Atali ya fanha ki lɔ, na ɲɛri saanzhɔ Zheruzalɛmu ni
(2 Caŋa Ɲɛhɛɛ Jomɔ 22:10-12)
11
Ayiwa, ba Akaziya nu Atali ya li ɲa na wee ja wʼa xu wɛ, a wu saan wu tirige shɛɛn pu bɛɛri ɲuŋɔ tugo. 2 Ga a saannaa Zhoramu poro pushɔ Yewosheba, wee bi bye Akaziya wo ceboroshɔ, a wee di Akaziya ja Zhowazi peele lɔ na yeege saan wu jalaa pu tɛ ni, pee piimu pu bi da gbo ge, na shɛ wu ni wu biivɔɔ wu ŋmɔhɔ Kilɛ-pɛɛŋɛ pugbɔhɔ ki wo yasinnɛyɛ puga ki ni. A pʼi wu kaa ŋmɔhɔ Atali na, a pʼi bye pu ya wee ta na gbo wɛ. 3 A wu niŋmɔhɔŋɔ di bye wà ni wu biivɔɔ wu ni na ta yee gbaara Tɛhɛnɛ Baa Kilɛ wo puga ki ni, lee di Atali ta wu ɲɛ saanra ti na fiige ki ɲuŋɔ ni.Zhowazi ya tìre na pye saan
(2 Caŋa Ɲɛhɛɛ Jomɔ 23:1-21)
4 Ayiwa, li yee gbarashuun wuu le, a Zhoyada di tuduro tun na pu shɛ ba ni Keretilee pee ni gɛdii pusamaa wo xhuu nigin nigin wo ɲuŋɔfɛɛ pu ni. A wu gari ni pu ni Tɛhɛnɛ Baa Kilɛ wo puga ki ni, na shɛ kariɲɛɛgɛ ɲɔmɛɛ lɔ ni pu ni, na pu pye pʼa kaa Tɛhɛnɛ Baa Kilɛ wo puga ki ni, na saan wu ja wu shɛ pu na. 5 Lee kadugo na, a wu pu pye: «Lemu yʼa da bye ge, lee li wa mɛ: Yʼa da yiyɛ taa taaya taanri, taaga kemu wo labye wu ɲɛ cadɛɛngɛ ki caŋa ge, pee di ba saan wu wo puga ki kasɛɛgɛ pyi. 6 Taaga shuun wogo kʼi da Suuri wo tajege ki kasɛɛgɛ pyi. Tajege kemu ki ɲɛ gɛdii pu kadugo yíri ge, taaga taanri wogo kʼi da kee tajege ki kasɛɛgɛ pyi. Yee taaya taanri wu bɛɛri wʼa da ba puga ki kasɛɛgɛ pyi mahaŋaa mahaŋaa. 7 Taaya shuun wusama, piimu bɛɛri wo labye wʼa xhuu cadɛɛngɛ ki caŋa ge, pee di shɛ Tɛhɛnɛ Baa Kilɛ wo puga ki kasɛɛgɛ pyi saan wu tàan. 8 Yi saan wu maha kabaya yi bɛɛri na, wa bɛɛri ni wu kashɛn yagboyo wu keŋɛ ni. Wa bɛɛri wʼa fulo yi na fanha na ge, yʼi weefɔɔ gbo. Yi na ba bye saan wu tàan wu ba se xuu bɛɛri.»
9 Saraya ɲaha shɔɔnrivɛɛ Zhoyada ya yemu bɛɛri jo ge, a xhuu nigin nigin ɲuŋɔfɛɛ pʼi yee bɛɛri pye cibɛ. A wa bɛɛri di wu sipyii lɔ, piimu wo labye wʼa ɲɔ kɔɔn cadɛɛngɛ ki caŋa, ni piimu wo labye wʼa xhuu cadɛɛngɛ ki caŋa ge, a pu bɛɛri di shɛ puyɛ ta saraya ɲaha shɔɔnrivɛɛ Zhoyada tàan. 10 Saannaa Dawuda wo ŋmasigiye, ni wu canmaa piimu pu bye Tɛhɛnɛ Baa Kilɛ wo puga ki ni ge, a saraya ɲaha shɔɔnrivɔɔ wu yee kan xhuu nigin nigin (100) ɲuŋɔfɛɛ pu mu. 11 A gɛdii pʼi pu kashɛn yagboyo yi co pu keye yi ni, na yere yere na lɔ puga ki kanige cɛ wu ni, fo na shɛ nɔ ki kamɛnɛ cɛ wu na, saraya tawologo ke, ni puga ki tàan wu ni, na saan wu maha. 12 A saraya ɲaha shɔɔnrivɔɔ wu saan wu ja wu pye wʼa fulo, na saanra ɲudɔnɔ li tɔ wu na, na kariɲɛɛgɛ ki wo sɛmɛ wu le wu keŋɛ ni. A pʼi wu teŋɛ saanra ti na, na wu tìre. A pʼi ganha na kadahara kpɔɔn, na yu: «Kilɛ wu saan wu yaha shikaragaa!»
13 Ayiwa, ba Atali ya gɛdii pee, ni sipyiire ti mujoŋɔɔ ki logo wɛ, na ba sipyiire ti yíri Tɛhɛnɛ Baa Kilɛ wo puga ki ni. 14 A wu wii, na saan wu niyerege ɲa Kilɛ-pɛɛŋɛ puga ki beni wu tàan, ma na jo ba lʼa tee na byi wɛ. Ɲuŋɔfɛɛ pee ni maya yi wivɛɛ pu bye saan wu tàan, fiige ki shɛɛn pu bɛɛri fundanga wuu di maya wi. A Atali di wu fàya shɛɛngi na sipile wá na: «Woni wu ɲɛ we! Woni wu ɲɛ we!» 15 Wee tuun wu ni a saraya ɲaha shɔɔnrivɛɛ Zhoyada di xhuu nigin nigin ɲuŋɔfɛɛ pee, ni kashɛnŋmuu pu ɲuŋɔfɛɛ pu pye na: «Yi we co yeege yiyɛ tɛ ni, shɛn bɛɛri bu daha wu fɛni yʼi weefɔɔ gbo ni ŋmɔpara ni!» Bani saraya ɲaha shɔɔnrivɔɔ wu bi jo na: «Wu ya yaa na gbo Tɛhɛnɛ Baa Kilɛ wo puga ki ni wɛ!» 16 A pʼi wu co, na gari ni wu ni saan wu wo puga ki ni shɔnyɔ yi tajege ki wo koo li ni. A pʼi shɛ wu gbo wà.
Zhoyada ya ɲɛri leŋɛ fiige ki ni
(2 Caŋa Ɲɛhɛɛ Jomɔ 23:16-21)
17 Ayiwa, a Zhoyada di kariɲɛɛgɛ ɲɔmɛɛ lɔ ni Tɛhɛnɛ Baa Kilɛ, ni saan we, ni sipyiire ti ni, kɔnhɔ sipyiire tʼi bye Tɛhɛnɛ Baa Kilɛ wo sipyii. A wu kariɲɛɛgɛ ɲɔmɛɛ la lɔ saan we ni sipyiire ti bɛ tɛ ni. 18 A fiige ki shɛɛn pu bɛɛri di jé Baali wo puga ki ni, na ki waraga, na wu saraya tawoloyo ye, ni wu jaalaa pu ja ja, na Baali wo saraya ɲaha shɔɔnrivɔɔ Matan gbo saraya tawoloyo yi ɲahagbaa na. A saraya ɲaha shɔɔnrivɛɛ Zhoyada di kasɛɛgɛ pyevɛɛ pii teŋɛ Tɛhɛnɛ Baa Kilɛ wo puga ki na. 19 A wu xhuu nigin nigin (100) wo ɲuŋɔfɛɛ pu lɔ, ni Keretilee pee, ni gɛdii pee, ni fiige ki shɛɛn pu bɛɛri. A pʼi saan wu lɔ yeege Tɛhɛnɛ Baa Kilɛ wo puga ki ni, na doro ni wu ni gɛdii pu wo tajege ki wo koo li ni na kari saan wu wo puga ki ni, na shɛ wu teŋɛ saanra koro li na. 20 A fiige ki shɛɛn pu bɛɛri di ganha na fundanga pyi, a kulo lʼi ɲaɲiŋɛ ta. Atali wi ge, lee bi pu ta pʼa wee gbo ni ŋmɔpara ni, saan wu wo puga ki ni.