Manase ya teŋɛ na pye Zhuda koomɔ pu wo saan we
(2 Caŋa Ɲɛhɛɛ Jomɔ 33:1-10)
21
Ayiwa, Manase teŋɛduun wu ni saanra ti na, wu shi wu bye yee kɛ ni shuun. A wu yee kɛlɛɛ kaguro ni kaguro (55) pye saanra ti na Zheruzalɛmu kulo li ni. Wu nu wu mɛgɛ ki bye na Efisiba. 2 Lemu lʼa kolo Tɛhɛnɛ Baa Kilɛ mu ge, lee wu bi byi. Tɛhɛnɛ Baa Kilɛ bi fiiye yatii shɛɛn piimu kɔri laha fiige ki ni Izirayɛli nagoo pu mu ge, pee wo tanhaŋa keree ki fɛni wu bi se. 3 Wu to Ezekiyasi wʼa bi gan tapyeye yemu ja ja ge, a wu guri yee sinvonɔ sin sanha. A wu saraya tawoloyo ya yàa yapɛrɛɛ Baali mu, na pɛɛŋɛ tinnɛ la sin yapɛrɛɛ Ashera mu, ba Akabu bi li pye wɛ, Izirayɛli koomɔ pu wo saan we. A wu ganha na nuguro sinni fugba wu wo kpɛɛnyegeye yi bɛɛri fɛɛ ni, na ganha na kapyeŋɛɛ pyi yee mu. 4 A wu yapɛrɛɛ wo saraya tawoloyo yereŋɛ Tɛhɛnɛ Baa Kilɛ wo puga ki ni, ma li ta bɛ Tɛhɛnɛ Baa Kilɛ bi jo na: «Zheruzalɛmu kulo li ni nʼa da ba na mɛgɛ ki yaha.» 5 A wu saraya tawoloyo ya yàa fugba wu wo kpɛɛnyegeye yi bɛɛri mu Tɛhɛnɛ Baa Kilɛ wo kaaya shuun wu funŋɔ ni. 6 A wu wu ja bɛ sorogo na pye saraga. Wu bi siganma pyi, na celɔrɔ bɛ pyi. A wu sipyii pii teŋɛ, pee piimu ya xuu yegee, na celɔrɔ pyi ge. Keree kiimu kʼa kolo Tɛhɛnɛ Baa Kilɛ mu ge, a wu ganha na la faraa kee na, na Tɛhɛnɛ Baa Kilɛ wo luu li yirige. 7 Ashera wo jaa wemu wʼa bi yàa ge, a wu shɛ wee yaha Tɛhɛnɛ Baa Kilɛ wo puga ki ni, ma li ta bɛ Tɛhɛnɛ Baa Kilɛ bi yi jo Dawuda ni wu ja Solomani mu kee puga ki keree na na: «Ke puga ke, ni Zheruzalɛmu kulo li nɛ shɔɔnri lɔ Izirayɛli gbaweye yi bɛɛri tɛ ni, di ba na mɛgɛ ki yaha wà fo gbee. 8 Nʼa da ga Izirayɛli nagoo pu kɔri di laha nige ke ɲiŋɛ ke na wɛ, kee kemu nɛ kan pu tii pu mu ge. Lʼi shɛ da nago kanna ɲɔmɛhɛɛ kiimu nɛ jo pu mu ge, pʼa kee koo ɲaari cibɛ, na daha na kapyebye Musa wo saliya wu bɛɛri fɛni, wʼa wemu kan pu mu ge.» 9 Ga pu ya ta Kilɛ wo jomɔ pu logo wɛ. A Manase di pu piinŋɛ, fo na pu pye pʼa kakuuyo pye na toro fiiye yatii shɛɛn pu tàan, pee piimu Tɛhɛnɛ Baa Kilɛ ya kyɛɛgi laha Izirayɛli nagoo pu ɲaha na ge.10 Ba lee ya pye wɛ, a Tɛhɛnɛ Baa Kilɛ di Kilɛ tudunmɔɔ pu tun pu mu, pee piimu pu ɲɛ wu wo kapyebyii pu ge, na pu pye na: 11 «Zhuda saannaa Manase ya tanhaŋa keree pye. Amɔri shi shɛɛn pʼa tanhaŋa keree kiimu pye toro ge, Manase wogoo kʼa kolo ye pee wogoo ki na. Wʼa wu yapɛrɛɛ ki taga Zhuda bɛ tɔɔgɔ le jurumu ni. 12 Lee wuu na, yemu Tɛhɛnɛ Baa Kilɛ, Izirayɛli wo Kilɛ wʼa yu ge, yee yi wa mɛ na: ‹Nʼa da ba bɔɔngɔ ka yaha zhan Zheruzalɛmu ni Zhuda ɲuŋɔ ni fo sipya bɛɛri wʼa ki keree logo ge, wufɔɔ na jiraŋi. 13 Daanna mɛɛ lemu ni nɛ Samari kulo li taanna ge, ni daanna yaaga kemu ni nɛ Akabu wo puga ki taanna ge, yee ninuyɔ nʼa da ba daga Zheruzalɛmu kulo li bɛ taanna. Nɛ na ba Zheruzalɛmu kulo li sipyii pu je na yeege li ni ba pu ma yalige yaaga je mɛ na ki shigile wɛ. 14 Nɛ na ba ɲaha lɔ na sipyii pusamaa tàan. Nɛ na ba pu le pu pɛɛn pu keŋɛ ni. Pu pɛɛn pu bɛɛri na ba pu kuu, na pu yaŋmuyɔ yi bɛɛri lɔ. 15 Bani fo caŋa kemu nɛ pu tii pu yeege Misira fiige ki ni ge, fo na pa nɔ niɲaa na, lemu lʼa kolo nɛ mu ge, lee pʼa pye, na nɛ luu li yirige.› »
16 Ayiwa, Manase ya jaagi baa fɛɛ wo shishan niɲɛhɛmɛ wo, fo na Zheruzalɛmu kulo li ɲi pee shishan pu na, na lɔ ɲuŋɔ ka na, fo na shɛ nɔ ka na. Lee bɛɛri kadugo na, a wu Zhuda bɛ tɔɔgɔ le jurumu ni, na wu pye wu na keree pyi kiimu kʼa koloTɛhɛnɛ Baa Kilɛ mu ge.
(2 Caŋa Ɲɛhɛɛ Jomɔ 33:18-20)
17 Ayiwa, Manase wo kapyegee kisaŋaa, keree kiimu bɛɛri wʼa pye ge, jurumu wemu bɛ wʼa pye ge, yee ya ka Zhuda koomɔ pu saannaa pu wo caŋa ɲɛhɛɛ jomɔ pu sɛmɛ wu ni. 18 A Manase di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ wu puga ki wo loyɔ kamahaŋa ki ni, kee kemu pʼa byi na Uza wo loyɔ kamahaŋa ki ge. A wu ja Amɔ di diin saanra ti na wu tɛgɛ.
Amɔ ya teŋɛ na pye Zhuda koomɔ pu wo saan we
(2 Caŋa Ɲɛhɛɛ Jomɔ 33:21-25)
19 Ayiwa, tuun wemu ni Amɔ ya teŋɛ saanra ti na ge, wu shi wu bye yee kɛlɛɛ shuun ni shuun (22). A wu yee shuun pye saanra ti ni Zheruzalɛmu kulo li ni. Wu nu wu mɛgɛ ki bye na Meshulemɛti, Yotiba shɛɛn Aruti wo poro pushɔ wu bye wii. 20 Lemu lʼa kolo Tɛhɛnɛ Baa Kilɛ mu ge, lee wu bi byi ba wu to Manase wʼa bi li pyi wɛ. 21 Wu to wʼa bi koo lemu ɲaari ge, lee wu bɛ bi ɲaari li cegee na. Wu to wʼa bi yapɛrɛɛ kiimu kaan ge, a wu bɛ di ganha na kee kaan, na nuguro sinni ki fɛɛ ni. 22 A wu kadugo le Tɛhɛnɛ Baa Kilɛ ni, wu tii pu wo Kilɛ we, na bye wu ya taha Tɛhɛnɛ Baa Kilɛ wo koo li fɛni wɛ. 23 Caŋa ka, a Amɔ wo fanha ki sipyigbɔɔ pʼi ba woni pye wu kaa na, na shɛ wu gbo wu saanra puga ki ni. 24 Ga, piimu bɛɛri pʼa woni wu pye saannaa Amɔ kaa na ge, a fiige ki shɛɛn pʼi pee bɛɛri gbo. A fiige ki shɛɛn pʼi wu ja Zhoziyasi teŋɛ saanra ti na wu tɛgɛ. 25 Amɔ wo kapyegee kisaŋaa, keree kiimu wʼa pye ge, kee ya ka Zhuda koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 26 A pʼi shɛ wu ɲuŋɔ ŋmɔhɔ wu wo faŋa ki ni, Uza wo loyɔ kamahaŋa ki ni. A wu ja Zhoziyasi di diin saanra ti na wu tɛgɛ.