Asiri shɛɛn ya pa Zheruzalɛmu fɛni
36
Ayiwa, saan wa bye Asiri fiige ki ni wu mɛgɛ ɲɛ na Sanakeribu. Saannaa Ezekiyasi wo saanra ti yee kɛ ni shishɛɛrɛ wuu li na, a wee saan wu ba do Zhuda mara wu wo baraga kulogoo ki bɛɛri na, na ki co. 2 A Asiri saan wu wu kashɛn keŋɛ ki ɲuŋɔfɔɔ wu tun ni kashɛn keŋɛ baraga wogo ka ni, na foro Lakishi kulo li ni na kari Zheruzalɛmu ni saannaa Ezekiyasi mu. Loguugo kemu kʼa shɛ jé fugba wu wo lɔhɔ tamaraga ki ni, fajii pu wo tɛgɛ ki koo li na ge, a kashɛn ɲuŋɔfɔɔ wu shɛ yere kee ɲɔ na. 3 Wee tuun wu ni, Ilikiyawu ja Eliyakimu, wee wemu wu bye saan wu puga ki kaɲahashɔnrimɔ wu ge, ni kama kavɛɛ Shebuna, ni Azafu ja Yowa, wee wemu wu bye saan wu wo jomɔ pu torogovɔɔ wu ge, a pee di foro kanha ki ni, na shɛ wu ɲuŋɔ círi.4 A Asiri kashɛn keye yi ɲuŋɔfɔɔ wu pu pye: «Yi shɛ yi jo Ezekiyasi mu na Saangbɔ wʼa jo, Asiri fiige ki saan we na: ‹Ɲaha na mu di wa daa wɛ?a 5 Go mu wa giin na ɲɔjomɔ yɛ na já yere fungɔngɔ fɛɛrɛ ni lowaa tayerege ni kashɛn ni ya? Jɔgɔ na mu di wa daa, na ɲuŋɔ nari nɛ na wɛ? 6 Misira fiige ki gɛ? Lee wahagaan nigɛgɛrɛ li ya, ma bu diiŋɛ li na lʼi ma keŋɛ su furi? Go mu Farawɔn ɲɛ, Misira fiige ki saan we. Sipyii piimu bɛɛri pʼa daa wu na ge, mu na wu ɲɛ pee mu.b 7 La wa la ni ma na ba jo na Tɛhɛnɛ Baa Kilɛ, yi wo Kilɛ wu na yee wa daa. Ga ta wee wo takanya ni wu saraya tawoloyo yi bɛ mu ya ja ja mɛ, na Zhuda shɛɛn ni Zheruzalɛmu shɛɛn pye na pʼa ma pʼa Kilɛ wu pɛlɛ ke saraya tawologo ke yɛ nigin na Zheruzalɛmu ni wɛ?› 8 Ayiwa, pa mʼa ba ɲɔmɛɛ kan na kafɔɔ wu mu, Asiri fiige ki saan we. Nɛ na ba shɔnyɔ kabɔfoŋɔɔ shuun (2.000) kan ma mu, ni ma na já shɔnduguloo ta di yi círi. 9 Mu na bye dii na já nɛ kafɔɔ wu kashɛn ɲuŋɔfɔɔ nigin yɛ pyaa bɛ niinɛ wɛ, ali wu pye pu bɛɛri wo kurogo wo bɛ, mu wemu wʼa daa Misira fiige ki na na pu na ba kashɛn wotoriyo ni shɔnduguloo kan yee mu ge? 10 Ta Tɛhɛnɛ Baa Kilɛ gaɲa ni yɛrɛ nɛ kafɔɔ wʼa pa do ke fiige ke na wu ki co wu ki kyɛɛgi? Bada! Tɛhɛnɛ Baa Kilɛ yɛ pyaa kʼa jo na: ‹Shɛ do ke fiige ki na, mʼa ki kyɛɛgi!›»
11 Wee tuun wu ni a Eliyakimu ni Shebuna ni Yowa di Asiri saan wu kashɛn keye yi ɲuŋɔfɔɔ wu pye: «Wèe wa ma ɲɛɛri, ta yu ni ma kapyebyii pu ni Aramu shɛɛn jomɔ pu ni, bani wèe wa yee nuri. Ma ganha ba yu ni wù ni Heburuu jomɔ pu ni pii sipyii pii ɲii na kasɔrɔgɔ ki na wɛ.»
12 Ga a kashɛn ɲuŋɔfɔɔ wu jo: «Nɛ kafɔɔ wʼa nɛ tun tuduro temu na ge, ta yee ni yi kafɔɔ wu yɛ mu tʼa yaa na jo? Pii sipyii pii pʼa tiin mɛ kasɔrɔgɔ ki na ge, go pee bɛ mu tʼa yaa na jo, pee piimu pʼa da ba ɲɔ kɔn na pu fure xaa, na pu firimɛ gbuu ba yee ɲɛ-ɛ ge.»
13 Lee kadugo na a ɲuŋɔfɔɔ wu yere na mujuu wa ni fanha ni Heburuu jomɔ pu ni na jo: «Yi saangbɔ wu jomɔ pu logo, Asiri saan we. 14 Wʼa jo na yee ganha bu yiyɛ yaha Ezekiyasi mu wu faanna wɛ, wʼa da já yee shɔ wɛ. 15 Ezekiyasi bu yi pye na yi dà Tɛhɛnɛ Baa Kilɛ na, na wee na ba yi shɔ, na le kulo le da ba le Asiri saan wu keŋɛ ni wɛ, yi ganha bu da yee na wɛ, wʼa yi piinŋɛ. 16 Yi ganha bu Ezekiyasi jomɔ pu logo wɛ, Asiri saan wʼa jo na yee pu ɲaɲiŋɛ sha wee mu, na yʼi yiyɛ kan wu mu. Lee bu bye, yee wa bɛɛri na da wuyɛ pyaa wo ɛrɛzɛn nagoo, ni wu nitoroŋɔ nagoo li, na wuyɛ pyaa wo keeŋɛ lɔhɔ gbuu, 17 fo na shɛ nɛ pye nɛ pa di ba yi co da se fiige katii ni kemu ki ɲɛ ba yi wogo ki ɲɛ-ɛ ge. Alikama ni duvɛnfomɔ wa kee fiige ke ni, buuri ni ɛrɛzɛn tiire bɛ wa ki ni. 18 Yi ganha bu Ezekiyasi yaha wu yi faanna na Tɛhɛnɛ Baa Kilɛ na ba yi shɔ wɛ. Ta shi wusama wo kilɛlɛɛ pʼa já pu wo fiiye yi shɔ Asiri saan wu na ya? 19 Mii Amati kulo le ni Aripadi kulo li wo kilɛlɛɛ pʼi ɲɛ wɛ? Mii Sefarivayimu kulo li wo kilɛlɛɛ pʼi ɲɛ wɛ? Ta pʼa já Samari fiige ki shɔ nɛ na ya? 20 Ye fiiye ye wo kilɛlɛɛ pu bɛɛri ni, a fiige kekɛ wo kilɛ di já wu wo fiige ki shɔ nɛ na wɛ? Tɛhɛnɛ Baa Kilɛ na bye dii na já nɛ sige Zheruzalɛmu lɔ na wɛ?»
21 A sipyiire tʼi cari tiyɛ na, pu ya yaaga bɛ jo wɛ, bani saanna Ezekiyasi bi pu pye na: «Yi ganha bu shɛ wu ɲɔ shɔ wɛ.»
22 Lee kadugo na, Ilikiyawu ja Eliyakimu, wee wemu wu bye saan wu puga ki kaɲahashɔnrimɔ wu ge, ni kama kavɛɛ Shebuna, ni Azafu ja Yowa, wee wemu wu bye saan wu wo jomɔ pu torogovɔɔ wu ge, a pʼi pu fadeye shɛɛngi, na guri pa saannaa Ezekiyasi yíri, Asiri saan wu kashɛn keye yi ɲuŋɔfɔɔ wʼa yemu jo ge, na ba yee jo wu mu.