Zheruzalɛmu wo mɛgɛ nivoŋɔ ke
62
Oo dɛ, Siyɔn wo taanɲɛɛgɛ ki wuu na,nɛ da ga cari nayɛ na wɛ.
Zheruzalɛmu kulo li wuu na,
nɛ da ga diin tanugo ni wɛ,
fo wu wo tiimɛ pu ba ba zhɛ,
ba kpɛɛngɛ ma nɔhɔ kɔn mɛ wɛ,
a wu ɲuwuuro tʼi ganha na ɲí, ba naɲiŋɛ ɲɛ wɛ.
2 Lee bu bye
fiiye yatii shɛɛn pu na ba ma wo tiimɛ pu ɲa,
saannaa pu bɛɛri na ma wo nɔɔrɔ wu ɲa.
Mɛgɛ nivoŋɔ na ba le ma na.
Tɛhɛnɛ Baa Kilɛ yɛpyaa na ba kee kan.
3 Ma na ba bye Tɛhɛnɛ Baa Kilɛ keŋɛ ni
ba saanra ɲudɔnɔ nɔɔrɔ wuu ɲɛ wɛ,
na bye ma Kilɛ wu kadaa li ni
ba saanra ɲumiginɛ li ɲɛ wɛ.
4 Pu da ba ma pyi nige wɛ na:
«Kulo lemu ni pʼa kadugo le ge.»
Pu da ba ma ɲiŋɛ ki pyi nige na takoloŋɔ wɛ.
Ga pu na ba ma pyi na: «Kafɔɔ wo ɲidaan kulo le.»,
na ma ɲiŋɛ ki pyi na: «Cenabun».
Bani ma kaa na ba daan Tɛhɛnɛ Baa Kilɛ mu,
wʼa ma ɲiŋɛ ki pye wuyɛ wogo.
5 Lɛvɔɔ ma doɲiŋɛ fucɛri leŋɛ leŋɛgana lemu na ge,
mu ma nagoo pʼa da ba ma ɲiŋɛ ki lɔ.
Ba cenabun poo ma funŋɔ taan mɛ wu cenabun kaa na wɛ,
mu na ma Kilɛ wu da ba funŋɔ taan ma kaa na.
6 Zheruzalɛmu, nɛ pii yaha ma maha maha kasɔrɔyɔ yi na,
pee di da ma ɲuŋɔ sigee.
Caŋa fara piige na, pee ya yaa na cari puyɛ na bada wɛ.
Yee piimu pʼa Tɛhɛnɛ Baa Kilɛ wo mɛgɛ ki yiri ge,
yi ganha bu ŋmɔnɔ kan yiyɛ mu wɛ.
7 Yi ganha bu ŋmɔnɔ kan Kilɛ bɛ mu
na ta wu ya Zheruzalɛmu yereŋɛvonɔ yereŋɛ,
na wu pye ɲiŋɛ ki bɛɛri wo masɔŋɔ ki kaɲuŋɔ wɛ.
8 Tɛhɛnɛ Baa Kilɛ ya wu kanige keŋɛ ki yirige,
wʼa wu keŋɛ baraga wogo ki yirige na gaa, na:
«Nɛ da ga ma shinma wu kan nige ma pɛɛn pu mu pʼa li wɛ.
Duvɛn wemu faa mʼa pye ge,
fiige katii wo nagoo da ga wee gba nige wɛ.
9 Ga piimu pʼa da ba shinma wu faa pye, na wu kɔn ge,
pee pu da ba wu li, na ganha na Tɛhɛnɛ Baa Kilɛ sɔni.
Piimu pʼa ɛrɛzɛn wu faa pye, na ba wu wolo ge,
pee pu da ba duvɛn wu gba
nɛ pɛɛŋɛ-pugbɔhɔ fɛfɛɛrɛ wogo ki wo kaaŋa ki ni.»
10 Zheruzalɛmu shɛɛn yi foro,
yi foro kulo li kuɲɔgɔɔ ki ni!
Yi koo yàa na sipyii pu mu!
Yi li yàa taanna, yi koo li yàa taanna!
Yi kagereye yi laha koo li ni!
Yi tuugoshɛmɛ pa yirige sipyiire ti mu.
11 Tɛhɛnɛ Baa Kilɛ ya wu mujuu li yaha nɔ
fo ɲiŋɛ ki tɛhɛnɛ li na na:
«Yi yi jo Siyɔn shɛɛn pu mu na: ‹Ma Shɔvɔɔ wu wʼa ma wà.
Wʼa ma ni wu saraa wu ni wu keŋɛ ni.
Wʼa ma ni wu labye wu kuduun wu ni wuyɛ ɲaha na.›»a
12 Pu na ba pee yiri na: «Fɛfɛɛrɛ sipyii,
Tɛhɛnɛ Baa Kilɛ ya piimu ɲuŋɔ wolo ge.»
Mu Zheruzalɛmu wi ge, pu na ba ma mɛgɛ yiri na:
«Todaanra kulo»
«Pu ya ta kadugo le kulo lemu ni wɛ».