Zhonasi 1

Zhonasi

Sɛmɛ wemu wʼa Kilɛ tudunmɔɔ Zhonasi keree yu ge

Zhonasi ya fe na gbee Tɛhɛnɛ Baa Kilɛ ɲaha na

Caŋa ka Tɛhɛnɛ Baa Kilɛ ya Amitayi ja Zhonasi pye: 2 «Yìri, mʼa shɛ Ninive kugbɔɔ li fɛni! Mʼa shɛ jo ni kulo li shɛɛn pu ni ni mujugbɔɔ ni, bani pu kuumɔ pʼa pɛlɛ ye nɛ ɲaha tàan.» 3 Ga a Zhonasi di yìri, na wu baa gbee Tɛhɛnɛ Baa Kilɛ ɲaha na. Lee funŋɔ ni a wu gari Zhopa suumɔ lɔhɔ ki kɔrɔyɔ yi tayerege ki ni, na shɛ kɔrɔgɔ ka ta wà kemu bi se Tarisisi ni ge. A wu jé jé pɛrɛmɛ pu kan, na jé tiin kɔrɔgɔ ki ni na gaaŋi ni pee ni Tarisi ni, kɔnhɔ wu laha Tɛhɛnɛ Baa Kilɛ tàan.

4 Ga a Tɛhɛnɛ Baa Kilɛ di kafɛɛgbɔhɔ ka yirige suumɔ lɔhɔ ki na. A kafɛɛgɛ kʼi sii pɛlɛ fo kɔrɔgɔ ki na zhaa di gyɛɛgi. 5 A kɔrɔgɔ ki kapyebyii pʼi sii fya fo xuuni. A pu bɛɛri di ganha na pu kilɛlɛɛ ɲɛɛri. A pʼi kɔrɔgɔ ki funŋɔ tuguro ti wolo wá lɔhɔ ki ni, kɔnhɔ kɔrɔgɔ kʼi faha. Lee bi Zhonasi ta wee ya tigi kari fo kɔrɔgɔ ki maazaŋa ki ni, na shɛ sinnɛ ŋmunɔ tara wà. 6 A kɔrɔgɔ ki paavɔɔ wu gari Zhonasi fɛni, na shɛ wu pye: «Mu dʼa sinnɛ yaha na ŋmunɔɔ do? Ma bɛ wu yìri mʼa ma wo Kilɛ wu ɲɛɛri. La wa la ni wu na wu funŋɔ sha ni wù kaa ni, na wù ɲuŋɔ wolo, kɔnhɔ wù ganha bu gyɛɛgi wɛ.»

7 Ayiwa a kɔrɔgɔ ki kapyebyii pʼi puyɛ pye: «Yi pa wù kagaanshaan pye, wemu wuu na ke bɔɔngɔ ke wa nɔni wù na ge, kɔnhɔ wù weefɔɔ cɛ.» A pʼi kagaangaa ki shan, a Zhonasi wo kagaan lʼi lɔ. 8 A pʼi Zhonasi pye: «Lemu li wa ke bɔɔngɔ ke nɔni wèe na ge, lee jo wù mu. Mii mu dʼa yìri wɛ? Labye wekɛ tuugo mu di wa byi wɛ? Fiige kekɛ shɛn mu di ɲɛ wɛ? Shi wekɛ shɛn mu di ɲɛ wɛ?» 9 A Zhonasi di pu ɲɔ shɔ na: «Heburu nɛ ɲɛ, Tɛhɛnɛ Baa Kilɛ nɛ bɛlɛ, Fugba Kilɛ we, wee wemu wʼa suumɔ lɔhɔ ni ɲiŋɛ ki yàa ge.» 10 A wu pu pye sanha na Tɛhɛnɛ Baa Kilɛ ɲaha na wee ya fe na gbee. A pʼi sii fya fo xuuni, na Zhonasi pye: «Ɲaha na ma dʼa le pye wɛ?» 11 A suumɔ lɔhɔ ki lokuruyo yʼi ganha na bɛlɛ na se ɲaha na, lee funŋɔ ni, a pʼi Zhonasi pye: «Lekɛ wèe dʼa yaa na pye mu na, kɔnhɔ lokuruyo yʼi yere wɛ?» 12 A Zhonasi di pu pye: «Yi na lɔ wá suumɔ lɔhɔ ki ni, lokuruyo yi na yere, bani nɛ li cɛ jo nɛ wuu na ke kafɛɛgbɔhɔ ke wa yee taa.» 13 A kɔrɔgɔ ki kapyebyii pʼi pu se bɛɛri pye, kɔnhɔ pʼi kɔrɔgɔ ki paa fulo koɲɔ ki na, ga pu ya já wɛ, bani la li bi faraa lokuruyo yi bɛlɛ wu na. 14 Wee tuun wu ni a pʼi Tɛhɛnɛ Baa Kilɛ ɲɛɛri na: «Ee! Tɛhɛnɛ Baa Kilɛ ɲuŋɔ ɲaari wù na, ma ganha bu wù yaha wù kyɛɛgi we ná we wuu na wɛ. Ma ganha bu jaagi baa fɔɔ shishan foo yege wù na wɛ, bani lemu lʼa taan mu mu ge, Tɛhɛnɛ Baa Kilɛ, lee mu ya pye.» 15 Lee kadugo na a pʼi Zhonasi co, na wu wá suumɔ lɔhɔ ki ni. Lee taapile li ni a lokuruyo ye ni kafɛɛgɛ ki bɛɛri di yere. 16 Ba lee ya pye wɛ, a kɔrɔgɔ ki kapyebyii pʼi sii fya fo xuuni Tɛhɛnɛ Baa Kilɛ na. A pʼi saraya wolo kan Tɛhɛnɛ Baa Kilɛ mu, na ɲɔyɔ bɛ faa wu mu.