ná wu keŋɛ yeege, na kaceepile li lɔ.Elize ya Arame wo kashɛn keŋɛ ki bulo
8 Aramu saan wu bi kashɛn kɔɔn Izirayɛli na. A wu yi jo wu kapyebyii pu mu na: «Nʼa da ba kashɛn keŋɛ ka sin we xuu we ni.» 9 A Kilɛ wo ná wu yi jo Izirayɛli saan wu mu na: «Ta mayɛ kasɛri, ma ganha bu doro we xuu we ni wɛ, Aramu fiige ki shɛɛn pʼa ŋmɔhɔ wà yíri.» 10 A Izirayɛli saan wu sipyii pii tun shɛ Kilɛ wo ná wu xuu wu wii wʼa wemu kaa jo ge. A Kilɛ wo ná wu saan wu funŋɔ to lee togana li na tɔɔɲii niɲɛhɛŋɛɛ ni.
11 A lee di Aramu fiige ki saan wu ɲaha wɔ, a wu wu kapyebyii pu yiri na pu pye: «Sipya wekɛ wu ɲɛ Izirayɛli saan wu wo kapyebye yee tɛ ge, yee na wee shɛ nɛ na-ɛ ya?» 12 A wu kapyebye wa di wu ɲɔ shɔ na: «Ahayi, na saan we, Izirayɛli wo saan wu kapyebye wa shishiin ɲɛ wèe tɛ ni wɛ, ga mʼa yemu yu, ma pushɔngɔ ki funŋɔ bɛ ni ge, Kilɛ tudunmɔɔ Elize wemu wu ɲɛ Izirayɛli ni ge, wee ya yee bɛɛri yu pu saan wu mu.» 13 A wu jo: «Wee Elize wu ɲɛ xuu wemu ni ge, yi shɛ wee wii, nʼa da ba wu co.» A pʼi wu pye: «Wu na da Dotan kulo li ni.» 14 A saan wu shɔnyɔ, ni kashɛn wotoriyo fɛɛ, ni kashɛn kegbɔhɔ tun kari piige ki ni, na kulo li maha círi. 15 Kee ɲimuguro ɲisɔɔgbɔhɔ ki na, a Kilɛ wo ná wu wo kapyebye wu foro, a wu kashɛn keŋɛ, ni shɔnyɔ, ni kashɛn wotoriyo ɲa yʼa kulo li maha círi, a wu Elize pye: «Na kafɔɔ, wèe na ba ɲaha pye ba?» 16 A wu wu ɲɔ shɔ na: «Ma ganha ba fyagi wɛ, ban piimu pu wa ni wèe ni ge, pee ya ɲɛhɛ na ye pii wuu pu na.» 17 Lee kadugo na a Elize di Kilɛ ɲɛɛri na: «Tɛhɛnɛ Baa Kilɛ, na kapyebye wu ɲìi ki mugi, wu da ɲaa.» A Tɛhɛnɛ Baa Kilɛ di kapyebye wu ɲìi ki mugi, a wee di li ɲa na faaboboŋɔ ki bɛɛri kʼa ɲi shɔnyɔ ni na wo kashɛn wotoriyo na, na Elize maha círi.
18 A Aramu kulo li shɛɛn pʼi digi na kari Elize yíri cɛ, a Kilɛ tudunmɔ wu Tɛhɛnɛ Baa Kilɛ ɲɛɛri na: «Nʼa ma ɲɛɛri, fyɛngɛrɛ wá pii sipyii pii na.» A Tɛhɛnɛ Baa Kilɛ di fyɛngɛrɛ wá pu na, na saha ni Elize wo ɲɛrɛgɛ ki ni. 19 A Elize di ba yi jo pu mu na: «Yee ya piin koo li ni, kulo lemu yee wa zhaa ge, le wa lere wɛ. Kilɛ tudunmɔ wemu yʼa zhaa ge, yi taha na fɛni di shɛ wu sanha shɛ yi na.» A Elize di pu ɲaha co na kari Samari kulo li ni. 20 Pʼa nɔ Samari ge, a Elize di Kilɛ ɲɛɛri na jo: «Tɛhɛnɛ Baa Kilɛ, pii sipyii pii ɲìi mugi pʼi ɲa.» A Tɛhɛnɛ Baa Kilɛ di pu ɲìi ki mugi, a pʼi puyɛ ta Samari kulo li niŋɛ ni. 21 Ba Izirayɛli wo saan wʼa pu ɲa wɛ, a wu Elize pye: «Di pu gbo ya, na to, di pu gbo ya?» 22 A Elize di wu ɲɔ shɔ na: «Ma ganha bu pu gbo wɛ. Ma bu sipyii co kashɛn ni ni ma ŋmɔpara li ni ma sindaa ki ni, mʼa pu gbo ya? Yi buuri ni lɔhɔ kan pu mu, pʼi li pʼi gba, lee kadugo na pʼi guri pʼa se pu kafɔɔ wu yíri.» 23 A Izirayɛli saan wu di lige nigbɔhɔ ka gbegele pu mu, a pʼi li na gba. Lee kadugo na, a pʼi pu yaha kari, a pʼi guri pa pu kafɔɔ wu yíri. Na lɔ kee caŋa ki na Aramu fiige ki kashɛn kuruyo yi ya shɛ nige Izirayɛli koomɔ pu ni wɛ.
Xuugo ka ya jé Samari kulo li ni
24 Tuun wa ya toro ge, a Aramu fiige ki saan Bɛni-Adadi di wu kashɛn kuruyo yi bɛɛri pinnɛ na shɛ Samari kulo li maha círi. 25 A xuugbɔhɔ di jé Samari kulo li ni kashɛn ki wuu na, fo kafaŋa ɲuŋmuu nigin bi bɛrɛɛ warifyɛn tuuyo kɛlɛɛ gbarataanri na (80), gbegbeshazhɛɛrɛ fire ti keŋɛ ɲii nigin wu bi bɛrɛɛ warifyɛn tuuyo kaguroa.
26 Caŋa ka, a Izirayɛli wo saan wu ba ganha na doroo kulo li maha maha kasɔrɔgɔ ki na, a cee wa di mujuu wá wu mu na: «Wù ɲuŋɔ wolo, saan we, wù kafɔɔ we!» 27 A saan wu jo: «Tɛhɛnɛ Baa Kilɛ bu bye wu di ya mu ɲuŋɔ wolo wɛ, nɛ ma já mu ɲuŋɔ wolo ni ɲaha ni wɛ? Ta shinma, kelee ɛrɛzɛn lɔhɔ ki wa na mu di gan ma mu?» 28 A saan wu nɔhɔ wu pye sanha na: «Ɲaha kʼa pye wɛ?» A cee wu jo: «We cee we ya nɛ pye: ‹Ma ja wu kan, wù wu xa niɲaa, di ba na wo wu kan wù xa ɲiga na!› 29 Ba wʼa yee jo wɛ, a wù na wo ja wu shɔhɔ, na wu xa. Ɲimuguro ti na, a nɛ wu pye: ‹Ma bɛ wu pa ni ma wo ja wu ni, wù wu xa!› Ga a wu dɛri shɛ wu wo ja wu ŋmɔhɔ.» 30 Ba saan wʼa wee cee wo wu jomɔ pu logo wɛ, na wu fàya yi shɛɛngi. Na wu yaha wu na doroo kasɔrɔgɔ ki na, a sipyiire tʼi wu ɲa na bɔrɔgɔ fàya na wʼa saanra fàya yi le na taha. 31 Saan wu bi yu na: «Shafati ja Elize ɲuŋɔ ki bu shɔn wu na niɲaa kɔnbaa, Kilɛ wu bɔɔngɔ shan na ɲuŋɔ ni, wu da la faraa ki na!»
Elize ya jo na xuugo ki na xhɔ
32 Ayiwa, lee bi Elize ta wʼa tiin wu kaban, nɔhɔlɛɛ pu dʼa tiin wu tàan. A saan wu wu sipya wu tun Elize mu. Ga na tudunmɔ wu yaha wu sanha nɔ wɛ, Elize bi yi jo nɔhɔlɛɛ pu mu na: «Yʼa ɲaa gɛ, sipya we sipyii gbovɔɔ we ya tun nɛ fɛni, na wu pa nɛ ɲuŋɔ kɔn! Li wii, tudunmɔ wu ba nɔ, yi gbura ki tɔ, yʼi wu kuruŋɔ. Ali wu kafɔɔ wuyɛ pyaa ki bɛ yɛrɛ wo tɔɔyɔ tunmɔ pu wa ma wu kadugo yíri.» 33 Na wu yaha pee jomɔ pu na, a tudunmɔ wʼi nɔ pu na, na yu na: «Tɛhɛnɛ Baa Kilɛ yɛpyaa ki ni ke bɔɔngɔ ke ya foro! Ta nɛ na já Tɛhɛnɛ Baa Kilɛ pye sanha na tadaŋa ya?»