Ezekiyasi wo yama pe ni wu sicuumɔ pu keree
(2 Saannaa 20:1-11 ; 2 Caŋaɲɛhɛɛ 32:24-26)
38
Yee caya yi na, a Ezekiyasi di ba do na yá, fo wu na zhaa di xhuu. A Kilɛ tudunmɔɔ Ezayi di shɛ foro wu na, Amɔsi wo ja we, na wu pye: «Yemu Tɛhɛnɛ Baa Kilɛ ya jo ge, yee yi wa mɛ: «Ma puga ki keree ki kaa le ma puga shɛn wa keŋɛ ni, bani ma da ba xhu, ma wa da juuŋɔ wɛ.»2 Ayiwa, a Ezekiyasi di wu ɲaha ŋmahana ɲɛri kasɔrɔgɔ ki yíri, na Tɛhɛnɛ Baa Kilɛ ɲɛɛri na: 3 «Tɛhɛnɛ Baa Kilɛ, ma funŋɔ kɔn li na, na nɛ ɲaari mu ɲaha tàan ni ɲɔmɛɛ fɛɛrɛ ni funvige ni, na kasaaŋaa pye ma ɲaha tàan.» A wu sii mɛɛ su xuuni.
4 Wee tuun wu ni a Tɛhɛnɛ Baa Kilɛ wo jomɔ pʼi nɔ Ezayi na na: 5 «Kuri mʼa shɛ yi jo Ezekiyasi mu na yemu Tɛhɛnɛ Baa Kilɛ, ma sefɛlɛ Dawuda wo Kilɛ wʼa jo ge, yee yi wa mɛ: ‹Nɛ ma ɲɛrɛgɛ ki logo, na ma ɲɛsinmɛ pu bɛ ɲa. Nʼa da ba yee kɛ ni kaguro fara ma shi wu na. 6 Nɛ na ba ma ni le kulo le shɔ Asiri fiige ki saan wu na. Nɛ na ba le kulo le mara.› »
7 Ayiwa, a Ezayi di jo: «Fagana lemu na Tɛhɛnɛ Baa Kilɛ da ba wu ɲɔjomɔ pu fa ge, lee wo ɲaha shɛshɛɛrɛ ti wa mɛ: 8 ‹Li wii, ɲimɛ pemu pʼa tigi Akazi wo katadinnɛ li na ge, nɛ na ba pee ɲimɛ pe pye pʼa kuri kadugo yíri ni girimɛɛ kɛ ni.›» Ayiwa, a caŋa kʼi guri foro girimɛɛ kɛ na, pee piimu na ɲimɛ pu bi tigi ge.
Ezekiyasi wo zagunnuŋɔ ke
9 Ayiwa, Ezekiyasi, Zhuda fiige ki saan we, wʼa zagunnuŋɔ kemu ka wu yama pe ni wu sicuumɔ pu da wu wuu na ge, kee ki wa ke:
10 «Nɛ bi na funŋɔ kɔɔn jo:
‹Xuu kulo ni nʼa gaaŋi mɛ,
ma na yaha na shi wu titanma ni,
na shi wu caŋaɲɛhɛɛ kʼi sanha xhɔ bɛ wɛ.›
11 Nɛ bi yu jo: ‹nɛ da Tɛhɛnɛ Baa Kilɛ ɲa nige
wyii wo ɲiŋɛ ki na wɛ.
Nɛ da ga sipyiyawyii ɲaha ɲa nige
koŋɔ ki sipyii pu ni wɛ.
12 Nɛ munaa lʼa wolo na gari taliige ni
ba yatɔɔnahama wo fàya bugi ɲɛ wɛ.
Nɛ shi wʼa kurulo ba gbeeshinmɛ fàŋa ɲɛ wɛ.
Faŋa ki bu shin xɔ, wʼa ki kurulo,
na ki kɔn wolo gbee wu ni.
Ɲisɔɔgɔ ni yakoŋɔ tɛ ni
mu bi da xhɔ nɛ ni.
13 Nɛ co nayɛ na fo na shɛ nɔ ɲisɔɔgɔ ki na.
Wʼa na kaciiye yi bɛɛri tɔnhɔnɔ ma na jo cɛnri wi.
Ɲisɔɔgɔ ni yakoŋɔ tɛ ni mu bi da xhɔ nɛ ni.
14 Nɛ bi mɛɛ yu ba kanhanadiidiinɛ ɲɛ fugba we ni wɛ,
nɛ bi mɛɛ yu ba xobanra ɲɛ wɛ.
Nɛ bi ma fugba wu wii
fo na shɛ piige pye kʼa jé na ɲaha ni.
Nɛ wo cɔnrɔmɔ pʼa pɛlɛ toro,
Ee, Kafɔɔ, pa na shɔ!
15 «‹Yekɛ nɛ di da ba jo wɛ?
Wʼa jo ni na ni,
wuyɛ pyaa kʼa we labye we pye.
Nɛ na ba nayɛ tirige
na ɲaari na shi wu caŋaɲɛhɛɛ ki bɛɛri ni,
na wo cɔnrɔmɔ pu wuu naa.
16 « ‹Kafɔɔ, mu wo saama pu baraga ni
sipyii ya ɲiifɛɛrɛ pyi.
Pee baraga ni nɛ wa ɲii fɛɛrɛ pyi niɲaa we ni.
Mu na ba nɛ cuuŋɔ, na nɛ yaha shi na.
17 Li wii, nɛ wo cɔnrɔmɔ pʼa ɲɛri na mu ɲaɲiŋɛ.
Mʼa na kile shɔ xu wo wege ki na
ma wo taanɲɛɛgɛ nigbɔhɔ ki funŋɔ ni.
Bani mʼa na jurumu wu bɛɛri wá
ma kadugo yíri.
18 Xuu kulo da já mu sɔ wɛ,
xu di wa da já ma pɛlɛ wɛ.
Piimu pʼa diri faŋa ni ge,
pee ya mu wo ɲɔmɛɛ fɛɛrɛ ti pyi nige pu tadaŋa wɛ.
19 Wyii yɛ nigin pʼa mu sɔni,
ma na jo ba nɛ wʼa li pyi mɛ niɲaa wɛ.
Tii na ba mu wo ɲɔmɛɛ fɛɛrɛ ti kaa jo pu nagoo mu.
20 Tɛhɛnɛ Baa Kilɛ ya nɛ shɔ!
Wèe na ba wù wo ciire ti cɛɛ ni konɔɔ ni,
wù shi wu caŋaɲɛhɛɛ ki bɛɛri ni Tɛhɛnɛ Baa Kilɛ wo puga ki ni.»
21 Ayiwa, lee bi Ezayi ta wʼa jo na pu pa ni nitoroŋɔ nilɛgɛ ni, pʼi ba kee taha Ezekiyasi wo pugo ki na, na wu na juuŋɔ.b 22 A Ezekiyasi di jo: «Ɲaha shɛshɛɛrɛ tekɛ tʼi li shɛɛ na nɛ na ba juuŋɔ fo na ba shɛ jé Tɛhɛnɛ Baa Kilɛ wo pɛɛŋɛ pugbɔhɔ ki ni sanha wɛ?»