Kilɛ ya Ezekiyɛli tun Izirayɛli shi wu mu
(Zheremi 1:4-9, 17 ; Macoo 10:27-33 ; Kashɛɛ 10:8-10)
2
Ayiwa, a lee mujuu lʼi nɛ pye: «Sipyiyawyii, yìri mʼa yere, nʼa da jo ni ma ni.» 2 Ba wʼa yee jo ni nɛ ni wɛ, a munaa la di jé nɛ ni, na nɛ yirige yereŋɛ. Wemu wʼa yu ni nɛ ni ge, a nɛ wee wo mujuu li logo.3 A wu nɛ pye: «Sipyiyawyii, nɛ wʼa ma tunni Izirayɛli nagoo pu mu, nʼa she fiiye yi mu, yee yemu yʼa nʼa she le yiyɛ ni na wá nɛ na ge. Pu ni pu tii pʼa nʼa she le puyɛ ni na wá nɛ na, fo na pa nɔ niɲaa na. 4 Piimu mu nʼa ma tunni ge, pu ɲuwegee kʼa waha, pu ɲuŋmogoo kʼa waha. Shɛ mʼa shɛ yi jo pu mu na: ‹Yemu Tɛhɛnɛ Baa Kilɛ ya jo ge, yee yi wa mɛ.› 5 Nʼa she fɛɛ pu ɲɛ pii. Pʼa ma jomɔ pu logo la, pu shiin ya pu she la, pu na ba li cɛ na Kilɛ tudunmɔ wa pee tɛ ni. 6 Mu sipyiyawyii, ma ganha bu fya pu na wɛ, pu jomɔ pu bɛ ganha bu fyaara leŋɛ ma ni wɛ. Ali ma ɲɛhɛ bi ɲɛ xhuyo tahaya niŋɛ ni, na ɲɛ shiwege niŋɛ ni, na diin nàmaa ɲuŋɔ ni, pu jomɔ pu ganha bu fyaara leŋɛ ma ni wɛ, pu ɲɛɲaa ganha bu ma pye mʼa jɛlɛ wɛ, bani nʼa she fɛɛ pu ɲɛ pii. 7 Mʼa shɛ na jomɔ pu jo pu mu, pʼa yi logo la, pu shiin ya yi logo wɛ la, bani nʼa she fɛɛ pu ɲɛ pii. 8 Mu sipyiyawyii, ma ɲuwegee ki shan mʼa na jomɔ pu logo. Ma ganha bu bye nʼa she fɔɔ ba ke puga ke ya pye nʼa she fɛɛ puga wɛ. Yaaga kemu nʼa da gan ma mu ge, ma ɲɔ ki mugi mʼa ki li.»