Taaxɔɔ li keree
12
«Wee tuun wu ni, Mishɛli wemu wu ɲɛ ɲuŋɔfɔgbɔ wu ge, wee na ba foro yere. Wee wʼa mu wo sipyii pu yogo yu. Wee tuun wu na ba bye kanhama nigbɔ tuun. Na co shi wu ɲɔkɔnduun wu na ɲiŋɛ ki na, fo na pa nɔ wee tuun wu na, pee kanhama pu tuugo sanha bye ɲa wɛ. Wee tuun wu ni, ma sipyii piimu bɛɛri wo mɛyɛ yʼa ka sɛmɛ wu ni ge, pee na ba shɔ.a 2 Sipyii niɲɛhɛmɛɛ piimu pʼa ŋmunɔɔ gbazhɛnhɛ ki ni ɲiŋɛ ki nɔhɔdaan ge, pee na ba ɲɛ. Pii na ba ɲɛ ɲìi sicuumɔ nixhɔbaama kaa na, pii ma ɲɛ shiige ni kanhama nixhɔbaama kaa na.b 3 Piimu pʼa pye fungɔnyɔ fɛɛ ge, pee na ba ɲí ba fugba wu wo nɔɔrɔ wu ɲɛ wɛ. Piimu pʼa tiimɛ kalaa kan sipyii niɲɛhɛmɛɛ mu ge, pee na ba ɲí gbee ba wɔrɔɔ ki ɲɛ wɛ.4 «Ga mu Daɲɛli wi ge, mu wu pe jomɔ pe mara yaha mayɛ funŋɔ ni, mʼa we sɛmɛ we ɲɔ tɔ yaha ni keŋɛ fɛ ni fo taaxɔɔ li ba shɛ nɔ. Wee tuun wu ni sipyii niɲɛhɛmɛɛ na ba wu kalaa, la ma fara pee wo lajɛ wu na.»c
5 Na nɛ Daɲɛli yaha nɛ na wii, a nɛ sipyii shuun watii bɛ ɲa pʼa yere. Nigin wa bye gba wu kabanugo ka na, nigin wa di ɲɛ keki kabanugo kisaŋa na. 6 A wee ná wa di jo ni lɛn fàya fɔɔ wu ni, wee wemu wu bye gba lɔhɔ ki ɲuɲɔ na ge na: «Fo tuun wekɛ ni kii kakanhaŋaa kii wo keree kʼi da ba xhɔ wɛ?» 7 Ná wemu niyerege ki bye gba lɔhɔ ki ɲuɲɔ wu na ni lɛn fàya yi ni ge, a nɛ wee mujuu logo. A wu wu kanige keŋɛ ke, ni wu kamɛnɛ keŋɛ ki yirige fugba wu ni, wemu wu wa ɲìi na gbee ge, na gàa na na: «Lee na ba bye yee taanri ni yee taagad funŋɔ ni. Kilɛ wo fɛfɛɛrɛ wuu pu baraga ba xhɔ fɛɛfɛɛ tuun wemu ni, wee tuun wu ni kii keree ki bɛɛri ɲɔ da ba fa.»
8 A nɛ pee jomɔ pu logo ga nɛ di ya pu ɲaha cɛ wɛ. A nɛ jo: «Na kafɔɔ we, dii kii keree kii di da ba xhɔ wɛ?» 9 A wu nɛ ɲɔ shɔ na: «Daɲɛli, ta gaaŋi, bani kii keree kii na ba mara yaha ni keŋɛ fɛ ni na pye kaŋmɔhɔnɔ fo na shɛ taaxɔɔ li pye lʼa nɔ. 10 Sipyii niɲɛhɛmɛɛ na ba bye fɛɛfɛɛ, na pu fiinŋɛ, na pu nɔhɔmɔ pu wolo pu ni. Sipyikuuyo na ba kakuuŋɔɔ pyi, pu wa da ba kii keree kii ɲaha cɛ wɛ. Ga fungɔnyɔ fɛɛ na ba ki ɲaha cɛ.e 11 Tuun wemu ni ɲiga bɛɛri wo saraya yi wolo wu ɲɔ da ba gbo ge, na co wee tuun wu na fo na pa nɔ tuun wemu na gyɛɛgi pyevɔɔ wu da ba katanhana niguunɔ pye saraya yi tawologo ki na ge, cabyaa kabɔfonɔ nigin ni xhuu shuun ni kɛlɛɛ gbarashɛɛrɛ (1.290) wu da doro.f 12 Wemu bu já wuyɛ co fo na nɔ cabyaa kabɔfonɔ nigin ni xhuu taanri ni kɛlɛɛ taanri ni kaguro (1.335) na, weefɔɔ ɲɛ duba pya. 13 Ga mu wi ge, mu wʼa gaaŋi fo tɛhɛnɛ li na. Ma na ba ŋmɔnɔ ta, na ba guri yìri na ma wo taa li ta taaxɔɔ li ni.