Ezekiyɛli
Sɛmɛ wemu wʼa Kilɛ tudunmɔɔ Ezekiyɛli keree yu ge
Ezekiyɛli ya Kilɛ wo nɔɔrɔ wu ɲa
(Ezekiyɛli 10 ; Kashɛɛ 4)
1
Yee kɛlɛɛ taanri (30) wuu li yeŋɛ shishɛɛrɛ wogo ki wo caŋa kaguro wogo ki na, Yawutuu piimu pʼa co na kari ge, na nɛ yaha pee tɛ ni, Kebari Gba wu tàan, a nɛ fugba wu ɲɔ ɲa kʼa mugi, a Kilɛ di kashɛgɛɛ kii shɛ nɛ na.a 2 Lee ya pye saannaa Zhoyakini wo yeconɔ li yee kaguro wuu li wo yeŋɛ ki cabyaa kaguro wu caŋa.b 3 A Tɛhɛnɛ Baa Kilɛ wo jomɔ pi nɔ nɛ Ezekiyɛli na, saraya ɲaha shɔɔnrivɛɛ Buzi wo ja we, na nɛ yaha Kalide shɛɛn pu wo fiige ki ni, Kebari Gba wu tàan. Wee xuu wu ni Tɛhɛnɛ Baa Kilɛ ya wu keŋɛ ki taha nɛ na.4 A nɛ wii na kafɛɛgbɔɔ la ɲa li na ma na yìri suumɔ kulo kacɛ ki na, ni ɲahaŋa tabaaga ka, ni nagbɔhɔ ka, kee bi kpɛɛngɛ kaan ki mahama pu ni. Kpɛɛngɛ ka bi ɲí na fòro ki niŋɛ ke ni ma na jo tɔɔrɔ pʼa ɲaaŋa na ni. 5 Ki nizhoo li ɲɛ ba ɲìi yaŋmuyɔ shishɛɛrɛ wa ɲɛ wɛ, yemu yʼa foro sipya fɛni ge.c
6 Kee yaŋmuŋɔ ka bɛɛri bye ni ɲahaya shishɛɛrɛ, ni kapaya shishɛɛrɛ ni. 7 Yi tɔɔyɔ yi bi tii tii, yi fereye yʼi ɲɛ ba nupepinŋɛ wo fereye ɲɛ wɛ, na ɲí ba pu ma tɔɔɲɛɛrɛ kemɛ wɔɔgɔ mɛ wɛ. 8 Sipya keye yi bye yi mu yi kapaya yi nɔhɔ ni yi kabaya shishɛɛrɛ wu bɛɛri na, yi shishɛɛrɛ wu bɛɛri di ɲɛ ni yi ɲahaya, ni yi kapaya. 9 Yi kapaya yi bi gbɔɔn yiyɛ na. Yi ba da ɲaari, yi da ŋmahana ɲɛri wɛ, ga ka bɛɛri na dii na se ki ɲahatiimɛ pu ni. 10 Yi ɲahaya yi bi foro sipya wogo fɛni. Yi shishɛɛrɛ wu bɛɛri bye ni cɛnri ɲaha ni kanige cɛ wu ni, yi shishɛɛrɛ wu bɛɛri di ɲɛ ni nupee ɲaha ni kamɛnɛ cɛ wu ni, yi shishɛɛrɛ wu bɛɛri di ɲɛ ni ɲaa wo ɲaha ni.d 11 Mu na yi ɲahaya yi bye. Yi kapaya yi bi yìri fugba ni. Yi bɛɛri bye ni kapaya shuun shuun ni yi na gbɔɔn yiyɛ na, kapaya shuun shuun wusamaa dʼa taga yi ceesɛɛyɛ yi tɔ tɔ. 12 Ka bɛɛri ba gaaŋi, kʼa dii na gaaŋi ki ɲahatiimɛ pu ni. Kilɛ wo sefɛɛrɛ ti bu yi pye yi shɛ xuu wemu ni, wà yʼa se. Yi ba se, yi da ŋmahana ɲɛri yʼi na yʼa se wɛ. 13 Ma bu yee ɲìi yaŋmuyɔ yi ɲa, mʼa yi ta ba naganɲigaa ɲɛ wɛ. Yi bye ba muubɔhɔɔ ɲɛ wɛ, kiimu ya se, na ma ɲìi yaŋmuyɔ yi tɛ ni ge. Na ki bi maŋamaŋaa, Kilɛ-ɲiŋɛɛ di fòro ki ni.e 14 Yee ɲìi yaŋmuyɔ yi bi fe na se, na fe na ma ba Kilɛ-ɲiŋɛɛ ɲɛ wɛ.
15 A nɛ yee ɲìi yaŋmuyɔ yi wii, na gɔrɔgɔ ka ta ɲiŋɛ ki na yi bɛɛri nigin nigin wu tàan, yi ɲahaya shishɛɛrɛ wu ɲahagbaa li na.f 16 Yee gɔrɔyɔ yi ɲɛwiinɛ ni yi yaagana li bye ba kirisoliti faakagereŋɛ ɲɛ wɛ, yi shishɛɛrɛ wu bɛɛri di ɲɛ nigin. Yi ɲɛwiinɛ le ni yi yaagana li bye ma na jo gɔrɔgɔ ka bɛɛri kʼa sɔɔri gɔrɔgɔ ka niŋɛ ni. 17 Yee gɔrɔyɔ yi bi fe yi kabaya shishɛɛrɛ wu bɛɛri na. Gɔrɔyɔ yi bi ŋmahana na ɲɛri yʼi na yʼa fe wɛ. 18 Pee zhantii pu tɔɔngɔ ki ɲuŋɔkana li bi fyaara leŋɛɛ sipya ni. Pee zhantii shishɛɛrɛ wu bɛɛri bi ɲi ɲìi na, fo na pu maha círi.g 19 Ɲìi yaŋmuyɔ shishɛɛrɛ wu ba gaaŋi, gɔrɔyɔ yi bɛ na ganha na gaaŋi ni yi ni. Ɲìi yaŋmuyɔ yi bu yìri fugba ni, gɔrɔyɔ yi bɛ na yìri ni yi ni. 20 Kilɛ wo sefɛɛrɛ ti bu yi pye yi shɛ xuu wemu ni, wà yʼa se, gɔrɔyɔ yi bɛ na yìri na se ni yi ni, bani ɲìi yaŋmuyɔ yi wo munaa le li bye gɔrɔyɔ yi bɛ ni. 21 Ɲìi yaŋmuyɔ yi ba gaaŋi, gɔrɔyɔ yi bɛ na ganha na gaaŋi. Yi bu yere, gɔrɔyɔ yi bɛ na yere. Yi bu yìri fugba ni, gɔrɔyɔ yi bɛ na yìri ni yi ni, bani ɲìi yaŋmuyɔ yi wo munaa le li bye gɔrɔyɔ yi bɛ ni.
22 Yaaga ka bye ɲìi yaŋmuyɔ yi ɲuɲɔ na ba fugba wu fanfanga ki ɲɛ wɛ, kee bi ɲí fo xuuni ba kirisoliti faakagereŋɛ ɲɛ wɛ, kee bi pii yi ɲuɲɔ wu na fugba wu ni.h 23 Yaŋmuyɔ yi bi yi kapaya yi pii kee fanfanga ki nɔhɔ ni, ka bɛɛri wo kapaya yi ma gbɔɔn ka woyo na, kapaya shuun shuun wusamaa dʼa taga yi ceesɛɛyɛ yi tɔ tɔ. 24 Yi ba gaaŋi, ma ganha na yi kapaya yi tunmɔ nuri ba logbɔhɔyɔ tunmɔ ɲɛ wɛ, kelee ba Se Bɛɛri Fɔɔ wu wo mujuu li ɲɛ wɛ. Tunmɔ nigbɔ pu bye pii ba kashɛn keŋɛ tunmɔ ɲɛ wɛ. Ba yʼa yere wɛ, yʼa kapaya yi tirige.i 25 Fanfanga kemu ki bye yi ɲuɲɔ wu na ge, mujuu la li ma fòro kee fanfanga ki wo ɲuɲɔ wu na. Ba yʼa yere wɛ, yʼa yi kapaya yi tirige.
26 Fanfanga kemu ki bye yi ɲuɲɔ wu na ge, yaaga ka bye kee fanfanga ki ɲuɲɔ na ba safiiri faakagereŋɛ ɲɛ wɛ, na ɲɛ ba saanra koro ɲɛ wɛ. Yaaga ka bye wà lee saanra koro li tuugo ki ɲuɲɔ na ba sipyiyawyii ɲɛ wɛ.j 27 A nɛ wu ɲa wu na yɛrɛ fo xuuni wu mahama pu bɛɛri ni ba tɔɔɲɛɛrɛ ɲɛ wɛ, temu ya kemɛ wɔɔgɔ ge. Wu bi yɛrɛ na co wu mɛnugumɔ pe na, na kari fugba wu ni, na jo mɛnugumɔ pu na, na digi nɔhɔdaan wu ni. A nɛ yaaga ka ɲa ba na ɲɛ wɛ, kee bi kpɛɛngɛ yeege wu mahama pu bɛɛri ni.k 28 Kpɛɛngɛ kemu ki bi wu maha ge, kee bye ba Kilɛ-ŋmɔpara ma bye mɛ ɲahaya ye na zanha cadogo wɛ. Ki bi foro Tɛhɛnɛ Baa Kilɛ wo nɔɔrɔ wu fɛni. Ba nɛ wu ɲa wɛ, na do, na ɲaha ke buri ɲiŋɛ ke na. A nɛ mujuu la logo.