Sɛmɛ wemu ni
Daɲɛli
kaa ya yu ge
Daɲɛli ni wu ɲaariɲii pee Babilɔni ni
1
Ayiwa Zhude fiige ki saan Yoyakimu wo saanra ti yee taanri wuu le, Babilɔni fiige ki saan Nabukodonozɔɔri ya pa, na ba Zheruzalɛmu maha ni kashɛn keŋɛ ni, Zhude fiige ki kugbɔɔ le.a 2 A Kafɔɔ di se kan Babilɔni shɛɛn pu mu saannaa Yoyakimu na, na Kilɛ-pɛɛŋɛ pugbɔhɔ ki yaŋmuyɔ ya bɛ ɲɔ yaha pu mu. A pʼi gari ni sipyiire ti ni Shinari fiigeb ki ni, na yaŋmuyɔ yi yaha pu wo yasunyɔ puga ki ni, naafuu wu tayahaŋa ki ni.c3 Lee kadugo na a Babilɔni saan wu tuduro kan Asipenazi mu, wu wo keree ki bɛɛri ɲuŋɔfɔɔ we, na pu shɛ ni Izirayɛli lɛvɛɛ pii ni, na foro saan wu wo gbawege ki ni, kelee kpɔnceŋɛɛ kii na. 4 Pʼi bye lɛvɛɛ, piimu cére ya ɲɔ, manɛ wa shishiin di ɲɛ pu na-ɛ ge. Pʼi bye fungɔnyɔ fɛɛ ni kalaa fɛɛ, piimu ya keree ɲaha cɛ ge. Pee di ba yaha saan wu wo puga ki ni kapyeŋɛɛ ki kaa na. Pʼi pu taanni Babilɔni shɛɛn jomɔ pu ni, pu da pu kani, pu da pu kalaa. 5 A saan wu jo na wee ya yaligee kiimu li caŋa bɛɛri, na duvɛn wemu gbuu ge, na pʼa yee shi kaan pu bɛ mu. Pʼi pu taanni yee taanri funŋɔ ni, lee kadugo na pʼi jé saan wu wo kapyeŋɛɛ ki ni. 6 Lɛvɛɛ piimu pʼa shɔɔnri ge, Zhude fiige ki sipyii shishɛɛrɛ wu bye pu ni: Daɲɛli, Ananiya, Mishayɛli ni Azariya. 7 A saan wu puga ki keree ki ɲuŋɔfɔɔ wu mɛyɛ yatii le pu bɛɛri na. A wu Daɲɛli mɛgɛ le na Balitazaari, na Ananiya mɛgɛ le na Shadaraki, na Mishayɛli mɛgɛ le na Meshaki, na Azariya mɛgɛ le na Abɛdi-Nego.
8 A Daɲɛli di li yaha wuyɛ funŋɔ ni na wee wa da wuyɛ nɔrɔgɔ ni saan wu wo yaligee kee ni wu yagbaya yi ni wɛ. A wu saan wu puga ki keree ki ɲuŋɔfɔɔ wu ɲɛɛri na wu ganha da wee karamu fo wu wuyɛ nɔrɔgɔ ni yee yaliye yi ni wɛ. 9 A Kilɛ di Daɲɛli kaa taan keree ki ɲuŋɔfɔɔ wu mu, a wu sɔɔ kee ɲɛrɛgɛ ki na. 10 Ga a wu Daɲɛli pye: «Nɛ fyagi na kafɔɔ saan wu na, wee wemu wʼa yee wo yaligee kee ni yee wo yagbaya yi shɛ nɛ na ge, wu ba ba yee ta yee ya shɔgɔ toro yi kaafɛɛ pusamaa tàan, wu na ba jo na nɛ wo kabee li wa lere, lee ma na ɲuŋɔ le bɛ!» 11 Ayiwa, Asipenazi wemu wu ɲɛ ɲuŋɔfɔɔ wu ge, wee bi Daɲɛli ni Ananiya ni Mishayɛli ni Azariya yɛ keree le ná wemu keŋɛ ni ge, a Daɲɛli di wee pye: 12 «Nʼa ma ɲɛɛri, wù taanna wii cabyaa kɛ funŋɔ ni, ma da naxhoo yapyiire ni lɔhɔ yɛ kaan wù mu!» 13 Kee bu doro, piimu pʼa saan wu wo yaligee ki li ge, mʼa wù taanna ni pee lɛvɛɛ pu ni. Ma bu lemu ta lee funŋɔ ni, mʼa wù co yaa ni lee ni. 14 A wee ná wu sɔɔ lee na, na pu taanna wii, cabyaa kɛ funŋɔ ni. 15 Cabyaa kɛ wʼa toro ge, a Daɲɛli ni wu ɲaariɲii pu ceepuuro ti ɲaha di sii ɲɔ, a pʼi nɔhɔ pɛlɛ bɛ sanha na toro piipu lɛvɛɛ pu tàan, piimu pu bi saan wu wo yaligee ki li ge. 16 Ma lɔ kee caŋa ki na, yaligee ki kanvɔɔ wu ya saan wu wo yaligee kee ni wu yagbaya yi kan nige pu mu wɛ, na ganha na naxhoo wo yapyiire ti kaan pu mu. 17 A Kilɛ di lajɛ ni fungɔngɔ fɛɛrɛ kan pii lɛvɛɛ shishɛɛrɛ we mu, na guri na pu xakilee taan kalaa wu bɛ na. Lee bɛɛri kadugo na a Daɲɛli di bye pu niŋɛ ni sipya wemu wʼa ŋmunɔyɔ ni kashɛgɛɛ kɔ́ri cɛ ge.
18 Tuun wemu wʼa bi shɛ pu daanni wu na ge, a wee di ba fa. A saan wu keree ki bɛɛri ɲuŋɔfɔɔ Asipenazi di shɛ ni kalaapiire ti bɛɛri ni Nabukodonozɔɔri mu. 19 A pu ni saan wu binnɛ tiin, na jo. Ga sipya wa shishiin ya ta pu bɛɛri ni wemu wʼa Daɲɛli ni Ananiya ni Mishayɛli ni Azariya xɔ wɛ. Wee tuun wu ni a pee di jé saan wu puga ki labye wu ni. 20 Fungɔngɔ fɛɛrɛ ni lajɛ keree kiimu bɛɛri na saan wʼa pu yege ge, a pʼi da Babilɔni wo cɛmɛ fɛɛ pee ni celɔbyii pu ɲaha na fo tɔɔɲii kɛ kee keree ki bɛɛri ni. 21 A Daɲɛli di gori wà kapyeŋɛɛ ki ni fo na shɛ nɔ saannaa Sirusi wo saanra ti yeeshiinɛ li na.