Amaziya ya pye Zhuda koomɔ pu wo saan
(2 Caŋa Ɲɛhɛɛ Jomɔ 25:1-4, 11-12)
14
Ayiwa, Zhowakazi ja Zhowazi wo saanra ti yee shuun wuu le Izirayɛli koomɔ pu ɲuŋɔ ni, lee yee le Zhowazi ja Amaziya ya teŋɛ na pye Zhuda koomɔ pu wo saan. 2 Wu shi wu bye yee kɛlɛɛ shuun ni kaguro (25) wu teŋɛduun wu ni saanra ti na. A wu yee kɛlɛɛ shuun ni gbarashɛɛrɛ (29) pye saanra ti na Zheruzalɛmu ni. Wu nu wu mɛgɛ ki bye na Yewodan, na ɲɛ Zheruzalɛmu shɛn. 3 Lemu lʼa dan Tɛhɛnɛ Baa Kilɛ ni ge, lee wu bi byi, ga wu di bi ta wu to Dawuda xɔ wɛ. Lemu wu to Zhowazi bi byi ge, lee wu bɛ bi byi cibɛ. 4 Lee bɛ na faaboboyo yi wo gan tapyeye yi ɲuŋɔ bi ta tugo wɛ. Sipyiire ti bi se na saraya ni nudanga yawurire wo yee gan tapyeye yi ni.5 Tuun wemu ni wu saanra tʼa pa fanha ta ge, wu fanha ki sipyigbɔɔ piimu pʼa bi wu to wu gbo na wu yaha saanra ti na ge, a wu pee gbo. 6 Ga wu ya ta pu jalaa pu gbo wɛ, na saha ni Tɛhɛnɛ Baa Kilɛ wo jomɔ pu ni Musa wo saliya sɛmɛ wu ni. Lʼa ka wà na: «Tii pu wa da ba xhuli jalaa pu wo jurumu wuu na wɛ, jalaa pu bɛ wa da ba xhuli tii pu wo jurumu wuu na wɛ. Wa bɛɛri na ba gbo wuyɛ pyaa wo jurumu wu wuu na.»
7 A Amaziya di Edomu kashɛnŋmuu kabɔfoŋɔɔ kɛ (10.000) gbo suumɔ pu wo faaya yi tɛ fawii li ni. Kee kashɛn ki tɔɔgɔ fɛni wʼa Sela kulo li co, na li mɛgɛ le na Yokitɛli. Kee mɛgɛ ke ki wa lee kulo li na, fo na pa nɔ niɲaa na.
Izirayɛli wo saan Zhowazi ya se ta Amaziya na
(2 Caŋa Ɲɛhɛɛ Jomɔ 25:17-24)
8 Ayiwa lee kadugo na, a Amaziya di tudunmɔɔ pii tun Izirayɛli wo saan wu mu, wee wemu wu ɲɛ Zhowazi ge, na wu pye: «Wù dodoyo tiiŋɛ yiyɛ na!» Zhowakazi ja wu bye Zhowazi, Zhowakazi di ɲɛ Zhewu wo ja. 9 A Izirayɛli wo saan Zhowazi di yi yaha shɛ jo Zhuda wo saan Amaziya mu na: «Caŋa ka Liban fiige ki wo xhuyo taha kʼa pa tuduro tun pu shɛ jo Liban fiige ki wo sɛdiri tige ki mu na: ‹Ma poro wu kan na ja wu mu wu pye wu shɔ!› Ga a Liban fiige ki wo naŋa yaaga ka di ɲaari jé xhuyo taha ki ni, na ki tanhana shan. 10 Mʼa se ta Edomu fiige ki na, a lee di tabaara leŋɛ ma ni. Kee ɲuyirige ke mʼa ta ge, kori ni kee ni, mʼa diin ma wo fiige ki ni! Ɲaha fɛni ma di zhaa di mayɛ kan bɔɔngɔ mu wɛ? Ma na ba mayɛ ɲuŋɔ tugo, na Zhuda koomɔ pu bɛ ɲuŋɔ tugo!» 11 Ga Amaziya ya ta yee logo wɛ. Wee tuun wu ni a Izirayɛli wo saan Zhowazi wu gari wu fɛni kashɛn ki na. A pʼi shɛ dodoyo tiiŋɛ yiyɛ na, wu ni Zhuda saannaa Amaziya ni, Zhuda koomɔ pu wo Bɛti-Shemɛshi kulo li ni. 12 A Izirayɛli shɛɛn pʼi se ta Zhuda shɛɛn pu na, a Zhuda shɛɛn pu bɛɛri di baa caaga na kari pu fàya buguloo pu ni. 13 A Izirayɛli saannaa Zhowazi di Zhuda saannaa Amaziya co na pye kashɛn bulo Bɛti-Shemɛshi kulo li ni, Akaziya ja Zhowazi wo ja we. A Zhowazi di gari Zheruzalɛmu kulo li ni, na shɛ keŋɛ ɲii xhuu shishɛɛrɛ (400) kapahaŋa ka kɔn kulo li maha maha kasɔrɔgɔ ki na, na co Efirayimu wo tajege ki na, fo na shɛ nɔ Gunŋmii li wo tajege ki na. 14 A wu sanni wu bɛɛri, ni wari wu lɔ, yaŋmuyɔ yemu bɛɛri yi bye Tɛhɛnɛ Baa Kilɛ wo puga ki ni, ni saan wu puga ki wo naafuu tayahaŋa ki ni ge, a wu yee bɛɛri lɔ. A wu kashɛn buloo pu bɛ lɔ, lee kadugo na, a wu guri kari Samari fiige ki ni.
15 Ayiwa, Zhowazi wo kapyegee kisaŋaa, lemu wʼa pye ge, wu na pye naŋmaga, ni wu kashɛn ke, kee kemu wʼa kɔn Zhuda saannaa Amaziya na ge, yee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 16 A Zhowazi di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ Samari kulo li ni, ni Izirayɛli wo saannaa pu ni. A wu ja Zheroboomu di diin saanra ti na wu tɛgɛ.
(2 Caŋa Ɲɛhɛɛ Jomɔ 25:25-28)
17 Ayiwa, Zhowakazi ja Zhowazi, Izirayɛli wo saan we, wee nixhugo na, Zhuda saannaa Amaziya ya yee kɛ ni kaguro pye lee kadugo na, Zhowazi wo ja we. 18 Amaziya wo kapyegee kisaŋaa, kee ya ka Zhuda saannaa pu wo caŋa ɲɛhɛɛ jomɔ pu wo sɛmɛ wu ni. 19 Pʼa pa woni pye wu kaa na Zheruzalɛmu kulo li ni, a wu baa kari Lakishi kulo li ni. A pʼi wu nɔhɔ niinɛ na kari Lakishi ni, na shɛ wu gbo wà. 20 A pʼi wu nixhugo ki taha shɔnyɔ na na kuri pa, na ba wu ɲuŋɔ ŋmɔhɔ Zheruzalɛmu ni ni wu tii pu ni, Dawuda wo kulo li ni.
(2 Caŋa Ɲɛhɛɛ Jomɔ 26:1-2)
21 Ayiwa, a Zhuda shɛɛn pu bɛɛri di Azariya co, na wu teŋɛ saanra ti na wu to Amaziya tɛgɛ, lee bi wu ta yee kɛ ni gbaara na. 22 Wee wʼa kuri Elati kulo li co, na li yaavonɔ yàa na pye Zhuda koomɔ pu wuu. Lee ya pye wu to saannaa Amaziya nixhugo ki na.
Zheroboomu II ya pye Izirayɛli koomɔ pu wo saan
23 Ayiwa, Zhowazi ja Amaziya wo saanra ti yee kɛ ni kaguro wuu le Zhuda koomɔ pu ɲuŋɔ ni, lee yee le Zhowazi ja Zheroboomu ya teŋɛ na pye Izirayɛli koomɔ pu wo saan Samari kulo li ni. A wu yee kɛlɛɛ shishɛɛrɛ ni nigin (41) pye saanra ti ni. 24 Lemu lʼa kolo Tɛhɛnɛ Baa Kilɛ mu ge, lee wu bi byi. Nebati ja Zheroboomu ya Izirayɛli nagoo pu tɔɔgɔ le jurumu wemu ni ge, wu ya ta laraga kɔn wee jurumu wa shishiin na wɛ. 25 Izirayɛli koomɔ pʼa bi buun kulogoo kiimu bɛɛri ni ge, a wu guri na kee bɛɛri co na pye Izirayɛli wogoo sanha, na co Amati wo tajege ki na, suumɔ kulo kacɛ ki na, fo na shɛ nɔ suumɔ loxugo ki na, woroo kulo kacɛ ki na, na saha ni Tɛhɛnɛ Baa Kilɛ, Izirayɛli wo Kilɛ wu wo nijoyo yi ni wu tudunmɔ, Amitayi ja Zhonasi mu, na yìri Gati-Efɛri kulo li ni. 26 Bani Tɛhɛnɛ Baa Kilɛ bi Izirayɛli koomɔ pu wo cɔnrɔmɔ nigbɔ pu ɲa. Sipya nigin bɛ bye Iziryɛli nagoo pu ni, wu bulo, kelee wu xhɔɔri, wemu na já Izirayɛli ɲuŋɔ wolo wɛ. 27 Na ta Tɛhɛnɛ Baa Kilɛ di ya ta jo na wee da Izirayɛli wo mɛgɛ ki fɔrɔgɔ di laha ɲiŋɛ ki na wɛ. Lee wuu na wʼa pu ɲuŋɔ wolo Zhowazi ja Zheroboomu keŋɛ fɛni.
28 Ayiwa, Zheroboomu wo kapyegee kisaŋaa, lemu bɛɛri wʼa pye ge, wu na pye naŋmaga kashɛn sige ki ni, ni wʼa Damasi kulo le, ni Amati kulo li shɔ Zhuda na shɔgana lemu na, na pye Izirayɛli woyo, yee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 29 A Zheroboomu di shɛ binnɛ ni wu tii pu ni yaŋa kanha na, Izirayɛli wo saannaa pee. A wu ja Zakariya di diin saanra ti na wu tɛgɛ.