Daɲɛli 11

«Nɛ wi ge, Mɛdi fiige shɛn saannaa Darusi wo saanra ti yeshiinɛ li na, nɛ bye wu tàan na wu tɛri, na kasɛɛgɛ yaha wu na.

Suumɔ kulo ni woroo kulo kacɛ ki wo saannaa pu keree

2 «Nimɛ, nʼa da ba can jo ma mu: ‹Saannaa taanri wa da ba yìri sanha na foro Pɛrisi fiige ki ni. Shishɛɛrɛ wo wu na ba bye naafuugbɔ fɔɔ na toro pusamaa tàan. Wu ga ba sefɛɛrɛ ta ni wu naafuu wu ni tuun wemu ni, wu na ba sipyiire ti bɛɛri yirige Girɛkii fiige ki wo saanra ti fɛni.

3 «Ga saan naŋmaga ka na ba yìri na foro Zhavan wo fiige ki ni. Wee na ba tagbɔhɔ mara ni wu wo sefɛɛrɛ nigbɔɔrɔ ti ni. Wu na ba wu ɲidaan keree pyi. 4 Wu saanra ti ga ba fanha nigbɔhɔ ta tuun wemu ni, ti na gyɛɛgi na daa koŋɔ ke kabaya shishɛɛrɛ wu na. Wu tirige shɛn da ba wu faa saanra ti na wɛ. Fanha ki na ba shɔ wu na, bani ki na ba daa daa na ki kan piitiilee mu, na wu nagoo pu yaha wà. Ga piimu mu saanra ti da ba gan ge, wee wa shishiin wo saanra da ba se ta na wu wuuro ti xɔ wɛ. 5 Woroo kulo kacɛ ki wo saan wu na ba baraga ta. Ga wu wo ɲuŋɔfɔɔ wa na ba baraga ta na toro wu tàan, wu fanha ki na ba tagbɔhɔ lɔ na toro wu tàan. 6 Yee kii ba doro, pee saannaa pu na ba naɲɛɛgɛ leŋɛ. Woroo kulo kacɛ wo saan wu na ba wu poro pushɔ kan suumɔ kulo kacɛ ki wo saan wu mu na pye wu shɔ, kɔnhɔ naɲɛɛgɛ ki pɔɔrɔ di fiin. Ga wee cee wu keree da ba ɲaha ta wɛ. Wu poo wu na ba gbo, pu ja wu bɛ na gbo. Pu na ba wee cee wu gbo, piimu pʼa wu torogo kari ge, ni wu tosege ke, ni wemu wu bye cee wu tɛgɛvɔɔ wee tuun wu ni ge, pu na ba pee bɛɛri gbo.

7 «Woroo kulo kacɛ ki wo saan wu puga shɛn wa na ba diin wu tɛgɛ saanra ti na. Wee na ba yìri na shɛ suumɔ kulo kacɛ ki wo saan wu fɛni, na shɛ jé wu saannaa pugbɔhɔ ki ni, na se ta wu na. 8 Wu ba pu yaŋmuyɔ yi kuu na kari, ali pu kilɛlɛɛ pee ni pʼa tɔɔrɔ ɲa na taga jaalaa piimu yàa ge, ni pu naafuu yaŋmuyɔ yemu ɲɛ warifyɛn ni sanni ge, pu na ba yee bɛɛri kuu na kari Misira fiige ki ni. Lee kadugo na, wʼa laraga kɔn suumɔ kulo kacɛ ki wo saan wu na na nɔ yee kii na. 9 Suumɔ kulo kacɛ ki wo saan wu na ba yìri lee kadugo na na gari woroo kulo kacɛ ki wo saan wu fɛni, na shɛ kashɛn kɔn wu na, na guri na ma wu wo fiige ki ni.

10 «Suumɔ kulo kacɛ ki wo saan wu jalaa pu na ba kashɛn ki gbegele. Pu na ba kashɛn keye niɲɛhɛyɛ pinnɛ, na yìri kari woroo kulo kacɛ ki wo saan wu fɛni ba lofomɔ ɲɛ wɛ. Pu niguribawuu na ba shɛ do fiige ki wo kashɛn ɲuŋɔ círi círi kulo li na. 11 Ayiwa, woroo kulo kacɛ ki wo saan wu luu na ba yìri fo xuuni. Wu na ba foro na shɛ kashɛn ŋmɔ suumɔ kulo kacɛ ki wo saan wu na, wee na kashɛnŋmuu niɲɛhɛmɛɛ yirige wu fɛni. Ga wu ni wu kashɛnŋmuu niɲɛhɛmɛɛ pu na ba le woroo kulo kacɛ ki wo saan wu keŋɛ ni. 12 Ba woroo kulo kacɛ ki wo saan wʼa pee sipyiɲɛhɛmɛɛ pu gbo wɛ, tabaara na ba jé wu ni. Wu kunni na ba sii sipyii niɲɛhɛmɛɛ gbo, ga wu setaara ti tɛhɛnɛ wa da ba dɔnnɔ wɛ. 13 Bani suumɔ kulo kacɛ ki wo saan wu na ba guri kari, na shɛ kashɛn keŋɛ kabɛtii gbegele, kemu wo sipyii ya ɲɛhɛ nizhiige ki wuu pu na ge. Ba tuun wa ya toro wɛ, ba yee kii ya toro wɛ, wʼa ba ni kee kashɛn keŋɛ nigbɔhɔ ki ni na fara kashɛn yagboyo niɲɛhɛyɛ na. 14 Wee tuun wu ni, sipyii niɲɛhɛmɛɛ na ba yìri woroo kulo kacɛ ki wo saan wu fɛni. Ali Namaa kafupege wuu pii na ba yìri muyɛ pyaa wo sipyii pu tɛ ni, na nʼa she le puyɛ ni kɔnhɔ le kashɛɛ le ɲɔ di fa, ga pu da ba se ta wɛ. 15 Suumɔ kulo kacɛ ki wo saan wu na ba ba na ba kashɛn wo kataduguyo ya yereŋɛ na woroo kulo kacɛ ki wo saan wu wo kulo la maha lee lemu lʼa kuuri ni kashɛn ɲuŋɔ círi círi kasɔrɔyɔ ni ge. Wu na ba se ta li na, na li co. Woroo kulo kacɛ ki wo saan wu wo kashɛn keye yi da ba li já wɛ, ali wu wo kashɛn naŋmaya yi bɛ da ba fanha ta di yere wɛ. 16 Suumɔ kulo kacɛ ki wo saan wemu wʼa pa pu fɛni ge, wee na ba wu ɲidaan pyi. Bani sipya wa shishiin wa da ba já yere wu sige wɛ. Fiige kemu kʼa ɲɔ fiiye yi bɛɛri na ge, wu na ba shɛ yere kee ni, na kakara pye wà bɛ. 17 Wu na ba jo na wee funŋɔ ki wa wu ba ni wu saanra ti wo sefɛɛrɛ ti bɛɛri ni. Wu na ba wuyɛ pye kanna naɲɛɛgɛ wu da leŋɛ ni woroo kulo kacɛ ki wo saan wu ni, lee funŋɔ ni wʼa wu poro pushɔ kan wu mu kɔnhɔ wʼi já wu saanra ti ta wu kyɛɛgi. Ga lee da ba foro wɛ, lee da ba ɲɔ wu keŋɛ ni wɛ. 18 Ayiwa, wu na ba wu ɲaha le suumɔ lɔhɔ ki ɲɔ fiiye yi ni na yee niɲɛhɛyɛ co. Ga, kashɛn keŋɛ ka wo ɲuŋɔfɔɔ wa na ba wu yereŋɛ na tɛhɛnɛ kɔn wu wo shiige keree yi na, wu bɛ da ba já wee ɲuŋɔ sogi wɛ. 19 Lee kadugo na, wu na ba guri na wu ɲaha tii wuyɛ pyaa wo kashɛn ɲuŋɔ círi círi kugbɔhɔɔ ki na, ga wu na ba guruŋɔ na do, wu da ba ɲa nige wɛ. 20 Saan wemu na ba diin woroo kulo kacɛ ki wo saan wu faara ge, wee na ba wa yaha wu shɛ katahaŋaa taha fiige ki koomɔ tasaaŋa ki wo sipyii pu na. Ga cabyaa kii funŋɔ ni wu na ba xhu. Loyire kelee kashɛn wa da ba bye wu kaxulo wɛ.

Izirayɛli wo kanhama pe

21 «Ayiwa zɔguuŋɔ fɔɔ wa na ba diin wu tɛgɛ, na ta saanra ti wo pɛɛŋɛ ya taha wu na wɛ. Tuun wemu ni ɲaɲiŋɛ na ba bye fiige ki ni ge, wee tuun wu ni wee da ba saanra ti lɔ, na wuyɛ teŋɛ na pye saan shizhiinmɛ ni. 22 Wu pɛɛn pu wo kashɛn keye niɲɛhɛyɛ yemu yi bi pa ba lofomɔ ɲɛ-ɛ ge, yee bɛɛri na ba juri wu ɲaha tàan. Wu na ba kariɲɛɛgɛ ɲɔmɛɛ li wo sipyii pu wo ɲuŋɔfɔɔ wa bɛ gbo. 23 Wu bu naɲɛɛgɛ leŋɛ ni wemu ni, wʼa ba weefɔɔ nɔhɔ yaha. Wu fanha ki na ba se ɲaha na, na se taa, na ta wu wo sipyii pʼi ya ta ɲɛhɛ bɛ wɛ. 24 Na fiige ki yaha ɲaɲiŋɛ na, wu na ba shɛ jé, na fiige ki taceye yi co. Wu na ba kaa pye, wu tii pee ni wu tii pu bɛ wo tii pu ya lemu pye ɲa-ɛ ge. Wu na ba fiige ki yaŋmuyɔ yi kuu, na wee naafuu we ni yee yasaaya yi kan wu wo sipyii pu mu. Wu na ba kashɛn ɲuŋɔ círi círi kulogoo kii wo cogana wo fɛɛrɛɛ kɔn wuyɛ funŋɔ ni. Ga wee tuun we tɛhɛnɛ wa da ba dɔnnɔ wɛ. 25 Fanha ke ni lowaa lemu li wa wu ni ge, lee na ba wu pye wʼa toro kashɛn keŋɛ nagaŋa ka ɲahagbaa na, na gari woroo kulo kacɛ ki wo saan wu fɛni. Woroo kulo kacɛ ki wo saan wu bɛ na ba gbegele kashɛn ki kaa na, wu na ba kashɛn keŋɛ ka yirige kemu kʼa sii pɛlɛ, ki baraga bɛ dʼa pɛlɛ fo xuuni ge. Ga wu da ba se ta suumɔ kulo kacɛ ki wo saan wu na wɛ, bani pu na ba wu nɔhɔ yaha. 26 Wuyɛ pya wo sipyii pu da ba bye kaɲuŋɔ na wu ɲuŋɔ tugo. Pu na ba wu kashɛn keŋɛ ki kɛgi na shan, wu kashɛnŋmuu pu niɲɛhɛmɛɛ na do do na xu. 27 Pee saannaa shuun wu wi ge, pu na ba binnɛ diin tabali nigin na shiizhan. Ga pu na ba funyɔ kolo ni puyɛ ni, na kafinɛyɛ jo puyɛ mu. Ga pu wo fungaa li da ba foro wɛ, bani tɛrɛ lemu lʼa kɔn shɛ taaxɔɔ li keree na ge, fo lee ba shɛ nɔ.

28 «Suumɔ kulo kacɛ ki wo saan wu na ba guri kari wu fiige ni ni naafuu nigbɔ ni. Fɛfɛɛrɛ kariɲɛɛgɛ ɲɔmɛɛ li wo funguuŋɔ na ba jé wu ni, wʼa kee funguuŋɔ ki koo ɲaari pu na. Lee kadugo na, wʼa guri kari wu wo fiige ki ni. 29 Li tuun ga ba nɔ, suumɔ kulo kacɛ ki wo saan wu na guri zhɛ do sanha woroo kulo kacɛ ki wo saan wu na. Ga wee tuun wu wo kashɛn ki da ba doro nizhiige ki wo torogana li na wɛ. 30 Kitimu shɛɛn na ba lɔhɔ kɔrɔyɔ nagaya yirige na pa wu fɛni, lee ma wu yatɛnyɛ gbo, wʼa guri kari. Wu loyire wo na ba nʼa shɛ wu loyire li kuuri sanha fɛfɛɛrɛ kariɲɛɛgɛ ɲɔmɛɛ li na. Piimu pʼa she fɛfɛɛrɛ kariɲɛɛgɛ ɲɔmɛɛ li ni ge, wʼa taanra leŋɛ ni pee ni. 31 Wu wo ɲɔjomɔ na, kashɛnŋmuu pii na ba fɛfɛɛrɛ xuu wu nɔhɔ, Kilɛ-pɛɛŋɛ pugbɔhɔ ke, kee kemu kʼa kuuri ni kashɛn ɲuŋɔ círi círi kasɔrɔgɔ ni ge. Saraya yemu yʼa wo ɲiga bɛɛri ge, pu na ba yee ɲɔ gbo, na katanhana niguunɔ pye wee xuu wu ni. 32 Piimu pʼa kariɲɛɛgɛ ɲɔmɛɛ li kyɛɛgi ge, saan wuyɛ pyaa na ba pee ɲuŋɔ kyɛɛgi ni wu nafaanra jomɔ ni. Ga piimu pʼa pu wo Kilɛ wu cɛ ge, pee na ba fanha ta na kagbɔhɔɔ pyi. 33 Piimu pu ɲɛ fungɔnyɔ fɛɛ sipyiire ti ni ge, pee na ba kalaa kaan sipyii niɲɛhɛmɛɛ mu. Ga tɛɛrɛ la bu doro, ŋmɔpara na ba pii gbo, na na pii gbo, pʼa pii co bulooro na, na pii yaŋmuyɔ kuu. 34 Pee kanhama pu ba nɔ pu na tuun wemu ni, sipyiɲɛhɛmɛɛ wa da ba pu tɛgɛ wɛ. Pii na ba puyɛ pye kanna pʼa pu tɛgɛ na ta fungɔnyɔ shuun di ɲɛ pu mu. 35 Pii na ba xhu pee fungɔnyɔ fɛɛ pu ni. Pee wo xu wu na ba bye kaɲuŋɔ na pii wo nɔhɔmɔ laha pu na, na pu pye fɛɛfɛɛ, fo na shɛ nɔ taaxɔɔ li wo tuun wu na. Bani tuun wemu tɛhɛnɛ lʼa kɔn yaha lee kaa na ge, wee sanha nɔ wɛ.

36 «Wee saan wu na ba wu ɲidaan pyi. Wu na ba wuyɛ pɛlɛ, na wuyɛ durogo kilɛlɛɛ pu bɛɛri fugba ni. Wu na ba joguumɔ jo na wá kilɛlɛɛ pu bɛɛri wo Kilɛ wu na. Wu na ba se ɲaha na, wu keree ki bɛɛri na ganha na ɲɔgi wu mu fo na shɛ loyire li wo tuun wu pye wʼa nɔ, bani lemu tɛhɛnɛ ya kɔn yaha ge, lee na ba bye. 37 Wu da ba kasɛɛgɛ yaha wu sefɛlɛɛ pu wo kilɛlɛɛ pu na wɛ, cèe pu bɛ wo ɲidaan wo kilɛ wu bɛ wɛ. Wu da ba kasɛɛgɛ yaha kilɛ wa shishiin na wɛ, bani wu na ba wuyɛ durogo yaŋmuyɔ yi bɛɛri fugba ni. 38 Wu na ba kashɛn ɲuŋɔ círi círi kulogoo ki wo kilɛ wu pɛlɛ yee yasunyɔ ye tɛgɛ. Wu na ba wee pɛlɛ ni sanni, ni warifyɛn, ni pɛɛwa faakagereye, ni pɛɛwa yaŋmuyɔ ni, na ta wu sefɛɛ di ya ta wee kilɛ wu cɛ wɛ. 39 Kashɛn ɲuŋɔ círi círi kasɔrɔgɔ ya taga kugbɔhɔɔ kiimu kuuri ge, wu na ba shɛ do kee kulogoo ki na wee kilɛ nabun wu wo baraga ni. Piimu ba sɔɔ wee kilɛ wu na, wu na ba pɛɛŋɛ nigbɔhɔ taha pee na, na teŋɛ teŋɛ na pye sipyiɲɛhɛmɛɛ wo ɲuŋɔfɛɛ, na ɲiŋɛ kan pu mu na pye pu fundanga yakanga.

Suumɔ kulo kacɛ ki wo saan wu xɔgana

40 «Taaxɔɔ li ba nɔ, woroo kulo kacɛ ki wo saan wu na ba shɛ do suumɔ kulo kacɛ ki wo saan wu na. Ga suumɔ kulo kacɛ ki wo saan wu na gburogi dɔ wu na ni kashɛn wotoriyo ni, ni shɔnduguloo, ni kashɛn kɔrɔyɔ niɲɛhɛyɛ ni. Wu na ba jé fiiye niɲɛhɛyɛ ni, na fɔ foro yi ni ba lofomɔ ɲɛ wɛ. 41 Wu na ba shɛ jé fiiye yi bɛɛri wo fiige nizaaŋa ki ni, na sipyii niɲɛhɛmɛɛ gbo. Ga, Edomu shɛɛn, ni Mowabu shɛɛn na ba shɔ wu na, na fara Amɔ shi shɛɛn pu wo ɲuŋɔfɛɛ pu na. 42 Wu na ba keŋɛ taha fiiye niɲɛhɛyɛ na. Misira fiige ki bɛ da ba shɔ wɛ. 43 Wu na ba Misira fiige ki naafuu we, ni pu sanni, ni pu warifyɛn, ni pu pɛɛwa yaŋmuyɔ yi bɛɛri shɔ pu na. Libi shɛɛn ni Ecopi shɛɛn na ba bye wu fanha ki nɔhɔ ni. 44 Ga jomɔ pa na ba yìri Kilɛ-nɔhɔ ni suumɔ kulo kacɛ ki na, pemu na ba wu jaa wu yirige ge. Wu luu na ba yìri fo xuuni, wʼa foro na shɛ sipyiire niɲɛhɛrɛ ɲuŋɔ tugo. 45 Wu na ba wu wo saannaa puga ki wo fàya piyɛyɛ yi sin suumɔ lɔhɔyɔ ye ni fɛfɛɛrɛ faaboboŋɔ nɔɔrɔ wogo ki tɛ wu ni. Wu wo caŋa ɲii li na ba xhɔ wà, na ta sipya bɛ ya shɛ keŋɛ le wu mu wɛ.»