Zhonasi 3

Ninive shɛɛn ya daajeŋɛ jo pu jurumu wu na

A Tɛhɛnɛ Baa Kilɛ di Zhonasi pye sanha wu tɔɔɲii shuun wuu ni na: 2 «Yìri, mʼa shɛ Ninive kugbɔɔ li fɛni! Jomɔ pemu nʼa jo ma mu ge, mʼa shɛ pee yɛrɛ pye ni mujugbɔɔ ni!» 3 Wee tuun wu ni a Zhonasi di yìri, na gari Ninive kulo li ni ba Tɛhɛnɛ Baa Kilɛ ya yi jo wɛ. Kugbɔɔ li bi sii pye Ninive, ma bu jo mʼa li ɲaari, cabyaa taanri ma da bye, ma na li círi. 4 A Zhonasi di caŋa nigin ɲara pye na mujuu waa na yu: «Cabyaa kɛlɛɛ shishɛɛrɛ (40) niɲaa kadugo na Ninive wʼa da gyɛɛgi.» 5 A Ninive shɛɛn di dà Kilɛ Kafila wu na. A pʼi yi jo waha kulo li shɛɛn pu bɛɛri mu na pu suun le, na co nɔhɔpiire ti na, na shɛ nɔ sipyilɛyɛ yi na, a pu bɛɛri di bɔrɔyɔ fàya† le.

6 Ba pee jomɔ pʼa nɔ Ninive fanhafɔɔ wu na wɛ, a wu yìri laha wu saanra koro li na, na wu saannaa fadegbɔhɔ ki wolo yaha, na bɔrɔyɔ fàya† le, na diin shɔɔnrɔ ni. 7 A saan wu ni wu fanhafɛɲii pʼi we saliya we teŋɛ kan kulo li shɛɛn pu bɛɛri mu na:

«Sipyii fara yapɔrɔyɔ yi na, niiyɛ fara yatɔɔpya wu na, ka shishiin ganha bu yaaga le ki ɲɔ ni wɛ. Ka shishiin ganha bu li wɛ, ka shishiin ganha bu lɔhɔ bɛ gba wɛ. 8 Sipyii pu bɛɛri di bɔrɔyɔ fàya† le, pʼi ya le yapɔrɔyɔ yi bɛ na, pu da mɛhɛɛ suu Kilɛ fɛni, pʼi daajeŋɛ jo pu kapyeguuŋɔɔ kee ni pu katiibaagaa ki na, pʼi ki ɲɔ yaha. 9 Kilɛ bi giin wu ba bɔɔngɔ kemu nɔ wù na ge, la wa la ni wu na ba ɲuŋɔ ɲaari wù na, na wu fungɔngɔ ɲɛri, kɔnhɔ wù ganha bu gyɛɛgi wɛ.»

10 Ayiwa a Kilɛ di pu ɲa pʼa daajeŋɛ jo, na pu kapyeguuŋɔɔ ki ɲɔ yaha. Wu bi bɔɔngɔ kemu gbegele pu kaa na ge, wu ya kee yaha nɔ pu na nige wɛ.