Daɲɛli 9

Daɲɛli wo Kilɛ-ɲɛrɛgɛ ke

Mɛdi shi shɛɛn saannaa Darusi wʼa pye Kalide shi shɛɛn pu wo saan we. Darusi bi bye saannaa Asurerusi wo ja. 2 Darusi wo saanra ti yeshiinɛ le, nɛ Daɲɛli ya li sɛɛri ɲa sɛmɛɛ pu funŋɔ ni, na Zheruzalɛmu kulo li nigyɛɛgɛŋɛ na ba gori yaha wà fo yee kɛlɛɛ gbarashuun (70), na saha ni Tɛhɛnɛ Baa Kilɛ wo jomɔ pu ni wu tudunmɔ Zheremi ɲɔ na. 3 A nɛ suun le, na bɔrɔyɔ fàya† le, na diin shɔɔnrɔ ni, na ganha na Kafɔɔ Kilɛ wu shaa ni ɲɛrɛgɛ, ni ɲɛrɛgɛ nigbɔhɔ ni. 4 A nɛ Tɛhɛnɛ Baa Kilɛ ɲɛɛri, na wo Kilɛ we. A nɛ yere wù wo jurumu wu na na jo:

«Ee wù Kafɔɔ, Kilɛ-gbɔtabaaga mu ɲɛ, fyaara wo. Mu kaa ya dan piimu ni, pee di ma ɲɔmɛjogoo ki koo ɲaari ge, mu ya kori yaha ma kariɲɛɛgɛ ɲɔmɛɛ li na ni pee ni, na ma saama pu shɛɛ pee na. 5 Wèe ya jurumu pye, wèe ya tiibaara pye, na kakuuŋɔɔ pye, na nʼa she le wuyɛ ni. Wèe ya kadugo le ma ɲɔmɛjogoo kee, ni ma kajogoo ki ni. 6 Wèe ya ta ma kapyebyii pu jomɔ pu logo wɛ, Kilɛ tudunmɔɔ pee, pee piimu pʼa jo ni wù saannaa pee, ni wù fanhafɛɛ pee, ni wù sefɛlɛɛ pee, ni fiige ki shɛɛn pu bɛɛri ni mu mɛgɛ na ge. 7 Wù Kafɔɔ, mu wʼa tii. Wèe wogo kunni ki wa shiige ke ba li wa mɛ niɲaa wɛ, wèe Zhuda shɛɛn, ni Zheruzalɛmu shɛɛn, ni Izirayɛli nagoo pusamaa bɛɛri, piimu pʼa tɛɛŋɛ, ni piimu sanha kʼa lii ge, fiige bɛɛri ni mʼa pu kɔri shɛ yaha pu katiibaagaa ki wuu na, kee kiimu pʼa pye ma na ge, 8 wèe wogo ki wa shiige ke Tɛhɛnɛ Baa Kilɛ, wèe ni wù saannaa pee, ni wu fanhafɛɛ pee, ni wù sefɛlɛɛ pee, bani wèe ya jurumu pye mu na. 9 Wèe Kafɔɔ Kilɛ we, wʼa ɲiɲaara taa, na yafa pyi, wèe pʼa nʼa she le wuyɛ ni na wá mu na. 10 Wèe ya ta sɔɔ na Tɛhɛnɛ Baa Kilɛ, wù Kilɛ wu mujuu li logo wɛ. Wèe ya ta wu saliya wu koo ɲaari wɛ, wee wemu wʼa kan wèe mu wu kapyebyii, Kilɛ tudunmɔɔ pu keŋɛ fɛni ge. 11 Izirayɛli nagoo pu bɛɛri pʼa mu wo saliya wu kyɛɛgi, pʼa ɲuŋɔ nari, na zhe pu da ma jomɔ pu logo wɛ. Ayiwa, mʼa bi kàa na laŋi jomɔ ni joguumɔ pemu jo, a pʼi pu ka ma kapyebye Musa wo saliya wu ni ge, a pee bɛɛri di do wèe ɲuŋɔ ni, bani wèe ya jurumu pye mu na. 12 Mu bi jo na mu na ba lemu pye wèe ni wù ɲuŋɔfɛɛ pu na ge, a mʼi lee pye. Mu ya bɔɔngɔ nigbɔhɔ shan wèe ɲuŋɔ ni. Bɔɔngɔ kemu kʼa to Zheruzalɛmu ɲuŋɔ ni ge, ki tuugo sanha bye ɲa ye ɲahaya ye nɔhɔ ni wɛ. 13 Kee bɔɔngɔ ke bɛɛri ya nɔ wèe na, ma na jo ba lʼa ka Musa wo saliya wu ni wɛ, ga wèe ya ta sɔɔ na mu Tɛhɛnɛ Baa Kilɛ, wù Kilɛ wu ɲɛɛri wɛ. Wèe ya ta sɔɔ na wù katiibaagaa ki ɲɔ yaha wɛ, wèe di ya ta sɔɔ na mu wo can wu logo wɛ. 14 Lee wuu na mu Tɛhɛnɛ Baa Kilɛ ya kasɛɛgɛ yaha ke bɔɔngɔ ke na, na ki yaha kʼa wèe ta, bani mu Tɛhɛnɛ Baa Kilɛ, wù Kilɛ we, mu ya tii ma kapyeŋɛɛ ki bɛɛri ni. Ga wèe pʼa pye wèe ya sɔɔ na logo wu ɲɔ na wɛ. 15 Ayiwa nimɛ Kafɔɔ, wù Kilɛ we, mu wemu wʼa ma sipyii pu yeege Misira fiige ki ni ni ma fanha keŋɛ ki ni ge, mu ya mɛgɛ nigbɔhɔ ta fo na pa nɔ niɲaa na. Ga wèe pʼa jurumu pye, wèe pʼa jaagi. 16 Kafɔɔ, na saha ni ma tiimɛ pu bɛɛri ni, wèe pʼa ma ɲɛɛri jo ma ma loyire le ni ma loyire niguunɔ li laha Zheruzalɛmu kulo li na, ma fɛfɛɛrɛ faaboboŋɔ ke. Bani wèe jurumu we ni wù sefɛlɛɛ pu wo tiibaara ti wuu na Zheruzalɛmu kulo le, ni ma sipyii pʼa pye fanhara yaaga sipyii pusamaa mu, pee piimu pʼa wèe maha ge. 17 Ayiwa nimɛ wù Kilɛ we, ma kapyebye wu ɲɛrɛgɛ ke ni wu ɲɛɛgbɔhɔ ki logo. Li pye mayɛ wuu na, mʼa ɲiɲaara ta ma fɛɛfɛɛ xuu wu na wee wemu wʼa kyɛɛgi ge. 18 Na Kilɛ we, ɲuwii shan mʼa logo! Ma ɲìi ki mugi mʼa wù takoloyo yi wii ni kulo li ni, lee lemu na ma mɛgɛ ki wa yiri ge! Wèe ya ta na ke ɲɛɛgbɔhɔ ke pyi wuyɛ pyaa ki wo tiimɛ pu wuu na wɛ, ga ma ɲiɲaara nigbɔɔrɔ ti wuu na wèe ya ma ɲɛɛri. 19 Wù Kafɔɔ wù jomɔ pu logo! Kafɔɔ yafa wù mu, Kafɔɔ kasɛɛgɛ yaha wù na. Wù ɲɔ shɔ Kilɛ, li pye mayɛ pyaa ki wuu na, ma ganha bu mɔ wɛ. Bani mu mɛgɛ ki wa yiri ma kulo le ni ma sipyii pu na.»

Daɲɛli wo cewuu kɛlɛɛ gbarashuun wu wo kashɛɛ le

20 Na nɛ yaha nɛ na yu, na Kilɛ ɲɛɛri, na yere na wo jurumu we ni na shi shɛɛn, Izirayɛli wo jurumu wu na, nɛ bi ɲɛɛgbɔhɔ pyi Tɛhɛnɛ Baa Kilɛ, wù Kilɛ wu ɲaha tàan, wu wo fɛfɛɛrɛ faaboboŋɔ ki keree na. 21 Na nɛ yaha nɛ na yu, na Kilɛ ɲɛɛri, sipya wemu nɛ fɛnhɛ ɲa na kashɛɛ li ni, ni wee ɲɛ Gaburiyɛli ge, a wee di ba gɔn foro nɛ mu tɔvuyo na, wu na yìri kapaya na, yakoŋɔ wo saraga ki woloduun wu ni. 22 A wu nɛ kalaa na nɛ pye: «Daɲɛli, nɛ pa nimɛ di ba fungɔngɔ fɛɛrɛ ni kaɲahacɛnɛ kan ma mu. 23 Ba mu ya ɲɛɛgbɔhɔ ki ɲɔ co na byi wɛ, a ɲɔmɛɛ la di jo, lee nɛ pa di ba jo ma mu. Bani ma kaa lʼa waha Kilɛ mu xuuni, ɲuwegee shan ni pe jomɔ pe ni, mʼa le kashɛɛ le kɔ́ri cɛ. 24 Cewuu kɛlɛɛ gbarashuun (70) tɛhɛnɛ lʼa kɔn shɛ ma sipyii pee, ni ma fɛfɛɛrɛ kulo li na, kɔnhɔ tɛhɛnɛ di gɔn kakuuŋɔɔ kee, ni jurumu wu na. Jurumu yafa wo yaaŋa kʼi bye, tiimɛ pʼi deŋɛ yaha fo gbee, kɔnhɔ kashɛgɛɛ kee ni Kilɛ tudunmɔ pu wo jomɔ pu ɲɔ di fa, sìnmɛ di dire fɛfɛɛrɛ ti bɛɛri wo fɛfɛɛrɛ wo wu na. 25 Ayiwa, mʼa yaa na li cɛ na fiinŋɛ na tuun wemu tɛhɛnɛ na Zheruzalɛmu wo deŋɛ we, ni wu yàa wʼa jo ge, fo na shɛ nɔ ɲuŋɔfɔɔ wu wo caŋa ɲii li na, wee wemu wʼa shɔɔnri lɔ ge, cewuu gbarashuun wu da doro. Cewuu kɛlɛɛ gbaara ni shuun (62) funŋɔ ni Zheruzalɛmu tɛyɛ ye ni wu kashɛn ɲaha kɔn kɔn kasɔrɔyɔ yi yaavonɔ da ba yàa. Ga lee na ba bye waha nigbɔ funŋɔ ni. 26 Kee cewuu kɛlɛɛ gbaara ni shuun (62) wu ba doro xɔ, wemu wʼa shɔɔnri lɔ ge, wee na ba gbo, sipya wa shishiin da ba bye ni wu ni wɛ. Ɲuŋɔfɔɔ wa wo sipyii na ba kulo li ni fɛfɛɛrɛ xuu wu ja. Ga wu taxɔgɔ na ba bye ba lofomɔ kakara ɲɛ mɛ wɛ. Fo na shɛ nɔ kashɛn ki tɛhɛnɛ na, kakara nigbɔɔrɔ na ba bye. 27 Wee ɲuŋɔfɔɔ wu na ba kariɲɛɛgɛ see wogo leŋɛ ni sipyii niɲɛhɛmɛɛ ni cewuu nigin funŋɔ ni. Saraya yemu pʼa wo ɲiga bɛɛri ge, wu na ba yee wo wolo we ni mamama yakanya yi ɲɔ yereŋɛ na cewuu li yaha li niŋɛ ni. Gyɛɛgi pyevɔɔ wu na ba katanhana niguunɔ pye yee saraya yi tawologo kiyɛ pyaa na fo na shɛ nɔ wee gyɛɛgi pyevɔɔ wuyɛ pyaa wo kyɛɛgiduun wu na.»