2 Saannaa 7

A Elize di jo: «Tɛhɛnɛ Baa Kilɛ wʼa yemu jo ge, yi yee logo. Wʼa jo: ‹Ɲiga nimɛtashiin ni myɛviimɛ kiloo kɛ ni shuun na ba bɛrɛ warifyɛn tuuŋɔ nigin yɛ na, ɔrijɛ kiloo kɛlɛɛ shuun ni shishɛɛrɛ (24) bɛ na ba bɛrɛ warifyɛn tuuŋɔ nigin yɛ na Samari kulo li tajege ki ni.› » 2 Kashɛn ɲuŋɔfɔɔ wemu wu bye ni saan wu ni ge, a wee di Kilɛ wo ná wu pye na: «Ali Tɛhɛnɛ Baa Kilɛ mɛhɛ fɛnɛtirilee kɔn kɔn bɛ fugba wu na, ta lee na já bye?» A Elize di wu pye: «Ma na ba li ɲa ma ɲii li na, ga kee yalige ka di wa da jé ma ɲɔ ki ni wɛ.»

3 Togo fɛɛ shishɛɛrɛ wa bye kulo li tajege ki ni, a pee di yi jo puyɛ mu na: «Ɲaha na wèe dʼa tiin naha na xu wu sigee wɛ? 4 Wù bu jo wù jé kulo li ni, xuugo ki ɲɛ wà, wù na ba xhu. Wù bu gori naha, wù na ba xhu sanha. Yi pa wù shɛ wùyɛ kan Aramu fiige ki kashɛn keŋɛ ki mu. Pu bu bye pu ya wù gbo wɛ, wù na ba gori ɲìi na ; pu bu wù gbo, wù na ba xhu.» 5 A pʼi gari Aramu fiige ki shɛɛn pu kashɛn keŋɛ ki yíri nibiire ti jeduun wu ni, ba pʼa shɛ nɔ kashɛn keŋɛ ki ɲɔ ki na wɛ, pu ya wa shishiin ta wà wɛ. 6 Kilɛ wʼa wotoriyo tunmɔ, ni shɔnyɔ tunmɔ ni kashɛn keŋɛ nigbɔhɔ soŋɔnɔ pye lʼa logo Aramu fiige ki shɛɛn pu kashɛn keŋɛ ki ni. A Aramu fiige ki kashɛnŋmuu pʼi yi jo puyɛ mu na: «Izirayɛli saan wʼa Xhɛti shɛɛn ni Misira shɛɛn pu wo saannaa pu saraa, a pʼi ba wèe fɛni.» 7 Mu na Aramu fiige ki kashɛnŋmuu pu bɛɛri ya paa nibiishiire ti ni. A pʼi baa gbee na fàya piyɛyɛ, ni shɔnyɔ, ni kafaya ni kashɛn keŋɛ ki tasinŋɛ ki yaha wà. Pu bi paa gbee pʼi pu munahaa ki ɲuŋɔ wolo. 8 A togo fɛɛ pʼi nɔ kashɛn keŋɛ ki ɲɔ ki na, na jé fàya puga ka ni, a pʼi li na gba, na warifyɛn, ni sanni, ni fàya kuu na shɛ yee ŋmɔhɔ. A pʼi guri pa sanha na ba jé fàya puga katii ni, na kee bɛ wo yaŋmuyɔ yi kuu, na shɛ yee bɛ ŋmɔhɔ.

9 Ga a pʼi ba pu funyɔ kɔn na yi jo puyɛ mu na: «Wèe ya kasaana pyi-i dɛ. Niɲaa wu ɲɛ kafonɔ nizaana cajogo ge, wèe bu cari wùyɛ na, wèe bu ɲisɔɔgɔ ki sige, wèe bu bye wèe di ya jo wɛ, wèe na ba tigire ta. Yi pa, wù shɛ kii keree kii paari saan wu puga ki mu.» 10 A pʼi shɛ kulo li tajege ki kuɲɔsigilee pu yiri, na kee keree ki jo pu mu na: «Wèe ya shɛ Aramu fiige ki shɛɛn pu kashɛn keŋɛ ki tasinŋɛ ki ni, wèe di ya shɛ wa shishiin ta wà wɛ ; wèe ya wa shishiin tunmɔ bɛ logo wɛ ; yafiin bɛ ɲɛ wà ni shɔnyɔ ni kafaya nibɔyɔ bɛ wɛ, ni fàya piyɛyɛ yi niwaya ye.» 11 A kulo li kuɲɔsigilee pʼi sɛlɛ na pee togo fɛɛ pu wo kafonɔ li jo saan wu puga ki mu. 12 A saan wu yìri piige ki ni, na yi jo wu kapyebyii pu mu na: «Aramu fiige ki shɛɛn pʼa gbegele wemu pye wèe kaa na ge, nʼa da lee pyegana li shɛ yi na. Pʼa li cɛ na xuugo ki ɲɛ wèe na, lee wuu na pʼa foro kashɛn keŋɛ ki tasinŋɛ ki ni, na ŋmɔhɔ sige ki ni, na yi jo puyɛ mu na: ‹Izirayɛli shɛɛn pu bu foro kulo li ni, wèe na ba pu ɲìi wuu pu co, na jé pu wo kulo li ni.› » 13 A saan wu kapyebye wa di wu pye: «Shɔnyɔ yemu yʼa kori ɲìi na kulo li ni ge, yee ɲɛ kanna Izirayɛli sipyii piimu pʼa kori ɲìi na xuu pu kadugo na ge. Kɔrɔgɔ kʼa laha pu bɛɛri na. Kaguro lɔ yee shɔnyɔ ni, ma wèe wo sipyii pii tun ni yee ni, pii shɛ kii keree kii pɛrɛgi.» 14 A pʼi wotoriyo shuun ni shɔnyɔ yi gbegele, a saan wu pee tun shɛ Aramu fiige ki kashɛn keŋɛ ki wii, a wu jo: «Yi shɛ ki wii.» 15 A pee di pu fɛ pu lɔ fo na shɛ nɔ Zhurudɛn gba wu na, pu ya yaaga bɛ ɲa koo li na fàya ni yɛrɛyɛ kadugo na wɛ, Aramu fiige ki shɛɛn pu tafɛbaawuu pʼa yee yemu wá ge. A tudunmɔɔ pʼi guri na ba yee jo saan wu mu. 16 Lee ya pye ge, a sipyii pʼi gari na shɛ Aramu fiige ki shɛɛn pu kashɛn keŋɛ ki wo yaŋmuyɔ yi kuu. Myɛviimɛ kiloo kɛ ni shuun bi bɛrɛɛ warifyɛn tuuŋɔ nigin yɛ na, ɔrijɛ kiloo kɛlɛɛ shuun ni shishɛɛrɛ bɛ di bi bɛrɛɛ warifyɛn tuuŋɔ nigin yɛ na, na saha ni Tɛhɛnɛ Baa Kilɛ wo jomɔ pu ni. 17 Kashɛn ɲuŋɔfɔɔ wemu wu bi ma bye ni saan wu ni ge, a saan wu wee pye na wu kasɛɛgɛ yaha sipyiire ti na kulo li tajege ki ni. A sipyiire tʼi gburogi kuɲɔɔ li ni, na wee tanhana gbo, na saha ni Kilɛ wo ná wu ɲɔjomɔ pu ni, saan wʼa bi kari wu yíri a wu shɛ pemu jo wu mu ge. 18 Kilɛ wo ná wu bi saan wu pye na: «Myɛviimɛ kiloo kɛ ni shuun na ba daa warifyɛn tuuŋɔ nigin yɛ na, ɔrijɛ kiloo kɛlɛɛ shuun ni shishɛɛrɛ bɛ na ba daa warifyɛn tuuŋɔ nigin yɛ na, ɲiga nimɛ tashiin, Samari kulo li tajege ki ni.» 19 Ga kashɛn ɲuŋɔfɔɔ wemu wu ma bye ni saan wu ni ge, a wee di Kilɛ wo ná wu pye na: «Ali Tɛhɛnɛ Baa Kilɛ mɛhɛ fɛnɛtirilee kɔn kɔn fugba wu na bɛ, ta lee na já bye?» A Elize di wu pye: «Ma na ba li ɲa ma ɲii li na, ga kee yalige ka di wa da jé ma ɲɔ ki ni wɛ.» 20 A li shiin di bye mu, a sipyiire tʼi gburogi, na kashɛn ɲuŋɔfɔɔ wu tanhana gbo kulo li tajege ki ni.