Kilɛ wo nɔɔrɔ wʼa kuri pa Kilɛ-pɛɛŋɛ pugbɔhɔ ki ni
43
Ayiwa lee kadugo na, a ná wu gari ni nɛ ni Kilɛ-nɔhɔ ki wo tajege ki ni. 2 A nɛ Izirayɛli wo Kilɛ wu wo nɔɔrɔ wu ɲa wu na ma na yìri Kilɛ-nɔhɔ ki na. Wu mujuu li bye ba logbɔhɔyɔ foo ɲɛ wɛ. Wu nɔɔrɔ wu bi kpɛɛngɛ yeege ɲiŋɛ ki na. 3 Kashɛɛ lemu nɛ ɲaa ge, ni lemu nɛ bi ɲa, na paduun wu ni di ba kulo li ja wu jo, ni nɛ bi lemu ɲa ma na yaha Kebari Gba wu ɲɔ ki na ge, kee bɛɛri ɲɛ nigin. Wee tuun wu ni, a nɛ do, na ɲaha ke buri ɲiŋɛ ki na.4 A Tɛhɛnɛ Baa Kilɛ wo nɔɔrɔ wu ba na pa jé Kilɛ-pɛɛŋɛ pugbɔhɔ ki ni, Kilɛ-nɔhɔ ki wo tajege ki ni. 5 Ayiwa, a Kilɛ Munaa lʼi nɛ lɔ na kari funŋɔ ki wo kaaŋa ki ni. A nɛ Tɛhɛnɛ Baa Kilɛ wo nɔɔrɔ wu ɲa wʼa Kilɛ-pɛɛŋɛ pugbɔhɔ ki ɲi. 6 A nɛ mujuu la logo na foro Kilɛ-pɛɛŋɛ pugbɔhɔ ki ni, lee di ná wu niyerege ta nɛ tàan. 7 A lee mujuu lʼi nɛ pye: «Sipyiyawyii, we xuu we wu ɲɛ nɛ wo saanra koro le, nɛ wo tɔɔyɔ yi tatahaŋa ke. Nɛ na ba diin yaha we xuu we ni, fo gbee Izirayɛli nagoo pu niŋɛ ni. Izirayɛli wo puga ke, ni wu saannaa pu da ba nɛ wo fɛfɛɛrɛ mɛgɛ ki nɔrɔgɔ nige ni pu wo dɔdɔɔrɔ keree kee, ni pu saannaa pu nixhuyo ni faaboboyo yi fugba wu ni wɛ. 8 Pʼa pu piyɛyɛ yi kuɲɔweye yi yaha yaha nɛ wo puga ki wo kuɲɔwege ki tàan, na pu gburaya yi yaha yaha nɛ wo puga ki wo gburaya yi tàan, a kasɔrɔgɔ nigin yɛ di bye nɛ ni pu tɛ ni. A pʼi nɛ fɛfɛɛrɛ mɛgɛ ki nɔhɔ lee funŋɔ ni ni pu wo tanhaŋa keree ki ni, kee kiimu pʼa pye ge. Lee wuu na nɛ pu ɲuŋɔ tugo na wo loyire li funŋɔ ni. 9 Ga nimɛ kunni, pu na ba pu dɔdɔɔrɔ te, ni pu saannaa pu nixhuyo yi sanha liigi na na, nɛ ma gori yaha pu niŋɛ ni fo gbee.
10 «Ayiwa, sipyiyawyii, Kilɛ-pɛɛŋɛ pugbɔhɔ ki keree jo Izirayɛli wo puga ki mu, kɔnhɔ pu jurumu wu pu shiige, pʼi ke Kilɛ-pɛɛŋɛ puga ke kemɛ sɛɛri. 11 Katiibaagaa kiimu bɛɛri pʼa pye ge, kee bu pu shiige, wee tuun wu ni mʼa ke Kilɛ-pɛɛŋɛ puga ke keree bɛɛri jo pu mu. Ki yereŋɛgana le, ni ki tajeye ye, ni ki taforoyo ye. Mʼa ki saliyaa pee, ni ki kodorogoo ki ka pu ɲii na ma kan pu mu, kɔnhɔ pʼi kasɛɛgɛ yaha yi bɛɛri na, pʼi da ɲaari pʼa sahaŋi ni yee ni. 12 Wemu wu ɲɛ Kilɛ-pɛɛŋɛ pugbɔhɔ ki wo saliya wu ge, wee wu ɲɛ we: Ki mahama pu kpɛɛngɛ ki bɛɛri ya yaa na yaha Tɛhɛnɛ Baa Kilɛ yahama ni faaboboŋɔ ki fugba wu ni. Wee wu ɲɛ Kilɛ-pɛɛŋɛ pugbɔhɔ ki wo saliya we.»
Saraya tawologo ke, ni saraya ye
13 Ayiwa, saraya tawologo ki wo daanna wu we, wee daanna wu wo keŋɛ ɲii li bi tɔnnɔ keŋɛ ɲii nidiinɛ li na ni sibiri ɲii nigin ni. Wege kemu ni saraya yi tawologo ki wo serege kʼa sin ge, kee wege ki jogi wu bye keŋɛ ɲii nigin, ki pɛɛrɛ ti bɛ di ɲɛ keŋɛ ɲii nigin. Ki ɲɔgoŋɔ ki ɲɛ sibiri ɲii nigin. Pee pʼa pye saraya tawologo ki nɔhɔshanma pe. 14 Na lɔ serege ki na, ɲiŋɛ ki na, fo na shɛ nɔ niŋɛ ki wo serege ki na, kee wo ɲuŋɔkana li bye keŋɛ ɲìi shuun, ki kadaa lʼi ɲɛ keŋɛ ɲii nigin. Na lɔ wà niŋɛ ki wo serege ki na fo na shɛ nɔ fugba wu ni, kee serege ki wo ɲuŋɔkana li bye keŋɛ ɲìi shishɛɛrɛ, ki kadaa lʼi ɲɛ keŋɛ ɲii nigin. 15 Na da kpɔnhɔɔ ki yàa kee fugba ni, kpɔnhɔɔ ki wo ɲuŋɔkana li bye keŋɛ ɲìi shishɛɛrɛ, na yeŋɛɛ shishɛɛrɛ yàa ki na. 16 Kpɔnhɔɔ ki ɲidaa li bye keŋɛ ɲìi kɛ ni shuun, ki kadaa li bɛ di ɲɛ keŋɛ ɲìi kɛ ni shuun. Ki kabanuyo shishɛɛrɛ wu bɛɛri wu bye nigin. 17 Saraya tawologo ki serege ki ɲidaa li bye keŋɛ ɲìi kɛ ni shishɛɛrɛ, ki kadaa li bɛ di ɲɛ keŋɛ ɲìi kɛ ni shishɛɛrɛ. Ki kabanuyo shishɛɛrɛ wu bɛɛri wu bye nigin. Ɲɔgoŋɔ kemu ki bi ki maha círi ge, kee wo kadaa li bye keŋɛ ɲii taaga. Wege kemu ki bi maha círi ge, kee wo jogi wu ɲɛ keŋɛ ɲii nigin. Ki taduguŋɔ ki bye Kilɛ-nɔhɔ ki na.»
18 Ayiwa, a ná wu nɛ pye: «Sipyiyawyii, yemu Kafɔɔ Kilɛ wʼa yu ge, yee yi wa mɛ: ‹Saraya tawologo ki ba ba yàa caŋa kemu, pʼi da saraya nizogoyo yi wo ki na, pʼi da saraya yi shishan pu ɲɛrɛgi ɲɛrɛgi ki na, lee na ba byi pyegana lemu na ge, lee li wa mɛ: 19 Levi wo tirige shɛɛn saraya ɲaha shɔɔnrivɛɛ piimu pu ɲɛ Sadɔki wo kpuun li shɛɛn pee, na saraya ɲaha shɔɔnrivɛɛrɛ ti wo kapyeŋɛɛ ki pyi nɛ mu ge, Kafɔɔ Tɛhɛnɛ Baa Kilɛ ɲɔjomɔ pi, nupepinŋɛ nigin ma da gan pee mu na pye jurumu yafa wo saraga. 20 Mʼa kee saraga ki wo shishan pa lɔ, mʼa pee fara saraya yi tawologo ki yeŋɛɛ shishɛɛrɛ wu na, ni serege ki guzheŋɛɛ shishɛɛrɛ we, ni ki maha maha ɲɔgoŋɔ ke. Lee funŋɔ ni ma da ki wo jurumu yafa wu wo yaaŋa ki pye, na ki pye fɛɛfɛɛ. 21 Lee kadugo na, mʼa lee jurumu yafa saraga nupee li lɔ laha fɛfɛɛrɛ xuu wu ni, pʼi shɛ li sorogo Kilɛ-pɛɛŋɛ pugbɔhɔ ki wo xuu wa ni, wee wemu ya gbegele yaha lee mɛgɛ na ge. 22 Caŋa shuun wogo ki na, mʼa sikapoo manɛ baa wo nigin co, mʼa wee bɛ pye jurumu yafa wo saraga, kɔnhɔ saraya tawologo kʼi bye fɛɛfɛɛ ma na jo ba pʼa nupee li taga ki pye fɛɛfɛɛ pyegana lemu na wɛ. 23 Ma bu yee jurumu yafa wo saraya yi wolo xɔ tuun wemu ni, mʼa manɛ baa wo nupee nigin ni manɛ baa wo dubyapoo nigin co yapɔrɔyɔ yi ni, mʼa yee kan Kilɛ mu. 24 Ma ba ni yi ni Tɛhɛnɛ Baa Kilɛ ɲaha tàan. Saraya ɲaha shɔɔnrivɛɛ pʼi ba suumɔ wo yi na, pʼi yi wolo saraga nizogoyo Tɛhɛnɛ Baa Kilɛ mu. 25 Ɲiga bɛɛri, mʼa sikapoo nigin wolo na pye jurumu yafa wo saraga, fo na shɛ da cabyaa gbarashuun. Mʼa nupee nigin ni dubyapoo nigin co yapɔrɔyɔ yi ni, yi shuun wu bɛɛri di bye manɛ baa woyo, mʼa yee bɛ pye saraga. 26 Yi na ba saraya yi tawologo ki pye fɛɛfɛɛ, fo na shɛ da cabyaa gbarashuun. Yi na ba ki pye fɛɛfɛɛ, na ki yaha nɛ Tɛhɛnɛ Baa Kilɛ yahama ni. 27 Kee cabyaa gbarashuun wu bu doro, na co caŋa gbarataanri wogo ki na, saraya ɲaha shɔɔnrivɛɛ pu na ba yi wo saraya nizogoyo ye, ni yi wo ɲaɲiŋɛ saraya yi wo saraya yi tawologo ki na. Lee funŋɔ ni nɛ ma sɔɔ yi na. Kafɔɔ Tɛhɛnɛ Baa Kilɛ ɲɔjomɔ pi.› »