2 Saannaa 18

Ezekiyasi ya teŋɛ na pye Zhuda koomɔ pu wo saan we

(2 Caŋa Ɲɛhɛɛ Jomɔ 29:1-2)

Ayiwa, Ela ja Oze wo saanra ti yee taanri wuu le Izirayɛli koomɔ pu ɲuŋɔ ni, lee yee le Akazi ja Ezekiyasi ya teŋɛ na pye Zhuda koomɔ pu wo saan we. 2 Wu shi wu bye yee kɛlɛɛ shuun ni kaguro (25) na wu teŋɛduun wu ni saanra ti na. A wu yee kɛlɛɛ shuun ni gbarashɛɛrɛ (29) pye saanra ti ni Zheruzalɛmu ni. Wu nu wu mɛgɛ ki bye na Abi, wee bye Zakari wo poro. 3 Lemu lʼa taan Tɛhɛnɛ Baa Kilɛ mu ge, lee wu bi byi cibɛ ba wu to Dawuda bi li pyi wɛ. 4 Wee wʼa gan tapyeye yi ɲuŋɔ tugo, na pɛɛŋɛ benɛɛ pu ja ja, na Ashera wo takanya yi wo tinyeeŋɛɛ ki kɔn kɔn. Musa bi daɲaa wɔ wemu yàa ge, a wu wee tɔnhɔnɔ, bani fo na pa nɔ wee tuun wu na, Izirayɛli nagoo pu bi nudanga yawurire sogoro wee wɔ wu mu. Pʼa bi wu mɛgɛ yiri na Nexhushitan. 5 A Ezekiyasi di Tɛhɛnɛ Baa Kilɛ, Izirayɛli wo Kilɛ wu pye wu tadaŋa. Zhuda koomɔ pu saannaa piimu bɛɛri pʼa toro wu ɲaha na, kelee na pa wu kadugo ge, pu shɛn nigin bɛ ya wu xɔ wɛ. 6 Wʼa bi taha yaha Tɛhɛnɛ Baa Kilɛ na, wu ya ta laraga kɔn wu na wɛ, na ganha na wu ɲɔmɛjogoo ki koo ɲaari, kee kiimu wʼa bi kan Musa mu ge. 7 Tɛhɛnɛ Baa Kilɛ bye ni wu ni. Keree kiimu bɛɛri ɲɔ wu bi wo ge, kee bɛɛri bi ɲaha taa wu mu. A wu nʼa she le wuyɛ ni na wá Asiri fiige ki wo saan wu na, na bye wu ya ta kuu nige wee mu wɛ. 8 Wee wʼa kashɛn kɔn Filisiti shɛɛn pu na, na se ta pu na, fo na shɛ nɔ Gaza ni wu koomɔ pu na, na lɔ kasɛɛgɛ pyevɛɛ pu wo putɔɔnyɔ yi na, fo na shɛ nɔ kashɛn ɲuŋɔ círi círi wo kulogoo ki na.

Pʼa Samari kulo li wo jo wu jo na taha

9 Ayiwa, Zhuda saannaa Ezekiyasi wo saanra ti yee shishɛɛrɛ wuu le, lee ya bɛ ni Ela ja Oze wo saanra ti yee gbarashuun wuu li ni Izirayɛli wo koomɔ pu ɲuŋɔ ni, lee yee le Asiri fiige ki saan Salimanasari ya nɔ Samari kulo li ni, na kashɛn keŋɛ sin na li maha. 10 Yee taanri funŋɔ ni a wu Samari kulo li co, lee ya pye Ezekiyasi wo saanra ti yee gbaara wuu le. Samari kulo lʼa co yee lemu ge, lee ya pye Izirayɛli koomɔ pu saan Oze wo saanra ti yee gbarashɛɛrɛ wuu le. 11 A Asiri saan wu Izirayɛli nagoo pu kuu na kari Asiri fiige ki ni. A wu shɛ pii yaha Xhala kulo li ni, na shɛ pii yaha Kabɔri Gba wu ɲɔ ki na, Gozan wo koomɔ pu ni, na shɛ pii yaha Mɛdi shɛɛn pu wo kulogoo ki ni. 12 Bani pu bi ta Tɛhɛnɛ Baa Kilɛ, pu Kilɛ wu wo jomɔ pu logo wɛ, na wu kariɲɛɛgɛ ɲɔmɛɛ li kyɛɛgi. Tɛhɛnɛ Baa Kilɛ wo kapyebye Musa bi yemu bɛɛri jo ge, pu bi ta yee logo wɛ, pu ya yi koo ɲaari wɛ.

Sankeribu ya shɛ do Zhuda wo koomɔ pu na

(2 Caŋa Ɲɛhɛɛ Jomɔ 32:1-19 ; Ezayi 36)

13 Ayiwa, saannaa Ezekiyasi wo saanra ti yee kɛ ni shishɛɛrɛ wuu le, lee yee le Asiri saan Sankeribu ya shɛ do Zhuda koomɔ pu wo kulogoo baraga wogoo ki bɛɛri na, na ki co. 14 Ba lee ya pye wɛ, a Zhuda saannaa Ezekiyasi di tuduro yaha pʼa shɛ jo Asiri wo saan wu mu Lakishi kulo li ni na: «Jurumu nɛ pye! Na yaha wà. Ma bu lemu bɛɛri taha na na, nɛ na zɔɔ lee na.» Wee tuun wu ni a Asiri saan wu warifyɛn tonɔɔ gbarashɛɛrɛ (9 000) ni sanni kiloo xhuu gbarashɛɛrɛ (900) taha Ezekiyasi na, Zhuda wo saan we. 15 Warifyɛn wemu bɛɛri wu ɲɛ Tɛhɛnɛ Baa Kilɛ wo puga ki ni ge, ni wemu bɛɛri wi ɲɛ saan wu puga ki wo naafuu tayahaya yi ni ge, a Ezekiyasi di wee bɛɛri kan. 16 Ali sanni wemu bɛ Ezekiyasi bi taha taha Tɛhɛnɛ Baa Kilɛ wo puga ki gburaya ye ni gbeetiriye yi na ge, a wu wee bɛɛri lahala na kan Asiri saan wu mu.

Asiri saan wʼa Zheruzalɛmu fuguri

(Ezayi 36:2-22 ; 2 Caŋa Ɲɛhɛɛ Jomɔ 32:9-16)

17 Ayiwa, a Asiri saan wu wu kashɛn ki wo ɲuŋɔfɔgbɔ we, ni saan wu puga ki wo kaɲahashɔnrimɔ we, ni kashɛn keye yi wo ɲuŋɔfɔɔ wu tun ni kashɛn keŋɛ baraga wogo ka ni na yiri Lakishi kulo li ni, na kari saannaa Ezekiyasi mu Zheruzalɛmu kulo li ni. A pʼi gari, na shɛ nɔ Zheruzalɛmu kulo li ni. Ba pʼa shɛ nɔ wɛ, loguugo kemu kʼa shɛ jé fugba wu wo lɔhɔ tamaraga ki ni, fajii pu wo tɛgɛ ki koo li na ge, a pʼi shɛ yere kee ɲɔ na. 18 A pʼi saan wu yiri. Ilikiya ja Eliyakimu, wee wemu wu bye saan wu puga ki wo kaɲahashɔnrimɔ wu ge, ni kama kavɛɛ Shebuna, ni Azafu ja Yowa, wee wemu wu bye saan wu wo jomɔ pu torogovɔɔ wu ge, a pee di foro, na shɛ pu ɲuŋɔ círi. 19 A Asiri fiige ki wo kashɛn keye yi ɲuŋɔfɔɔ wu pu pye: «Yi shɛ yi jo Ezekiyasi mu na yemu saangbɔ wʼa jo ge, Asiri fiige ki saan we, yee yi wa ye na: ‹Ɲaha na mu di wa daa wɛ? 20 Go mu wa giin na ɲɔjomɔ yɛ na já yere fungɔngɔ fɛɛrɛ ni lowaa tayerege ni kashɛn ni ya? Nimɛ, jɔgɔ na mu dʼa dà na ɲuŋɔ nari nɛ na wɛ? 21 Ta Misira fiige ki na bɛ mu wʼa daa wɛ? Lee wahagaan nigɛgɛrɛ le li ɲɛ ma bu ma keŋɛ sin li na lʼi ma ki su furi ge. Go mu Farawɔn ɲɛ, Misira fiige ki saan we. Sipyii piimu bɛɛri pʼa daa wu na ge, mu na wu ɲɛ pee mu. 22 La wa la ni yi na ba jo na Tɛhɛnɛ Baa Kilɛ, yi wo Kilɛ wu na yee wa daa. Ga ta wee wo gan tapyeye ye ni wu saraya tawoloyo yi bɛ Ezekiyasi ya ja ja mɛ, na Zhuda shɛɛn ni Zheruzalɛmu shɛɛn pye na pʼa ma pʼa Kilɛ wu pɛlɛ ke saraya tawologo ke yɛ nigin na Zheruzalɛmu ni wɛ?› 23 Ayiwa nimɛ, ɲɔmɛɛ kan na kafɔɔ wu mu, Asiri fiige ki saan we. Nɛ na ba shɔnyɔ kabɔfoŋɔɔ shuun (2.000) kan ma mu, ni ma na já shɔnduguloo ta di yi círi. 24 Mu na bye dii na já nɛ kafɔɔ wu kashɛn ɲuŋɔfɔɔ nigin yɛ pyaa bɛ niinɛ wɛ, ali wu pye pu bɛɛri wo kurogo wo bɛ, mu wemu wʼa daa Misira fiige ki na na pu na ba kashɛn wotoriyo ni shɔnduguloo kan yee mu ge? 25 Ta Tɛhɛnɛ Baa Kilɛ gaɲa ni yɛrɛ nɛ pa do ke fiige ke na, di ki co di ki kyɛɛgi? Bada! Tɛhɛnɛ Baa Kilɛ yɛ pyaa kʼa jo na: ‹Shɛ do ke fiige ki na, mʼa ki kyɛɛgi!› »

26 Wee tuun wu ni a Ilikiya ja Eliyakimu ni Shebuna ni Yowa di Asiri saan wu kashɛn keye yi ɲuŋɔfɔɔ wu pye: «Wèe wa ma ɲɛɛri, ta yu ni wù ni Aramu shɛɛn jomɔ pu ni, bani wèe wa yee nuri. Ma ganha ba yu ni wù ni Heburuu jomɔ pu ni pii sipyii pii ɲii na kasɔrɔgɔ ki na wɛ.» 27 Ga a kashɛn ɲuŋɔfɔɔ wu jo: «Nɛ kafɔɔ wʼa nɛ tun tuduro temu na ge, ta yee ni yi kafɔɔ wu yɛ mu tʼa yaa na jo? Pii sipyii pii pʼa tiin mɛ kasɔrɔgɔ ki na ge, go pee bɛ mu tʼa yaa na jo, pee piimu pʼa da ba ɲɔ kɔn na pu fure xaa, na pu firimɛ gbuu ni yee ni ge.»

28 Lee kadugo na, a ɲuŋɔfɔɔ wu yere na mujuu wá ni fanha ni Heburuu jomɔ pu ni na jo: «Yi saangbɔ wu jomɔ pu logo, Asiri saan we! 29 Yemu saan wʼa jo ge, yee yi wa mɛ na: ‹Yi ganha bu yiyɛ yaha Ezekiyasi mu wu faanna wɛ, wʼa da já yee shɔ nɛ na wɛ. 30 Ezekiyasi bu yi pye na yi dà Tɛhɛnɛ Baa Kilɛ na, na Tɛhɛnɛ Baa Kilɛ na ba yi shɔ, na le kulo le da ba le Asiri saan wu keŋɛ ni wɛ, yi ganha bu dà yee na wɛ, wʼa yi piinŋɛ.› 31 Yi ganha bu Ezekiyasi jomɔ pu logo wɛ, bani yemu Asiri saan wʼa jo ge, yee yi wa mɛ na yee pu ɲaɲiŋɛ sha wee mu, na yʼi yiyɛ kan wu mu. Lee bu bye, yee wa bɛɛri na da wuyɛ pyaa wo ɛrɛzɛn nagoo, ni wu nitoroŋɔ nagoo li, na wuyɛ pyaa wo keeŋɛ lɔhɔ gbuu, 32 fo na shɛ nɛ pye nɛ pa di ba yi co da se fiige katii ni kemu ki ɲɛ ba yi wogo ki ɲɛ-ɛ ge. Alikama ni duvɛnfomɔ wa kee fiige ke ni, buuri ni ɛrɛzɛn tiire wa ki ni, olivu sìnmɛ tiire ni sɛrɛ bɛ wa ki ni. Lee funŋɔ, yi na zhɛ bye wà ɲiifɛɛrɛ na, yi da xhuu wɛ. Yi ganha bu Ezekiyasi yaha wu yi faanna na Tɛhɛnɛ Baa Kilɛ na ba yi shɔ wɛ. 33 Ta fiiye yatii shɛɛn wo kilɛlɛɛ pʼa já pu wo fiiye yi shɔ Asiri saan wu na ya? 34 Mii Amati kulo le ni Aripadi kulo li wo kilɛlɛɛ pʼi ɲɛ wɛ? Mii Sefaramu kulo le, ni Ena kulo le, ni Iva kulo li wo kilɛlɛɛ pʼi ɲɛ wɛ? Ta pʼa já Samari fiige ki shɔ nɛ na ya? 35 Ye fiiye ye wo kilɛlɛɛ pu bɛɛri ni, a fiige kekɛ wo kilɛ di já wu wo fiige ki shɔ nɛ na wɛ? Tɛhɛnɛ Baa Kilɛ na bye dii na já Zheruzalɛmu shɔ nɛ na wɛ?»

36 A sipyiire tʼi cari tiyɛ na, pu ya yaaga bɛ jo wɛ, bani saannaa Ezekiyasi bi pu pye na: «Yi ganha bu shɛ wu ɲɔ shɔ wɛ.» 37 Lee kadugo na, Ilikiya ja Eliyakimu, wee wemu wu bye saan wu puga ki kaɲahashɔnrimɔ wu ge, ni kama kavɛɛ Shebuna, ni Azafu ja Yowa, wee wemu wu bye saan wu wo jomɔ pu torogovɔɔ wu ge, a pʼi pu fadeye shɛɛngi, na guri pa saannaa Ezekiyasi yíri, Asiri saan wu kashɛn keye yi ɲuŋɔfɔɔ wʼa yemu jo ge, na ba yee jo wu mu.