Daɲɛli 4

«Nɛ Nabukodonozɔɔri bye fɛrɛmɛ ni ɲaɲiŋɛ na na puga, na saanra pugbɔhɔ ki ni. 2 A nɛ ba ŋmunɔgɔ ka ŋmunɔ, a kee di nɛ fya fo xuuni. Fungɔnyɔ yemu yʼa tigi nɛ funŋɔ ni ma na yaha na kajaŋa ki na, ni kashɛgɛɛ kiimu nɛ ɲa ge, a yee di nɛ jaa wu yirige fo xuuni. 3 A nɛ tuduro kan jo pu Babilɔni fungɔngɔ fɛɛ pu bɛɛri yiri pa na ɲaha tàan kɔnhɔ pʼi ba kee ŋmunɔgɔ ki kɔri shɛ nɛ na. 4 Ayiwa, a cɛmɛ fɛɛ pee, ni jinaa kapyebyii pee, ni celɔbyii pee, ni wɔrɔɔ cɛvɛɛ pu bɛɛri di ba. A nɛ ŋmunɔgɔ ki paari pu mu ga pu ya já ki kɔri jo nɛ mu wɛ.

5 «Lee kadugo na, a Daɲɛli bɛ di ba yere nɛ ɲaha tàan. Pʼa wee pyi na Balitazaari na saha ni nɛ wo kilɛ wu wo mɛgɛ ki ni. Fɛfɛɛrɛ kilɛlɛɛ pu wo munaa li wa wee ni. A nɛ ŋmunɔgɔ ki paari wee mu: 6 ‹Mu Balitazaari, cɛmɛɛ fɛɛ pu wo ɲuŋɔfɔɔ we, nɛ li cɛ jo fɛfɛɛrɛ kilɛlɛɛ pu wo muna li wa mu na, kaŋmɔhɔnɔ la shishiin bɛ ɲɛ mu mu kakanhana wɛ. Kashɛɛ lemu nɛ ɲa ŋmunɔgɔ ni ge, li kɔri jo na mu. 7 Kashɛgɛɛ kiimu nɛ ɲa ma na yaha na yasinnɛgɛ ki na ge, kee ki wa mɛ: Nɛ bye na wii, na ba tige ka ɲa ɲiŋɛ ke niŋɛ ni, kee bi sii tɔnnɔ. 8 Kee tige ke bi sii tɔnnɔ, na bɛlɛ fɔ ki ɲidii le ya nɔni fugba ɲahaya ye na. Ma bu bye ɲiŋɛ ki kabaŋa kemu bɛɛri na, ma ganha na ki ɲidii li ɲaa. 9 Ki wɛyɛ yi bi sii ɲɔ, na ɲɛ ni nagoo niɲɛhɛmɛɛ ni. Yalige bi daa ki na pu bɛɛri mu, sige yaŋmuyɔ yi bi dɛn ki ɲimɛ pu ni, fugba shazhɛɛrɛ di dɛn ki geye yi na, ɲìi yaŋmuyɔ yi bɛɛri bi daa na li ki na.

10 «Ma na yaha na yasinnɛgɛ ki na, na wo kashɛɛ li funŋɔ ni, a nɛ kasɛɛgɛ pyevɔɔ fɛfɛɛrɛ wo wa ɲa wu na diri na yìri fugba wu ni. 11 A wee di jo ni mujugbɔɔ la ni na: ‹Yi tige ki kɔn shan, yʼi ki geye yi cere cere! Yi ki wɛyɛ yi muu, yʼi nagoo pu caaga! Sige yaŋmuyɔ yʼi baa foro ki nɔhɔ ni, shazhɛɛrɛ ti bɛ di yìri laha ki geye yi na. 12 Ga yʼi ki ɲuŋɔ ke ni ki niyɛ yi yaha wà ɲiŋɛ ki ni, yʼi tɔɔrɔ ni daɲaa shɔnhɔyɔ le ki na, yi yaha wà ɲà ki ni, sige ki ni. Mɛŋɛ di da ki kpɔɔn, ɲà di bye ki ɲɔlige ba yatɔɔyɔ ɲɛ wɛ. 13 Sipyii wo zɔ wu na ba wolo ki ni, na yatɔɔgɔ wo le ki funŋɔ ni. Tɛɛgɛɛ gbarashuun na ba doro ki ɲuŋɔ ni. 14 Piimu pu ɲɛ kasɛɛgɛ pyevɛɛ pu ge, pee pʼa le kaa le ɲɔ wolo. Fɛfɛɛrɛ wuu pu wo ɲɔmɛɛ na le kaa le wa, kɔnhɔ wyii pʼi li cɛ na Fugba Liilii Wo Wu wu ɲɛ sipyii pu wo saanra ti ɲuŋɔfɔɔ we. Wemu bu daan wu mu, wee mu wu da saanra ti kan. Wemu wu ɲɛ sipyiire ti bɛɛri wo kadugo yíri wo ge, wʼa wee yirige durogo fugba ni.› 15 Kee ki wa nɛ wo ŋmunɔgɔ ke, nɛ saannaa Nabukononozɔɔri ya kemu ŋmunɔ ge. Ayiwa, mu Balitazaari wu ki kɔri shɛ na na, bani nɛ wo saanra ti wo fungɔngɔ fɔɔ wa shishiin ya já ki kɔ́ri shɛ nɛ na wɛ, ga mu na já, bani fɛfɛɛrɛ kilɛlɛɛ pu muna li wa mu na.»

Daɲɛli ya saan wu wo ŋmunɔgɔ ki kɔri wu jo

16 Ayiwa, Daɲɛli wemu pʼa byi na Balitazaari ge, a wee di tuun wa pye wu xakili na wuregi, a wu fya xuuni. A saan wu jo: «Balitazaari, ke ŋmunɔgɔ ke ni ki kɔ́ri ganha bu ma funŋɔ pɛn wɛ!». A Balitazaari di jo: «Na kafɔɔ we, ke ŋmunɔgɔ ke ki pye ma pɛɛn pu wogo. Piimu pʼa ma kɔ ge, ki kɔri wu pye pee wo. 17 Tige kemu mu ya ɲa kʼa tɔnnɔ, na ɲɛ ni fanha ni, ki ɲidii lʼi nɔni ɲahaya yi na, kʼi ɲaa ɲiŋɛ ki kabaya yi bɛɛri na, 18 ki wɛyɛ yi dʼa ɲɔ, ki dʼa sii sɛ, bɛɛri di pu ɲɔlige taa ki na, yatɔɔyɔ di dɛn ki nɔhɔ ni, shazhɛɛrɛ bɛ di dun ki geye yi na ge, 19 kee ɲɛ mu, saan we! Bani mʼa baraga ta, a ma sefɛɛrɛ ti bɛ di bɛlɛ. Ma baraga kʼa pɛlɛ fo na nɔ fugba ɲahaya yi na, a mu wo fanha kʼi bye ɲiŋɛ ki wo fanha ɲuyɔ yi bɛɛri ɲuŋɔ ni. 20 Saan wʼa kasɛɛgɛ pyevɔɔ, fɛfɛɛrɛ wo wa ɲa wu na diri na yìri fugba we ni, na yu: ‹Yi tige ki kɔn shan, yʼi ki geye yi cere cere! Ga yʼi ki ɲuŋɔ ke ni ki niyɛ yi yaha wà ɲiŋɛ ki ni, yʼi tɔɔrɔ ni daɲaa shɔnhɔyɔ le ki na, yi yaha wà ɲà ki ni, sige ki ni. Mɛŋɛ di da ki kpɔɔn, ɲà di bye ki ɲɔlige ba yatɔɔyɔ ɲɛ wɛ, fo tɛɛgɛɛ gbarashuun bu shɛ doro ki ɲuŋɔ ni!›

21 «Ee saan we, ki kɔ́ri wu we: Fugba Liilii Wo wʼa yere kaa lemu na, wʼi lee pye saan wu na ge, lee li wa le: 22 Ma na ba gɔ́ri yeege sipyii niŋɛ ni, ma na ba shɛ diin naŋa yaaya niŋɛ ni. Pu na ba ɲà kaan ma mu ma na li ba niiyɛ ɲɛ wɛ. Mɛŋɛ na ba ma kpɔɔn. Tɛɛgɛɛ gbarashuun na ba doro ma ɲuŋɔ ni lee ni, fo ma ga ba li cɛ na Fugba Liilii Wo Wu wu ɲɛ sipyii pu wo saanra ti ɲuŋɔfɔɔ we, sipya wemu bu daan wu mu, weefɔɔ mu wʼa saanra ti kaan. 23 Tige ki ɲuŋɔ ke ni ki niyɛ yi kaa pʼa jo na pu yee yaha wà ɲiŋɛ ki ni ge, lee ya li shɛɛ na saanra ti na ba guri gan ma mu, ma ba li cɛ tuun wemu ni na fugba Kilɛ wu wu ɲɛ Se Bɛɛri Fɔɔ we. 24 Lee na dɛ saan wee, ɲɔ mayɛ na mʼa na wo yɛrɛ li logo. Jurumu wu ɲɔ yaha, ma da kapyegee nizaaŋaa pyi. Katiibaagaa ki ɲɔ yaha, ma da ɲuŋɔ ɲaari funmɔ fɛɛ na. Lee bu bye, la na ba fara ma wo ɲaɲiŋɛ ki na.»

Saan wu ŋmunɔgɔ kʼa pye can

25 Ayiwa, a kii keree kii bɛɛri di ba saannaa Nabukodonozɔɔri ta. 26 Ba yeye kɛ ni shuun ya toro wɛ, na wu yaha wu na saala Babiloni saanra pugbɔhɔ ki kataŋa ki na, 27 a saan wu jo: «Ta le Babiloni kugbɔɔ le bɛ nɛ yereŋɛ, na li pye na saanra ti wo kugbɔɔ li wɛ? Na wo sefɛɛrɛ ti baraga ni nɛ lee pye, na wo pɛɛŋɛ ke ni na wo nɔɔrɔ wu wuu na.» 28 Na pee jomɔ pu yaha saan wu ɲɔ na, a mujuu la di foro fugba wu ni na: «Saannaa Nabukodonozɔɔri, ye logo! Saanra tʼa shɔ ma na. 29 Ma na ba gɔ́ri yeege sipyii niŋɛ ni, ma na ba shɛ diin naŋa yaaya niŋɛ ni. Pu na ba ɲà kaan ma mu ma na li ba niiyɛ ɲɛ wɛ. Tɛɛgɛɛ gbarashuun na ba doro ma ɲuŋɔ ni lee ni, fo ma ga ba li cɛ na Fugba Liilii Wo Wu wu ɲɛ sipyii wo saanra ti ɲuŋɔfɔɔ we, sipya wemu bu daan wu mu, weefɔɔ mu wʼa saanra ti kaan. 30 Lee taapile li ni, a pee jomɔ pu ɲɔ di fa saannaa Nabukodonozɔɔri shizhaa na. A wu gɔri yeege sipyii niŋɛ ni, na ganha na ɲà li ba niiyɛ ɲɛ wɛ. A fugba mɛŋɛ di ganha na wu kpɔɔn fo na shɛ wu ɲuzhiire ti pye ti na fòro ba ɲaa shiye ɲɛ wɛ, a wu kabezhinyɛ yi bɛ di ganha na fòro ba shazhɛɛrɛ woyo ɲɛ wɛ.

Saan wu xakili wʼa kuri pa wu mu

31 Ayiwa, tɛɛ lemu tɛhɛnɛ lʼa bi kɔn shɛ ge, ba lee ya pa fa wɛ, a nɛ Nebukodonozɔɔri di ɲuŋɔ yirige, na fugba wu wii, a nɛ xakili wu guri pa nɛ mu. A nɛ baraga taha Fugba Liilii Wo Wu na. Wemu wu wa ɲìi na fo gbee ge, a nɛ wee sɔ na pɛɛŋɛ taha wu na. Tɛhɛnɛ ɲɛ wu wo fanha ki na wɛ, wu saanra ti bɛ na gori yaha fo gbee shi nibama wu bɛɛri mu. 32 Koŋɔ sipyii bɛɛri ɲɛ yafiin bɛ wu mu wɛ. Fugba wu kashɛn keŋɛ ki yoo, ɲiŋɛ ki sipyii pu yoo, lemu bu wu taan lee wʼa byi ni yee ni. Sipya wa shishiin wa wemu na já wu keŋɛ yereŋɛ wɛ, kelee na wu pye: Ɲaha ma di byi mɛ wɛ? 33 Lee taapile li ni, a nɛ xakili wu guri pa nɛ mu. Nɛ wo saanra ti wo nɔɔrɔ we, ni nɛ wo pɛnŋɛ ke, ni nɛ wo ɲafɛ wu ni, a yee bɛɛri di guri kan nɛ mu. A nɛ wo yɛrɛ kanvɛɛ pee ni nɛ wo sipyigbɔɔ pʼi nɛ yiri pa sanha. A pʼi guri nɛ teŋɛ sanha na wo saanra koo li na. A la di ganha na faraa nɛ wo fanha ki na. 34 Nimɛ, nɛ Nabukodonozɔɔri, nɛ ya baraga tɛri Fugba saangbɔ wu na, na wu sɔni, na pɛɛŋɛ tɛri wu na. Wu kapyegee ki bɛɛri kʼa saha, wu korogoo ki bɛɛri dʼa tii. Sipya bɛɛri wʼa wuyɛ durogo ge, wʼa wee tirige.»