Kilɛ wo goodaa li cawologo
63
Jɔgɔ wʼi ma mɛ ni ye faɲɛɛyɛ ye ni,na yìri Bɔsira kulo li ni, Edomu fiige ki ni wɛ?
Fazaaya yi wa wu na, wʼi ɲaari na ma
wu ɲuyirige wo, ni wu baraga ki bɛɛri ni.
«Nɛ Tɛhɛnɛ Baa Kilɛ wi,
nɛ wemu wʼa yu ni tiimɛ ni ge,
se wa nɛ ni na yee shɔ.»
2 «Ɲaha kʼa ma fàya yi ɲaaŋa,
na yi pye ba ɛrɛzɛn forogivɛɛ woyo yi ɲɛ-ɛ wɛ?»
3 «Nayɛ nigin nɛ ɛrɛzɛn wu forogi wege ki ni,
sipya nigin bɛ ya pye ni nɛ ni
na foro sipyiire ti bɛɛri ni wɛ.
Nɛ loyire wo wʼa pua forogi.
Na loyire niguunɔ li funŋɔ ni nɛ pu tɔnhɔnɔ.
A pu shishan pʼi ɲɛrɛgi ɲɛrɛgi nɛ fàya yi na,
na yi bɛɛri pye tabereye.b
4 Bani nɛ bi na goodaa li cawologo kɔn yaha
nayɛ funŋɔ ni.
Nɛ na ba na sipyii pu ɲuŋɔ wolo yee lemu ge,
lee lʼa nɔ.
5 Nɛ xuu wu bɛɛri wii, ga nɛ tɛgɛvɔɔ nigin bɛ ɲa wɛ,
Sipya bɛ ya ta wemu na nɛ tɔhɔ wɛ,
a lee di nɛ fo fo xuuni.
Wee tuun wu ni, a nɛ keŋɛ kʼi na tɛgɛ,
na nɛ pye setavɔɔ, a na loyire lʼi na tɔhɔ.
6 Nɛ loyire wo wʼa sipyiire ti tɔnhɔnɔ.
Loyireguunɔ funŋɔ ni nɛ pu gba
fo na ɲawɔhɔ wɔ pu na, na pu shishan wo ɲiŋɛ na.»
Saama pemu Kilɛ ya pye wu sipyii pu na ge
7 Nʼa da Tɛhɛnɛ Baa Kilɛ wo saama nigbɔ pu kaa jo,
di wu sɔ wu kapyegee nizaaŋaa ki wuu na,
kee kiimu wʼa pye wèe mu ge.
Saama nigbɔ pemu bɛɛri wʼa pye Izirayɛli nagoo pu mu ge,
wu wo ɲiɲaara te ni wu wo ɲɔmɛɛfɛɛrɛ ti funŋɔ ni wʼa pee pye.
8 Wu bi jo na: «Nakaara baa nɛ wo sipyii pu ɲɛ pii,
nɛ nagoo pu ɲɛ pii, pʼa da ga na nɔhɔ yaha wɛ.»
Lee wuu na wʼa pye pu shɔvɔɔ.
9 Pu kanhama pu bɛɛri ya pye Tɛhɛnɛ Baa Kilɛ yɛpyaa bɛ wo.
Wu mɛlɛkɛ wemu wu ɲɛ wu tàan ge, a wee di pu shɔ.
A wuyɛ pyaa di pu ɲuŋɔ wolo
wu wo taanɲɛɛgɛ ke ni wu ɲiɲaara ti gbɔɔrɔ ni.
Wʼa bi pu lɔ, na pu tɔhɔ taatuunnɔ li wo caya yi bɛɛri ni.
10 Ga pʼa nʼa she le puyɛ ni,
na Kilɛ wo Fɛfɛɛrɛ Munaa li luu tanha.
Lee wuu na Kilɛ ya ɲɛri pɛn pu fɛni,
a wuyɛ pyaa di kashɛn kɔn pu na.
11 Lee na, a pu funŋɔ di do
ni Musa wo caŋaɲii li wo keree ki ni, a pʼi jo:
«Kilɛ wemu wʼa wu sipyii pu kɔn suumɔ loɲiga ki na,
na yatɔɔnahama we ni yatɔɔyɔ yi kɔn ɲɛri ge, mii wʼi ɲɛ wɛ?
Kilɛ wemu wʼa bi wu Fɛfɛɛrɛ Munaa li tirige
pu niŋɛ ni ge, mii wʼi ɲɛ wɛ?
12 Wee wu bye Musa kanige cɛ,
na wu tɛri ni wu keŋɛ nɔɔrɔ wogo ki ni.
Wʼa suumɔ lɔhɔ ki taa taaya shuun pu ɲahagbaa na,
kɔnhɔ wu pɛɛŋɛ taha wu mɛgɛ ki na,
pɛɛŋɛ kemu ki ɲɛ ki da ga xhɔ-ɛ ge.c
13 Wee wʼa pu pye pʼa toro logbɔhɔ nijogoŋɔ ki tɛ ni,
ba shɔngɔ ma doroo mɛ siwaga ni wɛ, ali pu ya kuruŋɔ bɛ wɛ.
14 Tɛhɛnɛ Baa Kilɛ wo munaa lʼa pu ɲaha co
na kari taŋmɔŋɔ ni, ba kashɔ ma diri mɛ fadaaŋa na wɛ.»
Lee cogana li na mu ya ma sipyii pu ɲaha co Tɛhɛnɛ Baa Kilɛ,
kɔnhɔ ma nɔɔrɔ nigbɔ taha ma mɛgɛ ki na.
Kilɛ wo sipyii pu wo ɲɛrɛgɛ ke
15 Tɛhɛnɛ Baa Kilɛ, na ma yaha fugba wu ni,
na ma yaha ma fɛfɛɛrɛ tatɛɛngɛ nɔɔrɔ wogo ki ni,
ma ɲuŋɔ ki sogi mʼa wii.
Ma taanɲɛɛgɛ nigbɔhɔ ke ni ma sefɛɛrɛ te, mii yee dʼa kori wɛ?
Ma ɲubeŋɛ ke ni ma ɲiɲaara tʼa kɔn laha wèe na.
16 Na li ta bɛ mu wu ɲɛ wèe wo to we.
Ali Ibirayima mɛhɛ bye wu ya wèe cɛ wɛ,
ali Izirayɛli mɛhɛ bye wu ya wèe cɛ wu wuu wɛ,
mu Kilɛ wu ɲɛ wèe To.
Fo taashiinɛ li ni wèe ya mu mɛgɛ yiri na:
«Wèe wo ɲuŋɔ wolovɔɔ we.»
17 Tɛhɛnɛ Baa Kilɛ, ɲaha na ma dʼa wù yaha wʼà piin,
na laraga kɔn ma kodorogoo ki na wɛ?
Ɲaha na ma dʼa wù ɲuwegee yaha kʼa waha
fo na bye wù ya fyagi ma na-ɛ wɛ?
Wù taanɲɛɛgɛ kemu ki wa ma zɔ wu na ge,
kee wuu na kuri pa wù mu,
wèe piimu pu ɲɛ ma kapyebyii pee ni ma sipyii pu ge.
18 Ma fɛfɛɛrɛ sipyii pu ya ta fiige ki kafɛɛrɛ pye na mɔ wɛ,
a wù pɛɛn pʼi ba ma fɛfɛɛrɛ pɛɛŋɛ-pugbɔhɔ ki tɔnhɔnɔ.
19 Fo lʼa mɔ wèe ya ɲɛri sipyii mu ɲɛ nige piimu wo ɲuŋɔfɔɔ wɛ.
Wèe ya ɲɛri sipyii mu mɛgɛ ɲɛ piimu na wɛ.
Ee mu da bi da gbara mʼa fugba wu shɛɛngi ma tigi,
faaboboyo yi bi da da jɛlɛ ma ɲaha tàan.