Suumɔ kulo kacɛ ki wo gbaweye yi wo tahaa kee
48
Ayiwa, Izirayɛli gbaweye yi mɛyɛ yi ye, gbawege bɛɛri ni ki taa ɲiŋɛ: Dan wo gbawege ke, kee wo ɲiŋɛ taa li na ba lɔ suumɔ kulo kacɛ ki na Etilɔn koo li na, na nɔ Amati kulo li ni, ni Azari-Ena kulo le, na shɛ gbɔn Damasi wo koomɔ pu tɛhɛnɛ li na suumɔ kulo kacɛ ki na, Amati kulo li yíri, na lɔ Kilɛ-nɔhɔ ki na, na ba foro caŋatomɔ pu ni. Lee wa Dan wo gbawege ki wo taa le. 2 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Dan wo tɛhɛnɛ li na, lee na ba bye Azɛri wo gbawege ki wo ɲiŋɛ taa. 3 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Azɛri wo gbawege ki tɛhɛnɛ li na, lee na ba bye Nɛfitali wo gbawege ki wo taa le. 4 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Nɛfitali wo gbawege ki tɛhɛnɛ li na, lee na ba bye Manase wo gbawege ki wo taa le. 5 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Manase wo gbawege ki tɛhɛnɛ li na, lee na ba bye Efirayimu wo gbawege ki wo taa le. 6 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Efirayimu wo gbawege ki tɛhɛnɛ li na, lee na ba bye Urubɛn wo gbawege ki wo taa le. 7 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Urubɛn wo gbawege ki tɛhɛnɛ li na, lee na ba bye Zhuda wo gbawege ki wo taa le.Kafɔɔ wo taa le
8 Ayiwa, na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Zhuda wo gbawege ki wo tɛhɛnɛ li na, pu na ba ɲiŋɛ ka taanna, ki kadaa li ma bye keŋɛ ɲìi kabɔfoŋɔɔ kɛlɛɛ shuun ni kaguro (25.000), kʼi dɔnnɔ ba Izirayɛli gbaweye yi wo tahaa ki ɲɛ wɛ, na lɔ Kilɛ-nɔhɔ ki na, fo na shɛ nɔ caŋatomɔ pu ni. Wee xuu wu nizhoo ni fɛfɛɛrɛ xuu wa da ba yereŋɛ. 9 Xuu wemu yʼa da ba yaha Tɛhɛnɛ Baa Kilɛ yahama ni ge, wee xuu wu wo ɲidaa li na ba bye keŋɛ ɲìi kabɔfoŋɔɔ kɛlɛɛ shuun ni kaguro (25.000) wu kadaa li ma bye keŋɛ ɲìi kabɔfoŋɔɔ kɛ (10.000). 10 Wee fɛfɛɛrɛ xuu wu na ba bye saraya ɲaha shɔɔnrivɛɛ pu wo. Wu ɲidaa li na ba bye kabɔfoŋɔɔ keŋɛ ɲìi kɛlɛɛ shuun ni kaguro (25.000) suumɔ kulo kacɛ ki na, wu kadaa li ma bye keŋɛ ɲìi kabɔfoŋɔɔ kɛ (10.000) caŋatomɔ kacɛ ki na, na wu kadaa li pye keŋɛ ɲìi kabɔfoŋɔɔ kɛ (10.000) Kilɛ-nɔhɔ kacɛ ki bɛ na. Na wu ɲidaa li pye keŋɛ ɲìi kabɔfoŋɔɔ kɛlɛɛ shuun ni kaguro (25.000) woroo kulo kacɛ ki na. Tɛhɛnɛ Baa Kilɛ wo fɛfɛɛrɛ xuu wu na ba bye wee xuu wu niŋɛ ki ni. 11 Wee xuu wu na ba bye Sadɔki wo tirige shɛɛn saraya ɲaha shɔɔnrivɛɛ pu wo, pee piimu pʼa puyɛ kan Kilɛ mu, na pu wo labye wu pyi ni ɲɔmɛɛ fɛɛrɛ ni, pu di ya ta kadugo le Tɛhɛnɛ baa Kilɛ ni, ba Levi wo tirige shɛɛn pʼa li pye, Izirayɛli nagoo pu kadugo leduun wu ni Kilɛ ni wɛ. 12 Ɲiŋɛ kemu kʼa taanna fiige ki ni, na yaha Tɛhɛnɛ Baa Kilɛ yahama ni, na sogi Levi wo tirige shɛɛn pu wo tɛhɛnɛ li na ge, we xuu we na ba daanna wà na pye fɛfɛɛrɛ wo fo xuuni, na kan saraya ɲaha shɔɔnrivɛɛ fɛfɛɛrɛ wuu pu mu.
13 Levi wo tirige shɛɛn pu wo ɲiŋɛ taa li na ba sogi saraya ɲaha shɔɔnrivɛɛ pu wuu li na, li ɲidaa na ba bye keŋɛ ɲìi kabɔfoŋɔɔ kɛlɛɛ shuun ni kaguro (25.000) li kadaa li ma bye keŋɛ ɲìi kabɔfoŋɔɔ kɛ (10.000). Kee tahaa shuun wu bɛɛri ɲidahaa na ba bye keŋɛ ɲìi kabɔfoŋɔɔ kɛlɛɛ shuun ni kaguro (25.000), ki kadahaa ki ma bye keŋɛ ɲìi kabɔfoŋɔɔ kɛ (10.000). 14 Ke ɲiŋɛ ke xuu wa shishiin ya yaa na wu pɛrɛ, kelee na wu faa, kelee na wu kan wa mu wɛ. Fiige ki bɛɛri wo ɲiŋɛ nijeŋɛ ki ɲɛ kee ɲiŋɛ ke, bani kʼa yaha Tɛhɛnɛ Baa Kilɛ yahama ni.
Ɲuŋɔfɔɔ wu wo taa ɲiŋɛ, ni kulo li tasinŋɛ ke
15 Ayiwa, ɲiŋɛ kisaŋa kemu na ba gori ge, kee wo kadaa li na ba bye keŋɛ ɲìi kabɔfoŋɔɔ kaguro (5.000), na ki ɲidaa li pye keŋɛ ɲìi kabɔfoŋɔɔ kɛlɛɛ shuun ni kaguro (25.000). Kee na ba bye kulo li wogo, ni kulo li wo mahama pe. Kulo li na ba sin niŋɛ ke ni. 16 Kulo li wo daanna wu we: Kulo li suumɔ kulo kacɛ ki na ba bye keŋɛ ɲìi kabɔfoŋɔɔ shishɛɛrɛ di xhuu kaguro (4.500), li woroo kulo kacɛ ki na ba bye keŋɛ ɲìi kabɔfoŋɔɔ shishɛɛrɛ di xhuu kaguro (4.500), li Kilɛ-nɔhɔ kacɛ ki na ba bye keŋɛ ɲìi kabɔfoŋɔɔ shishɛɛrɛ di xhuu kaguro (4.500), li caŋatomɔ kacɛ ki bɛ na bye keŋɛ ɲìi kabɔfoŋɔɔ shishɛɛrɛ di xhuu kaguro (4.500), 17 Kulo li sizaya yi tɛhɛnɛ li na bye keŋɛ ɲìi xhuu shuun ni kɛlɛɛ kaguro (250) suumɔ kulo kacɛ ki na, na bye keŋɛ ɲìi xhuu shuun ni kɛlɛɛ kaguro (250) woroo kulo kacɛ ki na, na bye keŋɛ ɲìi xhuu shuun ni kɛlɛɛ kaguro (250) Kilɛ-nɔhɔ kacɛ ki na, na bye keŋɛ ɲìi xhuu shuun ni kɛlɛɛ kaguro (250) caŋatomɔ kacɛ ki na. 18 Ɲiŋɛ kemu na ba gori fɛfɛɛrɛ xuu wu ni Kilɛ-nɔhɔ ke, ni caŋatomɔ pu ni ge, wee xuu wu wo ɲidaa li na ba bye keŋɛ ɲìi kabɔfoŋɔɔ kɛ (10.000), Kilɛ-nɔhɔ ki na, keŋɛ ɲìi kabɔfoŋɔɔ kɛ (10.000) wa ma bye caŋatomɔ pu bɛ ni. Sipyii piimu pu da ba labye pyi kulo li funŋɔ ni ge, kee ɲiŋɛ ki wo faa yapyiire na ba daga da pee ɲɔ shaa. 19 Piimu pu da ba labye pyi kulo li mu, na foro Izirayɛli gbaweye yi bɛɛri ni ge, pee na ba kee ɲiŋɛ ki tunni. 20 Ɲiŋɛ kemu na ba yaha Tɛhɛnɛ Baa Kilɛ yahama ni ge, ki bɛɛri ɲuŋɔkana na ba bye keŋɛ ɲìi kabɔfoŋɔɔ kɛlɛɛ shuun ni kaguro (25.000), kabanugo bɛɛri. Yʼi wee fɛfɛɛrɛ xuu wu wo taaga shishɛɛrɛ wogo lɔ yi pye kulo li wo taa.
21 Xuu wemu na ba gori ge, wee na ba bye ɲuŋɔfɔɔ wu wo taa. Xuu wemu wʼa yaha Tɛhɛnɛ Baa Kilɛ yahama ni, ni kulo li mɛgɛ na ge, ɲuŋɔfɔɔ wu wo taa li na ba bye wee xuu wu wo kabanuyɔ shuun wu na. Wu wo taa li na ba lɔ fɛfɛɛrɛ xuu wu na Kilɛ-nɔhɔ ki na, na dɔnnɔ kari keŋɛ ɲìi kabɔfoŋɔɔ kɛlɛɛ shuun ni kaguro (25.000) wu cɛ fɛni, fo na shɛ nɔ fiige ki Kilɛ-nɔhɔ ki wo kodɛhɛnɛ li na. Na lɔ fɛfɛɛrɛ xuu wu na caŋatomɔ pu ni, na dɔnnɔ kari keŋɛ ɲìi kabɔfoŋɔɔ kɛlɛɛ shuun ni kaguro (25.000) wu cɛ fɛni, fo na shɛ nɔ fiige ki caŋatomɔ kacɛ ki wo kodɛhɛnɛ li na. Lee ɲiŋɛ taa le na ba bye ɲuŋɔfɔɔ wu wuu, li ni tahaa kisaŋaa bɛɛri na ba bye nigin. Lee na do, ɲiŋɛ kemu kʼa yaha Tɛhɛnɛ Baa Kilɛ yahama ni ge, ni Kilɛ-pɛɛŋɛ pugbɔhɔ ki wo fɛfɛɛrɛ xuu we, yee ma bye niŋɛ ki ni. 22 Lee funŋɔ ni do, ɲuŋɔfɔɔ wu wo ɲiŋɛ taa li ma bye Zhuda wo tirige shɛɛn pu tɛhɛnɛ le ni Bɛnzhamɛ wo tirige shɛɛn pu tɛhɛnɛ li tɛ wu ni. Levi wo tirige shɛɛn pee ni kulo li wo ɲiŋɛ taa li ma bye ɲuŋɔfɔɔ wu wo ɲiŋɛ taa li niŋɛ ki ni.
Woroo kulo kacɛ ki wo gbaweye yi wo tahaa kee
23 Ayiwa, gbaweye yisaya wo tahaa ki wa mɛ: Na lɔ Kilɛ-nɔhɔ ki na, fo na shɛ foro caŋatomɔ pu ni, lee ɲɛ Bɛnzhamɛ wo gbawege ki wo taa le. 24 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Bɛnzhamɛ wo gbawege ki tɛhɛnɛ li na, lee na ba bye Simiɲɔ wo gbawege ki wo taa le. 25 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Simiɲɔ wo gbawege ki tɛhɛnɛ li na, lee na ba bye Isakari wo gbawege ki wo taa le. 26 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Isakari wo gbawege ki tɛhɛnɛ li na, lee na ba bye Zabulɔn wo gbawege ki wo taa le. 27 Na lɔ Kilɛ-nɔhɔ ki na, fo na shɛ foro caŋatomɔ pu ni, na tiiŋɛ Zabulɔn wo gbawege ki tɛhɛnɛ li na, lee na ba bye Gadi wo gbawege ki wo taa le. 28 Gadi wo gbawege ki wo woroo kulo kacɛ ki wo tɛhɛnɛ li na ba bye fiige ki tɛhɛnɛ. Li na ba lɔ Tamari kulo li na, na gari fo Mɛriba wo lɔhɔyɔ yi na, Kadɛsi wo koomɔ pu ni, na doro kari fo Misira wo gba we, na shɛ doro kari fo suumɔ logbɔhɔ ke.
29 Ayiwa, lee taagana li na yʼa da ba fiige ki taa ni kagaanshaan ni, Izirayɛli gbaweye yi na, na pye pu cɛn tahaa. Kafɔɔ Tɛhɛnɛ Baa Kilɛ ɲɔjomɔ pi.
Zheruzalɛmu kuɲɔgɔɔ kɛ ni shuun we
30 Ayiwa, kulo li tajeye yi ye: Li suumɔ kulo kacɛ ke, kee ɲɛ keŋɛ ɲìi kabɔfoŋɔɔ shishɛɛrɛ di xhuu kaguro (4.500). 31 Izirayɛli wo gbaweye yi mɛyɛ na ba le kulo li tajeye yi na. Tajeye taanri na ba bye kulo li suumɔ kulo kacɛ ki na. Urubɛn wo tajege, ni Zhuda wo tajege, ni Levi wo tajege. 32 Kilɛ-nɔhɔ kacɛ ke, kee ɲɛ keŋɛ ɲìi kabɔfoŋɔɔ shishɛɛrɛ di xhuu kaguro (4.500). Tajeye taanri na ba bye wà bɛ. Yusufu wo tajege, ni Bɛnzhamɛ wo tajege, ni Dan wo tajege. 33 Kulo li woroo kulo kacɛ ke, kee ɲɛ keŋɛ ɲìi kabɔfoŋɔɔ shishɛɛrɛ di xhuu kaguro (4.500). Tajeye taanri na ba bye wà bɛ. Simiɲɔ wo tajege, ni Isakari wo tajege, ni Zabulɔn wo tajege. 34 Kulo li caŋatomɔ kacɛ ke, kee ɲɛ keŋɛ ɲìi kabɔfoŋɔɔ shishɛɛrɛ di xhuu kaguro (4.500). Tajeye taanri na ba bye wà bɛ. Gadi wo tajege, ni Azɛri wo tajege, ni Nɛfitali wo tajege.
35 Kulo li bɛɛri wo maha maha kasɔrɔgɔ ki ɲidaa na ba bye keŋɛ ɲìi kabɔfoŋɔɔ kɛ ni gbarataanri (18.000). Ayiwa, na lɔ kee caŋa ki na, kulo li mɛgɛ na bye «Adonayi-Shama!» Lee kɔ́ri ɲɛ na ‹Naha Tɛhɛnɛ Baa Kilɛ ɲɛ!›