Daɲɛli 7

Daɲɛli wo kashɛɛ nizhiinɛ le: Yacoyo shishɛɛrɛ we

Babilɔni saan Bɛlishazaari wo saanra ti yee nizhiinɛ le, Daɲɛli ya pa ŋmunɔgɔ ka ŋmunɔ na kashɛgɛɛ kii ɲa na wu yaha wu yasinnɛgɛ ki na. A wu kee ŋmunɔgɔ ki wo kagbɔhɔɔ ki ka.

2 A Daɲɛli di jo: «Na nɛ yaha nɛ na wii piige ni, a nɛ kafɛɛgbɔhɔ ka ɲa kʼa yìri fugba wu kabanuyo shishɛɛrɛ wu ni, na ba suumɔ logbɔhɔ ki kpɔn. 3 A yacoyo tabaaya shishɛɛrɛ wa di foro suumɔ lɔhɔ ki ni. Ka bɛɛri ni ki tuugo. 4 Yacoŋɔ nizhiige ki bye ba cɛnri ɲɛ wɛ. Ɲaa kapaya yi bye ki mu. Na nɛ yaha nɛ na ki wii, a ki kapaya yʼi shɔ ki na, na ki yirige laha ɲiŋɛ ki na, na ki yereŋɛ ki tɔɔyɔ yi na ba sipya ɲɛ wɛ. A sipya xakili di gan ki mu. 5 Wii, yacoŋɔ shuun wogo ki ɲɛ ba yacoŋɔ urusi ɲɛ wɛ. Ki bi yere ki tɔɔyɔ ya na. Gbodipyaa taanri di ɲɛ ki ɲɔ ni, na yi co ni ganhaa ki ni. A yʼi jo ki mu na ki yìri kʼi da xaara niɲɛhɛrɛ xaa. 6 Lee kadugo na a nɛ ganha na wii na yacoŋɔ katii bɛ ɲa ba shɛn ɲɛ wɛ. Shazhɛɛrɛ kapaya shishɛɛrɛ wu bye ki kadugo ni, ni ɲuyɔ shishɛɛrɛ. A fanha di gan ki mu. 7 Lee bɛ kadugo na, a nɛ ba yacoŋɔ shishɛɛrɛ wogo ka bɛ ɲa na piige kashɛgɛɛ ki ni. Wii, kee bye yakuuŋɔ, fyaara yakanhaŋa, ki kaan dʼa waha fo xuuni. Tɔɔrɔ ganhaa nijeŋɛɛ ki bye ki mu. Ki bi yaŋmuyɔ yi xaa, na yi kyɛɛgi kyɛɛgi, na yisaya tanhana ni ki tɔɔyɔ yi ni. Ki ni yacoyo nizhiiye yi bye nigin wɛ. Yeŋɛɛ kɛ wu bye ki mu. 8 Na nɛ yaha nɛ na kee yeŋɛɛ ki kasɛri, wii, a yenɛ nifɛnhɛfɛnhɛnɛ labɛtii di ɲɔ kɔn na foro kiiki yeŋɛɛ ki tɛ wu ni. A li voro wu yeŋɛɛ taanri wa kɔɔngi shan nizhiigee ki ni. Wii, ɲìi ki bye lee yenɛ li mu ba sipya ɲìi ɲɛ wɛ, ni sipya ɲɔ, kemu ki bi tabaara jomɔ yu ge.

Sipya ja we

9 «Na nɛ yaha nɛ na wii, a pʼi ba saanra korogoo kii teŋɛ. A Nɔhɔlɛ wa di ba diin la na. Wu fàya yi bi fiinŋɛ ba xɔɔrɔ ɲɛ wɛ, wu ɲuzhiire tʼi ɲɛ ba dubya nivyɛn shiire ɲɛ wɛ. Wu koro li bye ba naɲiŋɛ ɲɛ wɛ, a li gɔrɔyɔ yʼi bye ba naganhaa ɲɛ wɛ. 10 Gba lɔhɔ na wogo ka bye na fuu na fòro wu ɲahagbaa na. Mɛlɛkɛɛ kabɔfoŋɔɔ niɲɛhɛŋɛɛ ki bi kapyeŋɛɛ pyi wu mu, mɛlɛkɛɛ kabɔfoŋɔɔ xhuu ɲɔ baa wuu dʼa yere wu ɲahagbaa na. A kiirikɔɔn pʼi ba diin, a sɛmɛɛ pii ɲɔ di mugi.

11 A nɛ ganha na wii yenɛ nifɛnhɛfɛnhɛnɛ li wo tabaara jomɔ pu jo wu wuu na. Na nɛ yaha nɛ na wii, a pʼi yacoŋɔ ki gbo, na ki ceexaara ti sòrogo na ki ni. 12 A pʼi yacoyo yisaya wo sefɛɛrɛ tʼi shɔ yi na, na yi yaha ɲìi na na nɔ tuun wa na. 13 Na nɛ yaha nɛ na wii na piige kashɛgɛɛ ki ni, wii, wa bye na ma fugba ɲahaya yi na ba sipya ja ɲɛ wɛ. A wu ba fo na pa nɔ Nɔhɔlɛ wu na, a pʼi wu ɲaha co shɛ wu mu. 14 A fanha ni nɔɔrɔ ni saanra di gan wu mu. Shi wu bɛɛri, ni fiiye yi bɛɛri ni shi jomɔ pu bɛɛri wo sipyii bye na kapyeŋɛɛ pyi wu mu. Wu wo sefɛɛrɛ ti ɲɛ tɛhɛnɛ baa, ti da ga xhɔ wɛ. Wu wo saanra ti bɛ da ga gyɛɛgi bada wɛ.

Kashɛɛ li kɔ́ri

15 «A nɛ Daɲɛli funbɛɛnrɛ di sii pɛlɛ xuuni. A nɛ jaa wʼi yìri kii kashɛgɛɛ kii wuu na. 16 Piimu pu bi yere wà ge, a nɛ gbara wee wa na, na wu pye jo wu kii kashɛgɛɛ kii kɔ́ri wuyɛ pyaa pyaa jo na mu. A wu nɛ ɲɔ shɔ, na ki kɔ́ri wu jo nɛ mu. 17 A wu nɛ pye: ‹Ye yacoyo shishɛɛrɛ we ɲɛ saannaa shishɛɛrɛ wa, piimu na ba yìri ɲiŋɛ ki na ge. 18 Ga tee saanra te, Fugba Liilii Kilɛ wu wo fɛfɛɛrɛ wuu pu mu ti da ba gan. Saanra ti na ba bye yaha tuun bɛɛri ni pee wuuro fo gbee.›

19 «Ayiwa lee kadugo na, nɛ funŋɔ bye na yacoŋɔ shishɛɛrɛ wogo ki keree cɛ na fiinŋɛ. Kee ni yacoyo yisaya bye nigin wɛ. Yakanhaŋa, niguudiige ki bye kii. Ki ganhaa ki bye tɔɔrɔ, ki kazhinyɛ yʼi ɲɛ daɲaa. Ki bi ki yaŋmujoyo yi xaa, na yi cere cere, na yisaya tanhana ki tɔɔyɔ yi ni. 20 A nɛ yegeŋɛ pye yeŋɛɛ kɛ wu bɛ keree na, kee kiimu ki bye ki ɲuŋɔ ki ni ge, ni yenɛ nigin wu bɛ wʼa bi foro, a li voro wu kiiki taanri wu kɔɔngi shan, lʼi ɲɛ ni ɲìi ni ɲɔ ni, na tabaara jomɔ pu yu, li wo sefɛɛrɛ ti bɛ dʼa pɛlɛ kiiki ki yeŋɛɛ kisaŋaa ki wuuro ti na ge.

21 «A nɛ lee yenɛ li ɲa li na kashɛn kɔɔn Kilɛ wo fɛfɛɛrɛ sipyii pu na, na se taa pu na, 22 fo na shɛ Nɔhɔlɛ wu pye wʼa pa, na ba kaɲii kan Fugba Liilii Kilɛ wu wo fɛfɛɛrɛ sipyii pu mu. Wee tuun we ni saanra ti da ba gan fɛfɛɛrɛ sipyii pu mu.

23 «A wu nɛ pye: ‹Yacoŋɔ shishɛɛrɛ wogo ki na ba bye saanra shishɛɛrɛ wuuro, temu na ba bye ɲiŋɛ ki na ge. Tee saanra ti na ba tiyɛ waa saanra tisara bɛɛri na. Ti na ba ɲiŋɛ ki bɛɛri shɛɛngi na juuri, na ki tanhana ki tɔɔyɔ ni, na ki cere cere. 24 Yeŋɛɛ kɛ wu ɲɛ tee saanra shishɛɛrɛ wuuro ti wo saannaa kɛ wa, pee piimu na ba yìri ɲiŋɛ ki na ge. Nigin wa bɛ na ba yìri pee kadugo yíri, wee ni nizhiilee pu da ba bye nigin wɛ. Wu na ba saannaa taanri shan, na diin pee tɛgɛ ni. 25 Wu na ba joguumɔ yu na waa Fugba Liilii Kilɛ wu na, na Fugba Liilii Kilɛ wu wo fɛfɛɛrɛ sipyii pu ɲaani. Wu funŋɔ na ba bye wu kalɛgɛɛ ki wo caya ye ni saliya wu ɲɛri. Fɛfɛɛrɛ sipyii pu ɲɔ na ba yaha wu mu yee taanri ni yee taaga funŋɔ ni. 26 Lee kadugo na kiiri wu kɔnduun na ba nɔ, pʼa wee saan wu wo sefɛɛrɛ ti shɔ wu na, na wu kyɛɛgi, na wu ɲuŋɔ tugo fɛɛfɛɛ. 27 Wee tuun wu ni, saanra temu bɛɛri ti ɲɛ ye ɲahaya ye nɔhɔ ni ge, tee wo fanha ke, ni ti ɲuŋɔfɛɛrɛ te, ni ti sefɛɛrɛ ti na gan Fugba Liilii Kilɛ wu wo fɛfɛɛrɛ sipyii pu mu. Pee wo saanra ti ɲɛ tɛhɛnɛ baa wuuro. Ɲiŋɛ ki fanhafɛɛ pu bɛɛri na ba kapyeŋɛɛ pyi pee mu na pu ɲɔmɛɛ coni.›

28 «Kee kashɛgɛɛ kii wo tɛhɛnɛ li wa le. A kii keree kii di nɛ Daɲɛli xakili wu wuregi xuuni, fo na na ɲaha ki ɲɛri. A nɛ kee keree ki mara na funŋɔ ni.»