Zhowazi ya pye Zhuda koomɔ pu wo saan we
(2 Caŋa Ɲɛhɛɛ Jomɔ 24:1-3)
12
Ayiwa, Zhowazi ya teŋɛ saanra ti na tuun wemu ni ge, wu shi wu bye yee gbarashuun na. 2 Zhewu wo saanra ti yee gbarashuun wuu li na Izirayɛli wo koomɔ pu ɲuŋɔ ni, Zhowazi ya teŋɛ na pye saan Zhuda wo koomɔ pu ɲuŋɔ ni. A wu yee kɛlɛɛ shishɛɛrɛ (40) pye saanra ti na Zheruzalɛmu kulo li ni. Wu nu wu mɛgɛ ki bye na Zibiya, na yìri Bɛɛrisheba kulo li ni. 3 Zhowazi bi Tɛhɛnɛ Baa Kilɛ ɲidaan pyi wu shi wu caŋa ɲɛhɛɛ ki bɛɛri ni, bani saraya ɲaha shɔɔnrivɛɛ Zhoyada wu bi wu kalaa. 4 Ga lee bɛ na gan tapyeye yi bi ta ɲɔ gbo wɛ. Sipyiire ti bi saraya ni nudanga yawurire wo sanha gan tapyeye yi ni.Zhowazi ya pu pye pʼa Kilɛ-pɛɛŋɛ pugbɔhɔ ki yàa
(2 Caŋa Ɲɛhɛɛ Jomɔ 24:4-14)
5 Ayiwa, caŋa ka Zhowazi ya pa saraya ɲaha shɔɔnrivɛɛ pu pye: «Wari wemu bɛɛri pʼa wo na gaan Tɛhɛnɛ Baa Kilɛ mu wu wo pɛɛŋɛ puga ki ni ge, yi wu bɛɛri pinnɛ. Katahaŋaa ki wo wari we, ni ɲuwuuro ti wo we, ni wemu pʼa wo na gaan daan na mu funŋɔ ni ge. 6 Pii pʼa wari wu shuu ge, yi pee pye pʼi wu bɛɛri shɔ pa yi kan. Tɛyɛ yemu yʼa kyɛɛgi Kilɛ-pɛɛŋɛ puga ki ni ge, yi yee bɛɛri yàa.»
7 Ga fo na shɛ nɔ saannaa Zhowazi wo saanra ti yee kɛlɛɛ shuun ni taanri (23) wuu li na, saraya ɲaha shɔɔnrivɛɛ pu bi ta Kilɛ-pɛɛŋɛ puga ki takyɛɛgɛyɛ yi yàa wɛ. 8 A saannaa Zhowazi di saraya ɲaha shɔɔnrivɛɛ Zhoyada yiri, na fara saraya ɲaha shɔɔnrivɛɛ pusamaa na, na ba pu pye: «Ɲaha na yee di ta Kilɛ-pɛɛŋɛ puga ki takyɛɛgɛyɛ yi yàa-i wɛ? Na co nimɛ na, pii pʼa wari wu shuu ge, yi ganha ba wu shuu nige pee mu wɛ. Yʼa wu yɛri wà, pu da Kilɛ puga ki wo takyɛɛgɛyɛ yi yari ni wu ni.» 9 Ayiwa, a saraya ɲaha shɔɔnrivɛɛ pʼi sɔɔ lee na, na pu tɔɔgɔ wolo wari shɔɔ li ni, na pu tɔɔgɔ wolo Kilɛ puga ki takyɛɛgɛyɛ yi wo yàa wu bɛ ni. 10 Lee funŋɔ ni, a saraya ɲaha shɔɔnrivɛɛ Zhoyada di keshi wa lɔ, na wu ɲɔtɔŋɔ ke furi, na wu yaha saraya yi tawologo ki tàan, kanige cɛ wu ni, Tɛhɛnɛ Baa Kilɛ wo puga ki tajege ki wo koo li ni. Saraya ɲaha shɔɔnrivɛɛ piimu pʼa tajege ki ɲɔ ki sigee ge, wari wemu bɛɛri wʼa ma Tɛhɛnɛ Baa Kilɛ wo puga ki ni ge, a pee di ganha na wee bɛɛri leni wà. 11 Pu ba li ɲa tuun wemu ni na wari niɲɛhɛmɛ ya jé keshi wu ni, saan wu wo kama kavɔɔ we, ni saraya ɲaha shɔɔnrivɛɛ wo ɲuŋɔfɔgbɔ wu na ba, na ba bɔrɔgɔ ka shan, na wu tɔrɔ le wà. 12 Ba pʼa wu tɔrɔ xɔ wɛ, piimu pʼa labye wu pyi Tɛhɛnɛ Baa Kilɛ wo puga ki ni ge, pʼa wari wu kaa le pee wo ɲuŋɔfɛɛ pu keŋɛ ni. Pee ma ganha na Tɛhɛnɛ Baa Kilɛ wo puga ki wo labye wu pyevɛɛ pu saraa ni wee ni, ma na jo titɛmɛɛ pee, 13 ni mɔzɔɔn pee, ni faaya tɛvɛɛ pee, ni tiin shɔvɛɛ pee, ni faaya shɔvɛɛ pee, ni Tɛhɛnɛ Baa Kilɛ wo puga ki yàa yàa labye wu bɛɛri wo pyevɛɛ pee. 14 Ga wari wemu ni sipyiire ti bi ma Tɛhɛnɛ Baa Kilɛ wo puga ki ni ge, pu bi ta na wee luu na daga na Tɛhɛnɛ Baa Kilɛ wo puga ki wo warifyɛn tasaa pee, ni ŋmɔhɔɔ kee, ni kuzhɔyɔ, ni maya yi yari wɛ, pu bi wu taga na sanni yaaga ka shishiin, kelee warifyɛn yaaga ka shishiin yari wɛ. 15 Piimu pu bi labye wu pyi ge, pee mu pu bi wu kaan, kɔnhɔ pu da wu taga pʼa Tɛhɛnɛ Baa Kilɛ wo puga ki takyɛɛgɛyɛ yi yari. 16 Piimu mu pu bi wee wari wu kaan pu na gaan labye wu pyevɛɛ pu mu ge, pu bi wee wari wu ɲɛɛrɛa yegee pee mu wɛ, bani pu bi wee labye we pyi ni tifire ni. 17 Wari wemu wu bi daa yaaŋa ki wo saraya ye, ni jurumu yafa wo saraya yi koo ni ge, pu bi se ni wee ni Tɛhɛnɛ Baa Kilɛ wo puga ki ni wɛ. Wee bye saraya ɲaha shɔɔnrivɛɛ pu wo.
Zhowazi wo saanra ti taxɔgɔ
(2 Caŋa Ɲɛhɛɛ Jomɔ 24:23-27)
18 Ayiwa, wee tuun we ni Aramu fiige ki saan Azayɛli ya shɛ do Gati kulo li na, na li co. Lee kadugo na, a wu ganha na giin wu shɛ do Zheruzalɛmu kulo li bɛ na. 19 Zhuda saannaa Zhowazi bi yaŋmuyɔ yemu bɛɛri yaha Tɛhɛnɛ Baa Kilɛ yahama ni ge, ni wu tii pee, Zhuda wo saannaa pee, Zhozafati, ni Zhoramu, ni Akaziya, pee bɛ bi yaŋmuyɔ yemu bɛɛri yaha Tɛhɛnɛ Baa Kilɛ yahama ni ge, a Zhowazi di yee bɛɛri lɔ, ni Tɛhɛnɛ Baa Kilɛ wo puga ki naafuu wu tayahaya ye, ni saan wu puga ki wo naafuu tayahaya yi wo sanni wu bɛɛri, na yee kan pʼa shɛ gan Azayɛli mu, Aramu fiige ki wo saan we, a wu da Zheruzalɛmu kulo li yaha wà, na gari.
20 Ayiwa, Zhowazi wo kapyegee kisaŋaa, lemu bɛɛri wʼa pye ge, lee ya ka Zhuda saannaa pu wo caŋa ɲɛhɛɛ jomɔ pu wo sɛmɛ wu ni. 21 Wu fanha ki sipyigbɔɔ pʼa pa yìri wu fɛni, na woni pye wu kaa na. A pʼi wu gbo Bɛti-Milo kulo li ni, Sila wo tigitigimɛ pu ni. 22 Shimeyati ja Yozabadi, ni Shomɛri ja Yewozabadi, pee piimu pu ɲɛ wu wo fanha ki sipyigbɔɔ pu ge, pee pʼa wu gbo. A pʼi wu ɲuŋɔ ŋmɔhɔ ni wu tii pu ni, Dawuda wo kulo li ni. A wu ja Amaziya di diin saanra ti na wu tɛgɛ.