2 Saannaa 13

Zhowakazi ya teŋɛ na pye Izirayɛli koomɔ pu wo saan we

Ayiwa, Akaziya ja Zhowazi wo saanra ti yee kɛlɛɛ shuun ni taanri (23) wuu le, Zhuda koomɔ pu ɲuŋɔ ni, lee yee le Zhewu ja Zhowakazi ya teŋɛ na pye saan Izirayɛli koomɔ pu ɲuŋɔ ni Samari kulo li ni. A wu yee kɛ ni gbarashuun pye saanra ti ni. 2 Lemu lʼa kolo Tɛhɛnɛ Baa Kilɛ mu ge, a wu ganha na lee pyi. Nebati ja Zheroboomu ya Izirayɛli nagoo pu tɔɔgɔ le jurumu wemu ni ge, wu ya ta laraga kɔn wee jurumu wu na wɛ, a wu daha wee fɛni. 3 A Tɛhɛnɛ Baa Kilɛ di luu yirige Izirayɛli nagoo pu tàan. A wu pu le Azayɛli keŋɛ ni, Aramu fiige ki wo saan we, na pu le Bɛni-Adadi bɛ keŋɛ ni Azayɛli wo ja we, fo na taatuunnɔ pye lee ni. 4 Ga a Zhowakazi di ba Tɛhɛnɛ Baa Kilɛ ɲɛɛri na wu luu gbo pee tàan, a Tɛhɛnɛ Baa Kilɛ di wu ɲɛrɛgɛ ki logo, ma li kaɲuŋɔ pye wu bi Izirayɛli nagoo pu wo ɲaa wu ɲa. Bani Aramu fiige ki saan wu bi ɲaa woni pu na. 5 A Tɛhɛnɛ Baa Kilɛ di ɲuŋɔ wolovɔɔ kan Izirayɛli mu. A Izirayɛli nagoo pʼi shɔ Aramu fiige shɛɛn pu na. A pʼi guri tiin sanha pu faya buguloo pu ni, ba taashiinɛ li ɲɛ wɛ. 6 Ga Zheroboomu wo puga kʼa bi Izirayɛli nagoo pu tɔɔgɔ le jurumu wemu ni ge, pu ya ta laraga kɔn wee jurumu wu na wɛ, a pʼi daha yaha wee jurumu wu na. Ali Ashera wo pɛɛŋɛ tinnɛ li bye li talɛgɛ ni Samari kulo li ni. 7 Zhowakazi wo kashɛn keŋɛ ki bɛɛri ni, shɔnduguloo kɛlɛɛ kaguro (50) yɛ wu bi kori, ni kashɛn wotoriyo kɛ, ni kashɛnŋmuu tɔdiiye fɛɛ kabɔfoŋɔɔ kɛ (10.000), bani Aramu saan wu bi wu kashɛn keŋɛ ki bɛɛri ɲuŋɔ tugo. Wu bi pu bugo ba pʼa pomyɛ bugoo mɛ ni tɔɔyɔ ni wɛ. 8 Zhowakazi wo kapyegee kisaŋaa, lemu bɛɛri wʼa pye ge, wu na pye naŋmaga, yee ya ka Izirayɛli wo saannaa pu wo caŋa ɲɛhɛɛ jomɔ pu wo sɛmɛ wu ni. 9 A Zhowakazi di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ Samari kulo li ni. A wu ja Zhowazi di diin saanra ti na wu tɛgɛ.

Zhowazi ya teŋɛ na pye Izirayɛli koomɔ pu wo saan we

10 Ayiwa, Zhuda saannaa Zhowazi wo saanra ti yee kɛlɛɛ taanri ni gbarashuun (37) wuu le, lee yee le Zhowakazi ja Zhowazi bɛ ya teŋɛ na pye Izirayɛli koomɔ pu wo saan Samari kulo li ni. A wu yee kɛ ni gbaara pye saanra ti ni. 11 Lemu lʼa kolo Tɛhɛnɛ Baa Kilɛ mu ge, lee wu bi byi. Nebati ja Zheroboomu ya Izirayɛli nagoo pu tɔɔgɔ le jurumu wemu ni ge, wu ya ta laraga kɔn wee jurumu wa shishiin na wɛ, ga na daha yaha wee jurumu wu fɛni na byi. 12 Zhowazi wo kapyegee kisaŋaa, lemu bɛɛri wʼa pye ge, wu na pye naŋmaga, ni kashɛn kemu wʼa ŋmɔ ni Zhuda koomɔ pu wo saan Amaziya ni ge, yee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 13 A Zhowazi di shɛ binnɛ ni wu tii pu ni yaŋa kanha na, a Zheroboomu di diin saanra ti na wu tɛgɛ. A pʼi Zhowazi le Samari kulo li ni, ni Izirayɛli wo saannaa pu ni.

Kilɛ tudunmɔɔ Elize ya xu

14 Ayiwa, ba Elize ya pa do wu xu xu gban wu na wɛ, a Zhowazi di shɛ foro wu na, Izirayɛli wo saan we, na ganha na mɛɛ suu wu na, na yu: «Tofɔɔ we! Tofɔɔ we! Go mu wu bi bye Izirayɛli wo kashɛn wotoriyo ye, ni wu shɔnduguloo pee!» 15 A Elize di jo: «Sindaa ka lɔ ni ŋmaya ya!» A wu sindaa ka ni ŋmaya ya lɔ. 16 Lee kadugo na, a Elize di wu pye: «Sindaa ki durogo!» A wu sindaa ki durogo. Wee tuun wu ni, a Elize di wu keye taha saan wu wo keye yi na, 17 na jo: «Fɛnɛtiri wu mugi Kilɛ-nɔhɔ kacɛ ki na!» A wu fɛnɛtiri wu mugi. A Elize di jo: «Ki ŋmɔ!» A wu ki ŋmɔ. A Elize di jo: «Setaara wo ŋmaga ki wa Tɛhɛnɛ Baa Kilɛ mu, setaara wo ŋmaga ki wa Aramu shɛɛn pu fɛni. Ma na ba se ta Aramu shɛɛn pu na Afɛki kulo li ni, fo na pu ɲuŋɔ tugo.» 18 A Elize di jo sanha na: «Ŋmaya yi lɔ!» A wu ŋmaya yi lɔ. A Elize di Izirayɛli wo saan wu pye: «Ɲiŋɛ ki kpɔn!» A saan wu ɲiŋɛ ki kpɔn tɔɔɲii taanri, na yere. 19 A Kilɛ wo ná wu luu di yìri saan wu tàan, a wu jo: «Mu bi yaa na ɲiŋɛ ki kpɔn na nɔ tɔɔɲii kaguro kelee gbaara shi na, lee da bi pye, mu bi da ba se ta Aramu fiige ki shɛɛn pu na, fo na pu ɲuŋɔ tugo. Ga nimɛ tɔɔɲii taanri yɛ funŋɔ ni ma da ba se ta pu na.»

20 A Elize di xhu, a pʼi wu ɲuŋɔ ŋmɔhɔ.

Yee bɛɛri Mowabu shɛɛn bi ma na dun Izirayɛli koomɔ pu shɛɛn pu na. 21 Caŋa ka, na pu yaha pu na ná wa leni faya yi ni, a pʼi kee kashɛn keŋɛ ka ɲa. Ba pʼa kashɛn keŋɛ ki ɲa wɛ, na gbo wu wá Elize wo faŋa ki ni. A gbo wu shɛ gbɔn Elize wo kaciiye yi na, na ɲɛ na foro xu ni, na yìri.

Zhowazi ya kuri kulogoo niɲɛhɛŋɛɛ shɔ Aramu shɛɛn pu na

22 Ayiwa, Aramu fiige ki saan Azayɛli bi ɲaa woni Izirayɛli nagoo pu na Zhowakazi wo caŋa ɲii li bɛɛri ni. 23 Ga a Tɛhɛnɛ Baa Kilɛ di ba ɲuŋɔ ɲaari pu na. A pu ɲiɲaara di ba jé wu ni, a wu ɲaha tagi pu yíri wu kariɲɛɛgɛ ki wuu na, kee kemu wʼa bi lɔ ni Ibirayima ni Ishaaga ni Yakuba ni ge. Wu ya ta sɔɔ na pu ɲuŋɔ tugo wɛ, wu di bi sanha pu kɔri wà taliige ni wɛ. 24 A Azayɛli di ba xhu, Aramu fiige ki saan we, a wu ja Bɛni-Adadi di diin saanra ti na wu tɛgɛ. 25 Azayɛli bi kulogoo kiimu shɔ Zhowazi wo to Zhowakazi na kashɛn ki ni ge, a Zhowazi bɛ di guri kee shɔ Azayɛli ja Bɛni-Adadi na. A Zhowazi di se ta wu na na nɔ tɔɔɲii taanri na, na guri Izirayɛli wo kulogoo ki shɔ wu na.