Gba keŋɛ kemu kʼa fúu na fòro Kilɛ-pɛɛŋɛ pugbɔhɔ ki ni ge
47
Ayiwa lee kadugo na, a ná wu guri pa ni nɛ ni Kilɛ-pɛɛŋɛ pugbɔhɔ ki tajege ki ni. Lɔhɔ ki bi fòro Kilɛ-pɛɛŋɛ pugbɔhɔ ki kuɲɔwege ki nɔhɔdaan wu ni na se Kilɛ-nɔhɔ ki na, bani Kilɛ-nɔhɔ ke na Kilɛ-pɛɛŋɛ pugbɔhɔ ki ɲaha bi tagi. Kilɛ-pɛɛŋɛ pugbɔhɔ ki kanige cɛ wu ni lɔhɔ ki bi diri, saraya tawologo ki woroo kulo kacɛ ki na. 2 A ná wu foro ni nɛ ni Kilɛ-pɛɛŋɛ pugbɔhɔ ki suumɔ kulo kacɛ ki wo tajege ki ni, na maha maha toro ni nɛ ni Kilɛ-pɛɛŋɛ pugbɔhɔ ki kadugo yíri, fo na shɛ nɔ Kilɛ-nɔhɔ ki wo tajege ki na, a nɛ lɔhɔ ki ɲa ki na fúu lee kuɲɔɔ li woroo kulo kacɛ ki na.3 A ná wu shɛ ɲaha na Kilɛ-nɔhɔ ki na, daanna mɛɛ li bye wu keŋɛ ni, a wu keŋɛ ɲìi kabɔfonɔ nigin (1.000) taanna, na lɔhɔ ki kɔn ni nɛ ni. A lɔhɔ kʼi nɛ co ɲidakuruyo ye na. 4 A wu keŋɛ ɲìi kabɔfonɔ nigin (1.000) wa bɛ taanna sanha, na lɔhɔ ki kɔn ni nɛ ni, a lɔhɔ kʼi nɛ co nugunyɔ ye na. A wu keŋɛ ɲìi kabɔfonɔ nigin (1.000) wa bɛ taanna sanha, na lɔhɔ ki kɔn ni nɛ ni, a lɔhɔ kʼi nɛ co mɛnugumɔ pe ni. 5 A wu nugo keŋɛ ɲìi kabɔfonɔ nigin (1.000) wa bɛ taanna sanha. A lɔhɔ kʼi ɲɛri nimɛ gba lɔhɔ nɛ da já kemu kɔn wɛ, bani lɔhɔ ki bi cogi, ni loɲana bɛ wɛ, ki da já gɔn wɛ. Gba lɔhɔ ki bye kii sipya da já kemu kɔn wɛ ge.
6 Ayiwa, a ná wu nɛ pye: «Sipyiyawyii, mʼa le ɲa ya?» Lee kadugo na, a wu guri kari ni nɛ ni gba lɔhɔ ki ɲɔ ki na sanha. 7 Ba wʼa kuri pa ni nɛ ni wɛ, a nɛ ba tiire niɲɛhɛrɛ ɲa gba lɔhɔ ki ɲɔ ki na, ki kabanuyo shuun wu na. 8 A ná wu nɛ pye: «Ke lɔhɔ ke na ba fúu da se fiige ki Kilɛ-nɔhɔ ki na, na diri na gaaŋi Zhurudɛn fadaaŋa ki na, fo na shɛ jé Suumɔ Loxugo ki ni. Ki ba shɛ jé Suumɔ Loxugo ki ni, ki lɔhɔ ki na ɲɛri pye loceŋɛ. 9 Ke gba lɔhɔ ke bu fɔ́ na nɔ xuu wemu bɛɛri ni, ɲìi yaŋmuyɔ bɛɛri yi ɲɛ wà ge, yi bɛɛri na ɲɛhɛ, na bye ɲiifɛɛrɛ na. Fyaa pu na ɲɛhɛ fo xuuni, bani ke lɔhɔ ke na ba fɔ́ na nɔ wà, na suumɔ lɔhɔ ki ɲɛri na pye loceŋɛ. Ke gba lɔhɔ ke bu fɔ́ na nɔ xuu bɛɛri ni, wee xuu wu wo yaŋmuyɔ yi bɛɛri na ɲiifɛɛrɛ pye, na ɲɛhɛ. 10 Fyashaa na ba yere lɔhɔ ki ɲɔ na. Pu na ba pu jɔlɔɔ pu caa caa na lɔ Eyini-Gedi na fo na shɛ nɔ Eyini-Egilamu kulo li na. Fyaa tuuyo niɲɛhɛyɛ na ba daa wà ba suumɔ lɔhɔ ki wo fyaa pu ɲɛ wɛ. Pu na ba sii ɲɛhɛ fo xuuni. 11 Ga suumɔ lɔhɔ ki wo lowegeye ye, ni ki dukeye yi wo lɔhɔyɔ yi da ba ɲɛri loceŋɛ wɛ, yee na ba bye suumɔ pu tawoloyo. 12 Tisɛyɛ yi tuuyo yi bɛɛri na ba fin na foro gba lɔhɔ ki ɲɔ ki na, ki kabanuyo shuun wu bɛɛri na. Yi wɛrɛ ti wa da ga waha wɛ, yasɛyɛ di wa da xhɔ yi na wɛ. Yi na ba yasɛyɛ pyi yeŋɛ bɛɛri, bani Kilɛ-pɛɛŋɛ pugbɔhɔ ki wo fɛfɛɛrɛ xuu wu ni gba lɔhɔ ki bi fuu na fòro, na ma na jin yi ni. Yi yasɛyɛ yi na ba byi yaligee, na yi wɛyɛ yi pyi yama wɛrɛ.»
Tɛhɛnɛ Baa Kilɛ ya Izirayɛli fiige ki tɛhɛŋɛɛ wolo
13 Ayiwa, yemu Tɛhɛnɛ Baa Kilɛ wa yu ge, yee yi wa mɛ: «Fiige kemu yʼa da ba loolo Izirayɛli gbaweye kɛ ni shuun wu na na pye pu cɛn ge, kee wo tɛhɛŋɛɛ ki wa kiiri. Tahaa shuun na ba gan Yusufu wo gbawege ki mu. 14 Yi na ba ki taa yiyɛ na, na tahaa ki bɛɛri pye nigin. Bani nɛ kàa ni na keŋɛ ki yirige wu ni, jo nɛ na ba ki kan yi sefɛlɛɛ pu mu. Lee wuu na do, ke fiige ke na ba bye yi wo cɛn. 15 Ki tɛhɛŋɛɛ ki wa mɛ. Suumɔ kulo kacɛ ki na, na lɔ suumɔ logbɔhɔa ki na, na doro Etilɔn kulo li wo koo li ni, fo na shɛ nɔ Sedadi kulo li wo tajege ki na. 16 Na doro Amati kulo le, ni Berotayi kulo le, ni Sibarayimu kulo li ni, kee kulogoo ki wa Damasi wo ɲiŋɛ ke ni Amati wo ɲiŋɛ ki tɛ ni, na doro Asɛri-Tikɔn kulo li ni, Xhuran wo koomɔ pu tɛhɛnɛ li na. 17 Lee na do, kodɛhɛnɛ li na ba lɔ suumɔ logbɔhɔb ki na, na gari fo Asari-Enɔ kulo le, Damasi wo ɲiŋɛ ke ni Amati wo ɲiŋɛ ki na bye li tɛhɛnɛ. Lee ɲɛ fiige ki suumɔ kulo kacɛ ki wo tɛhɛnɛ le. 18 Fiige ki Kilɛ-nɔhɔ kacɛ ki tɛhɛnɛ li na ba bye Xhuran wo koomɔ pe ni Damasi wo koomɔ pu tɛ we, ni Galadi wo koomɔ pe, Izirayɛli fiige ki tɛ we, na shɛ da Zhurudɛn Gba wu na, na gari fo Suumɔ Loxugo ke. Lee na ba bye ki Kilɛ-nɔhɔ kacɛ ki wo tɛhɛnɛ le. 19 Fiige ki woroo kulo kacɛ ki wo tɛhɛnɛ li na ba lɔ Tamari na, fo na shɛ nɔ Mɛriba wo lɔhɔyɔ yi na, Kadɛsi wo koomɔ pu ni, na lɔ Misira wo gba wu na, fo na shɛ nɔ suumɔ logbɔhɔc ki na. Lee li wa fiige ki woroo kulo kacɛ ki wo kodɛhɛnɛ le. 20 Fiige ki caŋatomɔ kacɛ ki wo tɛhɛnɛ li na ba lɔ suumɔ logbɔhɔd ki na, na gari fo Lebo-Amati wo tajege ki na. Lee na ba bye fiige ki caŋatomɔ kacɛ ki wo tɛhɛnɛ le.
21 «Yi na ba fiige ki taa yiyɛ na, na saha ni Izirayɛli gbaweye yi ni. 22 Yi na ba kagaanshaan pye, na fiige ki taa. Nabuun piimu pu wa tiinnɛ na yi tɛ ni, ni nagoo ni ge, yi na ba ki taa yi ni pee na. Pee nabuun pu na ba bye yi mu ba kantiinlɛɛ ɲɛ wɛ Izirayɛli nagoo pu tɛ ni. Pu bɛ ya yaa na pu taa ɲiŋɛ ta na pye cɛn Izirayɛli nagoo pu tɛ ni. 23 Nabun wemu bu bye ni gbawege kemu ni, kee gbawege ki ni wee nabun wu wo taa li da voro. Kafɔɔ Tɛhɛnɛ Baa Kilɛ ɲɔjomɔ pi.»