Taaxɔɔ li wo keree kee
Daɲɛli ya kashɛɛ lemu ɲa gba wu ɲɔ ki na ge
10
Saannaa Cyrusi wo saanra ti yee taanri wuu li na, Pɛrisi fiige saan wee, jomɔ pa ya shɛ Daɲɛli na kashɛɛ ni. Daɲɛli mɛgɛ ka bɛ ki ɲɛ na Belishazaari. Pee jomɔ pe ɲɛ can, na kashɛn nigbɔhɔ ka kaa yu. A wu pee jomɔ pu kemɛ logo, a pu kɔ́ri di zhɛ wu na kashɛɛ li ni. 2 Yee caya yi na, nɛ Daɲɛli ya cewuu taanri pye ni funyaŋaa ni. 3 Nɛ bi ta na yalijeŋɛ ka shishiin li wɛ: xaara kelee duvɛn ya kpɔn nɛ ɲɔ na wɛ. Nɛ bi ta na sìnmɛ bɛ taga na nayɛ tiree wɛ, fo na shɛ cewuu taanri wu fa.4 Yeŋɛ nizhiige ki cabyaa kɛlɛɛ shuun ni shishɛɛrɛ (24) wu na, nɛ Daɲɛli bye gbagbɔ wu ɲɔ ki na, Tigire gba we. 5 A nɛ na ɲaha ki yirige na wii, na ná wa ɲa ni lɛn fàya ni. Ufazib wo sanni wu wo kirige ki bye wu na. 6 Wu ceepuuro ti bye ba kirisolite faakagereŋɛc ɲɛ wɛ, wu ɲaha ki bi ɲí ba Kilɛ-ɲinɛ ɲɛ wɛ, wu ɲìi ki bye ba naɲiŋɛ ɲɛ wɛ, wu keye ni wu tɔɔyɔ yi bi ɲí ba daɲaa tɔɔrɔ ɲɛ wɛ, temu ya wɔɔgɔ ge, wu mujuu li tunmɔ pu bye ba sipyii niɲɛhɛmɛɛ foo ɲɛ wɛ.d 7 Nɛ Daɲɛli yɛ nigin pe wʼa lee kashɛɛ li ɲa. Namaa piimu pu bye ni nɛ ni ge, pee ya ta li ɲa wɛ, ga a pee di fyaguunɔ fya, na baa shɛ lara. 8 A nɛ yɛ nigin pe di gori na lee kashɛɛ nigbɔɔ li wii. A nɛ fanha di xhɔ, a nɛ ɲaha kʼi ɲɛri, a nɛ fanha ki bɛɛri di xhɔ. 9 A nɛ wee ná wu mujuu li logo. Ba nɛ wu mujuu li logo wɛ, na jiregi, na do, na ɲaha ke buri ɲiŋɛ ki na. 10 A keŋɛ ka di gbɔn nɛ na. Na nɛ yaha nɛ na jɛlɛ, a wu nɛ yereŋɛ na nugunyɔ ye ni na kadahaa ki na. 11 A wu nɛ pye: «Daɲɛli, mu wemu kaa lʼa waha Kilɛ mu xuuni ge, jomɔ pemu nʼa da ba jo ma mu ge, kasɛɛgɛ shan pu na mʼa pu ɲaha cɛ. Xuu wemu ni ma wa ge, yìri mʼa yere wà. Bani nimɛ nɛ ya tuun na pa mu yíri.» Ba wʼa yee jo nɛ mu wɛ, a nɛ yìri yere, nɛ bɛɛri ɲɛ na jɛlɛ.
12 A wu nɛ pye: «Daɲɛli, ma ganha bu fya wɛ, bani, caŋa nizhiige kemu na mu ya li yaha ma zɔ wu na, na mʼa li ɲaha sha cɛ, na mayɛ tirige ma Kilɛ wu ɲaha tàan ge, ma jomɔ pʼa logo, pee shiin wuu na nɛ dʼa pa bɛ. 13 Pɛrisi wo saanra ti ɲuŋɔfɔɔe wʼa nɛ koo pari fo cabyaa kɛlɛɛ shuun ni nigin (21). Ga Kilɛ wo Kashɛn Keye yi wo ɲuŋɔfɔgbɔ wa ya pa nɛ tɛgɛ, wee mɛgɛ ki ɲɛ na Mishɛli. A nɛ gori wà Pɛrisi wo saannaa pu tàan.f 14 Kaa lemu li da ba bye ma sipyii pu na cabaya na ge, nɛ pa di ba lee ɲaha jo ma mu, bani ɲibaŋa keree le kashɛɛ le wa yu.»
15 Na wu yaha wu na pee jomɔ pu yu nɛ mu, a nɛ na ɲaha ki buri ɲiŋɛ ki na, na cari nayɛ na. 16 Ayiwa wemu wu bye ba sipya ɲɛ-ɛ ge, a wee di gbɔn nɛ ɲɔsɛɛyɛ yi na. A nɛ ɲɔ mugi, na ganha na yu. Wemu wʼa bi yere nɛ ɲaha tàan ge, a nɛ wee pye: «Na kafɔɔ, le kashɛɛ le ya funyaŋa wá nɛ na, a nɛ fanha di xhɔ. 17 Nɛ wemu wu ɲɛ ma kapyebye ge, na kafɔɔ, nɛ ma já jo ni mu ni dii wɛ? Fanha yafiin bɛ wa na ni nige wɛ, na ŋmɔgara ti bɛ wa co.» 18 Ayiwa, wemu wu bye ba sipya ɲɛ-ɛ ge, a wee di gbɔn nɛ na sanha, na fanha kan nɛ mu. 19 A wu nɛ pye: «Ma ganha bu fya wɛ, mu wemu kaa lʼa waha Kilɛ mu xuuni ge.» A wu jo: «Kilɛ wu ɲaɲiŋɛ kan ma mu! Fanha le mayɛ ni! Fanha le mayɛ ni!» Na wu yaha pee jomɔ pu na, a nɛ fanha ta na jo: «Na kafɔɔ, ta yu, bani mu ya fanha le nɛ ni.» 20 A wu nɛ pye: «Mu ya cɛ ɲaha na nɛ ya pa mu mu ya? Nimɛ, nʼa da guri zhɛ, di shɛ kashɛn kɔn Pɛrisi wo saanra ti ɲuŋɔfɔɔ wu na. Li wii, nɛ ba gari, Girɛkii wo fiige kig wo ɲuŋɔfɔɔ wu na ba. 21 Ga lemu lʼa ka can wu wo sɛmɛ wu ni ge, nʼa da ba lee jo ma mu. Sipya wa shishiin bɛ ya nɛ tɛri pee pɛɛn pu na wɛ, fo Mishɛli, yee wo ɲuŋɔfɔɔ we.»h