Daɲɛli 8

Daɲɛli wo kashɛɛ shuun wuu le: Dubyapoo ni sikapoo wu keree

«Saannaa Belishazaari wo saanra ti yee taanri wuu le, nɛ Daɲɛli ya kashɛɛ labɛtii ɲa kashɛɛ nizhiinɛ li kadugo na. 2 Na nɛ yaha nɛ na wii lee kashɛɛ li ni, a nɛ nayɛ ta Suzi kulo li ni, Elamu mara wo kugbɔɔ lee. Ma na yaha kee wiige ki na, a nɛ nayɛ ta Ulayi gba wu ɲɔ na.

3 A nɛ na ɲaha ki yirige na wii, na dubyapoo wa niyerege ɲa gba wu ɲɔ na. Yeŋɛɛ shuun wu bye wu mu. Kee yeŋɛɛ shuun wu bi tɔnnɔ, ga nigin wa dʼa tɔnnɔ wa na. Lemu lʼa bi tɔnnɔ ge, lee li bi foro kurogo ki na. 4 A nɛ wee dubyapoo wu ɲa, wu na yogo tunni ni wu yeŋɛɛ ki ni caŋatomɔ kacɛ ki na, ni suumɔ kulo kacɛ ke, ni woroo kulo kacɛ ki na. Yaaga ka shishiin bi já yeŋɛɛ shɔhɔ wu ni wɛ. Sipya wa shishiin bɛ di bi já yaaga shɔ wu na wɛ. Lemu lʼa wu taan ge, lee wu bi byi. A wu baraga di ganha na bɛlɛ na gaaŋi.

5 Na nɛ yaha nɛ na na funŋɔ shaa kee keree ki na, a nɛ sikapoo wa ɲa wʼa yìri caŋatomɔ pe ni na ma. Wee bi ɲiŋɛ ki bɛɛri saala, na ta wu tɔɔyɔ yi ya nɔni ɲiŋɛ ke na wɛ. Yenɛ nigin kakanhana wuu li bye wee sikapoo wu mu wu ɲìi ki tɛ wu ni. 6 A wu ba fo na pa nɔ yeŋɛɛ shuun wo dubyapoo wu na, wee wemu niyerege nɛ bi ɲa gba wu ɲɔ ki na ge. A wu baa tii dubyapoo wu na ni wu fanha ki bɛɛri ni. 7 Ba wʼa nɔ dubyapoo wu na wɛ, a kafupege di jé wu ni dubyapoo wu fɛni. A wu dubyapoo wu kpɔn, na wu yeŋɛɛ shuun wu kɛgi, dubyapoo wu ya já fanha ta di nama le wuyɛ ni wɛ. A wu dubyapoo wu shan ɲiŋɛ ki na, na wu tanhana wu tɔɔyɔ ni. Sipya bɛ ya ta wemu na dubyapoo wu shɔ sikapoo wu na wɛ.

8 A sikapoo wu fanha ta xuuni, ga tuun wemu ni wu fanha kʼa pa bɛlɛ na nɔ ki tɛhɛnɛ na ge, a wu yenɛ niduunnɔ lʼi gɛgi. A yeŋɛɛ shishɛɛrɛ kakanhana wogoo di foro li tɛgɛ ki ni, na ɲaha tii fugba wu kafɛɛgɛ ki tayiriye shishɛɛrɛ wu ni.

9 A yenɛ nifɛnhɛfɛnhɛnɛ la di foro yenɛ la na kii ki ni. A lee di ganha na bɛlɛgi fo xuuni na se woroo kulo kacɛ ke, ni Kilɛ-nɔhɔ kacɛ ke, ni fiiye yi bɛɛri wo fiige nizaaŋa ki kacɛ ki na. 10 A lee yenɛ lʼi dɔnnɔ fo na nɔ fugba wu kashɛn keŋɛ ki na. A lʼi kee kashɛn keŋɛ ki taaga ka, ni wɔrɔɔ ki wo taaga ka shan ɲiŋɛ ke na, na yi tanhana li tɔɔyɔ ni. 11 A lʼi dɔnnɔ fo na nɔ fugba kashɛn keŋɛ ki ɲuŋɔfɔɔ wu na, saraya yemu pʼa wo ɲiga bɛɛri ge, a lʼi yee ɲɔ gbo, na fɛfɛɛrɛ xuu wu nɔhɔ. 12 A jurumu wu bye kaɲuŋɔ a kashɛn keŋɛ ki ɲɔ di yaha li mu na fara ɲiga bɛɛri wo saraga ki na. A yenɛ lʼi can wu shan ɲiŋɛ na, na ganha na se taa li kapyeŋɛɛ ki ni. 13 A nɛ mɛlɛkɛ wa mujuu logo, a mɛlɛkɛ wabɛtii di jo ni wewu ni na wu pye: «Le kashɛɛ le wo keree ki na ba gori yaha tɔɔyɔ na fo tuun wekɛ wɛ? Ɲiga bɛɛri wo saraya yi ɲɔ na ba gbo fo tuun wekɛ wɛ? Jurumu wu na ba gori yaha da byi fo tuun wekɛ wɛ? Fɛfɛɛrɛ xuu we ni kashɛn keŋɛ ke, yee na ba gori yaha na danhana tɔɔyɔ ni, fo tuun wekɛ wɛ?» 14 A wu nɛ pye: «Fo yakoyo ni ɲisɔɔyɔ kabɔfoŋɔɔ shuun ni xuu taanri (2.300) bu shɛ doro. Lee kadugo na fɛfɛɛrɛ xuu wu na guri bye fɛɛfɛɛ».

Mɛlɛkɛ wa ya kashɛɛ li kɔ́ri jo Daɲɛli mu

15 Na nɛ Daɲɛli yaha nɛ na nayɛ funŋɔ shaa ni lee kashɛɛ li ni li kɔ́ri ni, li wii, a nɛ wa ɲa wʼa yere na ɲahagbaa na ba sipya ɲɛ wɛ. 16 A nɛ sipya wa mujuu logo wʼa li wá na foro Ulayi gba wu ni na: «Gaburiyɛli, kashɛɛ li kɔ́ri shɛ we ná we na.» 17 A wu fulo nɛ na na tayerege ki ni. Ba wʼa gbara nɛ na wɛ, a nɛ fya. A nɛ do, na ɲaha ki buri ɲiŋɛ ke na. A wu nɛ pye: «Sipya ja we, li cɛ fiinŋɛ, na taaxɔɔ li wo keree ki wa le kashɛɛ le». 18 Na wu yaha wu na yu ni nɛ ni, a nɛ jiregi, na ɲaha ki buri ɲiŋɛ ki na. A wu gbɔn nɛ na, na nɛ yirige yereŋɛ na tayerege ki ni. 19 Lee kadugo na a wu nɛ pye: «Li wii, kaa lemu li da ba bye Kilɛ wo loyire li taaxɔɔ li ni ge, nʼa da ba lee shɛ ma na, bani lee tɛrɛ li tɛhɛnɛ wʼa kɔn xɔ. 20 Dubyapoo wemu mʼa ɲa ni yeŋɛɛ shuun wu ni ge, wee ɲɛ Mɛdi ni Pɛrisi wo saannaa pee. 21 Sikapoo shiire wo wu ɲɛ Girɛkii wo saan we. Yenɛ niduunnɔ lemu li bye wu ɲìi ki tɛ wu ni ge, lee ɲɛ saan nizhiimɛ we. 22 Lee yenɛ lʼa pa gɛgi ge, shishɛɛrɛ wemu wʼa foro li tɛgɛ ni ge, kee yeŋɛɛ ki ɲɛ saanra tɛhɛɛ shishɛɛrɛ temu na ba foro kee fiige ki ni ge, ga tee saanra tɛhɛɛ shishɛɛrɛ wu wo fanha ki da ba saanra nizhiire ti wo fanha ki xɔ wɛ. 23 Pee wo saanra ti ba nɔ ti tɛhɛnɛ na, wee tuun wu na ba jurumupyii pu bɛ wo jurumu wu ta wʼa nɔ wu tɛhɛnɛ na, saan wa na ba yìri, wemu wu ɲɛ tabaara fɔɔ ni shizhiinmɛ fɔɔ ge. 24 Wu sefɛɛrɛ ti na ba bɛlɛgi, ga lee wa da ba bye wuyɛ pyaa ki wo fanha kaa wɛ. Wu na ba kakara nigbɔɔrɔ pyi, na se taa wu kapyeŋɛɛ ki ni. Wu na ba sefɛɛ pee, ni fɛfɛɛrɛ sipyii pu kyɛɛgi. 25 Wu wo shizhiinmɛ pu na ba bye kaɲuŋɔ wu wo naŋmahara keree ki ma ganha na se taa. Wu na ba wuyɛ pɛlɛ, na sipyii niɲɛhɛmɛɛ ɲaɲiŋɛ wuu gbuu. Wu na ba yìri ɲuŋɔfɛɛ pu wo ɲuŋɔfɔɔ wu kaa na, ga wu na ba kyɛɛgi na ta wa shishiin keŋɛ ya nɔ wu na wɛ. 26 Ɲisɔɔyɔ ni yakoyo yi wo kashɛɛ lemu kaa lʼa jo ge, can wu ɲɛ wii, ga mu wi ge, mu wu ma ɲɔ ki gbara lee kashɛɛ li na, bani ɲibaŋa keree ki wa, kiimu sanha kʼa lii ge.

27 Ayiwa a kee keree kii di nɛ Daɲɛli fanha xɔ fo xuuni, a yama di nɛ co na cabyaa niɲɛhɛŋɛɛ pye. Ga lee kadugo na, a nɛ yìri na ganha na saan wu wo labye wu pye. Nɛ xakili wu bi wuregi lee kashɛɛ li wuu na, bani nɛ bi ta li kɔ́ri cɛ wɛ.