Zhewu ya pu pye pʼa Akabu puga ki sipyii pu gbo
10
Ayiwa, Akabu wo jalaa kɛlɛɛ gbarashuun (70) wu bye Samari kulo li ni. A Zhewu di sɛmɛɛ pii ka na tun Samari kulo li ni, Jizirɛli wo ɲuŋɔfɛɛ pu mu, ni nɔhɔlɛɛ pee, ni Akabu wo jalaa pu wo biivɛɛ pee. A wu li ka pee sɛmɛɛ pu ni na: 2 «Yee wa saan wu puga ki nɔhɔpiire ti biini, kashɛn wotoriyo di ɲɛ yee mu, ni shɔnyɔ, ni kashɛn yagboyo, kulo lemu ni yi wa ge, kashɛn ɲaha kɔn kɔn kasɔrɔgɔ dʼa taga lee kuuri. We sɛmɛ we ba nɔ yi na tuun wemu ni, 3 yʼi yi kafɔɔ wu jalaa pu wii, wemu wu ɲɛ pu bɛɛri wo nijemɛ, wu dʼa keree bɛ ɲaha cɛ ge, yi wee teŋɛ wu to wu wo saanra koro li na, lee kadugo na, yʼi kashɛn ŋmɔ yi kafɔɔ wu puga ki mu!» 4 A pʼi sii fya fo xuuni, na jo: «Saannaa shuun bɛɛri, pee ya ta já wu na wɛ, wèe na bye dii na kaa já wùyɛ na wɛ?» 5 Saan wu puga ki kaɲahashɔnrimɔ we, ni kulo li kaɲahashɔnrimɔ we, ni nɔhɔlɛɛ pee, ni saan wu nagoo pu biivɛɛ pee, a pee di yi yaha shɛ jo Zhewu mu na: «Wèe ɲɛ ma kapyebyii, ma bu lemu bɛɛri jo wù mu, lee wʼà da bye. Wèe wa da sipya bɛ teŋɛ saanra ti na wɛ, lemu lʼa ma taan ge, lee pye.»6 A Zhewu di sɛmɛ shuun wo tun pu mu, na yi ka wee ni na: «Yi bu da yi na ɲɛ ni nɛ ni, yi bu da yi na na wo nijoyo yi nuri, yi pii namaa pii wo ɲuŋmogoo ki lɔ, yi kafɔɔ wu jalaa pee, yʼi ba ni ki ni na mu Jizirɛli kulo li ni ɲiga nimɛ tashiin.» Lee bi saan wu jalaa kɛlɛɛ gbarashuun (70) wu ta kulo li sipyigbɔɔ pu mu pu na biini. 7 Ba sɛmɛ wʼa nɔ pu na wɛ, a pʼi saan wu jalaa kɛlɛɛ gbarashuun (70) wu co, na pu kuun, na pee wo ɲuŋmogoo ki le sagaŋaa kii ni na tun Zhewu mu Jizirɛli kulo li ni. 8 A tudunmɔ wu shɛ Zhewu pye na: «Pʼa pa ni saan wu jalaa pu ɲuŋmogoo ki ni.» A Zhewu di jo: «Yi ki yaha yahaŋaa shuun kulo li tajege ki ni, fo ɲiga ɲisɔɔgɔ.» 9 Ba ɲiga kʼa pa mugi wɛ, a wu foro, na wuyɛ shɛ sipyiire ti bɛɛri na, na jo: «Jaagi wa yee na wɛ! Nɛ wʼa yiri na kafɔɔ wu fɛni, na wu gbo. Ga pii bɛɛri, a jɔgɔ di pee gbo wɛ? 10 Wee tuun wu ni, yi li cɛ na yaaga bɛ da gori fabaa Tɛhɛnɛ Baa Kilɛ wo jomɔ pu ni wɛ. Yemu bɛɛri Tɛhɛnɛ Baa Kilɛ ya jo wá Akabu wo puga ki na ge, yaaga bɛ da gori yi ni pyebaa wɛ. Yemu Tɛhɛnɛ Baa Kilɛ ya jo wu kapyebye Eli ɲɔ na ge, yee wʼa byi.»
11 Piimu bɛɛri pu bi kori Akabu wo puga ki ni Jizirɛli kulo li ni ge, a Zhewu di pee bɛ gbo, pu sipyigbɔɔ pu bɛɛri, ni pu naɲiinɛɛ pee, ni pu saraya ɲaha shɔɔnrivɛɛ pee, wu ya shɛn nigin bɛ yaha ɲìi na wɛ.
Zhewu ya pu pye pʼa Akaziya wo cebooloo pii gbo
12 Ayiwa lee kadugo na, a Zhewu di yìri na gaaŋi Samari kulo li ni. Ba wʼa shɛ nɔ Bɛti-Ekɛdi ni, yatɔɔnahamaa pu wo xuu wu ni wɛ, 13 na Zhuda saannaa Akaziya wo cebooloo pu ta wà, na jo: «Jovɛɛ yee di ɲɛ wɛ?» A pʼi wu ɲɔ shɔ na: «Akaziya cebooloo pu ɲɛ wère, wèe wa gaaŋi di zhɛ saan wu jalaa pu shaari, wù shɛ fo kan saanzhɔ wu jalaa pu mu.» 14 A Zhewu di wu wo sipyii pu pye: «Yi pu ɲìi wuu co!» A pʼi pu ɲìi wuu co, na pu kuun, na pu wá Bɛti-Ekɛdi wo keeŋɛ ki ni. Pee ya pye namaa kɛlɛɛ shishɛɛrɛ ni shuun (42). Zhewu ya shɛn nigin bɛ yaha wʼa shɔ pu ni wɛ.
Zhewu ya shɛ Zhonadabu ɲuŋɔ círi
15 Ayiwa, ba Zhewu ya yìri wee xuu wu ni wɛ, na shɛ saha ni Erekabu ja Zhonadabu ni, wee na ma di ba wu ɲuŋɔ círi. A wu duba pye wee mu, na jo: «Nɛ funŋɔ ya fiinŋɛ ni ma ni fiinŋɛgana lemu na ge, ta mu na mu bɛ wo funŋɔ kʼa fiinŋɛ ni nɛ ni ya?» A Zhonadabu di wu ɲɔ shɔ na: «Uun!» A Zhewu di jo: «Ki bi fiinŋɛ mu, ma keŋɛ ki kan naha.» A Zhonadabu di wu keŋɛ ki kan wu mu. A Zhewu di wu durogo wuyɛ tàan wu shɔngɔ wotori wu ni, 16 na wu pye: «Pinnɛ ni na ni, ɲɛpɛɛn lemu li ɲɛ nɛ ni Tɛhɛnɛ Baa Kilɛ wuu na ge, ma na zhɛ li cɛ.» A wu gari ni wu ni mu wu shɔngɔ wotori wu ni.
17 Ba pʼa shɛ nɔ Samari kulo li ni wɛ, Akabu wo puga shɛɛn piimusamaa pu bi kori Samari kulo li ni ge, a Zhewu di pee gbo, na pu bɛɛri ɲuŋɔ tugo na saha ni Tɛhɛnɛ Baa Kilɛ wo nijoyo yi ni Eli mu.
Zhewu ya Baali wo pɛɛŋɛ ki ɲɔ yereŋɛ
18 Lee kadugo na, a Zhewu di sipyiire ti bɛɛri yiri pinnɛ, na pu pye: «Akabu ya Baali pɛlɛ dooni yɛ, Zhewu wʼa da ba wu pɛlɛ xuuni. 19 Ayiwa nimɛ, yi Baali wo tudunmɔɔ pu bɛɛri yiri pa binnɛ na tàan, piimu bɛɛri pʼa labye pyi wu mu ge, ni wu saraya ɲaha shɔɔnrivɛɛ pu bɛɛri, shɛn nigin bɛ ganha bu fɔ wɛ, bani saraga nigbɔhɔŋɔ nʼa da wolo Baali mu. Shɛn bɛɛri bu fɔ, weefɔɔ wʼa da ɲiifɛɛrɛ pye wɛ.» Zhewu bi lee pyi ni shizhiinmɛ ni, piimu bɛɛri pʼa labye pyi Baali mu ge, kɔnhɔ wu pee ɲuŋɔ tugo. 20 A Zhewu di jo: «Yi sipyiire ti yiri Baali wo kalenɛ nigbɔɔ li kaa na.» A pʼi kalenɛ li kaa jo caaga. 21 A Zhewu di tuduro tun kari Izirayɛli koomɔ pu bɛɛri ni. Piimu bɛɛri pʼa labye pyi Baali mu ge, a pee bɛɛri di ba, shɛn nigin bɛ ya fɔ pu ni wɛ. A pʼi ba jé Baali wo puga ki ni, a Baali puga kʼi ɲi, na lɔ ke ɲuŋɔ ke na, fo na shɛ nɔ ke na. 22 Wemu wʼa bi Baali wo pɛɛŋɛ ki wo fàya yi keree ki shɔɔnri ge, a Zhewu di wee pye: «Piimu bɛɛri pʼa labye pyi Baali mu ge, fàya kan pee bɛɛri mu.» A wee di fàya kan pu bɛɛri mu. 23 Ayiwa, a Zhewu di shɛ Baali puga ki ni ni Erekabu ja Zhonadabu ni, piimu pʼa labye pyi Baali mu ge, na ba pee pye: «Yi yiyɛ bɛɛri pɛrɛgi wii, li ganha bu shɛ da nago Tɛhɛnɛ Baa Kilɛ wo kapyebye wa wa naha yi tɛ ni wɛ, ga na Baali wo kapyebyii yɛ pu ɲɛ naha.» 24 Lee kadugo na, a pʼi jé kɔnhɔ pʼi ɲaɲiŋɛ saraya ni saraya nizogoyo wolo.
Lee bi Zhewu ta wʼa namaa kɛlɛɛ gbarataanri (80) yaha kpɛɛngɛ ki na, na pee pye: «Namaa piimu nɛ le mɛ yi keŋɛ ni ge, wa bu daa na wa yaha wʼa shɔ, weefɔɔ wo munaa li da wu wuu li faa.» 25 Ba pʼa saraya nizogoyo yi wolo xɔ wɛ, a Zhewu di kashɛnŋmuu pee ni kashɛn ɲuŋɔfɛɛ pu pye: «Yi jé yʼi pii sipyii pii gbo, shɛn nigin bɛ ganha bu shɔ pu ni!» A pʼi pu bɛɛri gbo ni ŋmɔpara ni. A kashɛnŋmuu pee ni kashɛn ɲuŋɔfɛɛ pʼi shɛ pu wà kanha ki kadugo, lee kadugo na, a pʼi guri pa kulo li ni, na ba jé fo Baali wo pɛɛŋɛ puga ki funŋɔ ki ni. 26 Pʼa bi pɛɛŋɛ benɛɛ piimu sin sin Baali puga ki ni ge, a pʼi pee lɔ yeege, na pu wá na ni. 27 Faapinnɛ lemu pʼa bi sin Baali mɛgɛ na ge, na lee waraga, na Baali wo puga ki bɛ waraga, na ki ɲɛri na pye kaloyo. Yee wa wá niɲaa we bɛ ni.
Zhewu wo saanra ti pyegana Izirayɛli koomɔ pu ni
28 Ayiwa, a Zhewu di Baali wo pɛɛŋɛ ki ɲɔ yereŋɛ mu lee yereŋɛgana li na Izirayɛli fiige ki ni. 29 Ga Nebati ja Zheroboomu bi Izirayɛli tɔɔgɔ le jurumu wemu ni, ni wee ɲɛ na sanni nupepinyɛ yi pɛlɛ Bɛtɛli kulo le, ni Dan kulo li ni ge, Zhewu ya ta laraga kɔn wee jurumu wu na wɛ.
30 A Tɛhɛnɛ Baa Kilɛ di Zhewu pye: «Mʼa kasaana pye, bani mʼa na ɲidaan kaa pye. Lemu mʼa pye Akabu wo puga ki na ge, lee ya bɛ cibɛ ni nɛ wo ɲidaan ni. Lee wuu na, ma jalaa pu na ba puyɛ fari Izirayɛli wo saanra koro li na, fo na shɛ nɔ pu sii li shishɛɛrɛ wuu li na.» 31 Ga lee bɛ na Zhewu ya ta wu zɔ wu bɛɛri kan Tɛhɛnɛ Baa Kilɛ, Izirayɛli wo Kilɛ wu wo saliya wu mu wɛ. Zheroboomu ya Izirayɛli tɔɔgɔ le jurumu wemu ni ge, wu ya ta laraga kɔn wee na wɛ.
32 Yee caya yi na, a Tɛhɛnɛ Baa Kilɛ di ɲɔ kɔn na la wo Izirayɛli wo koomɔ pu ni. A wu se kan Aramu saannaa Azayɛli mu Izirayɛli nagoo pu na, a wee di pu kɔri laha kodɛhɛnɛ li bɛɛri na. 33 A wu pu kɔri laha Zhurudɛn gba wu Kilɛ-nɔhɔ ki wo koomɔ pe, ni Aroyɛri kulo li suumɔ kulo kacɛ ki na, Arinɔ dugo ki ɲɔ ki na ma na jo Galadi ni Bashan wo koomɔ pu bɛɛri. Gadi wo tirige shɛɛn, ni Urubɛn wo tirige shɛɛn, ni Manase wo tirige shɛɛn pu bi tiin wee xuu wu ni. 34 Zhewu wo keree kisaŋaa, lemu bɛɛri wʼa pye ge, wu lowaa li bɛɛri, yee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 35 A Zhewu di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ Samari kulo li ni. A wu ja Zhowakazi di diin saanra ti na wu tɛgɛ. 36 Yee kɛlɛɛ shuun ni gbarataanri (28) Zhewu ya pye Izirayɛli ɲuŋɔ ni Samari kulo li ni.