Tɛhɛnɛ Baa Kilɛ wo taa ɲiŋɛ ke
45
«Ayiwa, yi ba da zhɛ kagaanshaan li pye yʼi fiige ki taa sipyiire ti na tuun wemu ni, yʼi ɲiŋɛ ka yaha nɛ Tɛhɛnɛ Baa Kilɛ yahama ni. Kee wo ɲidaa li na ba bye keŋɛ ɲìi kabɔfoŋɔɔ kɛlɛɛ shuun ni kaguro (25.000), ki kadaa lʼi bye keŋɛ ɲìi kabɔfoŋɔɔ kɛ (10.000). Kee ɲiŋɛ ki na ba bye fɛfɛɛrɛ wogo ki tɛhɛŋɛɛ ki bɛɛri na. 2 Yʼi xuu wa taanna kee ɲiŋɛ ki na fɛfɛɛrɛ xuu wu mɛgɛ na, wee xuu wu ɲidaa di bye keŋɛ ɲìi xhuu kaguro (500), wu kadaa li bɛ di bye keŋɛ ɲìi xhuu kaguro (500). Yʼi keŋɛ ɲìi kɛlɛɛ kaguro (50) tafaga ka taanna taga ki maha círi. 3 Kee ɲiŋɛ kemu yʼa yaha ni ki ɲidaa li wa keŋɛ ɲìi kabɔfoŋɔɔ kɛlɛɛ shuun ni kaguro (25.000), ki kadaa lʼi ɲɛ keŋɛ ɲìi kabɔfoŋɔɔ kɛ (10.000) wu ge, yʼi xuu wa taanna kee na, pu na ba fɛfɛɛrɛ xuu wu yereŋɛ wee xuu wu ni, fɛfɛɛrɛ ti bɛɛri wo fɛfɛɛrɛ xuu we. 4 Kee ɲiŋɛ ki na ba bye fɛfɛɛrɛ wogo, kemu ya yaha ki yɛ saraya ɲaha shɔɔnrivɛɛ pu mɛgɛ na, fɛfɛɛrɛ puga ki wo kapyebyii pee, pee piimu pʼa yeree Tɛhɛnɛ Baa Kilɛ ɲaha tàan, na labye pyi wu mu ge. Pu na ba pu wo piyɛyɛ yi kɔn wà, na xuu wa bɛ yaha wà Tɛhɛnɛ Baa Kilɛ yahama ni, fɛfɛɛrɛ xuu wu kaa na.5 Ɲiŋɛ kabɛtii di daanna, ki wo ɲidaa lʼi bye keŋɛ ɲìi kabɔfoŋɔɔ kɛlɛɛ shuun ni kaguro (25.000), ki kadaa lʼi bye keŋɛ ɲìi kabɔfoŋɔɔ kɛ (10.000), ke na bye Levi wo tirige shɛɛn pu wo taa, pee piimu pʼa labye pyi Kilɛ-pɛɛŋɛ pugbɔhɔ ki funŋɔ ni ge, ni pupyaa kɛlɛɛ shuun (20).
6 Ayiwa, yʼi xuu wa bɛ taanna wu ɲidaa di bye keŋɛ ɲìi kabɔfoŋɔɔ kɛlɛɛ shuun ni kaguro (25.000), wu kadaa lʼi bye keŋɛ ɲìi kabɔfoŋɔɔ kaguro (5.000) fɛfɛɛrɛ xuu wu kabanugo, wee di ba bye Izirayɛli puga ki bɛɛri wo.
7 Ayiwa, ɲuŋɔfɔɔ wu wi ge, yʼi ɲiŋɛ tɛyɛ shuun kan wu mu. Na lɔ fɛfɛɛrɛ ɲiŋɛ ki na kulo li caŋatomɔ pu ni, fo na shɛ nɔ suumɔ lɔhɔ ki na, kee di bye teŋɛ ka. Na lɔ fɛfɛɛrɛ ɲiŋɛ ki na kulo li Kilɛ-nɔhɔ ki na, na gari fo na shɛ nɔ Izirayɛli ɲiŋɛ ki tɛhɛnɛ li na Kilɛ-nɔhɔ kacɛ ki na, kee bɛ di bye teŋɛ ka. Ɲuŋɔfɔɔ wu wo ɲiŋɛ ki tɛhɛŋɛɛ kʼa yaa na saha ni Izirayɛli nagoo pu wo ɲiŋɛ tahaa ki tɛhɛŋɛɛ ni. 8 Kee na ba bye ɲuŋɔfɔɔ wu wo taa ɲiŋɛ Izirayɛli fiige ki ni. Nɛ wo ɲuŋɔfɛɛ pu da ba dun nige Izirayɛli nagoo pu na wɛ. Pu na ba fiige ki yaha Izirayɛli nagoo pu mu, wa bɛɛri ni wu wo taa.»
Ɲuŋɔfɔɔ wu wo nibyii
9 Ayiwa, yemu Tɛhɛnɛ Baa Kilɛ wa yu ge, yee yi wa mɛ: «Yee Izirayɛli fiige ki ɲuŋɔfɛɛ pee, yee wuu lʼa kasa ye dɛ! Yi kafupege ke, ni sipyiire ti wo kanhama keree ki ɲɔ yereŋɛ, yʼi da ɲaari can ni tiimɛ ni. Yi ganha ba na sipyii pu yaŋmuyɔ yi shuu nige pu na wɛ. Kafɔɔ Tɛhɛnɛ Baa Kilɛ ɲɔjomɔ pi.
10 «Yee wo daanna yɛrɛyɛ yʼa yaa na fa. Yee efaa wʼa yaa na fa, yee bafu wʼa yaa na fab. 11 Efa we ni bafuc wu bɛɛri ya yaa na pye nigin: Bafu wʼa yaa na pye omɛrid wu taaga kɛ wogo, efa wu bɛ di bye omɛri wu taaga kɛ wogo. Yee yataanya yi ɲuŋɔkana ya yaa na saha ni omɛri wu ni. 12 Sikili wu na ba bye geraa kɛlɛɛ shuun (20). Mini wu na bye sikilee kɛlɛɛ gbaara (60).
13 «Yee ya yaa na yi keŋɛ yaŋmuyɔ yi wo na gaan Tɛhɛnɛ Baa Kilɛ mu kangana lemu na ge, lee li wa mɛ: Myɛ omɛri ɲii nigin bɛɛri, yi ma efa taaga gbaara wogo wolo pee myɛ pe ni, ɔrijɛ omɛri ɲii bɛɛri, yi ma efa taaga gbaara wogo wolo wee ɔrijɛ we ni, na yee kan Tɛhɛnɛ Baa Kilɛ mu. 14 Pu bu bye sìnmɛ, yʼi pee taanna bafu wu ni. Kɔri ɲii nigin bɛɛri, ma na jo omɛri ɲii nigin bɛɛri, yʼi bafu wu taaga kɛ wogo lɔ, bani bafu ɲìi kɛ wu ɲɛ omɛri ɲii nigin. 15 Dubyaa xhuu shuun (200) bɛɛri kelee sikaa xhuu shuun (200) bɛɛri, yʼi yatɔɔgɔ nigin co yee ni Izirayɛli wo yatɔɔgbaya yi ni, kee di bye ma yakanga, kelee saraga nizogoŋɔ, kelee ɲaɲiŋɛ saraga, kɔnhɔ yi wo jurumu wu yafa yi mu. Kafɔɔ Tɛhɛnɛ Baa Kilɛ ɲɔjomɔ pi.
16 «Fiige ki shɛɛn pu bɛɛri ya yaa na yee yaŋmuyɔ yi wo na gaan Izirayɛli fiige ki ɲuŋɔfɔɔ wu mu. 17 Izirayɛli fiige ki ɲuŋɔfɔɔ we wu da ba saraya nizogoyo ye, ni myɛ saraya ye, ni saraya niwoyo yi ɲaha shɔɔnri kaleŋɛɛ kee, ni yevorovoyo yi ni, ni cadɛɛnyɛ ye, ni Izirayɛli puga ki wo kaleŋɛɛ ki wo pinnɛrɛ ti bɛɛri ni. Wu na ba jurumu yafa wo saraya yi wo, ni myɛ saraya ye, ni saraya nizogoyo ye, ni ɲaɲiŋɛ saraya ye, kɔnhɔ Izirayɛli wo puga ki wo jurumu wu yafa pu mu.»
Kaleŋɛɛ kii wo kodorogoo
18 Ayiwa, yemu Kafɔɔ Kilɛ wa yu ge, yee yi wa mɛ: «Yeŋɛ nizhiige ki wo cazhiige ke, mʼa nupee nigin co lemu ɲɛ manɛ baa ge, mʼa fɛfɛɛrɛ xuu wu pye fɛɛfɛɛ. 19 Saraya ɲaha shɔɔnrivɔɔ wu jurumu yafa wo saraga ki shishan pa lɔ, wu pa fara fara Kilɛ-pɛɛŋɛ pugbɔhɔ ki wo gbeetiriye yi na, ni saraya yi tawologo ki serege ki guzheŋɛɛ shishɛɛrɛ we, ni funŋɔ ki wo kaaŋa ki wo tajeye yi wo gbeetiriye yi na. 20 Sipya wa bu jurumu pye, na ta wu ya li ɲɔ wolo li kaa na, na wu pye wɛ, wu di ya li cɛ bɛ na li pye wɛ, mʼa ye saraya ye ninuyɔ wolo weefɔɔ mu, yeŋɛ ki cabyaa gbarashuun wu na. Lee pyegana li na ma da ba Kilɛ-pɛɛŋɛ pugbɔhɔ ki pyi fɛɛfɛɛ.
21 «Yi na ba Ɲuwuuro Kalenɛ li pye yeŋɛ nizhiige ki wo cabyaa kɛ ni shishɛɛrɛ wu na. Cabyaa gbarashuun kalenɛ li wa. Yi na ba shizhɛnhɛrɛ baa buuri li. 22 Fiige ki ɲuŋɔfɔɔ wu na ba nupee nigin wolo na pye jurumu yafa wo saraga kee caŋa, wuyɛ pyaa ni fiige ki shɛɛn pu bɛɛri wuu na. 23 Kalenɛ li wo cabyaa gbarashuun wu funŋɔ ni, caŋa caŋa ɲuŋɔfɔɔ wu na ba nupɛhɛɛ gbarashuun ni dubyapee gbarashuun manɛ baa woyo wolo na pye saraga nizogoŋɔ Tɛhɛnɛ Baa Kilɛ mu. Caŋa caŋa wʼa sikapoo nigin wolo na pye jurumu yafa wo saraga. 24 Saraga nupee la bɛɛri, ni saraga dubyapoo wa bɛɛri, wʼa saraga myɛ efae ɲii nigin taha yi bɛɛri nigin nigin wu na, ni sìnmɛ ɛnf ɲii nigin. 25 Yee li yeŋɛ gbarashuun wogo ki wo cabyaa kɛ ni kaguro wu caŋa ki wo kalenɛ li ni, ɲuŋɔfɔɔ wu na ba ye saraya ye ninuyɔ wolo, fo na shɛ da cabyaa gbarashuun: Jurumu yafa wo saraga ke, ni saraga nizogoŋɔ ke, ni myɛ saraga ke, ni sìnmɛ saraga niwoŋɔ ke.»