Nabukodonozɔɔri wo sanni jaa wu kalenɛ le
3
Ayiwa, a saannaa Nabukodonozɔɔri di pu pye pʼa jaaa wa yàa ni sanni ni. Wee jaa wu ɲuŋɔ tɛhɛnɛ li bye mɛtɛrɛlɛɛ kɛlɛɛ taanri (30), wu kadaa di ɲɛ mɛtɛrɛlɛɛ taanri. A wu wee jaa wu sin Dura mura wu ni Babilɔni koomɔ pu ni. 2 Lee kadugo na a saan wu tuduro tun na pu wu fiige ki ɲuŋɔfɛɛ, ni kumadaa, ni gbafɛnɛɛrɛɛ, ni kiiri kɔnvɛɛ, ni fiige ki wari wu maravɛɛ, ni yɛrɛ kanvɛɛ, ni saliya fɛɛ ni fiige ki ɲahagbaa fɛɛ pusamaa bɛɛri yiri, kɔnhɔ pʼi ba wu wo sanni jaa wu kalenɛ li pye. 3 Ayiwa, saan wʼa bi sanni jaa wemu yàa ge, a ɲuŋɔfɛɛ pee, ni kumadaa pee, ni gbafɛnɛɛrɛɛ pee, ni kiiri kɔnvɛɛ pee, ni fiige ki wari wu maravɛɛ pee, ni yɛrɛ kanvɛɛ pee, ni saliya fɛɛ pee ni fiige ki ɲahagbaa fɛɛ pusamaa bɛɛri di ba puyɛ pinnɛ wee jaa wu ɲahagbaa na, wu kalenɛ li kaa na. 4 A jomɔ pu torogovɔɔ wu mujuu wá ni fanha ni na: «Shi wu bɛɛri, ni fiiye yi bɛɛri ni shi jomɔ pu bɛɛri wo sipyii, tuduro te ti wa na jo yi mu ge, tee ti wa mɛ: 5 ‹Yi ba maga ni sibenɛ ni koni ni gbogo ni yatinyɛ tuuyo yi bɛɛri mɛhɛɛ logo tuun wemu ni, yi bɛɛri di nuguro sin yʼi ɲahaya ye buri ɲiŋɛ ki na, yʼi sanni jaa wu pɛlɛ, wee wemu saannaa Nabukodonozɔɔri ya sin ge. 6 Sipyaa sipya wu ɲɛ wu ya nuguro sin, na ɲaha ke buri ɲiŋɛ ki na, na wee jaa wu pɛlɛ wɛ ge, weefɔɔ na ba wá lee taapile li ni kanra nab ki ni.› »7 Lee na, ba shi wu bɛɛri, ni fiiye yi bɛɛri, ni shi jomɔ pu bɛɛri wo sipyii pu bɛɛri ya pa maga, ni sibenɛ, ni koni, ni gbogo, ni yatinyɛ tuuyo yisaya bɛɛri wo mɛhɛɛ ki logo wɛ, a pu bɛɛri di nuguro sin, na ɲahaya ye buri ɲiŋɛ ki na, na sanni jaa wu pɛlɛ, saannaa Nabukodonozɔɔri ya wemu sin ge.
Daɲɛli wo naɲiinɛɛ pu ya ta sɔɔ na pɛɛŋɛ taha sanni jaa wu na wɛ
8 Ba lee ya pye wɛ, lee taapile li ni a Kalide shɛɛn pii di fulo na Yawutuu pu ɲuŋɔ le. 9 A pʼi saannaa Nabukodonozɔɔri pye: «Ɛɛ saan we, Kilɛ wu ma yaha shikaraga! 10 Ɛɛ saan we, muyɛ pyaa kʼa te tuduro te kan na sipyii pu bɛɛri ba maga ni sibenɛ ni koni, ni gbogo ni yatinyɛ tuuyo yisaya bɛɛri mɛhɛɛ logo tuun wemu ni, na pu bɛɛri di nuguro sin pʼi sanni jaa wu pɛlɛ. 11 Na sipya wemu bu zhe wu da nuguro sin wu jaa wu pɛlɛ wɛ, na weefɔɔ na wá lee taapile li ni kanra na ki ni. 12 Saan we, mu ya Yawutuu piimu teŋɛ na pʼa Babilɔni fiige ki keree ki ɲaha shɔɔnri ge, Shadaraki, ni Meshaki, ni Abɛdi-Nego, pee ya ta ma ɲɔmɛɛ co wɛ, pu ya ta na mu wo yasunyɔ yi pɛlɛ wɛ. Sanni jaa wu bɛ mu ya sin ge, pu ya ta wu pɛlɛ wɛ.»
13 Ayiwa, ba Nabukodonozɔɔri ya yee logo wɛ, a wu luu di yìri fo xuuni. A wu jo na pu pa ni Shadaraki ni Meshaki ni Abɛdi-Nego ni. A pʼi ba ni pu ni saan wu mu. 14 A Nabukodonozɔɔri di pu pye: «Shadaraki, ni Meshaki, ni Abɛdi-Nego, nɛ logo na yee ya ta na nɛ wo yasunyɔ yi pɛlɛ wɛ, sanni jaa wemu nɛ sin ge, na yee ya ta nuguro sin wee bɛ fɛɛ ni na wu pɛlɛ wɛ, can wu ɲɛ wii ya? 15 Ayiwa yi gbegele nimɛ, yi ba maga, ni sibenɛ, ni koni, ni gbogo ni yatinyɛ tuuyo yisaya bɛɛri mɛhɛɛ logo tuun wemu ni, jaa wemu nɛ sin ge, yʼi nuguro sin yʼi wee pɛlɛ. Yi bye yʼi ya wu pɛlɛ wɛ, yi na ba wá lee taapile li ni kanra na ki ni. Kilɛ wekɛ wu da já ba yee shɔ nɛ na wɛ?»
16 A Shadaraki, ni Meshaki, ni Abɛdi-Nego di saan wu ɲɔ shɔ na: «Ɛɛ saan we, ɲuŋɔ wa li na wèe pu ya jo le kaa le ni wɛ. 17 Saan we, Kilɛ wemu mu wèe ya kapyeŋɛɛ pyi ge, wee na já wèe shɔ kanra na ki na, na guri na wèe shɔ mu bɛ wo fanha ki na, wu shiin di na ba wèe shɔ bɛ. 18 Ga wu ɲɛhɛ bye wu ya wèe shɔ bɛ wɛ saan we, li cɛ fiinŋɛ na wèe wa da da kapyeŋɛɛ pyi ma yasunyɔ yi mu wɛ. Sanni jaa wemu bɛ mʼa sin ge, wèe di wa da wee bɛ pɛlɛ wɛ.»
Pʼa naɲiinɛɛ taanri wu wá nagbɔhɔ ki ni
19 A Nabukodonozɔɔri luu lisana di danha fo wu ɲaha kʼa ɲɛri Shadaraki, ni Meshaki, ni Abɛdi-Nego keree na. A wu jo na pu kanra li na ki ɲaaŋa sanha, pʼi ki kafugo ki pɛlɛ nizhiige ki na fo tɔɔɲii gbarashuun. 20 A wu wu wo sɔrɔsii baraga wuu pii pye na pu Shadaraki, ni Meshaki, ni Abɛdi-Nego pɔ, pʼi pu wá kanra na ki ni. 21 A pʼi pee sipyii pu pɔ ni pu kulushiilee, ni pu fadeye, ni pu ɲudɔŋɔɔ ni pu fadegbɔyɔ yi bɛɛri ni, na pu wá kanra na ki ni. 22 Saan wʼa tuduro ti jo ni kafugo ni, a pʼi kanra li na ki pɛlɛ fo na doro, lee funŋɔ ni, sɔrɔsii piimu pʼa Shadaraki, ni Meshaki ni Abɛdi-Nego wá na ki ni ge, a na ki kafugo kʼi pee bɛɛri gbo. 23 Pee namaa taanri wu wi ge, Shadaraki ni Meshaki, ni Abɛdi-Nego, a pee nibɔyɔ di do kanra na ki ni.
Kilɛ ya naɲiinɛɛ taanri wu ɲuŋɔ wolo
24 A saannaa Nabukodonozɔɔri jaa di yìri, a wu gburogi yìri, na wu yɛrɛ kavɛɛ pu yege na: «Ta sipyii taanri bɛ wèe ya pɔ wá na ki ni wɛ? A pʼi wu ɲɔ shɔ na: «Ɛɛ, lee ya cɛ fiinŋɛ saan we!» 25 A saan wu jo sanha na: «Nɛ dʼa tɛrɛ na namaa shishɛɛrɛ ɲaa pɔɔrɔ baa do! Pee wa na ɲaari na ki ni, kʼi ya yaaga bɛ pyi pu na wɛ. Shishɛɛrɛ wo wu ɲɛ ba kilɛlɛɛ ja ɲɛ wɛ.»
26 Lee kadugo na a Nabukodonozɔɔri di fulo nagbɔhɔ ki na, na jo: «Shadaraki ni Meshaki ni Abɛdi-Nego, Fugba Liilii Wo Kilɛ wu wo kapyebyii pee, yi foro pa naha!» A Shadaraki ni Meshaki ni Abɛdi-Nego di foro nagbɔhɔ ki ni.
27 A ɲuŋɔfɛɛ pee, ni kumadaa pee, ni gbafɛnɛɛrɛɛ pee ni yɛrɛ kanvɛɛ pu bɛɛri di ba binnɛ. A pʼi li ɲa na na ki ya yaaga bɛ pye pu ceepuuro ti na wɛ, pu ɲuzhiire ti bɛ ya sogi wɛ, yafiin di ya pu fadeye yi bɛ ta wɛ, na bɛ nugo di ya pye pu na wɛ. 28 Wee tuun wu ni a Nabukodonozɔɔri di jo: «Baraga ki taha Shadaraki ni Meshaki ni Abɛdi-Nego wo Kilɛ wu na. Wee ya wu mɛlɛkɛ wu tun na pa wu kapyebyii pu shɔ, bani pee ya dà pu Kilɛ wu na, na zhe pu da saan wu ɲɔmɛɛ co wɛ, na pu ceepuuro ti kan xu mu, pɛɛŋɛ yaaga katii wo bɛlɛ ɲaha na kemu ɲɛ pu wo Kilɛ wu wɛ. 29 Lee wuu na ɲɔmɛɛ le nʼa da jo ge, lee li wa mɛ: «Sipyaa sipya, mʼa pye shi bɛɛri, kelee mʼa yìri fiige bɛɛri ni kelee mʼa ta ma na jomɔ tuugo bɛɛri yu, ma ga joguumɔ jo wá Shadaraki, ni Meshaki ni Abɛdi-Nego wo Kilɛ wu na, ma na jere jere, na ma puga ki ja na pye katapige, bani pɛɛŋɛ yaaga ka shishiin ɲɛ wà kemu na já sipya shɔ ba wee Kilɛ wu ɲɛ wɛ! 30 Lee kadugo na a saan wu tayereye kan Shadaraki ni Meshaki ni Abɛdi-Nego mu Babilɔni koomɔ pu ni yemu yʼa ye nizhiiye yi na ge.
Tigbɔhɔ ki wo ŋmunɔgɔ kee
31 A saannaa Nabukodonozɔɔri di te tuduro te tun fiiye yi bɛɛri, ni shi wu bɛɛri, ni shi jomɔ pu bɛɛri mu, pee piimu pu wa ɲiŋɛ ki na ke. A wu jo: «Ɲaɲiŋɛ nigbɔhɔ ki pye yi mu. 32 Lʼa taan nɛ mu, Fugba Kilɛ wʼa ɲaha shɛshɛɛrɛ ni kakanhaŋaa kiimu pye nɛ mu ge, di kee jo yi mu.
33 Wu ɲaha shɛshɛɛrɛ tʼa pɛlɛ.
Wu kakanhaŋaa kʼi ɲɛ
ni baraga ni.
Wu saanra ti ɲɛ tɛhɛnɛ baa wuuro,
wu wo ɲuŋɔfɛɛrɛ ti bɛ
na ba gori yaha gbee.