Ezekiyasi ya wu naafuu tayahaya yi shɛ Babilɔni fiige ki wo tudunmɔɔ pu na
39
Ayiwa, Baladan ja Merodaki-Baladan, Babilɔni wo saan we, a wee di tudunmɔɔ yaha pa wee tuun we ni ni sɛmɛ wa ni, ni ma yakanya, na pa gan Ezekiyasi mu. Bani wu bi Ezekiyasi yama pe ni wu sicuumɔ pu da wu kaa logo. 2 A pee tudunmɔɔ pu wo ba wu daan Ezekiyasi ni. Yaŋmuyɔ yemu bɛɛri yi bye wu mu wu yaŋmuyɔ tayahaya yi ni ge, a wu yee bɛɛri shɛ pu na, warifyɛn, ni sanni, ni nudanga yaara, ni nudanga sìnmɛ. A wu wu kashɛn yagboyo yi bɛɛri shɛ pu na ni wu naafuu wu bɛɛri ni. Yafiin ya kori wu saanra puga ki ni, kelee wu saanra ti koomɔ pu bɛɛri ni wu ya kemu shɛ pu na wɛ.3 Ba lee ya pye wɛ, a Kilɛ tudunmɔɔ Ezayi di shɛ saannaa Ezekiyasi mu na shɛ wu pye: «Yekɛ pii sipyii pii da pa jo ma mu wɛ? Mii pu dʼa yìri na pa ma mu wɛ?» A Ezekiyasi di wu pye: «Fiitɔɔngɔ ka ni pʼa yìri na pa. Fo Babilɔni ni pʼa yìri.»
4 A Ezayi di jo: «Ɲaha ni Ɲaha pu dʼa ɲa ma saanra puga ki ni wɛ?» A Ezekiyasi di jo: «Yara bɛɛri li ɲɛ nɛ wo saanra puga ki ni ge, pʼa li ɲa. Yafiin ya kori nɛ naafuu wu tayahaŋa ki ni nɛ ya lemu shɛ pu na wɛ.»
5 Wee tuun wu ni a Ezayi di Ezekiyasi pye: «Yemu Kashɛn Keye yi Fɔɔ, Tɛhɛnɛ Baa Kilɛ wʼa jo ge, yee logo: 6 ‹Caŋa ka wʼa ma, yara bɛɛri li ɲɛ ma puga ki ni ge, ma tii pʼa yara lemu bɛɛri sha pinnɛ fo na pa nɔ niɲaa na ge, lee bɛɛri na ba guu na kari Babilɔni ni. Yafiin la wa da ba gori naha wɛ.› Tɛhɛnɛ Baa Kilɛ wʼa jo mu. 7 ‹Pu na ba gari ni ma nagoo pii ni, mayɛ pyaa wo tirige shɛɛn paa, na shɛ pu wolo namaa ni, na pu yaha bulooro kapyeŋɛɛ na Babilɔni saan wu wo saanra puga ki ni.› »a
8 A Ezekiyasi di Ezayi ɲɔ shɔ na: «Tɛhɛnɛ Baa Kilɛ wo jomɔ pemu mʼa jo na mu ge, pʼa taan.» Bani wu bi yi yu wuyɛ funŋɔ ni na: «Ɲaɲiŋɛ ni tifahama na ba da nɛ wo shi wu caŋaɲii li ni.»