Azariya ya teŋɛ na pye Zhuda koomɔ pu saan
(2 Caŋa Ɲɛhɛɛ Jomɔ 26:3-4)
15
Ayiwa, saannaa Zheroboomu wo saanra ti yee kɛlɛɛ shuun ni gbarashuun (27) wuu le Izirayɛli koomɔ pu ɲuŋɔ ni, lee yee le Amaziya ja Azariya ya teŋɛ na pye Zhuda koomɔ pu wo saan we. 2 Wu shi wu bye yee kɛ ni gbaara, wu teŋɛduun wu ni saanra ti na. A wu yee kɛlɛɛ kaguro ni shuun (52) pye saanra ti ni Zheruzalɛmu kulo li ni. Wu nu wu mɛgɛ ki bye na Yekoliya, Zheruzalɛmu shɛn wu bye wii. 3 Lemu li bi dan Tɛhɛnɛ Baa Kilɛ ni ge, lee wu bi byi cibɛ ba wu to Amaziya bɛ bi li pyi wɛ. 4 Ga lee bɛ na, gan tapyeye yi ɲuŋɔ ya ta tugo wɛ. Sipyiire ti bi saraya ni nudanga yawurire wo sanha yee gan tapyeye yi ni.(2 Caŋa Ɲɛhɛɛ Jomɔ 26:16-23)
5 Ayiwa, a Tɛhɛnɛ Baa Kilɛ di ba yama pa wá saan wu na. A wu ɲɛri togo fɔɔ, fo na shɛ nɔ wu caxhugo na. A pʼi shɛ wu yaha wu yɛ nigin puga ka ni, kɔnhɔ wu laraga kɔn sipyiire ti na. Wu ja Zhotamu, wee wemu wu bi bye wu puga ki wo kaɲahashɔnrimɔ wu ge, a wee di ganha na fiige ki keree ki shɔɔnri. 6 Azariya wo kapyegee kisaŋaa, lemu bɛɛri wʼa pye ge, yee ya ka Zhuda wo saannaa pu wo caŋa ɲɛhɛɛ jomɔ pu wo sɛmɛ wu ni. 7 A Azariya di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ ni wu tii pu ni Dawuda wo kulo li ni. A wu ja Zhotamu di diin saanra ti na wu tɛgɛ.
Zakariya ya pye Izirayɛli koomɔ pu wo saan we
8 Ayiwa, Zhuda saannaa Azariya wo saanra ti yee kɛlɛɛ taanri ni gbarataanri (38) wuu le, lee yee le Zheroboomu ja Zakariya ya pye saan Izirayɛli koomɔ pu ɲuŋɔ ni, Samari kulo li ni. A wu yebyaa gbaara pye saanra ti ni. 9 Lemu lʼa kolo Tɛhɛnɛ Baa Kilɛ mu ge, lee wu bi byi, ma na jo ba wu tii pʼa li pye toro wɛ. Nebati ja Zheroboomu ya Izirayɛli nagoo pu tɔɔgɔ le jurumu wemu ni ge, wu ya ta laraga kɔn wee jurumu wu na wɛ. 10 A Yabɛshi ja Shalumu di ba woni pye wu kaa na, na wu gbo sipyiire ti ɲii na, na diin saanra ti na wu tɛgɛ. 11 Zakariya wo kapyegee kisaŋaa, kee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni.
12 Lee bɛɛi ya pye mu lee pyegana li na, ba Tɛhɛnɛ Baa Kilɛ bi yi jo Zhewu mu wɛ na: «Ma jalaa pu na ba dɛn Izirayɛli koomɔ pu wo saanra ti na, fo na shɛ nɔ pu sii li shishɛɛrɛ wuu li na.» A li shiin di bye mu.
Shalumu ya teŋɛ na pye Izirayɛli koomɔ pu wo saan we
13 Ayiwa, Zhuda saannaa Oziyasia wo saanra ti yee kɛlɛɛ taanri ni gbarashɛɛrɛ (39) wuu le, lee yee le Yabɛshi ja Shalumu ya teŋɛ na pye Izirayɛli koomɔ pu wo saan. A wu yeŋɛ nigin pye saanra ti ni Samari kulo li ni. 14 A Gadi ja Menayɛmu di ba yìri Tirisa kulo li ni, na gari Samari kulo li ni, na shɛ Yabɛshi ja Shalumu gbo Samari ni, na diin saanra ti na wu tɛgɛ. 15 Shalumu wo kapyegee kisaŋaa, ni wʼa woni wemu pye ge, yee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni.
16 Ayiwa, a Menayɛmu di shɛ do Tifisa kulo li na, na li sipyii pu gbo, ni li koomɔ pu sipyii pu bɛɛri na co fo Tirisa kulo li na, bani kulo li shɛɛn pu bi li she pu da kulo li gburaya yi mugi wu mu wɛ. Cèe piimu bɛɛri pu ɲɛ ni lahaa ni ge, a wu pee bɛɛri wo yacɛrɛɛ ki puri puri.
Menayɛmu ya pye Izirayɛli koomɔ pu wo saan we
17 Ayiwa, Zhuda saannaa Azariyab wo saanra ti yee kɛlɛɛ taanri ni gbarashɛɛrɛ (39) wuu le, lee yee le Gadi ja Menayɛmu ya teŋɛ na pye Izirayɛli koomɔ pu wo saan. A wu yee kɛ pye saanra ti ni Samari ni. 18 Lemu lʼa kolo Tɛhɛnɛ Baa Kilɛ mu ge, a wu ganha na lee pyi. Wu shi caŋa ɲɛhɛɛ ki bɛɛri ni, Nebati ja Zheroboomu ya Izirayɛli nagoo pu tɔɔgɔ le jurumu wemu bɛɛri ni ge, wu ya ta laraga kɔn wee na wɛ. 19 Menayɛmu wo saanra ti caŋa ɲii li ni Asiri fiige ki saan Pulic ya pa ba Izirayɛli nagoo pu fɛni caŋa ka. A Menayɛmu di warifyɛn tonɔɔ kɛlɛɛ taanri ni shishɛɛrɛ (34) kan Puli mu, na wu wee tɛgɛ, kɔnhɔ saanra tʼi fanha ta wu keŋɛ ni. 20 Menayɛmu bi wee wari we taha taha Izirayɛli kabyaa fɛɛ pu bɛɛri na, wa bɛɛri wu wari tuuyo kɛlɛɛ kaguro (50). A wu wee wá wuyɛ na, na wee kan Asiri saan wu mu. Ba lee ya pye wɛ, a Asiri wo saan wu fiige ki yaha, na guri kari. 21 Menayɛmu wo kapyegee kisaŋaa, keree kiimu bɛri wʼa pye ge, kee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 22 A Menayɛmu di shɛ binnɛ ni wu tii pu ni yaŋa kanha na, a wu ja Pekakiya di diin saanra koro li na wu tɛgɛ.
Pekakiya ya teŋɛ na pye Izirayɛli koomɔ pu wo saan we
23 Ayiwa, Zhuda saannaa Azariya wo saanra ti yee kɛlɛɛ kaguro (50) wuu le, lee yee le Menayɛmu ja Pekakiya ya teŋɛ na pye Izirayɛli koomɔ pu wo saan, Samari kulo li ni. A wu yee shuun pye saanra ti ni. 24 Lemu lʼa kolo Tɛhɛnɛ Baa Kilɛ mu ge, lee Pekakiya bi byi. Nebati ja Zheroboomu ya Izirayɛli nagoo pu tɔɔgɔ le jurumu wemu ni ge, Pekakiya ya ta laraga kɔn wee jurumu we na wɛ. 25 Pekakiya wo jaragbɔ fɔɔ wa, na Peka, wee bye Eremaliya wo ja, wee ya pa woni pye Pekakiya kaa na, na wu gbo Samari ni, wu saanra puga ki ni, na fara Aragobu ni Ariye yɛ bɛ na. Galadi shɛɛn namaa kɛlɛɛ kaguro (50) wu bye ni wu ni. Ba pʼa saan wu gbo wɛ, a Peka di diin saanra ti na wu tɛgɛ. 26 Pekakiya wo kapyegee kisaŋaa, lemu bɛɛri wʼa pye ge, yee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni.
Peka ya teŋɛ na pye Izirayɛli koomɔ pu wo saan we
27 Ayiwa, Zhuda saannaa Azariya wo saanra ti yee kɛlɛɛ kaguro ni shuun (52) wuu le, lee yee le Eremaliya ja Peka ya teŋɛ na pye Izirayɛli koomɔ pu wo saan, Samari kulo li ni. A wu yee kɛlɛɛ shuun (20) pye saanra ti ni. 28 Lemu lʼa kolo Tɛhɛnɛ Baa Kilɛ mu ge, lee wu bi byi. Nebati ja Zheroboomu ya Izirayɛli nagoo pu tɔɔgɔ le jurumu wemu ni ge, wu ya ta laraga kɔn wee jurumu wu na wɛ. 29 Izirayɛli wo saan Peka wo saanra ti caŋa ɲii li ni, Asiri saan Tigilati-Pilezɛrid ya pa do Izirayɛli nagoo pu na, na Iyɔn kulo li co, ni Abɛli-Bɛti-Maka kulo le, ni Zhanoki kulo le, ni Kedɛshi kulo le, ni Asɔri kulo le, ni Galadi kulo le. A wʼi Galile fiige ki bɛ co na fara Nɛfitali bɛ wo fiige ki na. A wʼi pee sipyii pu kuu na kari Asiri fiige ki ni. 30 A Ela ja Oze bɛ di ba woni pye Eremaliya ja Peka kaa na, na wu gbo, na diin saanra ti na wu tɛgɛ. Lee ya pye Oziyasi ja Zhotamu wo saanra ti yee kɛlɛɛ shuun (20) wu na. 31 Peka wo kapyegee kisaŋaa, keree kiimu bɛɛri wʼa pye ge, kee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni.
Zhotamu ya teŋɛ na pye Zhuda koomɔ pu wo saan we
32 Ayiwa, Eremaliya ja Peka wo saanra ti yee shuun wuu Izirayɛli wo koomɔ pu ɲuŋɔ ni, lee yee le Oziyasi ja Zhotamu ya teŋɛ na pye saan Zhuda wo koomɔ pu ɲuŋɔ ni. 33 Wu shi wu bye yee kɛlɛɛ shuun ni kaguro (25) na wu teŋɛduun wu ni saanra ti na. A wu yee kɛ ni gbaara pye saanra ti ni Zheruzalɛmu kulo li ni. Wu nu wu mɛgɛ ki bye na Yerusha, na ɲɛ Sadɔki wo poro pushɔ. 34 Lemu lʼa taan Tɛhɛnɛ Baa Kilɛ mu ge, lee wu bi byi. Le wu to Oziyasi wu bi byi ge, lee wu bɛ bi byi cibɛ. 35 Ga lee bɛ na, gan tapyeye yi ɲuŋɔ ya ta tugo wɛ. Sipyiire ti bi saraya ye ni nudanga yawurire ti wo sanha yee gan tapyeye yi na. Zhotamu wʼa Tɛhɛnɛ Baa Kilɛ wo puga ki wo kuɲɔgɔ nidɔɔngɔ ki yàa.
36 Zhotamu wo kapyegee kisaŋaa, keree kiimu bɛɛri wʼa pye ge, kee ya ka Zhuda koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni.
37 Lee caŋa ɲii le ni, a Tɛhɛnɛ Baa Kilɛ di ɲɔ kɔn na Aramu fiige ki saannaa Erezini, ni Izirayɛli koomɔ pu saannaa Peka, Eremaliya wo ja we, a Tɛhɛnɛ Baa Kilɛ di ɲɔ kɔn na pee yɛri na ma Zhuda koomɔ pu fɛni. 38 A Zhotamu di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ ni wu tii pu ni, wu to Dawuda wo kulo li ni. A wu ja Akazi di diin saanra ti na wu tɛgɛ.