6
A Mɛdi shɛɛn Darusi di diin saanra ti na, wu shi wu bye yee kɛlɛɛ gbaara ni yee shuun (62).Daɲɛli wo pɛɛn pʼa wu pɛri
2 A Darusi di ɲuŋɔfɛɛ xhuu nigin ni kɛlɛɛ shuun (120) teŋɛ wu wo ɲidaan funŋɔ ni, a pee di daa daa, na pye wu saanra ti ɲuŋɔfɛɛ tɛyɛ yi bɛɛri ni. 3 A wu ɲuŋɔfɛgbɔɔ taanri wa teŋɛ pee ɲuŋɔfɛɛ pu bɛɛri ɲuŋɔ ni, kɔnhɔ pu bɛɛri di da ma pʼa pu wo keree ki ɲaha yu pee ɲuŋɔfɛɛ pu mu, lee di bye kaɲuŋɔ wa shishiin ganha já kaa kyɛɛgi saan wu mu wɛ. Daɲɛli bɛ wu bye pee ɲuŋɔfɛgbɔɔ taanri wu ni. 4 Ga Daɲɛli bye piipu ɲuŋɔfɛgbɔɔ pee ni ɲuŋɔfɛɛ pusamaa bɛɛri ɲaha na bani wu fungɔngɔ fɛɛrɛ te ni wu lajɛ wu bi pɛlɛ. A saan wu ganha na giin wu ba wu teŋɛ saanra ti bɛɛri ɲuŋɔ ni.
5 Ayiwa, a ɲuŋɔfɛgbɔɔ pusamaa ni piipu ɲuŋɔfɛɛ pʼi ganha na kaa la shaa pu na já lemu taga wu tɔɔgɔ le saanra ti keree na ge. Ga pu ya li ta wɛ, bani Daɲɛli bye sipya wemu wʼa tii ge, tanahaŋa ka shishiin bye wu na kaa la shishiin ni wɛ. 6 A pee sipyii pʼi puyɛ pye na: «Wèe da ga kaa la shishiin ta Daɲɛli fɛni di wu tɔɔgɔ le wɛ, fo wèe bu li sha wu wo Kilɛ wu wo saliya wu ni.» 7 A pee ɲuŋɔfɛgbɔɔ pee ni ɲuŋɔfɛɛ pʼi togaaya lɔ shɛ saan wu mu na shɛ wu pye: «Saannaa Darusi, Kilɛ wu ma yaha shikaraga! 8 Ma saanra ti fanhafɛɛ pu bɛɛri ya puyɛ pinnɛ, kaɲahashɔnrimɔɔ pee ni ɲuŋɔfɛɛ pee ni yɛrɛ kanvɛɛ pee ni gbafɛnɛɛrɛɛ pu bɛɛri ya puyɛ pinnɛ na bɛ yi na na saan wu saliya wa teŋɛ, wu yi jo waha sipyii pu bɛɛri mu na cabyaa kɛlɛɛ taanri (30) funŋɔ ni, sipyaa sipya wʼa kilɛ watii ɲɛɛri kelee sipya watii wemu ɲɛ mu saannaa Darusi wɛ ge, weefɔɔ ya yaa na wu co na wu wá cɛnrɛyɛ wege ki ni. 9 Nimɛ saan we, na saha ni Mɛdi ni Pɛrisi shɛɛn wo saliya wu ni, wee wemu wu ɲɛ wu ya ɲɛri wɛ ge, mu ya yaa na we saliya we ka, na ma keŋɛ fɛ taha wu na kɔnhɔ wa shishiin ganha bu já wu ɲɛri wɛ. 10 A saannaa Darusi di wu keŋɛ fɛ taha wee saliya wu na.
Pʼa Daɲɛli wá cɛnrɛyɛ wege ki ni
11 Daɲɛli ya yi logo tun wemu ni na wee saliya we wʼa teŋɛ ge, a wu gari wu kaban, na shɛ dugi jé wu puga, zangaso wu fugba wu ni. Wu puga ki fɛnɛtirilee piimu ɲaha ki bi tagi Zheruzalɛmu yíri ge, a wu pee mugi, na Kilɛ ɲɛɛri ba wʼa tee na li pyi wɛ. Caŋa caŋa Daɲɛli bi ma nuguro sin tɔɔɲii taanri wee xuu wu ni, na wu Kilɛ wu ɲɛɛri, na wu pɛlɛ. 12 Wee tuun wu ni a pee sipyii pʼi togaaya lɔ kari, na shɛ Daɲɛli ta wu na wu Kilɛ wu ɲɛɛri na wu pɛlɛ. 13 A pʼi gari saan wu mu, na shɛ wu funŋɔ to ni saliya wu kaa ni. A pʼi jo: «Ta muyɛ pyaa bɛ kʼa we saliya we shan wɛ, na cabyaa kɛlɛɛ taanri (30) funŋɔ ni, sipyaa sipya wʼa pɛɛŋɛ taha kilɛ kelee sipya watii na mu saan wu kadugo na ge, na pu wufɔɔ wá cɛnrɛyɛ wege ki ni wɛ?» A saan wu pu ɲɔ shɔ na: «Yee ɲɛ can na saha ni Mɛdi shɛɛn ni Pɛrisi shɛɛn wo saliya wu ni, wee wemu ya ɲɛri bada wɛ ge.» 14 A pʼi saan wu pye: «Zhuda wo tirige shɛn wa ɲɛ wà, Daɲɛli, wu ya pɛɛŋɛ taha mu na wɛ, wʼi ya pɛɛŋɛ taha ma saliya wu bɛ na wɛ. Caŋa caŋa wu ma wu Kilɛ wu ɲɛɛri tɔɔɲii taanri.» 15 Ba saan wʼa yee logo wɛ, a lee di sii waha wu na fo xuuni. A wu li kɔn wuyɛ funŋɔ ni na wu Daɲɛli ɲuŋɔ wolo. Wu na wu ɲuŋɔ wolo wologana lemu na ge, a wu ganha na lee shaa fo na shɛ caŋa ki pye kʼa to. 16 Ga a pee sipyii pʼi guri shɛ saan wu mu, na shɛ wu pye: «Saan we, na saha ni Mɛdi shɛɛn ni Pɛrisi shɛɛn wo saliya wu ni, saan wu bu wu keŋɛ fɛ taha na xɔ saliya wemu bɛɛri na, wee da já ɲɛri nige wɛ. Go mʼa lee cɛ kunni?» 17 Wee tuun wu ni a saan wu jo na pu pa ni Daɲɛli ni, pʼi shɛ wu wá cɛnrɛyɛ wege ki ni. A saan wu Daɲɛli pye: «Kilɛ wemu mu mʼa labye pyi tuun bɛɛri ni ni ma fanha ki bɛɛri ni ge, wee wu ma shɔ». 18 A pʼi ba ni faakagereŋɛ ka ni, na ba kee taga wege ki ɲɔ tɔ. A saan we ni wu fanhafɛɛ pu bɛɛri di pu keye fɛ taha ki na ni pu kabeleŋɛɛ ni, kɔnhɔ ɲɛri wa shishiin ganha da jé le kaa le ni Daɲɛli shizhaa na wɛ. 19 Lee kadugo na a saan wu gari wu saannaa puga ki ni. A wu piige ki bɛɛri pye wu ya li wɛ, wu ya sɔɔ wu shɔ wa bɛ ya jé wu fɛni wɛ, wu di ya já ŋmunɔ bɛ wɛ.
Kilɛ ya Daɲɛli shɔ cɛnrɛyɛ yi na
20 Ba ɲiga ki ɲɔ ya taha wɛ, a saan wu sɔɔ yìri, na gari tɔvuyo na cɛnrɛyɛ wege ki ɲɔ na. 21 Ba wʼa nɔ cɛnrɛyɛ wege ki na wɛ, a wu funbɛnwo di Daɲɛli yiri na: «Daɲɛli, Kilɛ ɲìi wo wu wo kapyebye we, ma Kilɛ we, wee wemu mu mʼa labye pyi tuun bɛɛri ni ge, wʼa já ma shɔ cɛnrɛyɛ yi na ya?» 22 A Daɲɛli di diin wà na saan wu ɲɔ shɔ na: «Saan we, Kilɛ wu ma yaha shikaraga! 23 Nɛ Kilɛ wʼa wu mɛlɛkɛ wu tun a wee di ba cɛnrɛyɛ yi ɲɔyɔ tɔ. Yi ya já yafiin bɛ pye nɛ na wɛ, bani nɛ pye sipyitiimɛ Kilɛ ɲaha tàan, nɛ di wʼa yafiin bɛ pye mu bɛ na wɛ, saan we.» 24 A saan wu funŋɔ di sii tàan, a wu jo na pu Daɲɛli wolo cɛnrɛyɛ wege ki ni. A pʼi Daɲɛli yeege cɛnrɛyɛ wege ki ni. Fɛ pa shishiin ya ta wu na wɛ, bani wu bi Kilɛ pye wu tadaŋa. 25 Piimu pʼa Daɲɛli tɔɔgɔ le ge, a saan wu jo na pu pa ni pee bɛɛri ni, pu ni pu cèe ni pu nɔhɔpiire, na pʼi ba pu wá cɛnrɛyɛ yi mu wege ki ni. Sani pu nɔ wege ki nɔhɔdaan ge, a cɛnrɛyɛ yʼi pu co na pu shɛɛngi shɛɛngi, na pu kaciiye ja ja. 26 Lee kadugo na a saannaa Darusi di kama pa ka na pee tun sipyii pu bɛɛri mu, ni shi wu bɛɛri, ni shi jomɔ pu bɛɛri wo sipyii pu mu koŋɔ ke kabaya ye bɛɛri na. A wu pu pye: «Ɲaɲiŋɛ ki pye yi mu! 27 Nʼa da le ɲɔmɛɛ le jo na waha yi mu, jo sipyii pu bɛɛri pʼa fyagi Daɲɛli wo Kilɛ wu na, pu da wu pɛlɛ na wo koomɔ pu bɛɛri ni.
Bani wee wu ɲɛ Kilɛ ɲìi wo we,
wu ɲɛ Kilɛ kodayii.
Wu saanra tʼa da ga gyɛɛgi bada wɛ,
wu sefɛɛrɛ ti na ba gori yaha gbee.
28 Wee wʼa sipya wo kaa ni,
wee wʼa sipya shuu.
Wʼa ɲaha shɛshɛɛrɛ kakanhaŋaa pyi
fugba we,
ni ɲiŋɛ ke bɛ na.
Wee wʼa Daɲɛli shɔ
cɛnrɛyɛ yi kazhinyɛ yi na»
29 Ayiwa, lee kadugo na a Daɲɛli di tayerege nigbɔhɔ ta saannaa Darusi wo saanra ti caŋa ɲii li ni, ni Pɛrisi shɛɛn Sirusi bɛ wo saanra ti caŋa ɲii li ni.