2 Saannaa 17

Oze ya pye Izirayɛli koomɔ pu wo saan

Ayiwa, Zhuda wo saan Akazi wo saanra ti yee kɛ ni shuun wu li na, Ela ja Oze ya pye Izirayɛli wo saan Samari kulo li ni. A wu yee gbarashɛɛrɛ pye saanra ti ni. 2 Lemu lʼa kolo Tɛhɛnɛ Baa Kilɛ mu ge, a wu ganha na lee pyi, ga wee wuu li ya ta Izirayɛli wo saannaa pusamaa wuu li xɔ wɛ, pee piimu pʼa toro wu ɲaha na ge. 3 A Asiri wo saan Salimanasari di ba do Oze na, na se ta wu na, a Oze di guu wu mu na ganha na munaa pɛrɛmɛ kaan wu mu. 4 Ga a Asiri fiige ki saan wu ba li ɲa na Oze wʼa giin wu wee nɔhɔ yaha, bani wʼa bi dɛgɛ sha Misira fiige ki saannaa So mu. Wu bi pa li she bɛ wu da da munaa pɛrɛmɛ pu kaan Asiri wo saan wu mu wɛ. Lee nibyii na, a Asiri fiige ki saan wu di Oze co, na wu pɔ na wu le kaso ni. 5 Lee kadugo na, a wu ba fiige ki bɛɛri co, na ba wu kashɛn keye taga Samari kulo li kuuri fo yee taanri. 6 Oze wo saanra ti yee gbarashɛɛrɛ wuu li na, a Asiri wo saan wu se ta Samari kulo li na, na Izirayɛli nagoo pu co kari Asiri fiige ki ni, na shɛ pu yaha Xhala kulo ni, ni Kabɔri Gba wu ɲɔ ki na Gozan koomɔ pu ni, ni Mɛdi wo kulogoo ki ni.

Lemu lʼa Izirayɛli wo saanra ti pye tʼa to ge

7 Lee ya pye bani Izirayɛli nagoo pʼa jurumu pye Tɛhɛnɛ Baa Kilɛ, pu Kilɛ wu na, wee wemu wʼa pu yeege Misira fiige ki ni na pye puyɛ wuu, na pu shɔ Farawɔn wo bulooro ti na ge. Pʼa bi kilɛlɛɛ piitiilee bɛ pɛlɛ sanha bɛ. 8 Tɛhɛnɛ Baa Kilɛ bi fiiye yatii shɛɛn piimu kɔri na laha Izirayɛli nagoo pu ɲahagbaa na ge, a Izirayɛli nagoo pʼi ganha na pee wo kalɛgɛɛ ki pyi, na Izirayɛli saannaa pu bɛ wo kashangaa ki koo li ɲaari. 9 Izirayɛli nagoo pʼa bi kapyebaagaa ŋmɔhɔ pye kiimu ya bɛ Tɛhɛnɛ Baa Kilɛ, pu Kilɛ wu mu wɛ. Pʼa bi saraya tawoloyo yàa pu kulogoo ki bɛɛri ni, na co kupiire ti na fo na shɛ nɔ kulogoo baraga wogoo ki na. 10 Pʼa bi pɛɛŋɛ benɛɛ pii yàa na pye gan tapyeye, na tiin kii sin sin na pye gan tapyeye Ashera mɛgɛ na yaŋaboboyo yi bɛɛri, ni titɔyɔ yi bɛɛri nɔhɔ ni. 11 Pʼa bi nudanga yawurire ti wuregi yee takanya yi ni ba sipyiire ti ɲɛ wɛ, temu Tɛhɛnɛ Baa Kilɛ bi kɔri na laha pu ɲahagbaa na ge. Pʼa bi kapyebaagaa niguuŋɔɔ pyi kiimu ya Kilɛ luu yirige ge. 12 Pʼa bi pɛɛŋɛ tɛri yapɛrɛɛ na, na ta Tɛhɛnɛ Baa Kilɛ di bi pu ɲaha kɔn lee bye na. 13 Tɛhɛnɛ Baa Kilɛ bi Izirayɛli nagoo ni Zhuda nagoo pu sɔnmi wu tudunmɔɔ pu keŋɛ fɛni ni piimu bɛɛri pʼa bi kashɛgɛɛ ɲaa ge. Wʼa bi pu pye na pu yi jo pu mu na: «Yi yi korogoo niguuŋɔɔ ki yaha. Saliya wemu nɛ kan yi sefɛlɛɛ pu mu ge, yʼi da wee wo ɲɔmɛjogoo ki bɛɛri koo ɲaari. Na kapyebyii, na tudunmɔɔ pu mu nɛ bi wee saliya we kan pʼa kan yee mu.» 14 Ga pu funŋɔ bye pu pe jomɔ pe logo wɛ. A pʼi pu niye waha ba pu tii pʼa pye wɛ, pee piimu pu bye pu ya dà Tɛhɛnɛ Baa Kilɛ, pu Kilɛ wu na wɛ ge. 15 Tɛhɛnɛ Baa Kilɛ bi saliya wu ɲɔmɛjogoo kiimu kan pu mu, na ɲɔmɛɛ lemu lɔ pu tii pu mu, na pu ɲuŋɔ taha keree kiimu na ge, pʼa she kee bɛɛri ni. Pʼa bi taha laɲɔbaa yapɛrɛɛ fɛni, a lee di pu bɛ ɲɛri laɲɔbaa sipyii. Fiiye yatii shɛɛn piimu pʼa bi pu maha ge, a pii daha pee wo kalɛgɛɛ ki fɛni, na ta Tɛhɛnɛ Baa Kilɛ di bi pu ɲaha kɔn na pu ganha bu bye pee shi wɛ. 16 Pʼa bi she Tɛhɛnɛ Baa Kilɛ, pu Kafɔɔ wo ɲɔmɛjogoo ki bɛɛri ni, na tɔɔrɔ shɔhɔ na taga nupepinyɛ shuun yàa, na pɛɛŋɛ tinnɛ sin yapɛrɛɛ Ashera mɛgɛ na. Pʼa bi nuguro sinni fugba wu wo kpɛɛnyegeye yi bɛɛri fɛɛ ni, na yapɛrɛɛ Baali pɛlɛ. 17 Pʼa bi pu jalaa ni pu pushaa wo saraya nizogoyo yapɛrɛɛ mu, na siganma ni celɔrɔ pyi. Pʼa bi puyɛ kan kakuuŋɔɔ niɲɛhɛŋɛɛ bye mu, fo na Tɛhɛnɛ Baa Kilɛ luu yirige. 18 Lee wuu na, a Tɛhɛnɛ Baa Kilɛ luu di yìri Izirayɛli nagoo pu tàan xuuni, a wu pu kɔri na laha wuyɛ ɲaha tàan, na Zhuda wo gbawege ki yɛ yaha wà. 19 Ga kee gbawege ke bɛ di ya ta sɔɔ na Tɛhɛnɛ Baa Kilɛ, pu Kilɛ wu wo ɲɔmɛjogoo ki koo ɲaari wɛ. A pu bɛ di dɛrɛɛ taha Izirayɛli nagoo pu wo kalɛgɛɛ ki ninuŋɔɔ fɛni na byi. 20 Lee wuu na Tɛhɛnɛ Baa Kilɛ ya she Izirayɛli nagoo pu bɛɛri ni, na pu tirige, na pu le pu le kakabyii pii keŋɛ ni, na da xɔ na pu kɔri laha wuyɛ ɲaha tàan. 21 Tuun wemu ni Kilɛ ya Izirayɛli nagoo pu waa laha Dawuda wo tirige shɛɛn pu na ge, a pʼi Nebati ja Zheroboomu teŋɛ na pye pu wo saan we. Wee wʼa Izirayɛli nagoo pu ɲuŋɔ nari Tɛhɛnɛ Baa Kilɛ na, na pu pye pʼa jurumu nigbɔ pye. 22 Na co fo wee tuun wu na, Zheroboomu yɛpyaa ya jurumu wemu bɛɛri pye ge, a Izirayɛli nagoo pʼi daha wee jurumu wu fɛni, pu ya ta laraga kɔn wee na wɛ, 23 fo na Tɛhɛnɛ Baa Kilɛ pye wʼa pa pu kɔri laha wuyɛ ɲaha tàan ma na jo ba wʼa bi yi jo wu kapyebyii pu bɛɛri ɲɔ na wɛ, pee piimu pu bye wu tudunmɔɔ pu ge. Lee wuu na pʼa Izirayɛli nagoo pu co na kari Asiri fiige ki ni, na pu sanha liigi pu wo fiige ki na. Wà pʼa kori fo na pa nɔ ba niɲaa ɲɛ wɛ.

Samari shɛɛn pu nɔhɔ tayirige

24 A Asiri wo fiige ki saannaa Salimanasari di ba ni Babilɔni shɛɛn, ni Kuta shɛɛn, ni Ava shɛɛn, ni Amati shɛɛn, ni Sefaramu shɛɛn ni, na ba pee teŋɛ karamu na Samari fiige ki kulogoo ki bɛɛri ni Izirayɛli nagoo pu tɛgɛ. A pee di Samari fiige ki lɔ, na diin ki kulogoo ki bɛɛri ni. 25 Pu tiinduun wu ni, pu bi Tɛhɛnɛ Baa Kilɛ pɛlɛ wɛ, a Tɛhɛnɛ Baa Kilɛ di cɛnrɛlɛɛ tun na pa pu fɛni, a pee di ba pu niɲɛhɛmɛɛ gbo. 26 Wee tuun wu ni a pʼi shɛ Asiri wo saan wu pye na: «Fiiye yatii shɛɛn piimu mʼa yaha Samari fiige ki kulogoo ki ni ge, pu ya ta kee fiige ke wo Kilɛ wu pɛlɛgana cɛ wɛ, lee wuu na wee Kilɛ wʼa cɛnrɛlɛɛ tun pʼa pa sipyiire ti coni, bani pu ya ta fiige ki wo Kilɛ wu wo pɛɛŋɛ ki kodorogoo ki cɛ wɛ.» 27 A Asiri wo saan wu jo: «Saraya ɲaha shɔɔnrivɛɛ piimu yʼa co kee fiige ki ni na pa ge, yi wee wa yaha shɛ gan pu mu, wee di shɛ diin wà, wee di da pu kalaa fiige ki wo Kilɛ wu pɛɛŋɛ ki wo kodorogoo ki ni.» 28 Ayiwa, saraya ɲaha shɔɔnrivɛɛ piimu pʼa bi co na yìri Samari kulo li ni ge, a wee wa di shɛ diin Bɛtɛli ni, na sipyiire ti kalaa Tɛhɛnɛ Baa Kilɛ pɛlɛgana ni. 29 Ga a wee shi wu sipyii pu bɛɛri nigin nigin di puyɛ pyaa wo kilɛlɛɛ yàa yàa. Kulo bɛɛri ni pʼa tiin ge, pʼa pee kilɛlɛɛ pu yaha yaha Samari shɛɛn pu wo gan tapyeye yi wo piyɛyɛ yi ni, Samari shɛɛn pʼa bi yemu yàa yàa ge. 30 A Babilɔni shɛɛn di yapɛrɛɛ Sukɔti-Benɔti yàa. A Kuti shɛɛn di yapɛrɛɛ Nɛrigali yàa. A Amati shɛn di yapɛrɛɛ Ashima yàa. 31 A Ava shɛɛn di yapɛrɛɛ Nibazi ni Taritaki yàa. A Sefaramu shɛɛn di ganha na pu wo jalaa pu sorogo yapɛrɛɛ Adaramelɛki ni Anamelɛki mu, kee ɲɛ Sefaramu shɛɛn pu wo kilɛlɛɛ.

32 Lee funŋɔ ni, a pʼi ganha na Tɛhɛnɛ Baa Kilɛ bɛ pɛlɛ, ga na sipyii piitiilee shɔɔnri puyɛ ni, na pee teŋɛ teŋɛ na pye puyɛ pyaa ki wo gan tapyeye yi wo saraya ɲaha shɔɔnrivɛɛ. A pee di ganha na labye pyi pu mu yapɛrɛɛ ki wo pɛɛŋɛ piyɛyɛ yi ni. 33 Pu bi Tɛhɛnɛ Baa Kilɛ pɛlɛ, ga na puyɛ bɛ wo kilɛlɛɛ pu pɛlɛ na saha ni pu bɛɛri wo tayiriye yi wo kalɛgɛɛ ki ni.

34 Fo na pa gbara niɲaa na, pee sipyii pii ya taha pu wo tɛɛlɛɛ li wo kalɛgɛɛ ki fɛni. Pu ya ta na Tɛhɛnɛ Baa Kilɛ pɛlɛ can can na wɛ. Pu bi ta na puyɛ pyaa ki wo kalɛgɛɛ kee, ni pu wo kodorogoo ki koo ɲaari wɛ, pu di ya Tɛhɛnɛ Baa Kilɛ bɛ wo saliya we, ni wu kodogoroo ki bɛ koo ɲaari wɛ, kee kiimu wʼa kan Yakuba wo shi wu mu ge, pu ya kee koo ɲaari wɛ. Tɛhɛnɛ Baa Kilɛ bi wee Yakuba we mɛgɛ le na Izirayɛli. 35 Tɛhɛnɛ Baa Kilɛ bi kariɲɛɛgɛ ɲɔmɛɛ lɔ Izirayɛli shɛɛn mu na pu pye na: «Yi ganha ga pɛɛŋɛ taha kilɛlɛɛ piitiilee na wɛ, yi ganha ga nuguro sin pu fɛɛ ni wɛ, yi ganha ga labye wa shishiin pye pu mu wɛ, yi ganha ga saraga bɛ wolo pu mu wɛ. 36 Ga Tɛhɛnɛ Baa Kilɛ wemu wʼa yi yeege Misira fiige ni ni wu sefɛɛrɛ keŋɛ ki ni ge, yʼa wee yɛ nigin pɛlɛ, yʼi da nuguro sinni wee yɛ nigin fɛɛ ni, yʼi da saraya wo wee yɛ nigin mu.» 37 Yee ya yaa na wu ɲɔmɛhɛɛ kee ni wu kodorogoo kee, ni wu saliya wu ɲɔmɛjogoo ki bɛɛri mara, kee kiimu kʼa ka na kan yi mu ge, na ki koo ɲaari ɲiga bɛɛri. Yʼi ganha ga pɛɛŋɛ taha kilɛlɛɛ piitiilee na wɛ. 38 Nɛ kariɲɛɛgɛ ɲɔmɛɛ lemu lɔ ni yi ni ge, yi ganha ga funŋɔ lee na wɛ. Nʼa da guri yi jo daha yi mu sanha jo yi ganha ga pɛɛŋɛ taha kilɛlɛɛ piitiilee na wɛ. 39 Ga yi da Tɛhɛnɛ Baa Kilɛ, yi Kilɛ wu pɛlɛ, wee na da yi shuu yi pɛɛn pu bɛɛri na. 40 Ga pii sipyii pii ya ta yee logo wɛ, na nɔrɔ yaha pu wo tɛɛlɛɛ li wo kalɛgɛɛ na. 41 Lee pɛlɛgana li na pee sipyii pu bi Tɛhɛnɛ Baa Kilɛ pɛlɛ, na guri na pu wo yapɛrɛɛ ki bɛ pɛlɛ sanha. Pu nagoo ni pu kadugo shi nibama wu bɛɛri ya kori yaha pu tii pu wo kalɛgɛɛ ki fɛni na byi fo na pa nɔ niɲaa na.