64
Na ya kajiiwaya sorogo sorogogana lemu na ge,na ma lɔhɔ pye ki na gani kagana lemu na ge,
lee shɛgana li na mu bi da ba ma mɛgɛ ki shɛ
ma pɛɛn pu na,
shi shɛɛn pu bɛɛri bi da da jɛlɛ ma ɲaha tàan.
2 Tuun wemu ni mu ya fyaara kagbɔhɔɔ ki pye ge,
kee ya pa wèe fo.
Mu ya tigi, a faaboboyo yi jɛlɛ ma ɲaha tàan.
3 Sipya sanha dee li logo wɛ,
li sanha dee jé sipya ɲuwii ni wɛ,
ɲii sanha dee li ɲa wɛ,
na pɛɛŋɛ yaaga ka wa wà, piimu pʼa daa ki na ge,
ki na kapyeŋɛɛ pyi pee mu ba mu ɲɛ wɛ.
Ni mu yɛ ni wɛ, lee sanha bye ɲa bada wɛ.
4 Sipyii piimu pʼa tiimɛ koo li ɲaari ni fundanga ni ge,
piimu pʼa doroo mu wo kodorogoo ki ni,
na pu funŋɔ shaa ni ma kaa ni ge, mu ya pee ɲuŋɔ cirini.
Ga mu luu ya yìri bani wèe ya jurumu pye.
Wù bu guri taashiinɛ li wo kodorogoo ki fɛni,
wù na ba ɲuwuuro ta.
5 Wèe bɛɛri pʼa pye fɛfɛɛrɛ baa fɛɛ.
Ali Tiimɛ keree kiimu bɛɛri wèe ya byi ge,
kee bɛɛri di ɲɛ ba fɛfɛɛrɛ baa fàya ɲɛ wɛ.
Wèe bɛɛri pʼa fanhaŋa ba tige wɛwaga ɲɛ wɛ.
Wèe katiibaagaa ki wa gaaŋi ni wèe ni
ba kafɛɛgɛ ɲɛ wɛ.
6 Sipya bɛ ya mu mɛgɛ yiri nige wɛ,
wa shishiin ya la le wuyɛ ni na daha ma fɛni wɛ,
bani mu ya ma ɲaha ki ŋmɔhɔ wèe na.
Mu ya wèe fanha ki yaha ki na xhuu na gaaŋi
wù tiibaaraa ti nɔhɔ ni.
7 Ga lee bɛ na, Tɛhɛnɛ Baa Kilɛ,
mu wu ɲɛ wèe wo To we.
Wèe ɲɛ cogo, mʼi ɲɛ ki faanrivɔɔ.
Wèe bɛɛri pu ɲɛ ma keŋɛ yayaaya.
8 Ee, Tɛhɛnɛ Baa Kilɛ,
ma ganha bu luu yirige wù tàan ma toro wɛ.
Ma ganha bu wù katiibaagaa ki yaha
ma zɔ wu na tuun bɛɛri ni wɛ.
Wù wii! Wèe bɛɛri pu ɲɛ mu wo sipyii.
9 Ma fɛfɛɛrɛ kulo li bɛɛri lʼa ɲɛri siwaga.
Siyɔn ya ɲɛri tawaga, Zheruzalɛmu ya ɲɛri kataha.
10 Wèe Kilɛ-pɛɛŋɛ pugbɔhɔ fɛfɛɛrɛ wogo nɔɔrɔ wogo ke,
kee kemu ni wèe sefɛlɛɛ pu bi ma masɔŋɔ yoyo yi cɛɛ ge,
na ya ki sorogo.
Xuu xuu bɛɛri kaa lʼa bi waha wèe mu ge,
yee bɛɛri ya ɲɛri katahaya.
11 Ee, Tɛhɛnɛ Baa Kilɛ,
kee keree kii bɛɛri nibyege na, mu da yaaga jo-e ya?
Ta ma na ba gori yaha jobaa,
mʼa wù kanha fo wu tɛhɛŋɛɛ na ya?