2 Saannaa 9

Pʼa Zhewu tìre na pye Izirayɛli koomɔ pu wo saan

Ayiwa, a Kilɛ tudunmɔɔ Elize di Kilɛ tudunmɔ wa yiri na wu pye: «Kirige ka taga mayɛ pɔ, mʼa le sìnmɛ gbuu le lɔ, mʼa shɛ Galadi wo Aramoti kulo li ni. 2 Mʼa shɛ nɔ Nimushi ja Zhozafati wo ja Zhewu na. Mʼa shɛ wu yiri ma yeege wu cebooloo pu tɛ ni, mʼa shɛ ni wu ni puga katii ni gɛrɛmɛ na. 3 Mʼa sìnmɛ gboro li lɔ, mʼa li sìnmɛ pu wo wu ɲuŋɔ ki ni, mʼa jo: ‹Yemu Tɛhɛnɛ Baa Kilɛ ya jo ge, yee yi wa mɛ: “Nʼa ma tìre na pye Izirayɛli koomɔ pu wo saan!”› Ma bu xhɔ, mʼa gbura ki mugi, ma da fe mʼa gbee.» 4 A lɛvɔɔ we, Kilɛ tudunmɔ we, a wu gari Galadi wo Aramoti kulo li ni. 5 Ba wʼa shɛ nɔ wɛ, na kashɛn ɲuŋɔfɛɛ pu ta kayuu na. A wu jo: «Ɲuŋɔfɔɔ we, ya wa nɛ mu na yu ma mu.» A Zhewu di jo: «Wekɛ ni mu di wʼa yu wèe bɛɛri ni wɛ?» A wu jo: «Muyɛ pyaa ki ni nɛ wʼa yu ɲuŋɔfɔɔ we.» 6 A Zhewu di jé puga ki ni, a Kilɛ tudunmɔ lɛvɔɔ wu sìnmɛ pu wo wu ɲuŋɔ ki ni, na wu pye: «Yemu Tɛhɛnɛ Baa Kilɛ ya jo ge, yee yi wa mɛ na: ‹Nʼa ma tìre na pye Tɛhɛnɛ Baa Kilɛ wo sipyii pu wo saan, Izirayɛli koomɔ pu wo saan. 7 Ma na ba ma kafɔɔ Akabu wo puga ki ɲuŋɔ tugo, lee funŋɔ ni nʼa da ba na tudunmɔɔ pu wo shishan pu foo tɔ, na wo kapyebyii pee, na Tɛhɛnɛ Baa Kilɛ wo kapyebyii pu bɛɛri bɛ wo shishan pu foo tɔ, wu shɔ Zhezabɛli wʼa piimu gbo ge. 8 Akabu wo puga ki bɛɛri ɲuŋɔ na ba dugo. Nɛ na ba namaa pu bɛɛri ɲuŋɔ tugo na foro Akabu wo puga ki ni, bulona fara sipyitiimɛ na, Izirayɛli koomɔ pu ni. 9 Nɛ na ba Akabu wo puga ki pye ba Nebati ja Zheroboomu wogo kʼa pye wɛ, ba Ayiya ja Basha wogo kʼa pye wɛ. 10 Poŋɔɔ na ba Zhezabɛli xa Jizirɛli wo tɛgɛ ki ni, sipya da ba da wemu na ba wu nixhugo ki le faŋa ni wɛ.› » Ba lɛvɔɔ wʼa yee jo xɔ wɛ, na gbura ki mugi na foro, na baa kari.

11 Ayiwa, ba Zhewu ya foro na kari wu kafɔɔ wu wo sipyii pu yíri wɛ, a pʼi shɛ wu yege na: «Lʼa taan ya? Ɲaha wuu na we sicere fɔɔ we da pa ma mu wɛ?» A Zhewu di pu pye: «Yee ya pii Kilɛ tudunmɔɔ pʼi shi cɛ, na pu kapyegee ki bɛ cɛ!» 12 Ga a pʼi wu pye na: «Kafinɛyɛ dɛ! Lemu na wʼa pa ge, li jo wù mu!» A wu jo: «Ye ni ye wʼa jo. Wʼa jo na yemu Tɛhɛnɛ Baa Kilɛ ya jo ge, na yee yi wa mɛ na: ‹Nɛ ma tìre, na ma pye Izirayɛli koomɔ pu wo saan we!› » 13 Taapile ni a pu bɛɛri di pu fadeye yi lɔ lɔ na le Zhewu tɔɔyɔ yi nɔhɔ ni kataduguŋɔ ki girimɛɛ pu na. A pʼi maga wi na jo: «Zhewu ya ɲɛri saan!»

Zhewu ya Zhoramu gbo, Izirayɛli koomɔ pu wo saan we

14 Ayiwa, lee funŋɔ ni, a Zhewu di yiri Zhoramu fɛni. Zhewu bi bye Zhozafati wo ja, Zhozafati di ɲɛ Nimushi wo ja. Ma li ta bɛ Zhoramu ni Izirayɛli wo kashɛnŋmuu pu bɛɛri bi li shaa pʼi Azayɛli ɲaha kɔn Galadi koomɔ wo Aramoti kulo li na, Aramu wo saan we. 15 Ga Aramu shɛɛn pu bi Zhoramu bana na wu yaha kashɛn ki na ni Aramu saannaa Azayɛli ni, a wu guri pa Jizirɛli kulo li ni, di ba wuyɛ wɛrɛ pye. A Zhewu di jo: «Yi bu da yi na ɲɛ ni na ni, wee tuun wu ni, shɛn nigin bɛ ganha bu shɔ do le kulo le ni wu ta shɛ ye ɲaha jo Jizirɛli kulo li ni wɛ.» 16 Lee kadugo na a Zhewu di wu shɔgɔ wotori wu lɔ, na gari Jizirɛli kulo li ni, bani wà Zhoramu nizinnɛgɛ ki bye. A Zhuda wo saan Akaziya di gari di zhɛ wu pɛrɛgi.

17 Kasɛɛgɛ pyevɔɔ wemu wu ɲɛ Jizirɛli kulo li wo zangaso-tɔɔngɔ ki fugba wu ni ge, a wee di Zhewu ɲa wu na ma ni sipyiɲɛhɛnɛ la ni, na jo: «Sipyiɲɛhɛnɛ la ni nɛ ɲii wa.» A Zhoramu di jo: «Shɔndugumɔ nigin wa yirige, wee di shɛ jiri pu na, wu pu pye: ‹Lʼa taan ya?› » 18 A shɔndugumɔ wu gari na shɛ jiri Zhewu na, na jo: «Yemu saan wʼa jo ge, yee yi wa mɛ na: ‹Lʼa taan ya?› » A Zhewu di wu pye: «Mu wo ɲaha kʼi wa yee ni wɛ? Ŋmahana ɲɛri mɛ, mʼa binnɛ na kadugo yíri wuu pu ni.» A kasɛɛgɛ pyevɔɔ wu jo: «Tudunmɔ wʼa kari fo na shɛ jé pu ni, ga wu sanha guri.» 19 A wu shɔndugumɔ nigin wa bɛ tun kari. A wee bɛ di shɛ nɔ pu na, na jo: «Yemu saan wʼa jo ge, yee yi wa mɛ na: ‹Lʼa taan ya?› » A Zhewu di jo: «Mu wo ɲaha kʼi wa yee ni wɛ? Ŋmahana ɲɛri mɛ, mʼa binnɛ na kadugo yíri wuu pu ni.» 20 A kasɛɛgɛ pyevɔɔ wu jo: «Wʼa kari fo na shɛ jé pu ni, ga wu sanha guri. Shɔngɔ wotori wu paagana lʼa foro Nimushi ja Zhewu wo wotori paagana li fɛni, bani wʼa wu fe ba sicere fɔɔ ɲɛ wɛ.»

21 Wee tuun wu ni a Zhoramu di jo: «Yi na shɔngɔ wotori wu pɔ!» A pʼi wu pɔ. A Zhoramu, Izirayɛli wo saan we, ni Akaziya, Zhuda wo saan we, a pʼi foro na shɛ Zhewu ɲuŋɔ círi, wa bɛɛri ɲɛ ni wu shɔngɔ wotori ni. A pʼi shɛ jiri wu na Jizirɛli shɛɛn Nabɔti wo tɛgɛ ki ni 22 Ba Zhoramu ya Zhewu ɲa wɛ, na jo: «Lʼa taan ya, Zhewu?» A Zhewu di jo: «Li ma já taan dii na mu nu Zhezabɛli yaha yapɛrɛɛ ki wo dɔdɔɔrɔ te ni wu siganma pu ni wɛ?» 23 A Zhoramu di ŋmahana kuri na fe na gbee, na Akaziya pye: «Woni wu ɲɛ we, Akaziya!» 24 Ga a Zhewu di wu sindaa ki lɔ, na Zhoramu ŋmɔ wu kapaya yi tɛ wu ni, a ŋmaga kʼi ba foro zɔjege ke ni, a Zhoramu di do na xhu wu wotori wu ni. 25 A Zhewu di wu kashɛn ɲuŋɔfɔɔ Bidikari pye na: «Wu lɔ, mʼa wu wá Jizirɛli shɛɛn Nabɔti wo tɛgɛ ki ni, bani ma funŋɔ kɔn li na, nɛ ni mu ni, tuun wemu ni wèe di bi bye ni wu to Akabu wo kashɛn wotoriyo yi ni ge, ye Tɛhɛnɛ Baa Kilɛ bi jo wu shizhaa na na: 26 ‹Nɛ Nabɔti ni wu jalaa pu shishan pu niwoŋɔ ɲa taɲaa, nʼa da ba li foo tɔ ma mu ke tɛgɛ ke ninuŋɔ ni! Tɛhɛnɛ Baa Kilɛ ɲɔjomɔ pi.› Ayiwa nimɛ, wu lɔ, mʼa wu wá tɛgɛ ki ni, na saha ni Tɛhɛnɛ Baa Kilɛ wo jomɔ pu ni.»

Zhewu ya pu pye pʼa Zhuda saannaa Akaziya gbo

(2 Caŋa Ɲɛhɛɛ Jomɔ 22:7-9)

27 Ayiwa, ba Zhuda saannaa Akaziya ya lee ɲa wɛ, na baa gbee Bɛti-Gan kulo li wo koo li ni. A Zhewu di wu bɛ nɔhɔ niinɛ, na jo: «Yi wu bɛ gbo wu wotori wu ni.» A pʼi wu ŋmɔ na bana Guri kulo wo faaboboŋɔ ki taduguŋɔ ki ni, Yibilamu kulo li tàan. A wu baa kari Megido kulo li ni, na shɛ xhu wà. 28 A wu kapyebyii pʼi wu le shɔngɔ wotori wa ni na kari Zheruzalɛmu kulo li ni, na shɛ wu ɲuŋɔ ŋmɔhɔ wu wo faŋa ki ni, ni wu tii pu ni, Dawuda wo kulo li ni. 29 Akabu ja Zhoramu wo saanra ti yee kɛ ni nigin wuu li na Akaziya bi teŋɛ na pye Zhuda koomɔ pu wo saan we.

Zhewu ya pu pye pʼa Zhezabɛli gbo, saanzhɔ we

30 Ayiwa, a Zhewu di jé Jizirɛli kulo li ni. Ba Zhezabɛli ya yee logo wɛ, na kalii le, na wu ɲuzhiire ti kemɛ yàa, na ganha na wii wu zangaso wu fɛnɛtiri wu ni. 31 Ba Zhewu ya nɔ kulo li tajege ki ni wɛ, a Zhezabɛli di jo: «Lʼa taan ya, Zhewu? Zimiri tuugo sipya mu ɲɛ, na wu kafɛɛ xuli!» 32 A Zhewu di wu ɲuŋɔ yirige fɛnɛtiri wu shizhaa, na jo: «Jɔgɔ wʼi ɲɛ nɛ ɲii wɛ? Jɔgɔ wɛ?» Ɲuŋɔfɛɛ shuun taanri wa, a pee di yere fɛnɛtiri wu tàan fugba wu ni, na wii na saha ni Zhewu ni. 33 A Zhewu di jo: «Yi we ŋmunuŋɔ shan!» A pee di wu ŋmunuŋɔ shan. A wu shishan pʼi kasɔrɔgɔ ke ni shɔnyɔ yi nɔrɔgɔ. A Zhewu di wu tanhana toro ni wu shɔngɔ wotori wu ni. 34 Lee kadugo na, a Zhewu di jé puga ki ni, na li, na gba, na da xɔ na jo: «Yi we laŋi fɔɔ we keree gbegele, yʼi wu ɲuŋɔ ŋmɔhɔ, bani saannaa poro pushɔ wu ɲɛ wii.» 35 A pʼi gari di zhɛ wu ɲuŋɔ ŋmɔhɔ, ga pu ya shɛ yaaga bɛ ta wu ni wɛ, fo wu ɲugɔrɔgɔ ke yɛ, ni tɔɔyɔ ye, ni keye ye. 36 Pʼa lemu ɲa ge, a pʼi guri pa, na ba lee jo Zhewu mu. A Zhewu di jo: «Go pe jomɔ pe Tɛhɛnɛ Baa Kilɛ ya jo wu kapyebye Tishibi shɛɛn Eli ɲɔ na na: ‹Poŋɔɔ na ba Zhezabɛli xa Jizirɛli kulo li wo tɛgɛ ki ni.› 37 Zhezabɛli nixhugo ki na ba bye yafɔɔnrɔ kɛrɛyɛ yi ni, Jizirɛli kulo li wo tɛgɛ ki ni, kɔnhɔ wa ganha bu ba jo nige na Zhezabɛli wʼa we wɛ.»