Kilɛ wo kiiri wemu wʼa ma ge
65
Tɛhɛnɛ Baa Kilɛ ya jo:«Nɛ bi gbegele di pii sipyii pii ɲɔ shɔ,
pee piimu pu ɲɛ pu ya ta nɛ yege-e ge.
Nɛ bi gbegele di na yɛ shɛ pii sipyii pii na,
pee piimu pu ɲɛ pu ya ta nɛ xuu sha-ɛ ge.
Shi wemu bi nɛ mɛgɛ ki yiri wɛ,
nɛ wee shi wu pye jo: ‹Nɛ we! Nɛ we!›a
2 Nɛ na keye sanha yaha tuun bɛɛri ni shi wa mu,
wee wemu wʼa nʼa she le wuyɛ ni ge.
Koo lemu lʼa kolo ge, lee pʼa ɲaari.
Puyɛ pyaa ki wo ɲidaan keree pʼa byi.b
3 Keree kiimu kʼa nɛ luu yirige ge,
kee pʼa byi tuun bɛɛri ni, nɛyɛ pyaa ki ɲii li na.
Pu wa na saraya wo tahaya yi ni,
na nudanga yawurire wuregi saraya tawoloyo ya ni
yee yemu ya yàa ni kafaan ni ge.
4 Pʼa se na dɛn fayac ni, na shuun faaya wegeye ni,
na shalaa xaara xaa.
Pu yaligee yɛrɛyɛ yi bɛɛri yʼa ɲi fɛfɛɛrɛ baa yaligee na.
5 Pu ma sipyii pusamaa pyi na: ‹Yi yere wà!
Yi ganha bu fulo wù na wɛ!
Bani wèe wo fɛfɛɛrɛ tʼa pɛlɛ ye lee na.›
Kee kapyegee kii ɲɛ wurege,
kemu ya jin nɛ munahaa ni ge.
Na ki ɲɛ kii kemu ya sori gbee ge.
6 Ga kii keree kii bɛɛri wa ka yaha nɛ ɲaha tàan.
Lee na, nɛ da ba cari nayɛ na wɛ,
ga nɛ na ba li foo tɔ pu mu fo li tɛhɛnɛ na.
7 Pu wo kakuuŋɔɔ ki fara pu sefɛɛ pu wo kakuuŋɔɔ ki na,
kee bɛɛri foo na ba dɔ pu mu taanunɔ ni,»
Tɛhɛnɛ Baa Kilɛ wʼa jo mu.
«Pee bi se na nudanga yawurire saraya wo faaboboyo yi na,
na fanhara shaan nɛ na yaŋaboyo yi na.
Lee wuu na nʼa da ba pu kapyelɛgɛɛ ki bɛɛri foo tɔ pu mu
fo ki tɛhɛnɛ na.»
8 Yemu Tɛhɛnɛ Baa Kilɛ ya jo ge, yee yi wa mɛ:
«Wa bu ɛrɛzɛn karaga ta lɔhɔ ɲɛ kemu ni ge, wʼa jo:
‹Yi ganha bu ki kyɛɛgi wɛ, bani baraga ki wa ki ni.›
Lee ninunɔ nɛ bɛ wʼa da ba bye na wo kapyebyii pu shizhaa na,
nʼa da ba pu kyɛɛgi wɛ.
9 Nɛ na ba pii yeege Yakuba wo tirige ki ni,
Zhuda wo gbawege shɛɛn pii na ba bye
nɛ wo faaboboyo yi kafɛɛ.
Piimu ɲaha nɛ bulo ge, pee na ba yi kafɛɛrɛ pyi.
Nɛ wo kapyebyii pu na ba diin wà.
10 Sarɔn wo fadaaŋa ki na ba bye yatɔɔyɔ tanahaŋa,
Akɔri wo logoro li mʼa bye niiyɛ yi wo tasinnɛgɛ,
nɛ wo sipyii pu mu, pee piimu pʼa nɛ shaa ge.d
11 «Ga yee piimu pʼa she Tɛhɛnɛ Baa Kilɛ ni,
na funŋɔ wɔ nɛ wo fɛfɛɛrɛ faaboboŋɔ ki na,
na yapɛrɛɛ Gadi kaan,
na ɛrɛzɛn lɔhɔ saraya wo
na gaan yapɛrɛɛ Mɛnie mu ge,
12 nɛ yee yaha ŋmɔpara kacɛ na.
Yee bɛɛri na ba nuguro sin pʼa yee kɔɔn kɔɔn.
Bani nɛ yiri pye, yee wa shishiin ya nɛ ɲɔ shɔ wɛ.
Nɛ jo, ga sipya bɛ ya nɛ jomɔ pu logo wɛ.
Yee ya kakuuŋɔɔ pye nɛ ɲaha tàan.
Keree kiimu kʼa pɛn nɛ mu ge, kee kʼa pye yee ɲidaan.»
13 Lee wuu na,
yemu Kafɔɔ, Tɛhɛnɛ Baa Kilɛ ya jo ge, yee yi wa mɛ:
«Nɛ wo kapyebyii pu na ba li,
ga yee pi ge, xuugo na ba yee ta.
Nɛ wo kapyebyii pu na ba gba,
ga yee pi ge, waga na ba yee ta.
Nɛ wo kapyebyii pu na ba funŋɔ taan,
ga yee pi ge, yee na ba zhiige.
14 Nɛ wo kapyebyii pu fundanga wuu na ba ciire cee,
ga yee pi ge, yee na ba sipyaa waa funyaŋa keŋɛ ni.
Yee na ba sipyaa waa ni yama ni yi zɔlɔɔ pu na.
15 Yee mɛgɛ ki na ba bye ba laŋi ɲɔmɛɛ ɲɛ wɛ
nɛ wo ɲidaan sipyii pu mu.
Pu na ba yu: ‹Tɛhɛnɛ Baa Kilɛ wu ma gbo!›
Ga nɛ wo kapyebyii pu pi ge,
nɛ na ba mɛgɛ katii le pee na.
16 Sipya ba giin wu duba pye ke ɲiŋɛ ke na,
wu na wu pye Can Fɔɔ Kilɛ wu wo mɛgɛ na.
Sipya ba giin wu gaa ke ɲiŋɛ ke na,
wu na gaa Can Fɔɔ Kilɛ wu wo mɛgɛ na.
Bani funŋɔ na ba wɔ taatoronɔ li wo kanhama pu na.
Pee kanhama pu na ba juri nɛ ɲaha tàan.»
Fugba nivomɔ ni ɲiŋɛ nivoŋɔ
17 «Li wii,
nɛ na ba fugba nivomɔ ni ɲiŋɛ nivoŋɔ yàa.
Sipya da ba wu funŋɔ shaa
ni taatoronɔ li wo keree ki ni nige wɛ.
Kee da ba diri sipya funŋɔ ni wɛ.f
18 Yi funyɔ taan tuun bɛɛri ni,
yʼi da fundanga mujoŋɔɔ waa gbee
nɛ wo yayaaya yi wuu na.
Bani nɛ na ba Zheruzalɛmu yereŋɛvonɔ yereŋɛ,
na wu pye fundanga kaɲuŋɔ,
na wu sipyii pu ɲi fundanga na.
19 Nɛ na ba funŋɔ taan Zheruzalɛmu wuu na,
nɛ zɔ wu na ba ɲi fundanga na na sipyii pu wuu na.
Mɛsuu kelee sipile la shishiin da ba logo
wu funŋɔ ni nige wɛ.g
20 Pubinnɛ da ga xhu wà nige li nɔhɔpiire ni lɛbaa wɛ,
sipyilɛgɛ bɛ yee di wa da ga gɔn wolo, kʼi xhu wà lɛbaa wɛ.
Bani sipya wemu ba xhu na wu shi wu yaha yee xhuu nigin (100) na,
nɔhɔpiire ni weefɔɔ ya xu.
Wemu ba xhu wu ya yee xhuu nigin (100) ta wɛ,
weefɔɔ ya wii ba laŋi fɔɔ ɲɛ wɛ.
21 Pu na ba piyɛyɛ yereŋɛ, na jé yee ni,
na ɛrɛzɛn kɛrɛyɛ shan, na yee yasɛyɛ li.
22 Pu da ba piyɛyɛ yereŋɛ
piitiilee di da jin yee ni nige wɛ.
Pu da ba yemɛ nuri
piitiilee di da tee yalɔɔrɔ te luu nige wɛ.
Bani nɛ sipyii pu wo shi wu na ba ɲɛhɛ
ba tige wo ɲɛ wɛ.
Piimu nɛ shɔɔnri lɔ ge, pee na ba pu labye wu lige li.
23 Pu da ba ganri nige tawaga ni wɛ.
Nagoo piimu bɛ pʼa da ba seni ge,
bɔɔngɔ da ba dun nige pee bɛ ɲuŋɔ ni wɛ.
Bani pu na ba bye shi nɛ baraga le wemu ni ge,
pu ni pu kadugo shi nibama wu ni.
24 Nɛ na ba pu ɲɛrɛgɛ ki ɲɔ shɔ na ta pu sanha ki pye wɛ.
Nɛ na ba pu jomɔ nuri, na pu yaha pu na pu yu.
25 Sige poŋɔ ni dubyapige na ba ɲà li shiizhan.
Cɛnri na ba ɲà li ba nù ɲɛ wɛ.
Wɔ wi ge, puuro na ba bye wee wo yalige.
Kakuunɔ kelee kakara ta shishiin da ba byi
xuu wa shishiin ni nɛ wo fɛfɛɛrɛ faaboboŋɔ ki na wɛ,
Tɛhɛnɛ Baa Kilɛ wʼa jo mu.