Ezekiyasi ya fungɔngɔ fɛɛrɛ sha Kilɛ tudunmɔɔ Ezayi mu
37
Ayiwa, ba saannaa Ezekiyasi ya pee jomɔ pu logo wɛ, a wu bɛ di wu wo fàya yi shɛɛngi, na bɔrɔyɔ fàya†, le, na gari Tɛhɛnɛ Baa Kilɛ wo pɛɛŋɛ pugbɔhɔ ki ni. 2 A wu wu puga ki kaɲahashɔnrimɔ Eliyakimu ni kama kavɛɛ Shebuna ni saraya ɲaha shɔɔnrivɛɛ nɔhɔlɛɛ pu tun Kilɛ tudunmɔɔ Ezayi mu, Amɔsi ja we. bɔrɔyɔ fàya† yi bye pu bɛɛri mu. 3 A pʼi shɛ Kilɛ tudunmɔ wu pye na Ezekiyasi ya jo: «Niɲaa ɲɛ ɲatanhaŋa, ni kafulo, ni shiige caŋa. Bani laa lʼa nɔ semɛ, ga fanha di ɲɛ nufɔɔ wu ni wu li se wɛ. 4 Asiri saan wʼa wu kashɛn keye ɲuŋɔfɔɔ wu tun wʼa pa Kilɛ ɲìi wo wu shɛhɛlɛ. La wa la ni Tɛhɛnɛ Baa Kilɛ, ma Kilɛ wu na ba kasɛɛgɛ yaha kii shɛhɛɛ kii na. La wa la ni, wu na ba kii shɛhɛɛ kii foo tɔ wu mu. Lee na do, wu sipyii piimusamaa pʼa kori ge, Kilɛ ɲɛɛri pee mu.»5 Ayiwa, ba saannaa Ezekiyasi wo tudunmɔɔ pʼa nɔ mu ni pee jomɔ pu ni Ezayi na wɛ, 6 a Ezayi di pu pye: «Yi shɛ yi jo yi kafɔɔ wu mu na yemu Tɛhɛnɛ Baa Kilɛ ya jo ge, na yee yi wa mɛ: ‹Jomɔ pemu mʼa logo ge, pee ganha bu ma jaa wu yirige wɛ, pee pemu Asiri saan wu kashɛn keye ɲuŋɔfɔɔ wʼa jo na nɛ fanha ge. 7 Nʼa da ba wu pye wʼa jomɔ pa logo, pee pemu na ba wu pye wʼa kuri na se wu wo fiige ki ni ge. Wu ba shɛ nɔ wà, nɛ na ba wu yaha ŋmɔpara di wu gbo.› »
Asiri saan wʼa Zheruzalɛmu fuguri sanha
8 Ayiwa, a Asiri saan wu kashɛn keye ɲuŋɔfɔɔ wu ba logo na Asiri saan wʼa yìri Lakishi kulo li ni, na kari di zhɛ do Libuna kulo li na, a wu gari na shɛ fara wu na wà. 9 Ga a pʼi ba Asiri saan wu pye na saannaa Tiraka wʼa ma di ba do wu na, Ecopi fiige ki wo saan we. Ba Asiri saan wʼa yee logo wɛ, na tudunmɔɔ tun sanha na pu shɛ yi jo Zhuda saannaa Ezekiyasi mu na: 10 «Ma Kilɛ wemu na mʼa daa ge, wu bu ma pye na: ‹Asiri saan wu da ba já Zheruzalɛmu co wɛ!› Wʼa ma faanna. 11 Asiri saannaa pʼa lemu pye fiiye yisaya na ge, pʼa yi kyɛɛgi kyɛɛgigana lemu na ge, muyɛ pyaa kʼa yee logo. A mʼi ganha na giin na yee na ba shɔ gɛ? 12 Nɛ sefɛlɛɛ pʼa Gozan kulo li kyɛɛgi, ni Karan kulo le, ni Erezɛfu kulo le, ni Edɛni shɛɛn piimu pu bye Telasari kulo li ni ge. Ta wee shi we wo kilɛlɛɛ pʼa já wu shɔ? 13 Amati wo saan we, ni Aripadi wo we, ni Sefarivayimu wo we, ni Ena wo we, ni Iva wo we, mii pee saannaa pʼi ɲɛ wɛ?»
Saannaa Ezekiyasi ya Kilɛ ɲɛɛri
14 Ayiwa, a saannaa Ezekiyasi di sɛmɛ wu shɔ tudunmɔɔ pu keŋɛ ni, na wu kalaa. Lee kadugo na a wu gari Kilɛ-pɛɛŋɛ pugbɔhɔ ki ni, na shɛ sɛmɛ wu sanhana Tɛhɛnɛ Baa Kilɛ ɲaha tàan. 15 A wu Tɛhɛnɛ Baa Kilɛ ɲɛɛri na jo: 16 «Kashɛn Keye yi Fɔɔ Tɛhɛnɛ Baa Kilɛ, Izirayɛli wo Kilɛ we, mu wemu wʼa tiin serubɛɛna pu ɲuŋɔ ni ge, mu yɛ nigin pe wu ɲɛ koŋɔ ke bɛɛri wo saanra ti wo Kilɛ we. Mu wʼa fugba we ni ɲiŋɛ ki yàa. 17 Tɛhɛnɛ Baa Kilɛ, ma ɲuwegee ki shan mʼa logo! Tɛhɛnɛ Baa Kilɛ, ma ɲìi ki mugi, mʼa wii! Sankeribu ya pu tun pʼa pa fanhara jomɔ pemu bɛɛri jo wá mu Kilɛ ɲìi wo wu na ge, yi logo! 18 Tɛhɛnɛ Baa Kilɛ, can wu ɲɛ wii, Asiri saannaa pu kunni ya pa shi wu bɛɛri kyɛɛgi na fara pu fiiye yi bɛ na. 19 A pʼi pu kilɛlɛɛ pu sòrogo na ni. Bani pee kilɛlɛɛ pi bi ta pye Kilɛ wuyɛ pyaa pyaa wɛ, sipya wo keŋɛ yayaaya yi bye yii, ma yi tɛ wolo tiye kelee faaya ni. Lee lʼa pu pye pʼa já yi bɛɛri kyɛɛgi. 20 Ayiwa nimɛ, Tɛhɛnɛ Baa Kilɛ, wù Kilɛ we, wù shɔ Sankeribu na, kɔnhɔ ɲiŋɛ ki wo saanra ti bɛɛri di li cɛ na mu yɛ nigin pe wu ɲɛ Tɛhɛnɛ Baa Kilɛ we.»
Tɛhɛnɛ Baa Kilɛ ya Ezekiyasi wo ɲɛrɛgɛ ki ɲɔ shɔ
21 Ayiwa, a Amɔsi ja Ezayi di tuduro yaha pʼa shɛ jo Ezekiyasi mu na yemu Tɛhɛnɛ Baa Kilɛ, Izirayɛli wo Kilɛ wʼa jo ge, yee yi wa mɛ: ‹‹Ɲɛrɛgɛ kemu mʼa pye Asiri saannaa Sankeribu shizhaa na ge, nʼa ki logo. 22 Yemu nɛ Tɛhɛnɛ Baa Kilɛ ya jo wu shizhaa na ge yee yi wa mɛ:
‹Siyɔn kulo li jate ya nɔ mu na wɛ, wʼa zhɛhɛni ma na.
Zheruzalɛmu wʼa ɲuŋɔ kori ma na, ma kadugo yíri.
23 Jɔgɔ mu dʼa shɛhɛlɛ, na wu fanha wɛ?
Jɔgɔ fɛni mʼa ŋmii waa, na ma ɲɛkuunɔ leni wu ni wɛ?
Go nɛ wi, Izirayɛli wo Fɛfɛɛrɛ wo we!
24 Mu ya ma tudunmɔɔ pu tun pʼa pa Kafɔɔ fanha.
Mu ya jo: “Nɛ wo shɔnyɔ wotoriyo yi ɲɛhɛ wu baraga ni
nɛ Sankeribu ya dugi kari fo Liban faaboboyo yi ɲidii li ni,
na shɛ wu sɛdiri tiye yi wo nidɔɔnyɔ yi kɔn,
na wu sipɛrɛ tiye yi nizaaya yi kɔn, na gari fo wu taha ki ɲidii li ni.
25 Nɛ keeye su, na yi lɔhɔ gba.
Nɛ Nili gba wu keye yi bɛɛri tanhana gbere fo na yi waha na tɔɔyɔ yi ni.”
26 «‹Ayiwa Sankeribu, ta mu ya li cɛ
na nɛ Tɛhɛnɛ Baa Kilɛ wʼa ki keree kii ɲɔ wolo fo taatuunnɔ ni wɛ?
Fo taashiinɛ li ni nɛ kii keree kii gbegele.
Na ganha na ki ɲɔ fani nimɛ.
Mu wo nibyii li ɲɛ na kii kulogoo baraga wogoo kii kyɛɛgi
na pye katahaya.
27 Ki sipyii pʼa fya, pu fanhaya ya xɔ, pʼa shiige.
Pu ɲɛ ba ɲa ɲɛ wɛ sige ki ni, ba ɲapure ɲɛ wɛ.
Pu ɲɛ ba kataŋa ɲa ɲɛ wɛ,
kelee ba kɛrɛyɛ shinma ɲɛ wɛ, wemu ma waha lɛbaa ge.
28 «‹Tuun wemu ni mu da diin ge, tuun wemu ni mu da voro ge,
tuun wemu ni mu da jé ge, nɛ we cɛ.
Tuun wemu ni mu ma luu yirige nɛ tàan ge, nɛ wee bɛ cɛ.
29 Mu ya luu yirige nɛ tàan.
Ma tabaara jomɔ pʼa jé nɛ ɲuwii li ni.
Lee wuu na nʼa da ba munatuuŋɔ le ma na,
di kɔrɔfɛ le ma ɲɔ ki ni.
Koo lemu ni mʼa pa ge, nɛ na ba ma kuruŋɔ lee ninunɔ ni.› »
30 «Mu Ezekiyasi wi ge, lemu li da ba bye lee wo ɲaha shɛshɛɛrɛ mu mu ge, lee li wa mɛ: Shinmapa wemu wʼa da ba fin yi kɛrɛyɛ yi ni ge, wee yʼa da ba li ɲiɲee. Yee lemu lʼa ma ge, lee bɛ na ba bye mu. Ga yee taanri wuu le, yi na ba yemɛ nugi, na ba yalɔɔrɔ lɔ, yi na ba ɛrɛzɛn tiye nɔri, na ba yi yasɛyɛ li. 31 Zhuda mara wu sipyii piimu pu da ba gori ge, peesamaa na ba bye ba tige ɲɛ wɛ, pu na ba niyɛ tirige, na nagoo pye sanha. 32 Oo dɛ pii na ba shɔ do Zheruzalɛmu ni. Pii na ba gori Siyɔn faaboboŋɔ ki na. Lee Kashɛn Keye yi Fɔɔ Tɛhɛnɛ Baa Kilɛ wʼa da ba bye wu wo taanɲɛɛgɛ nigbɔhɔ ki funŋɔ ni.
33 Lee wuu na, yemu Tɛhɛnɛ Baa Kilɛ ya jo Asiri wo saan wu shizhaa na ge, yee yi wa ye: ‹Wu da ga jé le kulo li ni wɛ, wu da ŋmaga bɛ ŋmɔ li ni wɛ. Wu da ga ba le kulo le fɛni ni ŋmasigiye ni wɛ. Wu da ba taduguŋɔ bɛ yàa kulo li fɛni wɛ. 34 Koo lemu ni wʼa pa ge, lee ninunɔ ni wʼa da ba guri. Wu da ga jé le kulo le ni wɛ, nɛ wʼa jo mu, nɛ Kafɔɔ Kilɛ. 35 Nɛ na ba le kulo le mara, na li shɔ nayɛ pyaa kee, ni na kapyebye Dawuda wuu na.›»
Asiri shɛɛn pʼa kari, a Sankeribu jalaa pʼi shɛ wu gbo
36 Ayiwa, a Tɛhɛnɛ Baa Kilɛ wo mɛlɛkɛ wu foro, na kashɛnŋmuu kabɔfoŋɔɔ xhuu nigin ni kɛlɛɛ gbarataanri ni kaguro (185.000) gbo Asiri shɛɛn pu ni. Ɲiga kʼa pa mugi ge, ba pʼa yìri wɛ, na pii bɛɛri ta xuu. 37 Ba lee ya pye wɛ, a Asiri saannaa Sankeribu di wu kashɛn keŋɛ ki yirige, na guri na kari Ninive ni, na shɛ diin wà.
38 Caŋa ka, na wu yaha wʼa nuguro sin wu yapɛrɛ Nisirɔki wu gbaha ki ni, a wu jalaa Adaramelɛki ni Saresɛri di shɛ wu gbo ni ŋmɔparaa ni, na baa kari Arara fiige ki ni. A wu ja Esari-Adɔn di diin saanra ti na wu tɛgɛ.