Tajege kemu ya gbegele yaha ɲuŋɔfɔɔ wu mɛgɛ na ge
44
Ayiwa lee kadugo na, a ná wu gari ni nɛ ni Kilɛ-pɛɛŋɛ pugbɔhɔ ki kpɛɛngɛ ki wo tajege ki yíri. Kee tajege ki bi foro to Kilɛ-nɔhɔ ki na. Ki nidɔŋɔ ki bye. 2 A Tɛhɛnɛ Baa Kilɛ di nɛ pye: «Ke tajege ke ɲɔ na ba dɔ yaha, ki da ga mugi wɛ, sipya bɛ da ga doro ki ni wɛ, bani kee ni Tɛhɛnɛ Baa Kilɛ, Izirayɛli wo Kilɛ wʼa jé. Ki na ba dɔ yaha. 3 Ɲuŋɔfɔɔ wu wi ge, wee yɛ nigin pe wu da ba já diin wà wu buuri wu li Tɛhɛnɛ Baa Kilɛ ɲaha tàan. Wu na ba jé kee tajege ki wo kpaan li ni, na ba guri foro lee koo le ninunɔ ni.Kilɛ ɲìi fyaara baa fɛɛ da ba jin Kilɛ-pɛɛŋɛ pugbɔhɔ ki ni wɛ
4 Ayiwa lee kadugo na, a ná wu gari ni nɛ ni suumɔ kulo kacɛ ki wo tajege ki yíri Kilɛ-pɛɛŋɛ pugbɔhɔ ki ɲahagbaa li na. A nɛ wii na Tɛhɛnɛ Baa Kilɛ wo nɔɔrɔ wu ɲa wʼa Tɛhɛnɛ Baa Kilɛ wo puga ki ɲi. A nɛ do na ɲaha ke buri ɲiŋɛ ke na. 5 A Tɛhɛnɛ Baa Kilɛ di nɛ pye: «Sipyiyawyii, kasɛɛgɛ deele shan! Ta wii ni ma ɲìi ki ni, ma da nuri ni ma ɲuwegee ki ni. Tuduro temu bɛɛri ni saliyaa piimu bɛɛri nʼa da ba jo ma mu Kilɛ-pɛɛŋɛ pugbɔhɔ ki shizhaa na ge, kasɛɛgɛ yaha yee na xuuni. Kilɛ-pɛɛŋɛ pugbɔhɔ ki jevɛɛ pʼa yaa na jin jegana lemu na, na fòro forogana lemu na ge, kasɛɛgɛ yaha lee na fo xuuni. 6 Mʼa yi jo nʼa she fɛɛ pu mu, Izirayɛli wo puga ke na yemu Kafɔɔ Kilɛ wʼa yu ge, na yee yi wa mɛ: ‹Yee Izirayɛli nagoo, yee tanhaŋa keree ki bɛɛri kʼa kasa ye! 7 Yee ya nabuun leŋɛ nɛ wo fɛfɛɛrɛ xuu wu ni, nabuun piimu pu ɲɛ cekɔnbaalaa pu zɔlɔɔ pu na, na ɲɛ cekɔnbaalaa pu cere ti bɛ ni ge, na nɛ puga ki nɔhɔ. Yee ya lee pye yi wo buuri we, ni saraga sìnmɛ xaara te ni shishan pu kanduun wu ni. Yee ya yi wo tanhaŋa keree ki taga nɛ ni yi wo kariɲɛɛgɛ ɲɔmɛɛ li kyɛɛgi. 8 Yeeyɛ pyaa ya ta nɛ wo fɛfɛɛrɛ ti wo kapyeŋɛɛ ki pye wɛ, ga na pii nabuun pii pye pʼa ki pye yi tɛgɛ nɛ wo fɛfɛɛrɛ xuu wu ni.›
9 Ayiwa, yemu nɛ wa yu ge, nɛ Kafɔɔ Kilɛ, yee yi wa mɛ: ‹Nabun bɛɛri wu ɲɛ cekɔnbaa wu zɔ wu na, na ɲɛ cekɔnbaa wu cere ti bɛ ni ge, wee wa shishiin da ga jé nɛ wo fɛfɛɛrɛ xuu wu ni wɛ, ali wu mɛhɛ bi ɲɛ tiinnɛ na Izirayɛli nagoo pu tɛ bɛ.› »
Levi wo tirige shɛɛn pu wo kodorogoo
10 «Tuun wemu ni Izirayɛli nagoo pʼa laraga kɔn nɛ na, na zhe nɛ ni, na daha pu yapɛrɛɛ ki fɛni ge, Levi wu tirige shɛɛn piimu bɛ pʼa bi laraga kɔn nɛ na ge, pee wo nahama pu wo jaagi kanhama pu na ba do pee ɲuŋɔ ni. 11 Pu na ba bye nɛ wo fɛfɛɛrɛ puga ki wo kapyebyii, na ganha na Kilɛ-pɛɛŋɛ pugbɔhɔ ki wo tajeye yi kasɛɛgɛ pyi. Pu na ba kapyeŋɛɛ pyi Kilɛ-pɛɛŋɛ pugbɔhɔ ki ni. Pu na ba sipyiire ti wo saraya nizogoyo ye, ni saraya yisaya xuli sipyiire ti mu. Pu na ba yeree sipyiire ti ɲahagbaa na, na kapyeŋɛɛ pyi ti mu. 12 Ga ma na jo pʼa kapyeŋɛɛ pye pu yapɛrɛɛ ki mu, na bye kuruŋɔ kuruŋɔ kagereŋɛ Izirayɛli wo puga ki mu, na Izirayɛli nagoo pu pye pʼa nahana, nɛ kàa pu mu ni na keŋɛ ki yirige wu ni, Kafɔɔ Tɛhɛnɛ Baa Kilɛ ɲɔjomɔ pi, jo pu wo nahama pu jaagi kanhama pu na ba do pu ɲuŋɔ ni. 13 Pu da ba fuloo nige nɛ na da saraya wo da gaan nɛ mu wɛ, yaaga tuugo bɛɛri kʼa yaha nɛ yahama ni, kelee yaaga bɛɛri ki ɲɛ fɛfɛɛrɛ wogo ge, pu da ba fuloo nige kee ka shishiin na wɛ. Tanhaŋa keree ni shiige keree kiimu pʼa pye ge, kee na ba do pu ɲuŋɔ ni. 14 Labye wemu yɛ nʼa da ba gan pu mu ge, wee wu ɲɛ mɛ na Kilɛ-pɛɛŋɛ pugbɔhɔ ki kasɛɛgɛ pyi, na ki funŋɔ labye nifɛnhɛfɛnhɛŋɛɛ ki yɛ pyi.»
Saraya ɲaha shɔɔnrivɛɛ pu wo kodorogoo
15 «Ga tuun wemu ni Izirayɛli nagoo pʼa bi laraga kɔn nɛ na ge, saraya ɲaha shɔɔnrivɛɛ piimu pu bi nɛ wo fɛfɛɛrɛ xuu wu wo labye wu pyi wee tuun wu ni, ni pee ɲɛ Levi wo tirige shɛɛn pee na foro Sadɔki wo kpuun li na ge, pee pʼa da ba yeree nɛ ɲaha tàan, na saraya ɲaha shɔɔnrivɛɛrɛ ti wo kapyeŋɛɛ ki pyi. Pu na ba yeree nɛ ɲaha tàan na sìnmɛ xaara te ni shishan pu wo na gaan nɛ mu, Kafɔɔ Tɛhɛnɛ Baa Kilɛ ɲɔjomɔ pi. 16 Pee yɛ pu da ba jin nɛ wo fɛfɛɛrɛ xuu wu ni. Pee yɛ pu da ba yeree nɛ wo tabali wu ɲaha tàan, na kapyeŋɛɛ pyi nɛ mu, na kasɛɛgɛ yaha wee labye wu wo kodorogoo ki na. 17 Pu ba ba nɔ Kilɛ-pɛɛŋɛ pugbɔhɔ ki funŋɔ ki wo kaaŋa ki tajeye yi na, pu na lɛn fàya yi le. Pu ba da labye ɲɔ kɔn da byi funŋɔ ki wo kaaŋa ki tajeye ye ni Kilɛ-pɛɛŋɛ pugbɔhɔ ki funŋɔ ni, dubya shiire fàya ya yaa na ɲa pu na wɛ. 18 Pu na ba lɛn fàya ɲumiginɛ taga pu ɲuyɔ yi migile, na lɛn fàya kulushiilee le le. Pu ganha bu kiriye taga puyɛ pɔ wɛ, kɔnhɔ pu ganha ba funni wɛ. 19 Pu ba da da fòro da se sipyiire ti yìri kpɛɛngɛ ki wo kaaŋa ki ni, fàya yemu ni pu bi labye wu pyi ge, pʼi yee wolo, pʼi yi yaha fɛfɛɛrɛ xuu wu wo piyɛyɛ yi ni, kɔnhɔ pu ganha bu shɛ sipyiire ti bɛ pyi fɛfɛɛrɛa wuu ni yee faya yi ni wɛ. Pu na fàya yatii le na da foro na se sipyiire ti yíri. 20 Pu ganha ba pu ɲuyɔ yi xuri da byi ɲuŋmahaa wɛ, pʼi ganha ba pu ɲuzhiire ti bɛ yari tʼa dɔɔngi tiyɛ mu wɛ, ga pʼa yaa na ɲuzhiire ti kɔɔn. 21 Saraya ɲaha shɔɔnrivɔɔ wa bɛɛri ba da jé Kilɛ-pɛɛŋɛ pugbɔhɔ ki funŋɔ ki wo kaaŋa ki ni, wu ganha bu duvɛn gba wɛ. 22 Wa bɛɛri ba da cee lɔ pu ni, wufɔɔ ganha bu naxhugoshɔ lɔ wɛ, wu ganha bu ceforogo lɔ wɛ, ga wu doɲiŋɛ pushɔ nacɛbaa wa lɔ na foro Izirayɛli wo puga ki wo pushaa pu ni. Saraya ɲaha shɔɔnrivɔɔ wa bu xhu na wu wo shɔ yaha, saraya ɲaha shɔɔnrivɔɔ watii na já wee naxhugoshɔ wu lɔ. 23 Yaaga kemu ya yaha Tɛhɛnɛ Baa Kilɛ yahama ni, ni yaaga kemu ɲɛ tanhaŋa yaaga ge, pu na ba nɛ wo sipyii pu kalaa, kɔnhɔ pʼi yee cɛ shɔɔnri yiyɛ ni. Yaaga kemu ɲɛ fɛfɛɛrɛ wogo ni kemu ɲɛ fɛfɛɛrɛ baa wogo ge, pʼi yee bɛ cɛ shɔɔnri yiyɛ ni. 24 Pu ba da kiiri kɔn, pʼi wu kɔn ni tiimɛ ni, na saha ni nɛ wo kodorogoo ki ni. Pʼi kasɛɛgɛ yaha nɛ wo saliyaa pee ni nɛ wo ɲɔmɛjogoo ki bɛ na, pu kaleŋɛɛ ki bɛɛri ni, pʼi nɛ wo cadɛɛnyɛ yi pye fɛfɛɛrɛ caya. 25 Saraya ɲaha shɔɔnrivɔɔ ganha ga fulo gbo na wɛ, kɔnhɔ wu ganha bu wuyɛ le fɛfɛɛrɛ baara ni wɛ. Xuu piimu yɛ na wu da já da fuloo ge, pee pu wa mɛ: wu to bu xhu, kelee wu nu, kelee wu ja, kelee wu poro pushɔ, kelee wu ceborona, kelee wu ceboroshɔ wemu wu bye gbaga jé baa ge. 26 Lee kadugo na, wu wuyɛ pye fɛɛfɛɛ, wu cabyaa gbarashuun pye, wu na wu labye wu ɲɔ kɔn. 27 Wu ba da jé caŋa kemu fɛfɛɛrɛ xuu wu ni funŋɔ ki wo kaaŋa ki ni, di wu labye wu ɲɔ kɔn fɛfɛɛrɛ xuu wu ni, wu wu wo jurumu yafa wo saraga ki wolo, Kafɔɔ Tɛhɛnɛ Baa Kilɛ ɲɔjomɔ pi.
28 Ayiwa, saraya ɲaha shɔɔnrivɛɛ pu wo cɛn we, wee ɲɛ nɛ. Yi ganha bu taa kan pu mu Izirayɛli fiige ki ni wɛ. Nɛ wu ɲɛ pu wo taa le. 29 Pu na ba puyɛ ɲɔ shaa ni myɛ wo saraya yi ni, ni jurumu yafa wo saraya ye, ni yaaŋa ki wo saraya ye, ni yaaga kemu bɛɛri kʼa yaha Tɛhɛnɛ Baa Kilɛ yahama ni ge, yee na ba bye pu woyo. 30 Yi yapyiire nizhiire ti bɛɛri wo nizhiire te, ni yi yakanya yemu bɛɛri yʼa wo na gaan Tɛhɛnɛ Baa Kilɛ mu ge, yee bɛɛri na ba bye saraya ɲaha shɔɔnrivɛɛ pu woyo. Yi na ba yi myɛ pu bɛɛri wo nijemɛ pu kaan pu mu, kɔnhɔ duba di digi yi puga ki na. 31 Yaaga kemu bɛɛri ya xu kiyɛ ni, kelee yacoŋɔ na ki co ge, kʼa pye shazhiga la, kʼa pye naŋa yaaga la, saraya ɲaha shɔɔnrivɔɔ ganha ga kee ka xa wɛ.»