Kilɛ wo sipyii pii ya pye ɲɔmɛɛ cobaalaa
66
Tɛhɛnɛ Baa Kilɛ ya yemu jo ge, yee yi wa mɛ:«Fugba wu ɲɛ nɛ wo saanra kootiinnɛ le,
ɲiŋɛ ke di ɲɛ na ɲidahaa tatahaŋa.
Yee di da ba puga kekɛ yereŋɛ nɛ mu wɛ?
Xuu wekɛ yee di da já gan nɛ mu, wee di bye na tatɛɛngɛ wɛ?a
2 Ye yaŋmuyɔ ye bɛɛri, nɛ keŋɛ kʼa yi bɛɛri yàa.
Nɛ baraga ni yi bɛɛri wa yàa, Tɛhɛnɛ Baa Kilɛ wʼa jo mu.
«Ga sipya wemu nɛ wii ge, wee ɲɛ:
Wemu wu ɲɛ kanhama fɔɔ, funyaŋa fɔɔ, na fyagi nɛ jomɔ pu na ge. b
3 «Sipya wa ma nù gbo saraga, na guri shɛ sipya bɛ gbo.
Wa ma dubya wolo saraga, na guri shɛ ponɔ bɛ ɲuŋɔ kpɔn ja.
Wa ma shinma saraga wolo, na guri shɛ shalaa shishan wo.
Wa ma nudanga yawurire sorogo nɛ mu, na guri shɛ yapɛrɛ kan.
Koo lemu lʼa taan pii sipyii pii mu ge, lee pʼa ɲaari.
Kii katanhaŋaa kii kʼa dan pu ni.
4 Lee wuu na nʼa pu yaha pu wo ɲidaan wu wo
bɔɔngɔ ki keŋɛ ni, lee nɛ bɛ ya shɔɔnri lɔ.
Kawagaa kiimu na pʼa fyagi ge, nɛ na ba kee shan pu ɲuŋɔ ni.
Bani nɛ pu yiri tuun wemu ni ge, sipya bɛ ya ta nɛ ɲɔ shɔ wɛ.
Nɛ jo, ga sipya bɛ ya nɛ jomɔ pu logo wɛ.
A pʼi kakuuŋɔɔ pye nɛ ɲaha tàan.
Keree kiimu kʼa pɛn nɛ mu ge, kee pʼa shɔɔnri lɔ.»
Kilɛ na ba wu sipyii pu logoo ɲiŋɛ
5 Yee piimu pʼa fyagi Tɛhɛnɛ Baa Kilɛ wo jomɔ pu na ge,
yi wu jomɔ pu logo: «Yee cebooloo piimu pʼa yee kɔ,
na yee kɔri nɛ wo mɛgɛ ki wuu na ge, pee ya jo:
‹Tɛhɛnɛ Baa Kilɛ wu wu wo nɔɔrɔ wu shɛ gɛ,
kɔnhɔ wù yi wo fundanga ki ɲa.›
Ga peeyɛ pyaa kʼa da ba zhiige.
6 Tunmɔ nigbɔ pa pʼa fòro kanha ki funŋɔ ni,
mujuu lʼa fòro Kilɛ-pɛɛŋɛ pugbɔhɔ ki ni.
Tɛhɛnɛ Baa Kilɛ wo mujuu li wa.
Wu pɛɛn pu wo kakuuŋɔɔ ki fɔɔ wʼa dɔni pu mu.
7 «Laa li sanha yìri wɛ, a wu li se.
Laa li yama pu sanha ɲɔ kɔn wɛ, a wu digi funana na.c
8 Jɔgɔ wu sanha dee yee shi logo ɲa wɛ?
Jɔgɔ wu sanha dee le shi ɲa ɲa wɛ?
Ta fiige niboŋɔ na já ze caŋa ɲii nigi ni?
Ta shi wa na já ze taapile ni?
Ago mu na Siyɔn ya pye.
Wu laa lʼa yìri yɛ, a wu nagoo se!
9 Nɛ ma cee sege ɲɔ mugi, na dɛrɛ jo sege ganha ba byi-i ya?»
Tɛhɛnɛ Baa Kilɛ wʼa jo mu.
«Nɛ wemu wʼa pya pyi wu na seni ge,
ta nɛ wu da sege ɲaha kɔn?»
Ma Kilɛ wu wʼa jo mu.
10 «Zheruzalɛmu ya taan yee piimu bɛɛri mu ge,
yi funŋɔ taan wu wuu na, yʼi da fundanga pyi ni wu ni.
Yee piimu pʼa bi mɛhɛɛ suu wu wuu na ge,
yi pinnɛ ni wu ni fundangbɔhɔ ki na.
11 Bani yi na ba wu jired li ŋmari
fo na din, lee lemu lʼa loɲinɛ kaan ge.
Yi fundanga wuu na ba li ŋmari fo na din,
lee lemu bɛɛri lʼa ɲi ge.»
12 Bani yemu Tɛhɛnɛ Baa Kilɛ ya jo ge, yee yi wa mɛ:
«Nɛ na ba ɲaɲiŋɛ ɲaha ɲɛri Zheruzalɛmu yíri
ba gba lɔhɔ ɲɛ wɛ,
na fiiye yatii shɛɛn wo nɔɔrɔ wu ɲaha tagi wu yíri
ba lofomɔ ɲɛ wɛ.
Yi na ba ŋmari, pu na ba yi leni kabanuyo na,
na yi tɛri nugunyɔ na, na yi taala taala.
13 Pya nu ya wu pya luu ɲiŋɛɛ ɲiŋɛgana lemu na ge,
nɛ na ba yi logoo ɲiŋɛ mu lee ɲiŋɛgana li na,
oo dɛ, yi logoo na ba ɲiŋɛ Zheruzalɛmu ni.»
14 Yi ba lee ɲa tuun wemu ni, yi zɔlɔɔ pu na ɲii fundanga na.
Yi ceepuuro ti na guri pye ni fanha ni ba ɲapurege ɲɛ wɛ.
Tɛhɛnɛ Baa Kilɛ na ba wu wo kapyebyii pu tɛgɛ,
na wu loyire niguunɔ li shɛ wu pɛɛn pu na.
15 Aye! Tɛhɛnɛ Baa Kilɛ we! Na niŋɛ ni wʼa ma.
Wu kashɛn wotoriyo yi ɲɛ ba kafɛnaɲile ɲɛ wɛ.
Wu na ba wu loyire li kuuri ni kafugo ni,
na naɲiŋɛ taga sipyiire ti ɲuŋɔ taha.
16 Tɛhɛnɛ Baa Kilɛ na ba kiiri kɔn sipyiire ti bɛɛri na,
ni na ni ŋmɔpara ni.
Wu na ba sipyiɲɛhɛmɛɛ gbo.
17 «Piimu pʼa puyɛ yɛri fɛfɛɛrɛ yahama ni, na puyɛ pyi fɛɛfɛɛ
na da na jin tahaya yi ni na gan wu pyi ge,
shɛn nigin fɛni pu ma daha wee di ɲɛ pu niŋɛ ni.
Pee wa shaalaa xaara xaa, yaŋmuyɔ yemu yʼa danha ge,
na yee xaa, na shuu xaa.
Pee sipyii pii bɛɛri na ba binnɛ gyɛɛgi,»
Tɛhɛnɛ Baa Kilɛ wʼa jo mu.
18 «Nɛ pu kapyegee ni pu fungɔnyɔ yi cɛ. Shi wu bɛɛri ni shi jomɔ pu tuuyo yi bɛɛri wo pinnɛduun wʼa nɔ. Pee na ba ba, na ba nɛ wo nɔɔrɔ wu ɲa.
19 «Nɛ na ba ɲaha shɛshɛɛrɛ ta pye na shɛ pu na. Sipyii piimu na ba shɔ pu ni nɛ wo kiiri wu kanhama pu na ge, nɛ na ba pii tun pee ni na shɛ Tarisisi ni Puli ni Ludi fiiye yi ni, pee piimu pu ɲɛ sindaa ŋmɔjemɛɛ ge. Na pii tun shɛ Tubali shɛɛn ni Yavan shɛɛn pu mu, ni suumɔ lɔhɔ niŋɛ takpiiye yi wo kulogoo kee, kee kiimu sanha kʼa lii ge. Pee sanha nɛ kaa logo ɲa wɛ, pʼi sanha nɛ wo nɔɔrɔ wu bɛ ɲa ɲa wɛ. Nɛ wo tudunmɔɔ pu na zhɛ nɛ wo nɔɔrɔ wu shɛ wee shi wu na. 20 Pu na ba ba ni yi cebooloo pu bɛɛri ni na foro shi wusama bɛɛri ni shɔnyɔ na, ni kashɛn wotoriyo, ni wotoriyo yemu wo fugba wʼa tɔ ge, na pii durogo shɔngɔ kafaya ni ɲɔhɔyɔ na. Pu na ba ba ni pu ni nɛ wo fɛfɛɛrɛ faaboboŋɔ ki na Zheruzalɛmu ni, na pa bye nɛ wo yakanga, Tɛhɛnɛ Baa Kilɛ wʼa jo mu. Izirayɛli nagoo pu ma ma ni pu wo yakanya yi ni pagana lemu na fɛfɛɛrɛ yaaga funŋɔ ni ge, pu na ba ba ni pu ni mu lee pagana li na Tɛhɛnɛ Baa Kilɛ wo pɛɛŋɛ pugbɔhɔ ki funŋɔ ni. 21 Nɛ na ba saraya ɲaha shɔɔnrivɛɛ ni Levi wo tirige shɛɛn pii shɔɔnri wolo pu ni,» Tɛhɛnɛ Baa Kilɛ wʼa jo mu.
22 «Ayiwa, ɲiŋɛ nivoŋɔ ni fugba nivomɔ wemu nɛ da ba yàa ge,
yee na ba gori yaha gbee yahagana lemu na ge,
lee yahagana li na yee bɛ wo tirige shɛɛn pee
ni yee wo mɛgɛ ki na ba gori yaha gbee
nɛ ɲaha taan,»e Tɛhɛnɛ Baa Kilɛ wʼa jo mu.
23 «Yevorovoŋɔ bɛɛri ni cadɛɛngɛ bɛɛri,
sipyiire ti bɛɛri na ba, na ba nuguro sin nɛ ɲaha tàan,
na nɛ pɛlɛ,» Tɛhɛnɛ Baa Kilɛ wʼa jo mu.
24 «Pu ba fòro kulo li ni tuun wemu ni, sipyii piimu pʼa ɲuŋɔ nari nɛ na ge, pu na pee nixhuyo ɲa. Fyɛnyɛ yemu yi da ba jé pee xuu pu ni ge, kee ka wa da ga xhu bada wɛ. Na ke ki da ba pu sorogo ge, kee da ga fugi ɲa bada wɛ. Pu na ba bye tanhaŋa yaaya sipyiire ti bɛɛri mu.