Zhoziyasi ya teŋɛ na pye Zhuda koomɔ pu wo saan we
(2 Caŋa Ɲɛhɛɛ Jomɔ 34:1-2)
22
Ayiwa, tuun wemu ni pʼa Zhoziyasi teŋɛ saanra ti na ge, wu shi wu bye yee gbarataanri. A wu yee kɛlɛɛ taanri ni nigin (31) pye saanra ti ni Zheruzalɛmu kulo li ni. Wu nu wu mɛgɛ ki bye na Yedida, wee bye Bɔsikati shɛɛn Adaya wo poro. 2 Lemu lʼa dan Tɛhɛnɛ Baa Kilɛ ni ge, lee wu bi byi. Wu to Dawuda ya koo lemu ɲaari ge, lee wu bɛ bi ɲaari li cegee na. Wu ya fiin shɛ kanige cɛ kelee kamɛnɛ cɛ wɛ.(2 Caŋa Ɲɛhɛɛ Jomɔ 34:8-18)
3 Ayiwa, Zhoziyasi wo saanra ti yee kɛ ni gbarataanri wuu li na, wʼa pa kama kavɛɛ Shafan tun caŋa ka Tɛhɛnɛ Baa Kilɛ wo pugba ki ni. Shafan bi bye Azaliya ja, Azaliya di ɲɛ Meshulamu wo ja. A Zhoziyasi di Shafan tun Kilɛ wo puga ki ni, na wu pye: 4 «Shɛ Ilikiya mu, saraya ɲaha shɔɔnrivɛɛ wo ɲuŋɔfɔgbɔ we, mʼa shɛ wu pye na wari wemu ni pʼa pa Tɛhɛnɛ Baa Kilɛ wo puga ki ni ge, na wu wu bɛɛri tɔrɔ, wee wemu kuɲɔsigilee pʼa ta sipyiire ti mu ge. 5 Piimu pu ɲɛ Tɛhɛnɛ Baa Kilɛ wo puga ki wo kapyebyii pu ɲahagbaa fɛɛ pu ge, pʼi wee wari wu kan pee mu, piimu pʼa kapyeŋɛɛ ki pyi Tɛhɛnɛ Baa Kilɛ wo puga ki ni, na puga ki wo takyɛɛgɛyɛ yi yari ge, kɔnhɔ pʼi da pee saraa ni wu ni. 6 Pʼi da kacebyii pu saraa ni puyirilee pee, ni mɔzɔɔn pee. Pʼi da tiin ki shuu, ni faaya nidɛyɛ ye, yee yemu ya yaa na taga puga ki yàa ge. 7 Ga wee wari we kaa lʼa le pu keŋɛ ni ge, wa shishiin ganha bu pu yege lee waripile la fiin wɛ, bani pʼa pu labye wu pyi ni tiimɛ ni.»
8 Wee tuun wu ni a saraya ɲaha shɔɔnrivɛɛ wo ɲuŋɔfɔgbɔ Ilikiya di kama kavɛɛ Shafan pye na: «Nɛ sha foro saliya sɛmɛ wu na Tɛhɛnɛ Baa Kilɛ wo puga ki ni!» A Ilikiya di sɛmɛ wu kan kama kavɛɛ Shafan mu, a wee di wu kalaa ni mujugbɔɔ ni. 9 Lee kadugo na, a kama kavɛɛ Shafan di shɛ saan wu mu, na shɛ wu pye na: «Wari wemu wʼa bye Kilɛ wo puga ki ni ge, ma kapyebyii pʼa wee kan Tɛhɛnɛ Baa Kilɛ wo puga ki wo kapyebyii pu ɲahagbaa fɛɛ pu mu.» 10 A kama kavɛɛ Shafan di guri saan wu pye sanha na: «Saraya ɲaha shɔɔnrivɛɛ Ilikiya ya sɛmɛ wa kan nɛ mu.» A Shafan di sɛmɛ wu kalaa ni mujugbɔɔ ni saan wu ɲahagbaa na.
Zhoziyasi ya jo na pu shɛ Kilɛ tudunmɔɔ Ulida yege
(2 Caŋa Ɲɛhɛɛ Jomɔ 34:19-28)
11 Ayiwa, ba saan wʼa saliya sɛmɛ wu jomɔ pu logo wɛ, na wu fàya shɛɛngi. 12 A saan wu te tuduro te kan saraya ɲaha shɔɔnrivɛɛ Ilikiya mu, ni Shafan ja Ayikamu, ni Mishe ja Akibɔri, ni kama kavɛɛ Shafan, ni Asaya, wee wemu wu ɲɛ saan wu wo kapyebye wu ge na: 13 «Yi shɛ Tɛhɛnɛ Baa Kilɛ yege na mu, ni sipyiire te, ni Zhuda shɛɛn pu bɛɛri mu, we sɛmɛ we keree na, wee wemu wʼà ta ge, bani Tɛhɛnɛ Baa Kilɛ wo loyire lʼa pɛlɛ. Wʼa luu yirige wèe tàan, ma li kaɲuŋɔ pye wèe tii pu ya ta we sɛmɛ we wo jomɔ pu logo wɛ. Yemu bɛɛri yʼa ka wèe keree na ge, pu ya ta yee koo ɲaari wɛ.»
14 Ayiwa, a saraya ɲaha shɔɔnrivɛɛ Ilikiya, ni Ayikamu, ni Akibɔri, ni Shafan, ni Asaya di gari Kilɛ tudunmɔɔ Ulida mu, Shalumu wo shɔ we, na shɛ binnɛ jo ni wu ni. Shalumu bi bye Tikiva wo ja, Tikiva di bi bye Arasi wo ja. Shalumu wu bi bye Tɛhɛnɛ Baa Kilɛ wo puga ki wo fàya yi kasɛɛgɛ pyevɔɔ. Zheruzalɛmu kulo li wo kayii nivonɔ li ni Ulida bi bye. 15 A wu pu pye: «Yemu Tɛhɛnɛ Baa Kilɛ, Izirayɛli wo Kilɛ wʼa jo ge, yee yi wa mɛ na ná wemu wʼa yi tun na pa nɛ mu ge, na yi shɛ yi jo wee mu na: 16 ‹Yemu Tɛhɛnɛ Baa Kilɛ wa yu ge, na yee yi wa mɛ na: “Nʼa da ba bɔɔngɔ yaha di zhan we xuu we, ni wu sipyii pu ɲuŋɔ ni, lemu bɛɛri Zhuda koomɔ pu saan wʼa kalaa we saliya sɛmɛ we ni ge, lee bɛɛri nʼa da ba bye. 17 Bani pʼa kadugo le nɛ ni, na shɛ ganha na nudanga yawurire wo kilɛlɛɛ piitiilee mu, na nɛ luu li yirige lee funŋɔ ni ni pu keŋɛ yayaaya yi ni. Nɛ luu lʼa yìri we xuu we fɛni, li wa da ba ɲiŋɛ wɛ”›. 18 Ga yʼi shɛ yi jo Zhuda koomɔ pu saan wu mu, wee wemu wʼa yi tun na yi pa Tɛhɛnɛ Baa Kilɛ yege ge, na yemu Tɛhɛnɛ Baa Kilɛ, Izirayɛli wo Kilɛ wʼa yu ge, na yee yi wa mɛ na: ‹Jomɔ pemu mʼa logo ge, 19 pee ya digi mu na, a mu di mayɛ tirige Tɛhɛnɛ Baa Kilɛ mu. Bani yemu nɛ jo na wá we xuu we ni wu sipyii pu na ge, mu ya yee logo, na bɔɔngɔ ni laŋi na ba do pu ɲuŋɔ ni. A mu di ma fàya shɛɛngi, na mɛɛ su nɛ ɲii na. Ayiwa, nɛ bɛ ya ma mɛɛ li logo. Tɛhɛnɛ Baa Kilɛ ɲɔjomɔ pi. 20 Lee wuu na, nʼa da ba ma yaha wà, fo ma ba xhu tuun wemu ni, di shɛ ma pinnɛ ni ma tii pu ni. Ma ɲaɲiŋɛ wo na ba shɛ le ma faŋa ki ni. Nɛ na ba bɔɔngɔ kemu bɛɛri shan we xuu we ɲuŋɔ ni ge, ma ɲii wa da daha kee bɔɔngɔ ki na wɛ.› » A tudunmɔɔ pʼi guri kari, na shɛ yee jo saan wu mu.