Ezekiyasi ya bana, na juuŋɔ
20
Ayiwa, yee caya yi na, a Ezekiyasi di ba do na yá, fo wu na zhaa di xhuu. A Kilɛ tudunmɔɔ Ezayi di shɛ foro wu na, Amotisi wo ja we, na wu pye: «Yemu Tɛhɛnɛ Baa Kilɛ ya jo ge, yee yi wa mɛ: ‹Ma funŋɔ jozama jo ma puga ki mu, bani ma da ba xhu, ma wa da juuŋɔ wɛ.› »2 Ayiwa, a Ezekiyasi di wu ɲaha ŋmahana ɲɛri kasɔrɔgɔ ki yíri, na Tɛhɛnɛ Baa Kilɛ ɲɛɛri na: 3 «Ɲɔ mayɛ na, Tɛhɛnɛ Baa Kilɛ, nʼa ma ɲɛɛri, ma fungɔngɔ yaha li na, na nɛ ɲaari mu ɲaha tàan ni ɲɔmɛɛ fɛɛrɛ ni funvige ni, na kasaaŋaa pye ma ɲaha tàan.» A wu sii mɛɛ su xuuni.
4 Wee tuun wu ni a Tɛhɛnɛ Baa Kilɛ wo jomɔ pʼi nɔ Ezayi na na wu ta wu sanha foro kaaŋa ki ni wɛ na: 5 «Kuri mʼa shɛ yi jo Ezekiyasi mu, na sipyii pu wo ɲuŋɔfɔɔ we, na yemu Tɛhɛnɛ Baa Kilɛ, wu to Dawuda wo Kilɛ wʼa jo ge, yee yi wa mɛ: ‹Nɛ ma ɲɛrɛgɛ ki logo, na ma ɲɛsinmɛ pu bɛ ɲa. Nʼa da ma cuuŋɔ. Caŋa taanri wogo ki na, ma na ba dugi na kari Tɛhɛnɛ Baa Kilɛ wo puga ki ni. 6 Nʼa da ba yee kɛ ni kaguro fara ma shi wu na. Nɛ na ba ma ni le kulo le shɔ Asiri fiige ki saan wu na. Nɛ na ba le kulo le mara nayɛ pyaa ki wuu na, ni na kapyebye Dawuda wu wuu na.› »
7 Ayiwa, a Ezayi di jo: «Yi nitoroŋɔ niwaara wo gateau ɲile la lɔ.» A pʼi nitoroŋɔ gato wu lɔ, na wu fara nɔɔgɔ ki na, a Ezekiyasi di juuŋɔ.
8 Lee bi Ezekiyasi ta wʼa Ezayi pye na: «Ɲaha shɛshɛɛrɛ tekɛ tʼa li shɛɛ na Tɛhɛnɛ Baa Kilɛ na ba nɛ cuuŋɔ, nɛ ma dugi kari caŋa taanri wogo ki na Tɛhɛnɛ Baa Kilɛ wo puga ki ni wɛ?» 9 Ayiwa, a Ezayi di jo: «Fagana lemu na Tɛhɛnɛ Baa Kilɛ da ba wu ɲɔjomɔ pu fa ge, lee wo ɲaha shɛshɛɛrɛ ti wa te mɛ mu mu: ‹Ɲimɛ pʼa yaa na shɛ ɲaha na ni tɔɔyɔ tatahaya kɛ ni laa, ta pu kuri kadugo ni tɔɔyɔ tatahaya kɛ ni, Akazi wo taduguŋɔ ki na?› » 10 A Ezekiyasi di jo: «Ɲimɛ pu bu shɛ ɲaha na ni tɔɔyɔ tatahaya kɛ ni, lee wa latii wɛ. Pʼa yaa pu kuri kadugo ni tɔɔyɔ tatahaya kɛ ni!» 11 Wee tuun wu ni a Kilɛ tudunmɔɔ Ezayi di Tɛhɛnɛ Baa Kilɛ ɲɛɛri, a wu ɲimɛ pu kuruŋɔ na pa kadugo ni tɔɔyɔ tatahaya kɛ ni, Akazi wo taduguŋɔ ki na, kee kemu wo tɔɔyɔ tatahaya na ɲimɛ pu bi tigi ge.
Ezekiyasi ya wu naafuu tayahaya yi shɛ Babilɔni fiige ki wo tudunmɔɔ pu na
12 Baladan ja Merodaki-Baladan, Babilɔni wo saan we, a wee di tudunmɔɔ yaha pa wee tuun we ni ni sɛmɛ wa ni, ni ma yakanya ya, na pa gan Ezekiyasi mu. Bani wu bi Ezekiyasi wo yama pu kaa logo. 13 A Ezekiyasi di pee tudunmɔɔ pu co na ɲɔ. Yaŋmuyɔ yemu bɛɛri yi bye wu mu wu yaŋmuyɔ tayahaya yi ni ge, a wu yee bɛɛri shɛ pu na, warifyɛn, ni sanni, ni nudanga yaara, ni nudanga sìnmɛ. A wu wu kashɛn yagboyo yi bɛɛri shɛ pu na ni wu naafuu wu bɛɛri ni. Yafiin ya kori wu saanra puga ki ni, kelee wu saanra ti koomɔ pu bɛɛri ni wu ya kemu shɛ pu na wɛ.
14 Ba lee ya pye wɛ, a Kilɛ tudunmɔɔ Ezayi di shɛ saannaa Ezekiyasi mu na shɛ wu pye: «Yekɛ pii sipyii pii da pa jo ma mu wɛ? Mii pu dʼa yìri na pa ma mu wɛ?» A Ezekiyasi di wu pye: «Fiitɔɔngɔ ka ni pʼa yìri na pa, fo Babilɔni ni pʼa yìri.» 15 A Ezayi di jo sanha na: «Ɲaha ni ɲaha pu dʼa ɲa ma saanra puga ki ni wɛ?» A Ezekiyasi di jo: «Yara bɛɛri li ɲɛ nɛ wo saanra puga ki ni ge, pʼa li ɲa. Yafiin ya kori nɛ naafuu wu tayahaŋa ki ni, nɛ ya lemu shɛ pu na wɛ.» 16 Wee tuun wu ni a Ezayi di Ezekiyasi pye: «Yemu Tɛhɛnɛ Baa Kilɛ ya jo ge, yee logo: 17 ‹Caŋa ka wʼa ma, yara bɛɛri li ɲɛ ma puga ki ni ge, ma tii pʼa yara lemu bɛɛri sha pinnɛ, fo na pa nɔ niɲaa na ge, lee bɛɛri na ba guu na kari Babilɔni ni. Yafiin la wa da ba gori naha wɛ.› Tɛhɛnɛ Baa Kilɛ wʼa jo mu. 18 ‹Pu na ba gari ni ma nagoo pii ni, mayɛ pyaa wo tirige shɛɛn paa, na shɛ pu wolo namaa ni, na pu yaha bulooro kapyeŋɛɛ na Babilɔni saan wu wo saanra puga ki ni.› » 19 A Ezekiyasi di Ezayi ɲɔ shɔ na: «Tɛhɛnɛ Baa Kilɛ wo jomɔ pemu mʼa jo na mu ge, pʼa taan.» Bani wu bi yi yu wuyɛ funŋɔ ni na: «Ɲaɲiŋɛ ni tifahama na ba da nɛ wo shi wu caŋa ɲii li ni.»
(2 Caŋa Ɲɛhɛɛ Jomɔ 32:32-33)
20 Ayiwa, Ezekiyasi wo kapyegee kisaŋaa, wu na pye naŋmaga, ni yaagana lemu na wʼa logoro li yaa, kɔnhɔ lɔhɔ kʼi da se Zheruzalɛmu kulo li ni ge, yee ya ka Zhuda koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 21 A Ezekiyasi di shɛ binnɛ ni wu tii pu ni yaŋa kanha na. A wu ja Manase di diin saanra ti na wu tɛgɛ.