Zhonasi ya Kilɛ ɲɛɛri na wu yaha fya wu funŋɔ ni
2
Wee tuun wu ni a Tɛhɛnɛ Baa Kilɛ di fyatabaaga ka pye kʼa shɛ Zhonasi lɔ jɔ. A wu caya taanri ni nibiiye taanri pye kee fyatabaaga ki funŋɔ ni.a 2 Na Zhonasi yaha fya wu funŋɔ ni, a wu wu Kafɔɔ Tɛhɛnɛ Baa Kilɛ wu ɲɛɛri na:3 «Na nɛ yaha na kanhama pu ni,
Tɛhɛnɛ Baa Kilɛ nɛ mu ɲɛɛri,
a mu di nɛ ɲɔ shɔ.
Na nɛ yaha xu wo nibiige ki ni,
nɛ mɛɛ su mu fɛni,
a mu di nɛ mɛɛ li logo.
4 Mʼa bi na wá suumɔ locogoŋɔ ki nɔhɔdaan.
A lɔhɔ kʼi na ɲuŋɔ jɔ.
A suumɔ lokuruyo yʼi fɔ toro na ɲuŋɔ ni.
5 Nɛ bi yu jo mʼa na kɔri laha mayɛ tàan.
Ga nɛ na ba ma Fɛfɛɛrɛ Pɛɛŋɛ Pugbɔhɔ ki ɲa sanha.
6 Suumɔ lɔhɔ kʼa fɔ nɛ ɲuŋɔ jɔ fo nɛ na zhaa di xhuu.
Suumɔ lɔhɔ kʼa nɛ maha círi.
Suumɔ lɔhɔ ki nɔhɔdaan ɲà kʼa bi nɛ katige ki migile.
7 Nɛ bi tigi fo faaboboyo yi nɔhɔdaan.
Ɲiŋɛ ki ɲɔ bi tɔ wá nɛ na ma xɔ fo badaa badaa.
Ga a mu di nɛ ɲìi wo wu yeege wecogoŋɔ ki ni,
Tɛhɛnɛ Baa Kilɛ, na Kafɔɔ we.
8 Tuun wemu ni nɛ bi zhaa di xhuu ge,
a nɛ funŋɔ di do ni mu Tɛhɛnɛ Baa Kilɛ kaa ni.
A mu di nɛ ɲɛrɛgɛ ki logo
na ma yaha ma Fɛfɛɛrɛ Pɛɛŋɛ Pugbɔhɔ ki ni.
9 Piimu pʼa yapɛrɛɛ ki pɛlɛ ge, kee kiimu ki ɲɛ ɲuŋɔ baa ge
pee ya pu wo ɲiɲaara takoro li yaha.
10 Ga nɛ wi ge, nɛ na ba ma masɔŋɔ yoyo cee,
na saraya wolo kan ma mu.
Nɛ ɲɔfaaya yemu faa ma mu ge,
nɛ na ba yee bɛɛri wolo yi tɛhɛnɛ na,
bani mu Tɛhɛnɛ Baa Kilɛ wʼa sipya ɲuŋɔ wo.»
11 Ayiwa a Tɛhɛnɛ Baa Kilɛ di jo ni fya wu ni, a wu shɛ Zhonasi tɛrɛŋɛ shan kogoŋɔ ki na.