2 Saannaa 8

Izirayɛli wo saan wʼa kaɲii kan Shunɛmu shɛn cee wu mu

Ayiwa, Elize bi cee wemu wo já nixhugo ki ɲɛ ge, a wu wee pye: «Xuu wemu wʼa ma taan ge, ta se wà ma ni ma puga shɛɛn pu ni, yʼi shɛ diin wà nadadɛɛnrɛ na, bani Tɛhɛnɛ Baa Kilɛ wa da ba xuugo yaha di ba. Kee xuugo ki na ba yee gbarashuun pye fiige ki ni.» 2 A cee wu li pye ba Kilɛ wo ná wʼa yi jo wɛ, a wu ni wu puga shɛɛn pʼi gari. A wu shɛ diin Filisiti shɛɛn pu wo fiige ki ni, na yee gbarashuun pye wà. 3 Ba yee gbarashuun wʼa toro wɛ, a cee wu yìri Filisiti shɛɛn pu wo fiige ki ni na pa, na gari saan wu mu, kɔnhɔ wu shɛ wu ɲɛɛri wu wo puga ke ni wu kɛrɛyɛ yi keree na. 4 Lee bi saan wu ta jomɔ na ni Gexhazi ni, Tɛhɛnɛ Baa Kilɛ wo ná wu wo kapyebye we. A saan wu jo: «Kagbɔhɔɔ kiimu bɛɛri Elize ya pye ge, ki paari na mu.» 5 Elize bi cee wu já wu ɲɛ ɲɛgana lemu na ge, na Gexhazi yaha wu na yee paari saan wu mu, a cee wu nɔ jé, na saan wu ɲɛɛri wu puga ke, ni wu kɛrɛyɛ yi shizhaa na. A Gexhazi di jo: «Ɔɔ na kafɔɔ saan we, cee wemu wo ja Elize ya ɲɛ ge, wee cee wu wʼa we, we di ɲɛ wu ja we.» 6 A saan wu cee wu yege, a cee wu yi ɲaha bɛɛri paari saan wu mu. Lee kadugo na, a saan wu ɲuŋɔfɔɔ wa pinnɛ ni cee wu ni, na wee pye: «Lemu bɛɛri li ɲɛ cee wu wuu ge, yi lee bɛɛri kuruŋɔ kan wu mu, yʼi wu kɛrɛyɛ yi wo lada wu bɛɛri kan wu mu, na co caŋa ɲii lemu tɛhɛnɛ na wʼa foro naha ge, fo na pa nɔ niɲaa na.»

Elize ya jo na Azayɛli na ba bye Aramu fiige ki saan

7 Ayiwa, a Elize di gari Damasi kulo li ni. Bɛni-Adadi, Aramu shɛɛn wo saan we, lee bi wee ta wee na yá, a pʼi shɛ wu pye na Kilɛ wo ná wʼa pa fo naha. 8 A saan wu Azayɛli pye: «Yakanya ya lɔ, mʼa shɛ Kilɛ wo ná wu ɲuŋɔ círi, mʼa shɛ Tɛhɛnɛ Baa Kilɛ yege, mʼa wu pye na: ‹Ta nɛ na yìri we gban we na ya?› » 9 A Azayɛli di yakanya ya lɔ, Damasi kulo li wo yasaaya ya, a yee di bɛ ni ɲɔhɔyɔ kɛlɛɛ shishɛɛrɛ (40) wo tuguro ni. A wu gari ni yee ni di zhɛ Kilɛ wo ná wu ɲuŋɔ círi. Ba wʼa nɔ wɛ, na shɛ yere wu ɲahagbaa na jo: «Ma ja Bɛni-Adadi, Aramu wo saan we, wee wʼa nɛ tun, na nɛ wu pa ma yege na: ‹Ta nɛ na yíri we gban we na ya?› » 10 A Elize di wu pye: «Shɛ, mʼa shɛ wu pye na: ‹Ma na juuŋɔ!› Ga Tɛhɛnɛ Baa Kilɛ ya li shɛ nɛ na, na wʼa da xhuu.» 11 A Kilɛ wo ná wu wu ɲaha ki kɔ le Azayɛli ni, na wu wii na mɔ, na ba mɛɛ le na suu. 12 A Azayɛli di jo: «Ɲaha na mʼa mɛɛ suu wɛ, na kafɔɔ we?» A Elize di wu pye: «Bani kakuunɔ le ma da ba bye Izirayɛli nagoo pu na ge, nɛ li cɛ. Ma na ba na le pu kashɛn ɲuŋɔ círi círi kulogoo ki na, na ŋmɔpara taga pu lɛvɛɛ pu gbo, na pu nɔhɔpiire ti tɔnhɔnɔ, na pu lahaa fɛɛ pu yacɛrɛɛ ki puri puri.» 13 A Azayɛli di jo: «Ɲaha nɛ di ɲɛ pun kadugo na wɛ, ma kapyebye we? Nɛ ma já le kagbɔɔ le la shi pye dii wɛ?» A Elize di jo: «Tɛhɛnɛ Baa Kilɛ ya li shɛ nɛ na, na mu na ba bye Aramu fiige ki saan.»

14 A Azayɛli di yìri Elize tàan, na gari wu kafɔɔ wu yíri, a wee di shɛ wu yege na: «Ɲaha woyo Elize dʼa jo ma mu wɛ?» A wu jo: «Wʼa nɛ pye na ma na ba juuŋɔ!» 15 Ɲimuguro ti na, a Azayɛli di fatɔŋɔ ka lɔ, na ki le lɔhɔ ni, na kee taga saan wu ɲaha ki tɔ, a wu xhu, a Azayɛli di diin wu tɛgɛ saanra ti na.

Zhuda saannaa Zhoramu wo caŋa ɲii le

(2 Caŋa Ɲɛhɛɛ Jomɔ 21:5-20)

16 Ayiwa, Akabu ja Zhoramu wo saanra ti yee kaguro wuu le, lee bi Zhozafati ta wee na ɲɛ sanha Zhuda wo saanra ti na, a wu ja Zhoramu di diin saanra ti na Zhuda koomɔ pu ni. 17 Zhoramu shi wu bye yee kɛlɛɛ taanri ni shuun (32) na wu teŋɛduun wu ni saanra ti na. A wu yee gbarataanri pye saanra ti na Zheruzalɛmu ni. 18 A wu daha Izirayɛli wo saannaa pu wo koo li fɛni na ɲaari, ma na jo ba Akabu wo puga kʼa li pye wɛ, bani Akabu wo poro pushɔ wu bye wu shɔ, lee na, lemu lʼa kolo Tɛhɛnɛ Baa Kilɛ mu ge, a wu lee pye. 19 Ga Tɛhɛnɛ Baa Kilɛ ya ta sɔɔ na Zhuda kyɛɛgi wɛ. Wu kapyebye Dawuda wuu na wʼa Zhuda yaha wà, bani wu bi jo na wa na ba daa tuun bɛɛri ni Dawuda wo jalaa pu mu saanra koo li na.

20 Ayiwa, a Edomu shɛɛn di ba nʼa she le puyɛ ni na Zhoramu yaha saanra ti na, na zhe Zhuda wo fanha ki ni, na saan wa teŋɛ puyɛ mu. 21 A Zhoramu ni wu kashɛn wotoriyo yi bɛɛri di gari Sayiri kulo li ni. A wu ba yìri piige ni, na shɛ do Edomu shɛɛn pu na, lee bi pee ta pee ya wu ni wu kashɛn wotoriyo yi ɲuŋɔfɛɛ pu kuuri. Ga a Zhuda shɛɛn pʼi baa kari pu fàya buguloo pu ni. 22 A Edomu shɛɛn di nʼa she le puyɛ ni, na wá Zhuda wo fanha ki na, fo na pa nɔ niɲaa na. A Libina bɛ di nʼa she le wuyɛ ni wee tuun wu ninumɔ ni.

23 Ayiwa, Zhoramu wo kapyegee kisaŋaa, lemu bɛɛri wʼa pye ge, lee ya ka Zhuda saannaa pu wo caŋa ɲɛhɛɛ jomɔ pu wo sɛmɛ wu ni. 24 A Zhoramu di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ ni wu tii pu ni Dawuda wo kulo li ni. A wu ja Akaziya di diin saanra ti na wu tɛgɛ.

Akaziya ya teŋɛ na pye Zhuda koomɔ pu wo saan we

(2 Caŋa Ɲɛhɛɛ Jomɔ 22:1-6)

25 Ayiwa, Akabu ja Zhoramu wo saanra ti yee kɛ ni shuun wuu le Izirayɛli ɲuŋɔ ni, lee yee le Zhoramu ja Akaziya ya teŋɛ na pye Zhuda koomɔ pu wo saan we. 26 Akaziya shi wu bye yee kɛlɛɛ shuun ni shuun (22) wu teŋɛduun wu ni saanra ti na. A wu yee nigin pye saanra ti na Zheruzalɛmu ni. Wu nu wu mɛgɛ ki bye na Atali, Izirayɛli saannaa Omuri wo poro pushɔ. 27 A wu daha Akabu wo puga ki wo koo li fɛni, lemu lʼa kolo Tɛhɛnɛ Baa Kilɛ mu ge, a wu lee pye, ma na jo ba Akabu wo puga kʼa pye wɛ, bani yafɛɛrɛ ti bye wu ni Akabu wo puga ki tɛ ni. 28 A wu ba binnɛ ni Akabu ja Zhoramu ni, na shɛ kashɛn kɔn Aramu saannaa Azayɛli na, Galadi wo Aramoti kulo li ni, a Aramu shɛɛn pʼi shɛ Zhoramu bana wà. 29 Ba saannaa Zhoramu ya shɛ do Aramu saannaa Azayɛli na, a Aramu shɛɛn pʼi wu bana Arama kulo li ni wɛ, a wu guri pa Jizirɛli kulo li ni, na ba wuyɛ wɛrɛ pye wà. A Zhoramu ja Akaziya, Zhuda wo saan we, a wee di shɛ Jizirɛli kulo li ni, di zhɛ Akabu ja Zhoramu pɛrɛgi, bani yama pu bi digi wu na.