Kilɛ-pɛɛŋɛ pugbɔhɔ ki wo kabanugo piyɛyɛ ye
42
Ayiwa lee kadugo na, a ná wu gari ni nɛ ni kpɛɛngɛ ki wo kaaŋa ki yíri, suumɔ kulo kacɛ ki na. Piyɛyɛ ye yi bye wà laraga ki ɲahagbaa na, na saha ni Kilɛ-pɛɛŋɛ pugbɔhɔ ki ni, suumɔ kulo kacɛ ki na ge, a wu gari yee yíri ni nɛ ni. 2 Kee pukuugo ki kabaŋa kemu kʼa ɲaha tagi suumɔ kulo kacɛ ki na ge, kee wo ɲidaa li bye keŋɛ ɲìi xhuu nigin (100), ki kadaa lʼi ɲɛ keŋɛ ɲìi kɛlɛɛ kaguro (50)a. 3 Kabanugo ka na, ki bi ɲaha tagi Kilɛ-pɛɛŋɛ pugbɔhɔ ki wo kpɛɛngɛ ki yíri, kee kemu wo kadaa li ɲɛ keŋɛ ɲìi kɛlɛɛ shuun (20), ki dʼa Kilɛ-pɛɛŋɛ pugbɔhɔ ki maha círi ge. Kabanugo ka bɛ na, ki bi ɲaha tagi kpɛɛngɛ ki wo kaaŋa ki wo daalaa pu yíri. Tatoroyo yi bye yʼi, na yi tahala tahala yiyɛ ɲuɲɔ na, zangaso pukuuyo taanri wu na. 4 Tatorogo ka bye piyɛyɛ yi ɲahagbaa li na, na kari funŋɔ ki wo kaaŋa ki yíri, kee wo kadaa li bye keŋɛ ɲìi kɛ, ki ɲidaa lʼi ɲɛ keŋɛ ɲìi xhuu nigin (100). Yee piyɛyɛ yi wo tajege ki bye suumɔ kulo kacɛ ki na. 5 Fugba wu wo pukuugo ki wo piyɛyɛ yi bi cɛ́rɛ na foro nɔhɔdaan wo pukuugo ke, ni niŋɛ ki wo pukuugo ki wo piyɛyɛ yi ni, bani tatorogo ki bi la kɔn wolo fugba wo pukuugo ki wo piyɛyɛ yi ni. 6 Zangaso pukuuyo taanri yi bye yee piyɛyɛ ye. Ga benɛɛ bi ta pye yi na ba kaaŋa ki wo piyɛyɛ yisaya ɲɛ wɛ. Ba mʼa duri na se fugba wu ni wɛ, piyɛyɛ yi ma ganha na jɛrɛŋɛ na se. 7 Kasɔrɔgɔ kemu ki bye piyɛyɛ yi ɲahagbaa li na, kpɛɛngɛ ki wo kaaŋa ki yíri wu ni ge, kee wo ɲidaa li bye keŋɛ ɲìi kɛlɛɛ kaguro (50), 8 bani pukuuyo yi bɛ wo ɲidaa li bye keŋɛ ɲìi kɛlɛɛ kaguro (50). Ga na shɛ Kilɛ-pɛɛŋɛ pugbɔhɔ ki yíri wu ni, yi ɲidaa li bye wà keŋɛ ɲìi xhuu nigin (100). 9 Yee piyɛyɛ yi nɔhɔdaan wu ni, Kilɛ-nɔhɔ kacɛ ki na, tajege ka bye wà, piimu bu yìri kpɛɛngɛ ki wo kaaŋa ki yíri wu ni, pee na já jé wà. 10 Xuu wemu ni kaaŋa ki wo kasɔrɔgɔ kʼa ɲɔ kɔn ge, wee xuu wu ni kee tajege ki bye. Piyɛyɛ ya bye woroo kulo kacɛ ki bɛ na, na ɲaha tagi laraga ke, ni piyɛyɛ yi yíri, Kilɛ-pɛɛŋɛ pugbɔhɔ ki kadugo yíri wu ni. 11 Tatorogo ka bye yee piyɛyɛ yi ɲahagbaa li na. Yee piyɛyɛ yi bye ba suumɔ kulo kacɛ ki wo piyɛyɛ yi ɲɛ wɛ. Yi ɲidaa le, ni yi kadaa le, ni suumɔ kulo kacɛ ki wo piyɛyɛ yi wo ɲidaa le, ni yi kadaa li bye nigin. Yi tajeye ye, ni yi singaŋaa kee, ni yi taforoyo yi bɛɛri bye nigin. 12 Piyɛyɛ yi tajeye yemu yi wa woroo kulo kacɛ ki bɛ na ge, yee bɛ bye nigin. Tatorogo kemu ki bye Kilɛ-nɔhɔ wo kasɔrɔgɔ ki ɲahagbaa li na ge, tajege ka bye wee xuu wu bɛ ni, tatorogo ki tasiige ki ni. Kee tajege ke ni sipyiire ti bi jin. 13 A ná wu nɛ pye: «Suumɔ kulo kacɛ ki wo piyɛyɛ ye, ni woroo kulo kacɛ ki wo piyɛyɛ ye, yee yemu yi wa laraga ki ɲahatiimɛ pu ni ge, yee ya yaha Tɛhɛnɛ Baa Kilɛ yahama ni. Saraya ɲaha shɔɔnrivɛɛ piimu pʼa saraya yi wo Tɛhɛnɛ Baa Kilɛ ɲaha tàan ge, wà pee wa da ba pu wo fɛfɛɛrɛ ti bɛɛri wo fɛfɛɛrɛ yaligee ki li. Yaŋmuyɔ yemu yi ɲɛ fɛfɛɛrɛ ti bɛɛri wo fɛfɛɛrɛ woyo ge, pu na ba yee yɛri wà: Shinma wo saraya ye, ni jurumu yafa wo saraya ye, ni yaaŋa ki wo saraya ye. Fɛfɛɛrɛ xuu wu ɲɛ wee xuu we. 14 Saraya ɲaha shɔɔnrivɛɛ pu ba jé fɛfɛɛrɛ xuu wu ni, pu ya yaa pu yìri wà, pʼi foro kari kpɛɛngɛ ki wo kaaŋa ki ni, na ta pu ya pu labye wu wo fàya yi wolo yaha wee xuu wu ni wɛ, bani fɛfɛɛrɛ woyo yi ɲɛ yee fàya ye. Fàya yatii pʼa yaa na le, na da foro kari sipyiire ti yíri.»Kilɛ-pɛɛŋɛ pugbɔhɔ ki wo kasɔrɔgɔ ke
15 Ayiwa, ba ná wʼa Kilɛ-pɛɛŋɛ pugbɔhɔ ki funŋɔ ki taanna xɔ wɛ, a wu nɛ yeege Kilɛ-nɔhɔ ki wo tajege ki ni. A wu ɲɔ kɔn na Kilɛ-pɛɛŋɛ pugbɔhɔ ki maha maha kasɔrɔgɔ ki taanna. 16 A wu Kilɛ-nɔhɔ kacɛ ki taanna ni wu daanna kagaan li ni, a kee di bye daanna kagaan li ɲìi xhuu kaguro (500). 17 A wu suumɔ kulo kacɛ ki taanna, a kee di bye daanna kagaan li ɲìi xhuu kaguro (500). 18 A wu woroo kulo kacɛ ki taanna, a kee di bye daanna kagaan li ɲìi xhuu kaguro (500). 19 A wu ŋmahana ɲɛri caŋatomɔ kacɛ ki bɛ na, na kee bɛ taanna, a kee bɛ di bɛ ni daanna kagaan li ɲìi xhuu kaguro (500) ni. 20 Lee kadugo na, a wu Kilɛ-pɛɛŋɛ pugbɔhɔ ki maha maha kasɔrɔgɔ ki kabanuyo shishɛɛrɛ wu bɛɛri taanna. Ki ɲidaa li bye daanna kagaan li ɲìi xhuu kaguro (500), ki kadaa li bɛ di ɲɛ daanna kagaan li ɲìi xhuu kaguro (500). Kee kasɔrɔgɔ ke ki bi fɛfɛɛrɛ xuu we ni sipyiire ti wo takaraga ki waa laha yiyɛ na.