Kasɔrɔgɔ ki wo kama pe
5
Caŋa ka saannaa Bɛlishazaari ya pa ligbɔhɔ ka gbegele wu wo sipyigbɔɔ pu mu. Pee bi bye sipyii kabɔfonɔ nigin (1.000). A wu duvɛngbaa ɲɔ co pu ɲaha tàan. 2 Na wu yaha wu na duvɛn wu gbuu, wu to Nabukodonozɔɔri bi sanni ni warifyɛn cɛɛgbuugoo kiimu lɔ Kilɛ-pɛɛŋɛ pugbɔhɔ ki ni Zheruzalɛmu ni ge, a wu tuduro tun na pu kee lɔ pa, kɔnhɔ wu ni wu cèe ni wu taanfɛzhaa ni wu sipyigbɔɔ pʼi ba duvɛn wu gbuu ni kee ni. 3 Ayiwa a pʼi ba ni kee sanni cɛɛgbuugoo ki ni, kiimu pʼa lɔ Kilɛ-pɛɛŋɛ pugbɔhɔ ki ni Zheruzalɛmu ni ge. A saan wu ni wu sipyigbɔɔ pee ni wu taanfɛzhaa ni wu cèe pʼi duvɛn wu gba ni kee ni. 4 Pʼa pa gba na tin tuun wemu ni ge, na ɲɔ co na pu yapɛrɛɛ pɛlɛ, kee kiimu kʼa yàa ni sanni, ni warifyɛn, ni daɲaa tɔɔrɔ, ni tɔɔwɔ, ni tiye ni faaya ni ge.5 Lee taapile li ni a pʼi sipya keŋɛ ɲa kʼa foro yere. A kee keŋɛ ki wo kabɛhɛɛ kʼi ganha na kama pa kani saanra puga ki kasɔrɔgɔ ki na sokinna wu shizhaa na. A saan wu kee keŋɛ ki ɲa ki kabɛhɛɛ ki na kama pu kani. 6 A saan wu ɲaha kʼi ɲɛri, a wu xakili wu wuregi fo na wu funŋɔ pɛn, a wu cére tʼi shɔ wu na fo wu nugunyɔ yi na jɛlɛ, na ma na guuni yiyɛ na. 7 A saan wu sɛlɛ, na tuduro tun na pu cɛmɛ fɛɛ, ni wɔrɔɔ cɛvɛɛ ni sigaanfɛɛ pu bɛɛri yiri. A saan wu Babilɔni fungɔnyɔ fɛɛ pu pye: «Sipyaa sipya wʼa já pe kama pe kalaa, na pu kɔ́ri bɛ jo nɛ mu ge, saannaa fadeŋɛ kʼa da le wufɔɔ na, na sanni ɲɔhɔrɔ le wu katige ni, wufɔɔ na bye Babilɔni fiige ki saanra ti ɲuŋɔfɔgbɔ taanri wo.» 8 A saan wu wo fungɔnyɔ fɛɛ pu bɛɛri di ba, ga wa shishiin ya já kama pu kalaa, kelee na pu kɔ́ri jo saan wu mu wɛ. 9 Wee tuun wu ni a saan wu xakili wusama di wuregi. A wu ɲaha kʼi ɲɛri sanha, a wu sipyigbɔɔ pu yatɛnyɛ di xhu.
10 A saan wu nu wu saan we ni wu sipyigbɔɔ pu wo mujoŋɔɔ ki logo, na ba jé kalenɛ li puga ki ni, na jo: «Ɛɛ saan we, Kilɛ wu ma yaha shikaraga! Ma funŋɔ ganha bu bɛn wɛ, ma ɲaha ki bɛ ganha bu ɲɛri wɛ! 11 Ná wa wa ma fiige ki ni fɛfɛɛrɛ kilɛlɛɛ pu wo munaa li wa wu ni. Ma to wu wo caŋa ɲii li ni, xakili fɛɛrɛ, ni kaɲahacɛnɛ ni fungɔngɔ fɛɛrɛ bye wu ni ba kilɛlɛɛ pu ɲɛ wɛ. A ma to saannaa Nabukodonozɔɔri di wu pye cɛmɛ fɛɛ, ni wɔrɔɔ cɛvɛɛ, ni sigaanfɛɛ, ni jinaa kapyebyii pu bɛɛri wo ɲuŋɔfɔɔ. 12 Wee ná wu mɛgɛ ki bye na Daɲɛli a pʼi wu mɛgɛ le na Balitazaari. Lajɛ ni fungɔngɔ fɛɛrɛ wo kakanhana munaa li bye wu mu, na ŋmunɔyɔ ɲaha yu, na kaŋmɔhɔŋɔɔ shɛɛ, na yegeye niwaya ɲɔshɔɔrɔ kaan. Ayiwa, yi wee Daɲɛli wu yiri, wu na ba kama pu kalaa, na pu kɔ́ri bɛ jo ma mu.»
13 A pʼi shɛ Daɲɛli yiri na pa saan wu mu. A saan wu Daɲɛli pye: «Nɛ to wʼa bi sipyii piimu co na yìri Zhuda koomɔ pu ni ge, wa mɛgɛ ki bye pu ni na Daɲɛli, ta mu wu ɲɛ wii? 14 Nɛ logo na kilɛlɛɛ pu wo munaa li wa mu mu, na mu xakili wʼa taan, na lajɛ ni fungɔngɔ fɛɛrɛ kakanhana wuuro ti ɲɛ mu mu. 15 Pʼa pa nɛ mu ni fungɔnyɔ fɛɛ pee, ni cɛmɛ fɛɛ pu ni, kɔnhɔ pʼi ba pe kama pe kalaa, pʼi pu kɔ́ri jo na mu, ga pu ya já wɛ. 16 Nɛ dʼa logo na mu ya já kaŋmɔhɔŋɔɔ ɲaha jo, na keree niwagaa bɛ ɲaha yu. Ma bu já pe kama pe kalaa, na pu kɔri bɛ jo na mu, saannaa fadeŋɛ ki da le ma na, na guri na sanni ɲɔhɔrɔ bɛ le ma katige ni, na ma pye saanra ti bɛɛri wo ɲuŋɔfɛgbɔ taanri wo.»
17 A Daɲɛli di saan wu ɲɔ shɔ na: «Saan we, ma wo pɛɛŋɛ yaŋmuyɔ yi yaha mayɛ mu, kelee mʼa yi kan piitiilee mu. Ga lee bɛ na, nʼa da ba kama pu kalaa, na pu kɔ́ri bɛ jo saan wu mu. 18 Saan we, Fugba Liilii Wo Kilɛ wu bi saanra, ni pɛɛŋɛ, ni nɔɔrɔ ni sefɛɛrɛ kan mu to Nabukodonozɔɔri mu. 19 Kee mɛgbɔhɔ ki wuu na, sipyii pu bɛɛri, ni shi wu bɛɛri, ni shi jomɔ pu bɛɛri wo jovɛɛ bi fyagi wu ɲaha na fo na jɛlɛ. Wu bu jo wu sipya wemu gbo, wʼa wee gbo, wu bu jo wu sipya wemu yaha ɲìi na, wʼa wee yaha. Wu bu jo wu pɛɛŋɛ taha sipya wemu na, wʼa lee pye, wu bu jo wu sipya wemu cɛrɛŋɛ, wʼa weefɔɔ cɛrɛŋɛ. 20 Ga ba wʼa pa wuyɛ durogo, na wuyɛ pɛlɛ wɛ, a wu gɔri laha saanra koro li na, a wu nɔɔrɔ wu bɛ di shɔ wu na. 21 A wu gɔri yeege sipyii pu niŋɛ ni, na yatɔɔgɔ luu le wu ni. A wu shɛ binnɛ ni sige kafaya ni, na ganha na ɲà li ba niiyɛ ɲɛ wɛ. A mɛŋɛ di ganha na wu ceepuuro ti kpɔɔn, fo caŋa kemu wuyɛ pyaa ya pa yere li na na Fugba Liilii Wo Kilɛ wu wo saanra te ti ɲɛ sipyii pu wuuro ti ɲuŋɔ ni ge, na sipya wemu bu daan wu mu, na weefɔɔ mu wʼa saanra ti kaan. 22 Ayiwa, mu Bɛlishazaari, mu wemu wʼa pye wu ja ge, mu ya kii keree kii bɛɛri cɛ. Ga lee bɛ na mu ya ta sɔɔ na mayɛ tirige wɛ. 23 A mu di mayɛ durogo, na mayɛ taanna ni Fugba wu Kafɔɔ ni. A yee di Kilɛ-pɛɛŋɛ pugbɔhɔ ki funŋɔ cɛɛgbuugoo ki lɔ na pa duvɛn gbuu mu ni ma fanhafɛɛ pee, ni ma cèe, ni ma taanfɛzhaa. Yee ya duvɛn wu gba ni yi ni na guri sanha na yi yapɛrɛɛ ki sɔ, warifyɛn yapɛrɛɛ, ni sanni wogoo, ni daɲaa tɔɔrɔ wogoo, ni tɔɔwɔ wogoo, ni tiye wogoo, ni kagereye wogoo. Na ta kee yapɛrɛɛ kii di ya ɲaa wɛ, ki ya nuri wɛ, kʼi ya kaa cɛ wɛ. Kilɛ wemu keŋɛ ni mu wo munaa le ni ma ɲiifɛɛrɛ ti ɲɛ ge, mu ya ta sɔɔ na wee pɛlɛ wɛ. 24 Lee wuu na Kilɛ ya kii kabɛhɛɛ kii yaha kʼa pa pe kama pe ka. 25 Kama pemu pʼa ka kasɔrɔgɔ ki na ge pee pu wa mɛ na:
MENE, MENE, TEKƐLI ni PARISIN.
26 Pee jomɔ pe kɔri we: MENE, lee kɔ́ri ɲɛ ‹na tɔrɔ›. Kilɛ ya mu saanra ti caya tɔrɔ, na ti nɔ ti tɛhɛnɛ na. 27 TEKƐLI, lee kɔ́ri ɲɛ ‹na peze›. Mu ya peze kilo na, fanha di ya ta mu ni wɛ. 28 PARISIN, lee kɔri ɲɛ ‹na taa›. Ma saanra tʼa taa, na ti kan Mɛdi ni Pɛrisi shɛɛn pu mu.»