Ɲuŋɔfɔɔ wu wo kodorogoo
46
Ayiwa, yemu Kafɔɔ Kilɛ wa yu ge, yee yi wa mɛ: «Funŋɔ ki wo kaaŋa ki wo tajege kemu kʼa foro to Kilɛ-nɔhɔ ki na ge, kee na ba dɔ yaha labye wu wo cabyaa gbaara wu bɛɛri funŋɔ ni. Ga cadɛɛngɛ ki ba nɔ, ki na mugi. Ki na ba mugi yevorovoŋɔ ki bɛ wo kalenɛ li caŋa. 2 Ɲuŋɔfɔɔ wu na ba jé kpɛɛngɛ ki wo tajege ki wo kpaan li ni, na shɛ yere tajege ki wo gbeetiriye yi tàan. Saraya ɲaha shɔɔnrivɛɛ pu na wu wo saraga nizogoŋɔ ke, ni wu ɲaɲiŋɛ saraga ki wolo. Wʼa nuguro sin kuɲɔwege ki ni, lee kadugo na, wʼa foro. Tajege ki ɲɔ na mugi yaha, fo na shɛ nɔ yakoŋɔ ki na. 3 Fiige ki shɛɛn pu na ba ma da nuguro sinni Tɛhɛnɛ Baa Kilɛ fɛɛ ni, kee tajege ki ni, cadɛɛnyɛ ye, ni yevorovoyo yi wo kaleŋɛɛ ki ni.4 «Saraga nizogoŋɔ kemu ɲuŋɔfɔɔ wu da ba wolo gan Tɛhɛnɛ Baa Kilɛ mu, cadɛɛngɛ ki na ge, kee ɲɛ dubyapiye gbaara manɛ baa woyo, ni dubyapoo nigin manɛ baa wo, 5 wu ni wu myɛ saraga, efa ɲii nigin. Myɛ saraga efa ɲìi ɲɔ kemu kʼa taan wu mu ge, wu kee taha dubyapiye yi na. Wu sìnmɛ ɛn ɲìi nigin nigin taha efa ɲìi ki bɛɛri na. 6 Yevorovoŋɔ ki wo kalenɛ li ni, wu manɛ baa wo nupee nigin wolo saraga, ni dubyapepinyɛ gbaara, ni dubyapoo nigin yi bɛɛri manɛ baa woyo. 7 Wu myɛ saraga efaa ɲii nigin taha nupee li na, wu ɲii nigin wa taha dubyapoo wu na. Wu se ɲɛ myɛ efa ɲìi kiimu na ge, wu kee taha dubyapiye yi na. Efa ɲii la bɛɛri wu sìnmɛ ɛn ɲii nigin taha li na.
8 «Ɲuŋɔfɔɔ wu ba da jé tuun wemu ni, wu jé tajege ki wo kpaan li ni, wu ba guri foro lee ninunɔ ni. 9 Fiige ki shɛɛn pu ba ma tuun wemu ni Tɛhɛnɛ Baa Kilɛ mu, kaleŋɛɛ ki wo pinnɛrɛ ti ni, wemu bu jé suumɔ kulo kacɛ ki wo tajege ki ni, na ba Tɛhɛnɛ Baa Kilɛ pɛlɛ, wufɔɔ ba da voro, wu foro woroo kulo kacɛ ki wo tajege ki ni. Wemu bu jé woroo kulo kacɛ ki wo tajege ki ni, wufɔɔ di shɛ foro suumɔ kulo kacɛ ki wo tajege ki ni. Wemu bu jé tajege kemu ni, wufɔɔ ganha bu guri voro kee ninuŋɔ ni wɛ, ga wu shɛ foro ki ɲahatii wogo ki ni. 10 Sipyiire ti ba jin tuun wemu ni, ɲuŋɔfɔɔ wu bɛ di jé, ti ba fòro, wu bɛ di foro.»
Saraya yi wo kodorogoo
11 «Ayiwa, kaleŋɛɛ ki wo caya ye, ni pinnɛrɛ ti wo caya yi na, nupee li wo myɛ saraga ki na ba bye efa ɲii nigin, dubyapoo wu bɛ wogo ki na bye efa ɲii nigin. Pu se bu myɛ efa ɲii kiimu ta, pʼa kee taha dubyapiye yi wo saraga ki na. Efa ɲii nigin bɛɛri pʼa sìnmɛ ɛn ɲii nigin taha li na. 12 Ɲuŋɔfɔɔ wu ba da daan na mu wo saraga nizogoŋɔ wolo, kelee daan na mu wo ɲaɲiŋɛ saraga, tajege kemu kʼa foro to Kilɛ-nɔhɔ ki na ge, pu na kee mugi wu mu, wʼa wu wo daan na mu wo saraga nizogoŋɔ ke, ni daan na mu wo ɲaɲiŋɛ saraga ki wolo, ba wʼa tee na li pyi cadɛɛnyɛ yi ni wɛ. Wu bu xhɔ wʼa foro, pʼa tajege ki tɔ.
13 «Caŋa bɛɛri mʼa yee nigin dubyapige manɛ baa wogo wolo na pye saraga nizogoŋɔ Tɛhɛnɛ Baa Kilɛ mu. Caŋa bɛɛri ɲisɔɔgɔ na ma da ba kee wo. 14 Ɲisɔɔgɔ bɛɛri mʼa myɛ saraga efa taaga gbaara wogo fara kee na, ni sìnmɛ ɛnb ɲii taaga taanri wogo, na kee fara myɛ saraga ki na. Kee ɲɛ Tɛhɛnɛ Baa Kilɛ wo myɛ saraga ke. Yi na ba pee saliyaa pu koo ɲaari fo gbee. 15 Ɲisɔɔgɔ bɛɛri dubyapige kʼa da wolo, ni myɛ saraga ke, ni sìnmɛ pe, na pye saraga nizogoŋɔ kemu na da wo fo gbee ge.»
Ɲuŋɔfɔɔ wu jalaa pu wo cɛn taa
16 Ayiwa, yemu Tɛhɛnɛ Baa Kilɛ wa yu ge, yee yi wa mɛ: «Ɲuŋɔfɔɔ wu bu wu wo taa ɲiŋɛ ka kɔn na kan wu ja wa mu, kee ɲiŋɛ ke na ɲɛri na pye wee ja wu wo cɛn. Wu jalaa pu na ba kee ta, kʼa bye pu wo cɛn taa. 17 Ga wu bu wu taa ɲiŋɛ ka kɔn na kan wu wo kapyebye wa mu, ki na bye wee kapyebye we wogo, fo na shɛ nɔ ɲuwuuro ti wo yeec li na. Ɲuwuuro ti wo yee li ba nɔ, kʼa guri pye ɲuŋɔfɔɔ wu wogo. Lee funŋɔ ni wu taa ɲiŋɛ ki ma bye wu jalaa pu yɛ wogo. 18 Ɲuŋɔfɔɔ wu ganha ga sipya wa shishiin wo ɲiŋɛ taa lɔ sipyiire ti ni wɛ. Wu ganha ga wa wo taa ɲiŋɛ shɔ wu na wɛ. Ɲiŋɛ kemu wu da ba gaan wu jalaa pu mu ge, wu da kee kɔɔn wu wo ɲiŋɛ taa li na, kɔnhɔ nɛ wo sipyii pu ganha bu ba jaaga di lii lii pu ɲiŋɛ cɛn tahaa ki na wɛ.»
Kilɛ-pɛɛŋɛ pugbɔhɔ ki wo tashɔhɔyɔ ye
19 Ayiwa lee kadugo na, kuɲɔɔ lemu ki wa suumɔ kulo kacɛ ki na, tajege ki ɲɔ na ge, a ná wu gari wá ni nɛ ni saraya ɲaha shɔɔnrivɛɛ pu wo fɛfɛɛrɛ piyɛyɛ yi ni. A nɛ xuu wa ɲa wà caŋatomɔ kacɛ ki na, funŋɔ ki ni. 20 A wu nɛ pye: «We xuu we ni saraya ɲaha shɔɔnrivɛɛ pʼa da ba yaaŋa ki wo saraya ye, ni jurumu yafa wo saraya yi sori. Wà pʼa da ba myɛ saraya yi bɛ sori, kɔnhɔ pu ganha ba fòro ni yi ni kpɛɛngɛ ki wo kaaŋa ki ni wɛ. Lee funŋɔ ni sipyiire ti da da gbɔɔn yi na, yʼi da pu pyi fɛfɛɛrɛ wuu wɛd. 21 Lee kadugo na, a wu gari ni nɛ ni kpɛɛngɛ ki wo kaaŋa ki ni, na gari ni nɛ ni kaaŋa ki guzheŋɛɛ shishɛɛrɛ wu na. Kaaŋa ki gozhii la bɛɛri li bye ni kadaana la ni. 22 Kaaŋa ki guzheŋɛɛ shishɛɛrɛ wu bɛɛri wu bye ni kadaanŋaa nifɛnhɛfɛnhɛŋɛɛ ni, kiimu wo ɲuɲɔ wʼa tɔ tɔ ge. Kee kadaanŋaa ki wo ɲidahaa ki bye keŋɛ ɲìi kɛlɛɛ shishɛɛrɛ (40), ki kadahaa kʼi ɲɛ keŋɛ ɲìi kɛlɛɛ taanri (30). Kadaanŋaa shishɛɛrɛ wu bɛɛri wo ɲuŋɔkaŋaa ki bye nigin guzheŋɛɛ ki na. 23 Kadaana la bɛɛri pʼa faaya kasɔrɔgɔ taga li kuuri. A pʼi kpɔnhɔɔ kii sin sin yee kasɔrɔyɔ yi fɛrɛɛ ki ni na yi maha. 24 A ná wu nɛ pye: «Tashɔhɔyɔ yi wa ye, piimu pʼa kapyeŋɛɛ pyi Kilɛ-pɛɛŋɛ pugbɔhɔ ki ni ge, we xuu we ni pee wa da ba sipyiire ti wo saraya xaara ti sori.»