Zhuda koomɔ pu wo saan Akazi
(2 Caŋa Ɲɛhɛɛ Jomɔ 28:1-27)
16
Eremaliya ja Peka wo saanra ti yee kɛ ni gbarashuun wuu le, lee yee le Zhotamu ja Akazi ya pye Zhuda wo saan. 2 Akazi shi wu bye yee kɛlɛɛ shuun (20) na wu teŋɛduun wu ni saanra ti na. A wu yee kɛ ni gbaara pye saanra ti ni Zheruzalɛmu kulo li ni. Lemu lʼa taan Tɛhɛnɛ Baa Kilɛ, wu Kafɔɔ Kilɛ wu mu ge, wu bi ta na lee pyi ba wu to Dawuda ya li pye pyegana lemu na wɛ. 3 Ga a wu daha Izirayɛli wo saannaa pu wo ɲaarigana li fɛni. Wu yɛrɛ ya wu jasege bɛ wolo saraga, na wu gbo sòrogo yapɛrɛɛ mu. Lee funŋɔ ni, Kilɛ ya fiiye yatii shɛɛn piimu kɔri pu wo fiige ki ni Izirayɛli nagoo pu kaa na ge, a wu binnɛ ni pee ni pu wo tanhaŋa keree ki na. 4 Wu bi saraya wo, na nudanga yawurire sòrogo pɛɛŋɛ tapyeye yi bɛɛri ni, ni faaboboyo yi na, tiye yemu bɛɛri yʼa tɔ ge, ni yee nɔhɔdaan.5 Ayiwa, Aramu fiige ki saan Erezini ni Izirayɛli koomɔ pu saan Eremaliya ja Peka ya pa puyɛ pinnɛ, kɔnhɔ pʼi shɛ kashɛn kɔn Zheruzalɛmu na. A pʼi shɛ Akazi maha, ga pu ya já fanha ta wu na wɛ. 6 Wee tuun we ninumɔ ni Aramu fiige ki saannaa Erezini ya Elati kulo li co, na li le Aramu fiige ki wo fanha ki nɔhɔ ni sanha. Zhuda wo koomɔ pu shɛɛn piimu pu bye wà ge, a wu pee kɔri yeege Elati kulo li ni. A Edomu shɛɛn di ba diin Elati kulo li ni, na bye wà fo na pa nɔ niɲaa na. 7 A Akazi di tudunmɔɔ tun Asiri saan Tigilati-Pilezɛri mu na jo: «Nɛ ɲɛ ma baaripye ni ma ja. Pa mʼa ba na shɔ Aramu saan ni Izirayɛli saan wu na. Pʼa pa do na na.» 8 Warifyɛn ni sanni wemu wu bye Tɛhɛnɛ Baa Kilɛ wo puga ki ni, ni saan wuyɛ pyaa wo puga ki wo naafuu wu tayahaŋa ki ni ge, a Akazi di wee lɔ na kan pʼa shɛ gan Asiri saan wu mu. 9 A Asiri saan wu sɔɔ lee na, na yìri shɛ Damasi fɛni na shɛ lee kulo li co. A wu sipyiire ti co kari Kiri kulo li ni, na saannaa Erezini gbo.
10 Ayiwa, a saannaa Akazi di gari Damasi kulo li ni di zhɛ Tigilati-Pilezɛri ɲuŋɔ círi, Asiri fiige ki wo saan we. Ba Akazi ya shɛ Damasi kulo li wo saraya tawologo ki ɲa wɛ, na tuduro tun kari saraya ɲaha shɔɔnrivɛɛ Uri mu Zheruzalɛmu ni, na kee saraya tawologo ki yaagana li bɛɛri, ni ki yagboyo yi yaagaŋaa ki bɛɛri ɲaha jo wu mu. 11 A saraya ɲaha shɔɔnrivɛɛ Uri di saraya tawologo ka yàa na saha ni saannaa Akazi wo shɛmɛ pu ni cibɛ, pee pemu wʼa tun wu mu na yìri Damasi kulo li ni ge. A Uri di kee saraya tawologo ki yàa na ta saannaa Akazi sanha yìri Damasi kulo li ni na pa wɛ. 12 Ba saan wʼa pa yìri Damasi ni na pa wɛ, na shɛ saraya tawologo ki ɲa, na fulo ki na, na dugi ki na. 13 A wu saraga nizogoŋɔ wolo saraya tawologo ki na, na shinma saraga ka wolo ki na, na saraya niwoŋɔ ka wo ki na, na ɲaɲiŋɛ saraya wo shishan pu ɲɛrɛgi ɲɛrɛgi ki na. 14 Daɲaa wo saraya tawologo kemu ki bye Tɛhɛnɛ Baa Kilɛ ɲaha tàan ge, a wu kee lɔ laha ki tayahaŋa ki ni Kilɛ wo puga ki ɲahagbaa li na, saraya tawologo nivoŋɔ ke ni Tɛhɛnɛ Baa Kilɛ wo puga ki tɛ wu ni, na shɛ ki sin saraya tawologo nivoŋɔ ki tàan, suumɔ kulo kacɛ ki na. 15 A saannaa Akazi di te tuduro te jo saraya ɲaha shɔɔnrivɛɛ Uri mu na: «Ta ɲisɔɔyɔ yi wo saraya nizogoyo ye, ni yakoyo yi wo shinma saraya yi wo ke saraya tawologo nigbɔhɔ ke na, ni saan wu wo saraya nizogoyo ye, ni yi shinma saraya ye, ni fiige ki sipyiire ti bɛɛri wo saraya nizogoyo ye, ni yi shinma saraya ye, ni yi saraya niwoyo ye, ma da saraya nizogoyo yi wo shishan pu bɛɛri, ni saraya yisaya wo shishan pu bɛɛri ɲɛrɛgi ɲɛrɛgi ki na. Ke ki wa daɲaa wo saraya yi tawologo ki ge, mʼa kee yaha na kacɛ na.» 16 Saannaa Akazi ya yemu bɛɛri jo ge, a saraya ɲaha shɔɔnrivɛɛ Uri di yee bɛɛri pye cibɛ.
17 A saannaa Akazi di Tɛhɛnɛ Baa Kilɛ wo puga ki wotoriyo yi daɲaa kɔrɔyɔ yi waraga laha yi na, pɛgɛ ke ki bye yi ɲuŋɔ ni ge, na kee laha wà. Pɛgɛ nagaŋa kemu ki bi teŋɛ nupɛhɛɛ kɛ ni shuun wu ɲuŋɔ ni ge, a wu kee tirige, na ki sin faakagereye ya ɲuŋɔ ni. 18 Lee kadugo na, pʼa bi kpaan lemu yereŋɛ Tɛhɛnɛ Baa Kilɛ wo puga ki ni, fo pʼa bi li mɛgɛ yiri na cadɛɛngɛ ki wo kpaan li ge, a wu lee laha wà Asiri saan wu wuu na. Saan wu bi jin kpɛɛngɛ ki wo tajege kemu ni na se Tɛhɛnɛ Baa Kilɛ wo puga ki ni ge, a wu kee bɛ tɔ Asiri saan wu wuu na.
19 Ayiwa, Akazi wo kapyegee kisaŋaa, keree kiimu bɛɛri wʼa pye ge, kee ya ka Zhuda koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 20 A Akazi di shɛ binnɛ ni wu tii pu ni yaŋa kanha na. A pʼi wu ɲuŋɔ ŋmɔhɔ ni wu tii pu ni Dawuda wo kulo li ni. A wu ja Ezekiyasi di diin saanra ti na wu tɛgɛ.